Musiqi ilə sözün əbədiyaşarlığı
O gün elə bil ulduzlar yerə
köçmüşdü. Şamların alovları ulduz
işığını andırırdı. Bu ulduz
yağışı altında aydın fikirli,
işıqlı düşüncə və dərrakəyə
malik yüksək səviyyəli Azərbaycan ziyalıları
bir məkana — Rəşid Behbudov adına Dövlət
Mahnı Teatrına yığışmışdılar. Bu dəyərli
insanları — elm və sənət adamlarını, millət
vəkillərini və söz xiridarlarını bu məkana
bir məqsəd toplamışdı: Ciddi sənət və sənətkar
haqqında duyğularını zaman-zaman kağıza
köçürən, onları hər kəsə yaxından
tanıdan, UNİSEF və “Qızıl qələm”
mükafatları laureatı Rafiq Salmanovun yenicə çapdan
çıxmış “Mənim könlüm deyir ki...”
kitabının təqdimatına və 60 illik zəhmətkeş
ömür yolunun yubiley təntənəsinə şahidlik
etmək.
Rafiq Salmanov imzası
oxuculara yaxından tanışdır və bu imzanı görən
kəs mütləq həmin ad altında ünlü,
tanınan və unudulmaqda olan korifey sənət adamları
haqqında, müasir və dünyadan köçmüş sənətkarlar
haqqında şirin dillə yazılmış mükəmməl
bioqrafiya ilə tanış olurlar. O uzun illərdən bəridir
ki, “Xalq qəzeti”nin səhifələrində xalq musiqimizə,
ifaçılıq sənətinə, həm də bir
musiqiçi kimi dərindən bələd olaraq
ayrı-ayrı sənət adamlarının
yaradıcılıq simasını ən əlamətdar
cizgiləri ilə canlandıraraq onların dolğun sənət
portretini yaradır və böyük məhəbbətlə
təqdim edir. Və bu gün təqdimatı keçirilən
“Mənim könlüm deyir ki...” kitabında toplanan məqalələr
müxtəlif vaxtlarda “Xalq qəzeti”ndə dərc
edilmişdir. Otuz beş çap vərəqi həcmində cəmi
1000 nüsxə tirajla nəşr edilmiş bu sanballı, həm
məna tutumu baxımından, həm də fiziki çəki
anlamında “ölçülü-biçili” və
ağır “çəkili” kitabın redaktoru İlham Abbasov
deyir ki, xalq musiqimizə, onun əvəzsiz
ifaçılarına həsr olunmuş bu yazılar müəllifin
yaradıcılıq diapazonundan soraq verməklə
yanaşı, həm də bu il şərəfli tarixinin 90
illiyini qeyd edən “Xalq qəzeti”nin milli-mənəvi dəyərlərimizə
necə böyük sayğı ilə yanaşmasının,
mədəni irsimizin qorunması naminə gördüyü
işlərin göstəricisidir”. Kitabdakı bu yazılarda
incəsənət həyatımızın on illəri əhatə
edən mənzərəsi canlanır və bu yazıların
hər birində zamanın silinməz möhürü var — həm
yazıldığı günün, həm də sənətkarların
ömrünü əhatə edən illərin. Bu yazılar qələmə
alınanda Fatma Mehrəliyeva, İslam Rzayev, Sərvər
İbrahimov, Əliağa Quliyev, Mais Salmanov kimi sənətkarlarımız
hələ həyatda idilər və onların bir insan kimi bu
gün və sabah yaşamalarında Rafiq müəllimin
mükəmməl qələmindən çıxan
yazıların müstəsna əhəmiyyəti var.
Kitabda toplanmış
oçerk portret, müsahibə və müxbir qeydləri
bütövlükdə professional musiqi
ifaçılarımızın dünəni, bugünü və
sabahı barədə əhatəli sənədli əsər
təsiri bağışlayan bir topludur.
...Aprelin 20-də “Xalq qəzeti”nin
əməkdaşları axşam düzənlənən təntənəyə
hazırlaşarkən eşitdiyimiz xəbər
hamımızı sarsıtdı. “Rafiq müəllim
reanimasiyadadır”. Hamının əhvalı dəyişdi. 4
saylı şəhər klinik xəstəxanasına tələsən
kim, əlini dəstəyə atıb gözəl ziyalı
olan baş həkim Fikrət Zeynalovla əlaqə saxlayan kim...
Böyük yaradan sevdiklərini zaman-zaman sınağa çəkir
və Rafiq müəllimi növbəti sınaqdan böyük
mərhəmətilə çıxardı və
yaxşı ki, arzuedilən toplantı elə yubilyarın istədiyi
şəkildə düzənləndi.
Romantik, duyğulu
ab-havaya köklənmiş tədbirdə xalq artistlərimiz
ustad xanəndə Əlibaba Məmmədovun, professor Arif
Babayevin, Canəli Əkbərovun, Flora Kərimovanın, tarzən
Ramiz Quliyevin çıxış və ifaları, təbrikləri
Rafiq müəllimə minnətdarlıq notları ilə
köklənmişdi. Bu dəyərli kitaba ön söz yazan
Milli Konservatoriyanın rektoru, professor, xalq artisti Səyavuş
Kəriminin təbriki isə professional musiqi xadiminin
yubilyarın yaradıcılığına və bu
yaradıcılığın üzdə olmasında əməyi
olan “Xalq qəzeti”nə dəyərli qiyməti oldu.
“...Yazıları və
kitabları Rafiq Salmanovu geniş oxucu kütləsinə daim
axtarışda olan jurnalist, milli musiqimizin tarixinə, peşəkarlıq
məsələlərinə, tanınmış simalarına
yaxşı bələd olan musiqiçi, həm də incə,
parlaq çalarları ilə seçilən fotoportret
ustası kimi tanıdıb. Heydər Əliyev Fondunun himayəsi
ilə keçirilən respublika muğam müsabiqəsinə
verdiyi jurnalist dəstəyi, “Xalq qəzeti”ndə dərc etdirdiyi
silsilə yazılar isə ona böyük nüfuz və
ehtiram qazandırdı”.
Məhz bu nüfuzun və
hörmət-izzətin işığına toplaşan dəyərli
ziyalılar Rafiq müəllimin sənətkarlara verdiyi diqqət,
dəyər və önəm qədər də yubileyi ilə
bağlı çıxışlarında onun fəaliyyətinə
önəm və dəyər verdilər. Bu münasibətləri
yaradanlar arasında isə “Xalq qəzeti”nin baş redaktoru Həsən
Həsənovu öncüllər sırasında
gördüklərini söylədilər. İstər Milli Məclisin
deputatları Miri Qənbərov və Vahid Əhmədov, istər
akademik Vasim Məmmədəliyev və istərsə də
digər çıxış edənlər Rafiq Salmanovun
araya-ərsəyə gətirdiyi bu dəyərli kitabın
işıq üzü görməsində “Xalq qəzeti”nin və
onun baş redaktoru Həsən Həsənovun böyük əməyini
qeyd etdilər. Kitabın nəşrinə maliyyə dəstəyi
göstərmiş, Azərbaycan incəsənətinin
yaxın dostu Tağı Əhmədova təşəkkür
eşidiləndə çıxışlarda, Azərbaycan mədəniyyətinin,
sənət və ədəbiyyatının gələcək
nəsillərə çatdırılmasında, əbədiyaşarlıq
qazanmasında təməl olan bu cür xeyirxah işlərin və
xeyirxahların sıralarının daha çox
artmasını arzuladılar.
Bakı Metropoliteninin rəisi
Tağı Əhmədov, xalq şairi Zəlimxan Yaqub,“Xalq qəzeti”nin
baş redaktoru Həsən Həsənov, xalq artisti Flora Kərimova,
Nazpəri Dostəliyeva öz çıxışlarında
Rafiq Salmanovun yeni kitabı haqqında dəyərli fikirlər
söylədilər və onu mədəniyyət və incəsənətin
yorulmaz təbliğatçısı adlandırdılar. Xalq
artistləri Brilyant Dadaşova, Mələkxanım Əyyubova,
Mətanət İsgəndərli, əməkdar artist
Gülüstan Əliyeva, “Muğam—2005”in televiziya müsabiqəsinin
qalibləri İlkin Əhmədov, Aytən Məhərrəmova,
Sevda Nurəliyeva, skripkaçı Səlim, gitara ustası Rəhman,
Əbilov adına mədəniyyət evinin bədii rəhbəri
Mirəhməd Əsgərov,digər Rafiqsevər
musiqiçilər yubilyarı bir şəxsiyyət kimi dəyərləndirərək,
bu kitabı gərəkli mənbə adlandırdılar.
Tədbirdə 60 illik
yubileyi münasibətilə Rafiq Salmanova Mədəniyyət
və Turizm Nazirliyinin Fəxri Fərmanını nazirliyin
bölmə müdiri Lətifə Məmmədova təqdim
etdi.
“Xalq qəzeti”nin bir sıra əməkdaşları, ailə üzvləri, dostları və onu sevən musiqiçilərin iştirak etdiyi bu təntənəli gecəni Rafiq müəllimin 60 illik ömrünün sənətsevər oxuculara yaradıcılıq hesabatı da adlandırmaq olar. Bu kitab hamımızı inandırır ki, musiqi ilə sözün vəhdətindən yaranan əbədiyaşarlıq xalqımızın dilini, musiqisini yaşadır, ölməz edir.
Kitabın önəm veriləsi məziyyətlərindən biri də budur ki, müəllif yaşlı nəsli təmsil edən Qulu Əsgərov, Əhəd Əliyev (kor Əhəd) Mübubət Məmmədova və digərləri ilə birgə orta nəsil musiqiçilərinə — Ağadadaş Ağayev, Nisə Qasımova, Zaur Rzayev, Zamiq Əliyev, Razi Şükürov, Səfa Qəhrəmanov və başqalarına, bunlarla yanaşı isə gənc ifaçılara da geniş yer verib. Bu ifaçıları milli musiqimizin parlaq sabahına ümid yaradan gənclər kimi göstərib.
Milli mətbuatımızın fədakar və zəhmətkeş nümayəndələrindən olan, yazıları ilə özünü təsdiqləmiş Rafiq Salmanovun sayca 3-cü olan “Mənim könlüm deyir ki” kitabı onun könlündəkilərinin hələ hamısı deyil. Yazıb-yaratmaq arzusu böyük olan yubilyara yeni uğurlar arzulayırıq.
Zərifə BƏŞİRQIZI
Xalq qəzeti.- 2010.- 24 aprel.- S. 8.