Özbəkistanda Azərbaycan kinosu həftəsi uğurla keçmişdir

Azərbaycanla Özbəkistan arasında mədəni əlaqələr genişlənməkdədir. Bu yaxınlarda Özbəkistanda keçirilən Azərbaycan kinosu həftəsi bu sahədə əməkdaşlığın davamıdır. Tədbirdə Azərbaycan kinematoqrafçılarını respublikanın xalq artisti Rafiq Əliyev, rejissorlar Mehriban Ələkbərzadə, Samir Kərimov və Mədəniyyət və Turizm Nazirliyinin əməkdaşı Almaz Sultanzadə təmsil edirdi. Bu barədə nazirliyin mətbuat xidməti məlumat yaymışdır.

Açılış mərasimi Əlişir Nəvai adına Kino sarayında baş tutmuşdur. 500 nəfərlik tamaşa zalında “Özbəkkino” Milli Agentliyin rəhbərliyi, dövlət xadimləri, kino sənətkarları, yaradıcı ziyalılar, şəhər ictimaiyyəti və Azərbaycan diasporunun tanınmış nümayəndələri iştirak etdi. “Özbəkkino”nun baş direktoru Aqzam İsxakov tədbiri açıq elan etdi. Bizim tərəfdən Azərbaycan səfirliyinin müşaviri Akif Əliyev və Mədəniyyət və Turizm Nazirliyinin əməkdaşı Almaz Sultanzadə çıxış etmişlər. Mədəniyyət və turizm naziri adından “Özbəkkino” Milli Agentliyinə Azərbaycan xalçası, bizim filmləri özbək dilinə dublyaj etmiş özbək kino xadimlərinə hədiyyələr təqdim olunmuşdur. Sonda nümayiş etdirilən “Hökmdarın taleyi” bədii filmi tamaşaçıların böyük marağına səbəb olmuşdur. Həmin gün Kino sarayının foyesində Azərbaycan səfirliyinin təşkil etdiyi “İki xalqın oğlu” başlığı altında kino və teatr rəssamı Yusif Hüseynovun rəsmləri və “Azərbaycan kinosu: dünən və bu gün” adlı fotosərgi nümayiş etdirilmişdir.

Ümumiyyətlə, Kino həftəsi ərzində 3 bədii film – “Hökmdarın taleyi”, “Məhkumlar”, “Niyyət”, 2 sənədli film –“Azərbaycan motivləri”, “İz...Qala”, 2 qısametrajlı film – “Bir addım”, “Düyün” və 2 cizgi filmi – “Mərhəmətin dadı” və “Nuş olsun” 4 kinoteatrda nümayiş olunmuşdur.

Nümayəndə heyəti Nizami adına Daşkənd Dövlət Pedaqoji Universitetində, Daşkənd Dövlət İncəsənət Universitetində, “Özbəkfilm” kinostudiyasında, Beynəlmiləl Mədəniyyət Mərkəzində təşkil olunmuş görüşlərdə iştirak etmişdir. Həftənin tədbirləri Səmərqənd şəhərinə “Niyyət” filminin premyerası və bir sıra görüşlərlə davam etmişdir.

Azərbaycan kinosu həftəsi Özbəkistanın bütün kütləvi informasiya vasitələrində təfsilatı ilə işıqlandırılmışdır.

Aprelin 23-də “Özbəkkino” Milli Agentliyində təşkil olunan brifinqdə Azərbaycan kinosu həftəsinin yekunları KİV nümayəndələrinin iştirakı ilə müzakirə olunmuş və bu əlaqələrin gələcəkdə inkişaf etdirilməsi barədə təkliflər söylənilmişdir.

Özbəkistanda Azərbaycan kinematoqrafçılarına bir çox hədiyyələr verilmişdir ki, onlar gələcəkdə Azərbaycan Dövlət Film Fondunun Kino muzeyində “Özbəkistanda Azərbaycan kinosu həftəsi” bölməsində sərgilənəcəkdir.

Azərbaycanda cavab tədbirin bu ilin sentyabr-oktyabr aylarında keçirilməsi planlaşdırılmışdır.

M.MÜKƏRRƏMOĞLU

Xalq qəzeti.- 2010.- 30 aprel.- S. 8.