Türkiyədən daha bir sevgi ərməğanı...

 

Bu günlərdə Dövlət Opera Balet Teatrında Azərbaycan milli rəqslərindən ibarət möhtəşəm konsert proqramı sənətsevərlərə təqdim edildi. "Ortaq miras"adlanan bu təntənəli gecənin təşəbbüskarları da, bir-birindən gözəl milli rəqslərimizi peşəkarlıqla ifa edənlər Türkiyəli qardaşlarımız idi. İstanbul Teknik Universiteti tərəfindən dəstəklənən Türk Musiqisi Dövlət Konservatoriyasının Türk Xalq Oyunları bölümü tərəfindən hazırlanan layihə ilə çıxış edən türkiyəli qonaqların da dediyi kimi, əsrlərlə ömrü olan bu möhtəşəm mədəni irsi qorumaq,yaşatmaq, yeni nəsillərə ötürmək kimi müqəddəs missiyanı yerinə yetirirdi.

Azərbaycanın Türkiyənin dövlət himninin səslənməsiylə yekunlaşan rəsmi hissədən sonra Azərbaycan milli rəqslərinin tarixini əks etdirən videoçarx salona toplaşan həm yerli, həm Turkiyədən gəlmiş qonaqlar tərəfindən alqışlarla qarşılandı. Sonra isə konsert başladı. Canlı orkestr dirijor Oğuzxan Balçının rəhbərliyi ilə öncə Hammamzadə İsmail Dədə Əfəndidən həzin bir melodiya daha sonra isə Azərbaycan rəqs musiqilərini tamaşaçılara təqdim etdi. "Süzən qızlar", "Şəki rəqsi", "Qarabağ yallısı'', "Bu Leyli", "Çobanlar'', "İğidlər", "Nağaraçılar" kimi rəqslərimiz türk rəqqasların ifasında böyük heyranlıqla izlənildi.

Əslində, peşəkar yox, həvəskar olan, aralarında yaşı əllini keçən insanların da olduğu bu rəqqaslar milli rəqslərimizi peşəkarlardan heç pis ifa etmədilər. Ən maraqlısı isə bu idi ki, o insanların əksəriyyəti Türkiyədə sayılıb seçilən adamları idi. Layihənin Bakı koordinatoru, əslən azərbaycanlı olan tanınmış adamı Kamil Salduz da rəqqasların arasında idi.

Konsert proqramı başa çatdıqdan sonra türkiyəli qonaqlar ömrünü milli rəqslərimizi yaşatmağa həsr etmiş qocaman Azərbaycan rəqqaslarına mükafatlar təqdim etdilər. Yüksək əhval-ruhiyyə, möhtəşəm alqışlarla bitən tədbir Türkiyə-Azərbaycan dostluğunun sarsılmaz olduğunu hər zaman yaşayaçağını bir daha sübut etdi.

 

Aida AYSA

 

Xalq qəzeti.-2010.-16 dekabr.-S.7.