Ədalətli və düzgün seçim

Dövlətimizin başçısının mətbuatın və azad sözün inkişafına böyük qayğısı qədirbilənliklə etiraf olundu

Azərbaycanın böyük tarixi var. Bu böyük tarixə nəzər salsaq, görərik ki, heç vaxt Azərbaycanda söz bu qədər azad olmayıbdır, fikir bu qədər azad olmayıbdır, mətbuat bu qədər azad olmayıbdır.

Heydər ƏLİYEV Ümummilli lider

Dekabrın 1-dən 20-nə kimi "RUH" Azərbaycan Jurnalistləri Müdafiə Komitəsi 2010-cu ildə "Jurnalistlərin dostu" mükafatı qalibinin müəyyənləşdirilməsi ilə bağlı kütləvi informasiya vasitələri və jurnalist təşkilatları arasında sorğu keçirilmişdir. Sorğuda 30 gündəlik, 19 həftəlik qəzet, 2 jurnal, 11 informasiya agentliyi, 13 jurnalist təşkilatı, 8 informasiya portalı, 7 televiziya və 3 radio kanalı, ümumilikdə 93 kütləvi informasiya vasitəsi iştirak edib. Mükafatın əsasnaməsinə uyğun olaraq gündəlik qəzetlərə, televiziya kanallarına və informasiya agentliklərinə 2, digər kütləvi informasiya vasitələrinə və jurnalist təşkilatlarına bir anket təqdim olunub. Respondentlər "2010-cu ilin yekunlarına görə hansı ictimai-siyasi xadimi, vəzifəli şəxsi jurnalistlərin dostu hesab edirsiniz" sualına cavab verməli idilər.

Sorğuda iştirak edənlərin 81 faizi Azərbaycan Prezidenti İlham Əliyevi "Jurnalistlərin dostu" mükafatına ən layiqli namizəd hesab edib. Mükafatın əsasnaməsinə görə, kütləvi informasiya vasitələrinin inkişaf etdirilməsi sahəsində tutduğu vəzifəsindən asılı olmayaraq müstəsna xidmətləri olan şəxslər mükafatın laureatı ola bilərlər.

Qeyd edək ki, bu mükafat ilk dəfə 1997-ci ildə təsis edilmişdir. Əsas məqsəd cəmiyyətdə söz və məlumat azadlığı prinsiplərini inkişaf etdirmək, kütləvi informasiya vasitələri ilə dövlət orqanları, özəl qurumlar, ictimai birliklər və siyasi partiyalar arasında əlaqələrin möhkəmləndirilməsinə köməklik göstərmək və mətbuata qayğı ənənələrini stimullaşdırmaqdır. Sonuncu dəfə 2002-ci ildə ümummilli lider Heydər Əliyevə təqdim edilən "Jurnalistlərin dostu" mükafatının 8 ildən sonra bu böyük tarixi şəxsiyyətin siyasi kursunun ən layiqli davamçısı Azərbaycan Prezidenti İlham Əliyevə verilməsi heç də təsadüfi xarakter daşımır.

İlham Əliyev prezidentlik fəaliyyətinə başladıqdan sonra kütləvi informasiya vasitələrinə dövlət qayğısı keyfiyyətcə yeni mərhələyə qədəm qoydu. Müstəqil dövlətimizin ictimai-siyasi, sosial-iqtisadi həyatında demokratik dəyərlər daha geniş şəkildə bərqərar olunduqca söz və mətbuat azadlığının qanunvericilik bazası bir o qədər möhkəmləndi. Möhtərəm Prezidentimizin rəhbərliyi altında həyata keçirilən mühüm əhəmiyyətli tədbirlər nəticəsində kütləvi informasiya vasitələrinin daha da demokratikləşməsi istiqamətində qətiyyətli addımlar atıldı. Ölkədə söz və mətbuat azadlığına jurnalistəlrin öz iradələrini azad şəkildə ifadə etmələrinə əlverişli şərait yaradıldı. Azərbaycan Prezidentinin 2005-ci il 21 iyul tarixli "Azərbaycan mətbuat işçilərinin təltif edilməsi", "Azərbaycan mətbuat işçilərinə fəxri adların verilməsi haqqındə", həmçinin "Kütləvi informasiya vasitələrinə maliyyə yardımı göstərilməsi haqqında" sərəncamlarında jurnalistələrin əməyinə yüksək qiymət verilməsi və onların problemlərinin aradan qaldırılmasının dövlətin diqqət mərkəzində saxlanılması bir daha öz əksini tapdı. Azərbaycan mətbuatının əsasının qoyulmasının 130 illik yubileyinin bütün bölgələrdə təntənəli şəkildə qeyd edilməsi, jurnalistlərə fəxri adların, mətbuat sahəsində uzun illər çalışanlara Prezident təqaüdünün verilməsi dövlət başçısının mətbuata göstərdiyi qayğının təzahürüdür. Ulu öndər Heydər Əliyevin söz və mətbuat azadlığının demokratik dəyərlər çərçivəsində inkişafını layiqincə davam etdirən möhtərəm Prezident İlham Əliyev mətbuatın maddi-texniki və maliyyə bazasının möhkəmləndirilməsi istiqamətində də mühüm sərəncamlar imzalamışdır. 2006-cı il fevralın 8-də imzalanmış "Qəzetlərin "Azərbaycan" nəşriyyatına olan borclarının ödənilməsi barədə sərəncamı diqqətə çatdırmaq istərdik. Bu tarixi sənədə əsasən kütləvi informasiya vasitələrinin "Azərbaycan" nəşriyyatına olan 450 min ABŞ dolları məbləğindəki borcu dövlət büdcəsindən ödənilmişdir. Qürurla qeyd etmək lazımdır ki, qəzetlər arasında ayrıseçkiliyə yol verilməmişdir.

Çünki "Azərbaycan" nəşriyyatına borcları ödənilən qəzetlər sırasında müstəqil və müxalifətyönümlü qəzetlər çoxluq təşkil etmişdir. Baxmayaraq ki, bəzi müxalifətyönümlü qəzetlər Azərbaycanın son illər siyasi-iqtisadi və mədəni sahələrdə qazandığı uğurlara qısqanclıqla yanaşır, ölkəmizin xarici siyasət sahəsində əldə etdiyi nailliyyətlərə və beynəlxalq miqyasda yüksək qiymətləndirilən demokratik seçkilərin nəticələrinə kölgə salmağa çalışır, həmin qəzetlərin də nəşriyyata olan borcları dövlət büdcəsi hesabına ödənilmişdir.

Ulu öndərin ideyalarını ləyaqətlə davam etdirən möhtərəm Prezidentimiz İlham Əliyev mətbuata göstərilən dövlət qayğısını daim diqqətdə saxlamışdır və bu sahədə bir-birinin ardınca mühüm əhəmiyyətli sərəncamlar imzalamışdır. 2008-ci il 31 iyul tarixli "Azərbaycan Respublikasında kütləvi informasiya vasitələrinə birdəfəlik maliyyə yardımı göstərilməsi haqqında", həmçinin "Azərbaycan Respublikasında kütləvi informasiya vasitələrinin inkişafına dövlət dəstəyi konsepsiyasının təsdiq edilməsi haqqında" sərəncamlar milli mətbuatın problemlərinin həllində keyfiyyətcə yeni mərhələnin əsasını qoydu. Mətbuata dövlət dəstəyi konsepsiyası kütləvi informasiya vasitələrinin maddi-texniki bazasının gücləndirilməsində, vətəndaş cəmiyyəti quruculuğunda və jurnalistlərin maddi rifah halının yaxşılaşdırılmasında böyük rol oynadı. Bunun ardınca möhtərəm Prezidentimiz İlham Əliyev 2009-cu il 3 aprel tarixində "Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması haqqında" sərəncam imzaladı. Bununla da jurnalistlərin problemlərinin aradan qaldırılması istiqamətində daha bir qətiyyətli addım atıldı. Qeyd edək ki, fond fəaliyyət göstərdiyi müddətdə kütləvi informasiya vasitələrinə, agentliklərə və jurnalistlərə birdəfəlik maddi yardım göstərir, mütəmadi olaraq müxtəlif mövzularda müsabiqələr təşkil edir, qaliblərə pul mükafatları verilir. Dövlətimizin başçısı milli mətbuatımızın inkişafına davamlı dəstəyin təmin edilməsi və mətbuat işçilərinin sosial müdafiəsinin gücləndirilməsi işini davam etdirmişdir. Zəngin tarixi ənənələrə malik Azərbaycan milli mətbuatının müstəqil dövlət quruculuğuna və inkişafına, habelə milli-mənəvi dəyərlərimizin qorunmasına mühüm töhfələr verməsi möhtərəm Prezidentimizin diqqətindən bir an olsun kənarda qalmamışdır. Məhz bunun nəticəsi olaraq Prezident İlham Əliyev Azərbaycan milli mətbuatının 135 illiyi ilə əlaqədar 2010-cu il 21 və 22 iyul tarixlərində bir-birinin ardınca iki sərəncam imzalamışdır. "Azərbaycan milli mətbuatının 135 illiyi ilə əlaqədar tədbirlərin maliyyələşdirilməsi və Azərbaycan Respublikasının kütləvi informasiya vasitələrinə birdəfəlik maliyyə yardımının göstərilməsi haqqında" sərəncama əsasən, 32 qəzet redaksiyasının hər birinə 20 min manat, 8 informasiya agentliyinin hər birinə 10 min manat birdəfəlik maliyyə yardımı ayrılmışdır. Bununla yanaşı, milli mətbuatımızın 135 illiyi ilə əlaqədar tədbirlərin keçirilməsi üçün Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna 280 min manat məbləğində birdəfəlik maliyyə yardımı edilmişdir. Ümumiyyətlə, milli mətbuatımızın 135 illiyinin təntənəli şəkildə qeyd edilməsi üçün Azərbaycan Respublikasının 2010-cu ilin dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan 1 milyon manat məbləğində vəsait ayrılmışdır. Mətbuat işçilərinin qarşılaşdıqları problemlərin mütəmadi olaraq aradan qaldırılması istiqamətində dövlət başçımızın həyata keçirdiyi mühüm əhəmiyyətli tədbirlər də yüksək qiymətə layiqdir. Azərbaycan Prezidentinin bu məqsədlə imzaladığı 22 iyul 2010-cu il tarixli "Azərbaycan mətbuat işçilərinin sosial-müdafiəsinin gücləndirilməsi tədbirləri haqqında" sərəncamı təkcə ölkəmizdə deyil, beynəlxalq aləmdə də yüksək qiymətləndirilmişdir. Çünki bu vaxta qədər heç bir ölkədə jurnalistlər dövlət vəsaiti hesabına tikilən mənzillə təmin olunmayıb, Azərbaycanda isə mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədi ilə 2010-cu il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna 5 milyon manat vəsait ayrılmışdır. Bütün bunlar bir daha təsdiqləyir ki, ümummilli lider Heydər Əliyevin siyasi kursu bu gün müvəffəqiyyətlə həyata keçirilir. Bunun nəticəsidir ki, milli mətbuatımız daim dövlətin diqqət və qayğısı ilə əhatə olunmuş, söz və mətbuat azadlığının inkişaf etdirilməsi və maddi-texniki bazasının gücləndirilməsi istiqamətində ardıcıl tədbirlər həyata keçirilir.

Azərbaycan milli mətbuatının 135 illik yubileyi günündə Mətbuat Şurasının hər cür şəraitə malik və müasir avadanlıqlarla təmin olunmuş binasının açılış mərasiminin keçirilməsi və Azərbaycan Prezidentinin həmin tədbirdə iştirakı mətbuata göstərilən dövlət qayğısının bariz nümunəsidir. Bu gün yüzlərlə jurnalistin müxtəlif dövlət təltiflərinə, "Əməkdar jurnalist" fəxri adına layiq görülməsi ölkəmizdə jurnalistlərə göstərilən qayğının davam etdirilməsindən xəbər verir. Qeyd etmək istərdik ki, ölkəmizdə fikir, söz və mətbuat azadlığı dövlət başçısı İlham Əliyevin siyasi kursunun və qazanılan demokratik nailiyyətlərin mühüm tərkib hissəsidir. Azərbaycanın kütləvi informasiya vasitələrində çalışan hər bir əməkdaş bunu dərk edir və yüksək dəyərləndirir.

"Jurnalistlərin dostu" mükafatı qalibinin müəyyənləşdirilməsi ilə bağlı kütləvi informasiya vasitələri və jurnalist təşkilatları arasında sorğu keçirilən zaman təbii ki, respondentlər bu məqamları diqqətdən qaçırmamalı idilər və qaçırmadılar da. Çünki son 7 ildə Azərbaycanda müstəqil mətbuatın demokratik prinsiplər əsasında inkişafına və kütləvi informasiya vasitələrində çalışanların sosial müdafiəsinin möhkəmləndirilməsinə Prezident İlham Əliyev qədər qayğı göstərən ikinci bir şəxs yoxdur. Ona görə də jurnalistlər Azərbaycan Prezidenti İlham Əliyevi özlərinə ən yaxın dost seçdilər və "Jurnalistlərin dostu" mükafatının yalnız ona layiq olduğuna qərar verdilər.

Əliqismət BƏDƏLOV,

Rauf ƏLİYEV,

Xalq qəzeti.-2010.-26 dekabr.-S.1-2.