Türkiyə Dağlıq
Qarabağ münaqişəsinin həllində səylərini
artırır
Son vaxtlar Türkiyənin dövlət və hökumət
rəhbərləri, o cümlədən xarici işlər
naziri istər telefon danışıqlarında, istərsə
də dünya liderləri ilə görüşlərində
Dağlıq Qarabağ probleminin həlli məsələsini
daha qətiyyətlə dilə gətirir, bu sahədə
ciddi irəliləyişlərin olmasının vacibliyini
vurğulayırlar. Rəsmi Ankara münaqişənin həlli
ilə birbaşa məşğul olan ATƏT-in Minsk qrupunun fəaliyyətindən
də narazılığını açıq şəkildə
ifadə edir. Bütün bunlar göstərir ki,
dünyanın 16-cı ən güclü iqtisadiyyatına və
NATO-nun ikinci ən qüdrətli quru qoşunlarına sahib
olan Türkiyə Cənubi Qafqazla bağlı siyasətində
fəallığını artırıb. Bu siyasəti həyata
keçirərkən, məhz “Qafqazda Sabitlik və Əməkdaşlıq
Platforması”nın prinsiplərinə söykənir. Platformanın
əsas amalı isə regiondakı problemlərin kənar
müdaxilə olmadan bölgə ölkələrinin birgə
səyi ilə aradan qaldırılmasıdır.
Türkiyənin arqumentlərini
əsaslandırmaq ücün kifayət qədər
faktları var. Son günlər qardaş ölkənin Baş
naziri Rəcəb Tayyib Ərdoğanın bəyanatları bu
baxımdan diqqəti cəlb edir. Cənab Ərdoğan
bildirir ki, mühüm beynəlxalq təşkilat olan ATƏT-in
Minsk qrupu Cənubi Qafqazdakı ən təhlükəli və
eyni zamanda “uzunömürlü” münaqişə olan
Dağlıq Qarabağ probleminin həllində üzərinə
götürdüyü öhdəlikləri hələ də
yerinə yetirməyib. O deyib: “Minsk qrupunun həmsədrləri
olan Rusiya, Amerika, Fransa bu məsələdə daha fəal
olmalıdırlar. 20 ildir siz problemin həlli məsələsində
öz üzərinizə öhdəlik
götürürsünüz, ancaq 20 ildə ciddi mənada nəticə
əldə etməyibsiniz. Bunun əvəzində ortada nə
var? Son zamanlar Azərbaycan və Ermənistan liderləri daha
tez-tez görüşürlər. Bunun da faydalı olduğu
qənaətindəyik. Lakin istənilən halda əsas məsələ
nəticənin əldə olunmasıdır. Təəssüflər
olsun ki, nəticə hələ də əldə edilməyib”.
Türkiyənin Baş
nazirinin bu bəyanatları rəsmi Bakı tərəfindən
də dəstəklənir. Azərbaycan tərəfinin fikrincə,
sülh danışıqları prosesi süni şəkildə
uzadılır. Burada əsas günahkar tərəf isə Ermənistandır.
Azərbaycan Prezidenti Administrasiyasının xarici əlaqələr
şöbəsinin müdiri Novruz Məmmədovun fikrincə,
Minsk qrupunun həmsədrləri də artıq başa
düşürlər ki, onların cəhdləri heç bir
nəticə verməyib və bu, belə davam edə bilməz:
“Ərdoğanın fikri ilə razıyam. Həmsədrlər
səy göstərir. Bu səylər kifayətdirmi? Onlar 20
ildir gəlib gedirlər. Təkliflər verirlər. 20 il də
gəlsinlər. Əgər müəyyən bir nəticə
yoxdursa, onların özləri də, rəhbərləri də
düşünməlidir. Əgər münaqişənin həllində
ciddi irəliləyiş yoxdursa, onda hara gedirik? Dünyanın
200 dövləti də bunu izləyir. Dağlıq Qarabağ
münaqişəsinə dair ədalətli mövqedən
çıxış etməmək dünya üçün
də pisdir. Balaca bir Ermənistanın arxasında hansı
qüvvələr durur ki, Ermənistan belə mövqe
nümayiş etdirir? Əgər həmin qüvvələr
çəkilsə, Ermənistan Azərbaycanın
qarşısında diz çöküb yalvarar. Türkiyə
qarşısında yalvarar ki, sərhədləri
açın.” Novruz Məmmədov rəsmi İrəvanın
tez-tez mövqe dəyişməsinin Türkiyə - Ermənistan
arasında imzalanmış protokollarda da özünü
göstərdiyini deyib: “Ankara-İrəvan protokollarına dair
Ermənistan Konstitusiya Məhkəməsinin
çıxardığı qərar bir daha Ermənistanla
danışıqlarda rəsmi Bakının mövqeyinin
düzgün olduğunu göstərir.”
Azərbaycan Prezidenti Administrasiyasının xarici əlaqələr şöbəsinin müdirinin bu fikirləri gücləndirən hadisələr son vaxtlar daha da sürətlə inkişaf etməyə başlayıb. Məsələn, yayılan məlumatlardan da aydın olur ki, Azərbaycan Prezidenti cənab İlham Əliyevlə Ermənistanın dövlət başçısı Serj Sarkisiyan arasında baş tutan Soçi görüşündə rəsmi İrəvan yenidən mövqeyini sərtləşdirib. Bundan başqa, ABŞ Konqresinin xarici əlaqələr komissiyası bu il martın 4-də qondarma “erməni soyqırımı”nı müzakirəyə çıxarmaq barədə qərar qəbul edib. Təbii ki, bütün bunlar Ankaranın kəskin etirazlarına səbəb olur. Çünki bu, həm Azərbaycan - Ermənistan, həm də Türkiyə - Ermənistan danışıqlarında prosesin başlanğıc nöqtəsinə qayıtması deməkdir. Məhz buna işarə edən Türkiyənin xarici işlər naziri Əhməd Davudoğlu Almaniyanın Münxen şəhərində keçirilən 46-cı Təhlükəsizlik Konfransıdan qayıdarkən verdiyi bəyanatda deyib: “Amerika Konqresində baş verənləri bəlkə də kimlərsə təsadüf hesab edə bilər, ancaq biz belə düşünmürük. Son həftələrdə üç önəmli hadisənin ardıcıl olaraq baş verməsi bizi son dərəcə narahat edir. Öncə Ermənistan Anayasa Məhkəməsi imzaladığımız protokollara qəbul edə bilməyəcəyimiz şərtlər qoydu. Bunun ardınca Azərbaycan Prezidenti İlham Əliyevlə Ermənistanın dövlət başçısı Serj Sarkisiyan arasında Soçidə keçirilən görüşdə erməni tərəfi yenidən mövqeyini sərtləşdirdi. İndi isə Amerika Konqresinə məlum qanun layihəsi təqdim olunur. Biz bütün bunların ardıcıl olaraq eyni zaman çərçivəsində baş verməsinin təsadüf olmadığı qənaətindəyik. Nəyə görə qanun layihəsi məhz indi ABŞ Konqresinin gündəminə çıxarılır? Nəyə görə Ermənistan Anayasa Məhkəməsi, məsələn, ötən ilin noyabrında deyil, bu ilin yanvarında qərar qəbul etdi?”
Türkiyənin xarici işlər naziri Əhməd Davudoğlu bildirib ki, rəsmi Ankara ötən il avqustun 31-də protokolları imzalayacağını elan etdikdə, ona heç bir tərəf təzyiq göstərməmişdi. Bu gün kimsə hansısa vasitə ilə Türkiyəyə təzyiq göstərməyə çalışsa, onda prosesə zərbə vurmuş olacaq. Cənab Davudoğlu bəyan edib ki, rəsmi Ankara həmişə doğru hesab etdiyi siyasəti həyata keçirib. Bu, belə də davam edəcək: “Bu baxımdan bu qanun layihəsinin Konqresdə gündəmə gətirilməsi nə ABŞ-ın, nə Ermənistanın, nə də Türkiyənin mənafeyinə cavab verir. Bu proses ikitərəfli münasibətlərin korlanması ilə yanaşı, Türkiyə - Ermənistan arasında aparılan danışıqların da dalana dirənməsi ilə nəticələnəcək. Buna görə də bu məsələlərdə Vaşinqtonun daha da diqqətli olmasını gözləyirik.”
Türkiyənin xarici işlər nazirinin açıqlamalarından belə məlum olur ki, artıq beynəlxalq aləmdəki bəzi dairələr Ankaradan daha çox güzəşt qoparmaq üçün yenidən “erməni kartından” istifadə etməyə başlayıblar. Həmin dairələrsə, hər halda 1919-23-cü illərdə baş verən Qurtuluş Savaşını unudublar. Həmin illərdə Anadolu 5 nəhəng imperiya tərəfindən işğal edilmişdi. Belə bir vaxtda türk xalqı bütün çətinliklərə dözərək, düşmənə həddini bildirdi. Bu gün artıq dünya arenasında öz sözünü deyən qüdrətli Türkiyəni belə cılız siyasətlə diz çökdürmək mümkün deyil. Türkiyə regionun əsas dövlətlərindən biri, Azərbaycan isə Cənubi Qafqazın lider ölkəsidir. Bütün bunlara əsaslanaraq qətiyyətlə demək olar ki, Xocalı soyqırımı həqiqətini görməzdən gələrək, tarixin qaranlıq səhifəsində baş verənləri qondarma “erməni soyqırımı” adlandıranlar qaranlığa məhkum olacaqlar.
Rauf KƏNGƏRLİ
Xalq qəzeti.-2010.- 9 fevral.- S. 6.