Ötən ilin yekunları
Nərimanov rayonunda hesabat yığıncağı
keçirilmişdir
Dünən Bakı şəhəri Nərimanov Rayon
İcra Hakimiyyətində 2009-cu ildə rayonun sosial-iqtisadi
inkişafının yekunları və qarşıda duran vəzifələrə
həsr olunmuş hesabat yığıncağı keçirildi.
Tədbir iştirakçıları öncə müasir Azərbaycan
dövlətinin qurucusu, xalqımızın ümummilli lideri
Heydər Əliyevin rayon icra hakimiyyəti binasının
foyesindəki büstü önünə gül dəstələri
qoydular.
Rayonun sənaye, təhsil,
səhiyyə, mədəniyyət və digər təşkilatlarının,
hüquq-mühafizə orqanlarının, eləcə də
ictimaiyyət nümayəndələrinin iştirak etdikləri
yığıncağı Nərimanov Rayon İcra Hakimiyyətinin
başçısı Abdin Fərzəliyev açdı. “Azərbaycan
Respublikasının Prezidenti İlham Əliyevin sədrliyi ilə
Nazirlər Kabinetinin 2009-cu ilin sosial-iqtisadi
inkişafının yekunlarına həsr olunmuş
iclasında irəli sürülmüş vəzifələrlə
bağlı Nərimanov rayonunun sosial-iqtisadi
inkişafının 2009-cu ilin yekunları və
qarşıda duran vəzifələr barədə” hesabat məruzəsi
ilə çıxış edən natiq dövlət
başçısının məlum iclasdakı nitqinin bəzi
məqamları üzərində geniş dayandı. 2009-cu
ildə ölkə həyatının bütün sahələrində
əldə olunmuş uğurların Prezident İlham Əliyev
tərəfindən yüksək qiymətləndirildiyini və
cari ildə bu nailiyyətlərin daha da inkişaf etdirilməsinin,
nəzərdə tutulmuş bütün proqram və layihələrin
yerinə yetirilməsinin vacibliyinin qeyd edildiyini diqqətə
çatdıran natiq ötən il baş vermiş davamlı
inkişaf prosesində Nərimanov rayonunun da mühüm rol
oynadığını bildirdi. Qeyd olundu ki, 2009-cu ilin
yekunlarına görə, rayon iqtisadiyyatının əsasını
təşkil edən sənaye dinamik şəkildə
inkişaf etdirilmiş və bu müddət ərzində xidmətlər
də daxil olmaqla 145,1 milyon manatlıq məhsul istehsal
olunmuşdur. Sənaye məhsulunun ümumi həcmində
qeyri-dövlət sektorunun xüsusi çəkisi 81,8 faizə
çatmışdır. İl ərzində sənaye müəssisələrində
işləyənlərin sayı 7513 nəfər olmuş,
onların orta nominal əmək haqları 279,8 manat təşkil
etmişdir.
İl ərzində yeni
iş yerlərinin yaradılması ilə bağlı işlərin
davam etdirildiyini vurğulayan natiq ötən il Nərimanov
rayonunda 2516 daimi iş yerinin açıldığını
diqqətə çatdırdı. Ötən il rayon üzrə
əsas kapitala ümumi investisiya qoyuluşu 128,8 milyon manat təşkil
etmişdir. İcra hakimiyyətinin başçısı onu
da bildirdi ki, 2009-cu ildə rayonun inşaat sektorunda yüksək
göstəricilər əldə edilmiş, tikinti təşkilatları
tərəfindən 394,6 milyon manatlıq iş həcmi yerinə
yetirilmişdir. Hesabat dövründə tikinti təşkilatlarında
çalışan işçilərin sayı 9353 nəfər
təşkil etmiş, onların orta aylıq əmək
haqları 418 manata çatmışdır ki, bu da əvvəlki
ilə nisbətən 21,1 faiz çoxdur.
Məruzəçi qeyd etdi ki, ötən il iqtisadiyyatın başqa sahələrində olduğu kimi, əhalinin həyat səviyyəsini xarakterizə edən əsas göstəricilərdən biri olan pullu xidmətlərin həcmi də xeyli artmış, rayon əhalisinə 150,9 milyon manatlıq belə xidmət göstərilmişdir ki, bu da əvvəlki illə müqayisədə bir qədər artıqdır. 2009-cu ildə rayon ərazisində fəaliyyət göstərən ticarət müəssisələri üzrə pərakəndə əmtəə dövriyyəsinin həcmi 666,6 milyon manat olmuşdur. Bundan əlavə, il ərzində ictimai iaşənin əmtəə dövriyyəsinin həcmi 14,7 milyon manat və artım sürəti 113,2 faiz təşkil etmişdir.
İcra hakimiyyətinin başçısı il ərzində rayonda çox mühüm iri sosial və digər infrastruktur layihələrinin həyata keçirildiyini diqqətə çatdırdı. Qeyd olundu ki, Daxili İşlər Nazirliyinin general-leytenant Arif Heydərov adına hospitalın yeni binası, Heydər Əliyev prospekti ilə Ağa Nemətulla küçəsinin kəsişməsində inşası başa çatdırılmış yol ötürücü, körpü-tunel və yeraltı piyada keçidləri, 203 saylı yarımstansiya, 110 kilovoltluq 3-cü və 4-cü “Xırdalan” hava xətləri, Heydər Əliyev Fondunun təşəbbüsü ilə inşa olunmuş Psixonevroloji Uşaq Evi və Talassemiya Mərkəzi, Azadlıq və Ziya Bünyadov prospektlərinin kəsişməsində müxtəlif səviyyəli yol qovşağına daxil olan tunel ilin buraxılış obyektləri kimi rayonun sosial-iqtisadi həyatına verilən mühüm töhfə kimi dəyərləndirilə bilər. Bundan əlavə, hazırda rayon ərazisində inşa olunan Heydər Əliyev Mərkəzində işlərin sürətlə davam etdirildiyini diqqətə çatdıran A.Fərzəliyev bu mühüm proqramların və infrastruktur layihələrinin Nərimanov rayonunda həyata keçirilməsini ölkə Prezidenti İlham Əliyevin və onun xanımı, Heydər Əliyev Fondunun rəhbəri Mehriban xanım Əliyevanın xüsusi diqqət və qayğısının təzahürü kimi dəyərləndirdi.
Natiq rayonun abadlaşdırılması, mənzil-kommunal obyektlərinin istismarı vəziyyətinin yaxşılaşdırılması sahəsində görülmüş işlərdən danışaraq bildirdi ki, ötən il Mənzil Kommunal Təsərrüfatı Birliyi tərəfindən yaşayış binalarının texniki vəziyyətinə baxış keçirilmiş, hazırlanmış tədbirlər planına əsasən lazımi işlər həyata keçirilmişdir. Belə ki, il ərzində yaşayış binalarında və fərdi evlərdə 7756 kvadratmetr dam örtüyü, lazımi yerlərdə pəncərələr dəyişdirilmiş, su boruları və navalçalar təmir edilmişdir. 2009-cu ildə rayonun 8 ünvanında abadlıq işləri aparılmış, həyətlərdə yeni söhbətgah və oturacaqlar quraşdırılmışdır. Abadlıq işlərinin gedişi zamanı rayonun ayrı-ayrı küçə və ara yollarına 19776 kvadratmetrlik asfalt örtüyü salınmışdır.
Rayon ərazisində məişət tullantılarının daşınıb zərərsizləşdirilməsinin daha da yaxşılaşdırılması məqsədilə ayrı-ayrı ünvanlarda əlavə 14 ədəd yeni konteyner meydançası inşa edilmiş və tutumu bir kubmetr olan 190 ədəd konteyner qoyulmuşdur.
Bununla yanaşı, rayon ərazisində yerləşən, şirkət və nazirliklərin nəzdində fəaliyyət göstərən mənzil kommunal istismar sahələri tərəfindən ayrı-ayrı ünvanlarda yerləşən binaların dam örtükləri, daxili kommunikasiya xətləri, yağış suları axıdılan navalçalar, ümumi girişlərdəki pəncərə və qapılar dəyişdirilmiş, zirzəmilərdə yığılan suların çəkilməsi və kəskin qəzalı vəziyyətdə olan evlərin təmiri üçün zəruri tədbirlər həyata keçirilmiş, həyətdəki oturacaqlar və məişət tullantıları üçün nəzərdə tutulmuş konteynerlər rənglənmişdir.
Ölkə Prezidenti İlham Əliyevin yaşıllıqların qorunması və artırılması ilə bağlı tapşırıq və göstərişləri rəhbər tutularaq Nərimanov rayonunda ötən il ərzində həyata keçirilən yaşıllaşdırma tədbirləri barədə geniş məlumat verən məruzəçi dedi ki, 2010-cu ilin “Ekologiya ili” elan olunması bu sahədə daha böyük işlərin görülməsi zərurətini yaradır. Başçı bununla bağlı bütün təşkilat rəhbərlərinə, rayon fəallarına göstəriş və tövsiyələrini verdi.
Məruzəçi rayon əhalisinin elektrik enerjisi, qaz və içməli su təminatı ilə bağlı il ərzində görülmüş işlər barəsində məlumat verdi, təhsil, səhiyyə, idman və gənclər siyasəti, həmçinin əhalinin sosial müdafiəsinin gücləndirilməsi sahələrində həyata keçirilən tədbirlərdən bəhs etdi. Ötən il ölkəmiz üçün son dərəcə mühüm əhəmiyyət kəsb edən 18 mart — ümumxalq referendumu və 23 dekabr bələdiyyə seçkilərində rayon sakinlərinin fəal iştirak etdiklərini diqqətə çatdırdı.
Həmçinin ölkə Prezidenti cənab İlham Əliyevin bütün görüşlərində vətəndaşların müraciətlərinə diqqət və qayğı ilə yanaşılması, onların problemlərinin həllinə hərtərəfli kömək göstərilməsi barədə tapşırıq verdiyini xatırladan natiq bu məqsədlə ötən il rayonda 44 səyyar qəbul və görüşün keçirildiyini və vətəndaşlar tərəfindən qaldırılan məsələlərin əksəriyyətinin həll edildiyini bildirdi.
Hesabat məruzəsinin sonunda 2010-cu ildə miqyasına və əhəmiyyətinə görə qarşıda daha böyük və ciddi vəzifələrin dayandığını vurğulayan natiq Nərimanov rayonunun sosial-iqtisadi inkişafının sürətləndirilməsi, ölkə başçısı cənab İlham Əliyevin sosial-iqtisadi və siyasi kursunun uğurla həyata keçirilməsi üçün bütün imkanların gələcəkdə də səfərbər olunacağını, rayon sakinlərinin artan maddi və mənəvi tələbatının ödənilməsi üçün lazım olan bütün tədbirlərin görüləcəyini bildirdi.
Məruzə ətrafında çıxış edən “Bakı Kondisioneri” ASC-nin sədri, rayon icra hakimiyyəti başçısı yanında şuranın üzvü Vaqif Heydərov, Nərimanov Rayon Polis İdarəsinin rəisi, şura üzvü Muradəli Babayev, Dövlət Sosial Müdafiə Fondu Nərimanov rayon şöbəsinin müdiri Hüseyn Kərimov rəhbərlik etdikləri sahələrin 2009-cu ildəki fəaliyyəti və qarşıda duran vəzifələr barədə hesabat verdilər. Ötən ilin bütün ölkə kimi, paytaxtın Nərimanov rayonu üçün də əlamətdar olduğunu bildirdilər, bu uğurların artırılması üçün daha böyük əzmkarlıqla çalışmağın vacibliyini qeyd etdilər.
Tədbirdə Prezident Administrasiyasının məsul işçisi Tağı Tağıyev və Milli Məclisin deputatı, YAP sədrinin birinci müavini, icra katibi Əli Əhmədov çıxış edərək 2009-cu ildə ölkəmizin sosial-iqtisadi inkişafı sahəsində əldə olunmuş uğurların Nərimanov rayonunun timsalında da aydın nəzərə çarpdığını bildirdilər.
Hesabat yığıncağının sonunda rayonun təhsil, səhiyyə, idman, sosial-iqtisadi, ictimai-siyasi və mədəni həyatında fərqlənənlərə xüsusi mükafatlar və fəxri fərmanlar verildi.
Sonda “Nərimanov rayonunun sosial-iqtisadi inkişafının 2009-cu ilin yekunları və qarşıda duran vəzifələr haqqında” məsələyə dair rayon icra hakimiyyəti başçısı yanında şura iclasının qərarı oxundu.
Mirbağır YAQUBZADƏ
Xalq qəzeti.- 2010.- 12 fevral.- S. 8.