Sabirabad: əzmkarlıq, işgüzarlıq uğurların təməlidir

Möhtərəm Prezidentimiz İlham Əliyevin diqqət və qayğısı sayəsində əvvəlki illərdə olduğu kimi 2009-cu ildə də rayonumuzda böyük işlər görülmüşdür. “Azərbaycan Respublikası regionlarının sosial-iqtisadi inkişafı Dövlət Proqramı (2009-2013-cü illər)” ilə rayon icra hakimiyyətinin qarşısına qoyulan vəzifələr uğurla icra olunmuşdur. — Sabirabad Rayon İcra Hakimiyyətinin başçısı Heydər Abbasov 2009-cu ilin yekunlarından bəhs edərkən belə dedi və əlavə etdi: — Əlbəttə, bütün bunlar 2010-cu ildə işlərimizin daha sağlam təməl üzərində qurulacağından xəbər verir.

Doğrudan da, ötən ilin statistik göstəriciləri rayonun uğurlu bir il yaşadığını təsdiq edir. 2009-cu ildə Qaratəpə kəndində aqrolizinq müəssisəsi fəaliyyətə başlamışdır. Elə həmin kənddə 12 min tonluq tutumu olan regional logistik gübrə anbarı tikilib istifadəyə verilmişdir. Hər iki obyekt kənd təsərrüfatının inkişafına əvəzsiz töhvələr verəcəkdir.

Şəhid ailələri və Qarabağ müharibəsi əlilləri üçün hər cür şəraiti olan 16 mənzilli yaşayış binası tikilmişdir. Qeyd edək ki, son 2 ildə onların istifadəsinə 24 və 16 mənzilli yaşayış binaları da verilmişdir.

Araz çayı üzərində asma körpü salınmış, bu da çayın sol sahilindəki 4 kəndin sakinlərinin mərkəzlə əlaqəsini asanlaşdırmışdır. Balahəşimxanlı kəndində 480 şagird yerlik yeni məktəb binası tikilib ən müasir avadanlıqlarla təchiz olunmuş, təhsil şöbəsi üçün inzibati binanın tikintisi də yüksək keyfiyyətlə aparılmışdır. Mikayıl Müşfiq adına 4 saylı, Rüstəmli, Qaragünə 2 saylı kənd orta, Qaratəpə kənd əsas, Güdəcühür kənd ibtidai məktəbləri, habelə 2 və 5 saylı şəhər uşaq bağçaları əsaslı təmir edilmişdir. MRX-in əsas binasında, Nizami kənd sahə xəstəxanasında əsaslı, Qaratəpə, Muğangəncəli, Yaxadəllək kənd sahə xəstəxanalarında, Həşimxanlı, Yolçubəyli, Şəhriyar kənd həkim ambulatoriyalarında bərpa və cari təmir işləri aparılmışdır. Tarix-diyarşünaslıq muzeyində, uşaq musiqi məktəbində, Əhmədabad kənd mədəniyyət evində və kitabxanasında əsaslı təmir işləri görülmüşdür.

Aqrar bölmədə yeni emal sexləri fəaliyyətə başlamış, 4 heyvandarlıq və quşçuluq müəssisəsi yaradılmışdır.

2009-cu ildə rayonda geniş qurucluq və abadlıq işləri də aparılmışdır. Şəhərin Heydər Əliyev prospektində “Muğan” istirahət parkı əsaslı şəkildə yenidən qurulmuşdur. Burada 1892 kvadratmetr sahəyə üzlük daş döşənmiş, 2 fəvvarə tikilmiş, yeni işıqlandırma sistemi quraşdırılmış, oturacaqlar qoyulmuş, 1014 kvadratmetr sahədə yaşıllıq salınmışdır.

Şəhərin küçə və meydanlarında da xeyli iş görülmüşdür. M.S.Ordubadi, R.Rza, Xaqani, Q.Namazəliyev, A.Abdullayev, N.Gəncəvi və digər küçələrdə, eləcə də çoxmərtəbəli yaşayış binalarının həyətinə ümumilikdə 43,1 min kvadratmetr asfalt örtüyü vurulmuşdur. Heydər Əliyev prospektinin, M.Mirağaoğlu və İ.İsgəndərov küçələrinin səkilərinə ümumilikdə 2175 kvadratmetr ağ lay və tamet daşı döşənmişdir. Heydər Əliyev prospektindəki yaşayış binalarının dam örtüyü əsaslı təmir olunmuş və bir sıra digər bərpa işləri görülmüşdür.

“Bazar küçələri” adlanan V.Əhmədov və İ.İsgəndərov küçələrində nəqliyyatın və insanların hərəkətinə maneçilik törədən 10-dan çox ticarət obyektinin müəyyən hissəsinin sökülməsi nəticəsində V.Əhmədov küçəsi 4 metr enində genişləndirilmiş və küçə boyu yeni kanalizasiya xətti çəkilmişdir.Kənd yollarının təmirinə diqqət artırılmış, 17 kənddə yollara çınqıl döşənmişdir. Bu iş davam etdiriləcəkdir.

Prezident İlham Əliyev 2010-cu ili “Ekologiya ili” elan etmişdir. Ağac əkini kampaniyası əsl ümumxalq hərəkatına çevrilmişdir. Sabirabadda bu istiqamətdə əsaslı işlər görülmüşdür.

Ötən il rayon iqtisadiyyatının möhkəmləndirilməsi istiqamətində görülən tədbirlərin nəticəsi uğurlu olmuşdur. Ümumi məhsul buraxılışı əvvəlki ilə nisbətən 5,6 faiz artaraq 203,3 milyon manat olmuşdur. Sənaye məhsulunun həcmi də artaraq 9,7 milyon manat təşkil etmişdir. İqtisadiyyatın inkişafına və sosial obyektlərin yaradılmasına investisiya qoyuluşu artmışdır. Əsas kapitala yönəldilən investisiyanın həcmi 9 milyon 284 min manat olmuşdur.

Kənd təsərrüfatında ümumi məhsul istehsalı 122 milyon manat olmuş, bu da əvvəlki illə müqayisədə 17 milyon manat və ya 15 faiz artım deməkdir.

Əhalinin sosial rifahını səciyyələndirən göstəricilərdə də artım dinamikası müşahidə edilmişdir. Adambaşına düşən pul gəlirləri 2009-cu ildə əvvəlki illə müqayisədə 7,7 faiz artaraq 1293,6 manat, orta aylıq əmək haqqı 10,4 faiz artaraq 182,2 manat olmuşdur.

Sahibkarlara hərtərəfli şəraitin yaradılmasının nəticəsidir ki, iqtisadi sahədə qeyri-dövlət sektoru həlledici rol oynamışdır. Ümumi məhsul buraxılışının 92 faizi, sənaye məhsulu həcminin 65 faizi, kənd təsərrüfatı məhsulunun hamısı qeyri-dövlət sektorunun payına düşmüşdür.

Ötən il rayonun kənd təsərrüfatı üçün xüsusilə uğurlu olmuşdur. Dövlət başçısının kənd təsərrüfatına qayğısını sabirabadlılar daha yaxından hiss etmişlər. 18748 şəxsə əkin sahəsinin becərilməsində istifadə edilmiş yanacaq və motor yağlarına görə 2,1 milyon manat vəsait verilmişdir. Bütün vəsait plastik kartlar vasitəsilə ödənilmişdir. Məhsul istehsalçılarına güzəştli qaydada 446 min manat dəyərində 1122 ton mineral gübrələrin satılması təmin edilmişdir.

Elə bunların nəticəsidir ki, ötən il 63383 hektar sahədə yüksək məhsuldarlığa nail olunmuşdur. Taxılçılıqda uğurlar daha böyükdür. 23618 hektar buğda, 7485 hektar arpa sahəsindən ümumilikdə 113837 ton taxıl götürülmüşdür, bu da əvvəkli illə müqayisədə 21,4 min ton artıqdır.

Son illər qrant hesabına 22 nəfərə 53 müxtəlif markalı kənd təsərrüfatı texnikası verilmişdir. Aqroservislərdə isə 100-ə yaxın texnika cəmləşmişdir.

Meşələrin mühafizəsi və yeni meşələrin salınması Sabirabad üçün həyati vacib məsələlərdəndir. Kürqırağı ərazisində 3046 hektar meşəliyin qorunmasını rayon Meşə Mühafizəsi və Bərpası Müəssisəsi həyata keçirir. Keçən il 40 hektar meşə əkilmiş, meşələrin cins tərkibi də xeyli yaxşılaşdırılmışdır.

Əkinçiliyin inkişafı düzgün suvarmadan aslıdır. Hər il Sabirabadda 67 min hektar sahədə suvarma işləri aparılır. Bu mühüm işlə mexaniki suvarma və suvarma sistemləri idarələri məşğul olur. Ötən il bu müəssisələr 2311 kilometr uzunluğunda suvarma kanal sistemi vasitəsilə xidmət göstərmiş, 480-ə qarşı 767 kilometr su kanalı lildən təmizlənmişdir. Suvarmanın yaxşılaşdırılması üçün digər vasitələrdən də istifadə edilmişdir. Qaratəpə kəndində Dünya Bankının vəsaiti hesabına “Suvarma paylayıcı sistemi və onun idarə olunmasının təkmilləşdirilməsi” layihəsi həyata keçirilmişdir. Nizami, Qaragüney, Cavad və digər kəndlərdə də həyata keçirilən belə irihəcmli layihələrin səmərəsi böyükdür.

Ötən il təhsil sahəsində görülən işlər sürətlənmiş, inkişafyönümlü proqramlar ardıcıl həyata keçirilmişdir. Ölkə Prezidentinin sərəncamı ilə 2009-cu ilin “Uşaq ili” elan olunması ilə əlaqədar rayonun təlim-tərbiyə müəssisələrində çoxsaylı tədbirlər həyata keçirilmiş, məktəblilər arasında müxtəlif müsabiqələr, yarışlar təşkil olunmuşdur.

Təhsil müəssisələrinin əsas göstəricilərindən biri məzunlarının ali məktəblərə qəbuludur. 2009-cu ildə respublikanın ali məktəblərinə 152 nəfər, orta ixtisas məktəblərinə isə 36 nəfər sabirabadlı məzun qəbul olunmuşdur. Onlardan 10 nəfəri 500-dən yuxarı bal toplamışdır.

Sosial sahədə aparılan islahatlar rayonda səhiyyənin inkişafına da öz müsbət təsirini göstərmişdir. Əhalinin sağlamlığı keşiyində dayanan 134 həkim və 470 orta tibb işçisi əhaliyə 20 ixtisasda 150 mindən çox yerli, 9 minə yaxın qaçqın və məcburi köçkünlərə ambulator və stasionar tibbi xidmət göstərmişdir. Mərkəzi xəstəxanaya müasir tipli ultrasəs müayinəsi və “SİEMENS” markalı rentgen aparatları verilmişdir.

Rayonda mədəni xidmətin səviyyəsi də yüksəlmişdir. Muzey və kitabxana xidməti yaxşılaşdırılmışdır. Ən müasir tələblərə cavab verən Heydər Əliyev muzeyi yaradılmış, tarix diyarşünaslıq muzeyinin eksponatları 8770-ə çatdırılmışdır. Mərkəzi kitabxana sistemində 513 min nüsxədən çox kitab fondu yaradılmış, M.Ə.Sabir adına Mərkəzi kitabxanada avtomatlaşdırılmış informasiya sistemi qurulmuş, kənd yaşayış məntəqələrində asudə vaxtın təşkili üçün mədəni-kütləvi tədbirlərin keçirilməsinə diqqət artırılmışdır.

Heydər Əliyev muzeyinin işinin təkmilləşdərilməsi istiqəmətində xeyli iş görülmüşdür. İctimaiyyətin nümayəndələrindən formalaşdırılmış qrup Heydər Əliyev irsinin təbliği və öyrənilməsi ilə yanaşı ulu öndərlə bağlı xeyli sayda videolentə alınmış xatirələr, fotoşəkillər əldə etmişdir. Muzeyə ziyarətin kütləviliyi təmin olunmuş, burada gənc nəslin vətənpərvərlik və dövlətçilik ruhunda formalaşması istiqamətində müxtəlif tədbirlər keçirilmişdir.

Ötən il milli azlıqlarla da iş canlandırılmışdır. Rus icmasının üzvlərini narahat edən hər bir məsələyə həssaslıqla yanaşılmışdır. Provoslavların Pasxa bayramı münasibətilə icma üzvləri rayon icra hakimiyyətində qəbul edilmiş və onlara maddi yardım göstərilmişdir.

Rayonda məskunlaşan 6164 məcburi köçkünün, 2432 qaçqının yaşayış şəraitinin yaxşılaşdırlması və məşğulluğunun artırılması üçün əsaslı işlər görülmüşdür. 365 hektar əkinə yararlı torpaq sahəsi onların istifadəsinə verilmiş, heyvandarlıqla məşğul olan məcburi köçkün ailələrinə isə 309 hektar örüş sahəsi ayrılmışdır. Axıska türk ailələri üçün Qaratəpə kəndində 12, Əhmədabad kəndində 4, Xəlfəli kəndində isə 2 yaşayış evi tikilmişdir.

221 şəhid ailəsi, 133 Qarabağ müharibəsi və 29 Çernobıl əlili, 44 Böyük Vətən müharibəsi veteranı daim diqqət mərkəzində olmuşlar. Son illər bu kateqoriyadan olan insanlar üçün 56 mənzilli 3 yaşayış binası tikilib istifadəyə verilmişdir. Bunlarla yanaşı, kəndlərdə yaşayan bu qrupdan olan insanların mənzil-məişət şəraitini yaxşılaşdırmaq üçün də bir sıra tədbirlər görülmüşdür. Suqovuşan kəndində Qarabağ müharibəsi əlili Məhərrəm Əhmədova ikiotaqlı ev tikilmiş, 26 şəhid ailəsinin, 2 Çernobıl əlilinin mənzilində təmir bərpa işləri aparılmış, ailə vəziyyəti ağır olan 10 Qarabağ müharibəsi əlili himayəyə götürülmüşdür. 3 nəfər Böyük Vətən müharibəsi əlilinə “OKA” markalı avtomobil ayrılmış, 18 əlilə isə pansionatlara pulsuz yollayış vərəqələri verilmişdir.

Aztəminatlı ailələrə, əlil və kimsəsizlərə rayon icra hakimiyyətinin müvafiq komissiyası tərəfindən 150 min manat yardım göstərilmişdir.

2009-cu ildə Sabirabad rayonunda 35 yeni müəssisə yaradılmış, 588 iş yeri açılmışdır, bunun da 433-ü daimi, 155-i isə müvəqqəti olmuşdur.

Ötən il həmçinin Qasımbəyli, Moranlı kəndlərində koordinat tipli ATS-lər daha müasir elektron tipli ATS-lərlə əvəz edilmiş, Həşimxanlı, Yolçubəyli, Şəhriyar, Şıxsalahlı kəndlərində kabelləşmə işləri aparılmış, xətlər yenilənmişdir. Əhaliyə 99,1 min manat poçt xidməti göstərilmişdir.

Əhalinin elektrik enerjisi ilə təminatında bir sıra işlər görülmüşdür. 8589 abonentə “Smart” tipli yeni sayğac quraşdırılmış, 51 transformator təmir edilmiş və yenisi ilə əvəz olunmuşdur.

Əhalinin təbii qazla təchizatında da inkişaf vardır. 7 çoxmərtəbəli yaşayış binasına təbii qaz verilmiş, şəhərin 9 küçəsinə yeni xətlər çəkilmiş və yaxud köhnə qaz borularında təmir-bərpa işləri aparılmışdır.

Kənd əhalisinin içməli suya olan tələbatını ödəmək məqsədilə Ekologiya və Təbii Sərvətlər Nazirliyinin xətti ilə Sarxanbəyli, Muğan Gəncəli, Həşimxanlı, Quruzma, Cavad, Türkədi və Narlıq kəndlərində modul tipli sudurulducu qurğular istifadəyə verilmişdir. Son illər 15 kənddə də bu cür sudurulducu qurğular quraşdırılmışdır. Yaxın gələcəkdə 22 kənddə də belə qurğuların tikintisi nəzərdə tutulmuşdur.

Su Kanal İdarəsi tərəfindən mərkəzi nasos stansiyasında əsaslı təmir işləri görülmüş, şəhərin 3 küçəsinə yeni su xətləri çəkilmiş, digər xətlərdə təmir-bərpa işləri aparılmışdır.

2009-cu il dekabrın 23-də keçirilən bələdiyyə seçkiləri ötən ilin əlamətdar hadisələrindən olmuşdur. Sabirabad rayonunda da bu seçkilər “Azərbaycan Respublikasının Seçki Məcəlləsi”nin tələblərinə tam uyğun təşkil edilmişdir.

Sözsüz ki, 2009-cu ildə Sabirabad rayonunda görülmüş işlərin miqyası qəzet səhifəsinə sığmayacaq dərəcədə çoxdur. Hamısından ətraflı danışmaq mümkün olmasa da, bir məsələ dəqiqdir ki, sabirabadlılar dövlətçilik ənənələrinə sadiqlik nümayiş etdirməklə hər bir çətinliyin öhdəsindən gəlməyin mümkünlüyünə inanırlar. Elə bu inamın təzahürü olaraq yazını rayon rəhbəri Heydər Abbasovun fikirləri ilə tamamlamaq istəyirik:

— Qarşıda bizi daha böyük və daha məsuliyyətli işlər gözləyir. İqtisadiyyatın bütün sahələrində əldə olunan yüksək nəticələr və davamlı sürətli inkişafa hesablanan “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda qarşıya qoyulan vəzifələr deməyə əsas verir ki, iqtisadi potensialımız növbəti ildə daha da gücləncəkdir. Azərbaycan Respublikasının Prezidenti möhtərəm İlham Əliyevi əmin edirik ki, sabirabadlılar 2010-cu ildə də əzmlə çalışacaq və rayonun yüksəlişini təmin edəcəklər.

Səməd HÜSEYNOĞLU,

“Xalq qəzeti”nin bölgə müxbiri

Xalq qəzeti.- 2010.- 17 fevral.- S. 4.