Saz dünənimizin sabahımıza əmanətidir

Bu fikir Azərbaycan Aşıqlar Birliyinin Azərbaycan Dövlət Pedaqoji Universiteti ilə bu ali məktəbdə keçirdiyi "Aşıq yaradıcılığının müasir problemləri" mövzusunda elmi konfransda səslənən mülahizə və qənaətlərin mərkəzində dayandı.

Konfransı giriş sözü ilə açan Pedaqoji Universitetin rektoru, AMEA-nın müxbir üzvü, professor Yusif Məmmədov 28 May Respublika Günü ərəfəsində keçirilən konfransın milli-mənəvi dəyərlər sistemində əhəmiyyətli yeri olan aşıq sənətinin xalqımızın estetik düşüncəsinin və zövqünün formalaşmasında əsrlərdən bəri oynadığı rolu vurğuladı. Natiq bildirdi ki, bu gün konfransda səslənəcək mövzular müstəqillik dövründə milli-mədəni quruculuğun aktual məsələlərini qabartmaqla, qədim aşıq sənətinin yeni şəraitdə qorunması və zənginləşdirilməsi ilə bağlı həlli vacib problemləri diqqətə çatdıracaq.

Aşıqlar Birliyinin sədri, xalq şairi Zəlimxan Yaqub zaman-zaman milli varlığını yad basqılardan, yabançı təsirlərdən qorumuş xalqımızın öz dilini, musiqi zövqünü yaşatmasında, sevinc və kədərini bədii salnaməyə çevirməsində aşıq sənətinin misilsiz rolundan söz açdı. AAB sədri bildirdi ki, bütün dövrlərdə xalqımız sazına-sözünə, sazımız-sözümüz isə xalqımıza mənəvi dayaq olmuş, zəngin milli mədəniyyətimizdə aşıq sənəti öz şedevrlərini yaradıb bugünümüzə çatdırmışdır. Artıq aşıq sənəti bəşəri irs kimi dəyərləndirilir, himayə olunur.

Zəlimxan Yaqub daha sonra bildirdi ki, aşıq sənətinə dövlət səviyyəsində göstərilən diqqət onun gələcəyi baxımından nikbinlik doğursa da, bu misilsiz xalq yaradıcılığının öyrənilməsi və öyrədilməsi, yaşadılması və geniş təbliğ olunması ilə bağlı bir sıra məsələlər yoluna qoyulmalıdır. Bəzi adamların və qurumların bu milli-mənəvi dəyərə biganəliyi nə qədər dözülməzdirsə, sazın üzdəniraq təbliği, şou meydanlarına çıxarılması da bir o qədər arzuolunmaz, yolverilməzdir. Aşıq sənəti ulu babaların müqəddəs əmanətidir, onu iki gözümüz kimi, iman kimi, namus kimi qorumalıyıq, inkişaf etdirməli və gələcək nəsillərə çatdırmalıyıq.

Bu yolda biz istedadlı aşıqlarımızı himayə etməli, onların yaradıcılığını kütləvi auditoriyalardan xalqımıza çatdırmalıyıq. Aşıq sənətini dünyada tanıtmaq və sevdirmək işini də ardıcıl davam etdirməliyik. Bir sıra maraqlı tədbirlər nəzərdə tutulub. Aşıq muzeyi yaratmaq və aşıq-ozan ensiklopediyası yaratmaq istiqamətində iş gedir. Bugünkü konfrans isə bizə daha nələr etməli olacağımızı anladacaq.

Konfransda filologiya elmləri doktoru, professor Məhərrəm Qasımlının "Çağdaş aşıqlarımızın səhnə və nitq mədəniyyəti", filologiya elmləri doktoru, professor Həsən Mirzənin "Çağdaş aşıq sənətində uğurlarımız və qüsurlarımız", filologiya elmləri doktoru, professor Qara Namazovun "Aşıq sənətində klassik ənənəyə diqqət və qayğı məsələləri", filologiya elmləri doktoru, professor Buludxan Xəlilovun "Folklor yaradıcılığı: problemlər, qayğılar", filologiya elmləri doktoru, professor Seyfəddin Qəniyevin "Şirvan aşıq məktəbi bu gün", filologiya elmləri doktoru Mahmud Allahmanlının "Müasir aşıq sənətinin tədqiqi problemləri", filologiya elmləri namizədi Elxan Məmmədlinin "Çağdaş aşıq sənətində ifaçılıq və yaradıcılıq problemləri" mövzusunda məruzələrində aşıq sənətinin çağdaş durumu, onun inkişafı və xalqa çatdırılması ilə bağlı ciddi diskussiya aparıldı, dəyərli mülahizələr səsləndi, zəruri tədbirlərdən söz açıldı.

Məruzələr arasında tanınmış aşıqların çıxışları dinlənildi. Konfransa yekun vuran AAB sədri Zəlimxan Yaqub müzakirələrdə səslənmiş elmi fikirlərə, qaldırılan məsələlərə münasibətini bildirdi, belə tədbirlərin davam etdiriləcəyini, problemlərin həlli ilə bağlı əməli işlər görüləcəyini söylədi.

Konfrans xalqımızın aşıq sənətinə dərin bağlılığının növbəti ifadəsi kimi saz-söz yaradıcılığının uğurlarını və nöqsanlarını bir daha sərgilədi.

Tahir AYDINOĞLU

Xalq qəzeti.- 2010.- 5 iyun.- S. 8.