Hesabat konserti

 

Dünən M.Maqomayev adına Azərbaycan Dövlət Filarmoniyasında Leapold və Mstislav Rastropoviçlər adına 21 nömrəli on bir illik Uşaq Musiqi Məktəbinin hesabat konserti keçirildi.

 

Azərbaycan Respublikası Mədəniyyət və Turizm Nazirliyi, eləcə də Bakı Şəhər Mədəniyyət və Turizm İdarəsinin təşkilati dəstəyi ilə keçirilən konsertdə xalq artisti Teymur Göyçayevin bədii rəhbəri və baş dirijoru olduğu Q.Qarayev adına Azərbaycan Dövlət Kamera Orkestrinin müşayiətilə məktəbin 12 gənc istedadı bir-birindən gözəl ifalarıyla tamaşaçıların zövqünü oxşadılar.

1967-ci ildən fəaliyyət göstərən, 1996-cı ildən isə ulu öndər Heydər Əliyevin sərəncamı ilə Leapold və Mstislav Rastropoviçlərin adını daşıyan bu musiqi ocağında hər il belə hesabat konsertlərinin verildiyinin bir ənənə olduğunu söyləyən məktəbin direktoru Rafiq Əzizov, bu konsertlərin gənc ifaçıların həyatında çox mühüm rol oynadığını, onların səhnə mədəniyyətinə, professional ifaçılıq məziyyətlərinə çox müsbət təsir göstərdiyini dedi. Bu uşaqların arasında ümumrespublika, hətta Beynəlxalq müsabiqələrin qaliblərinin və laureatlarının olduqlarını açıqlayan R.Əzizov Qran-pri mükafatçısı İsrafil Rəsulovun, Nəsrin Mustafayevin, Fərəh Xəlilovanın, Prezident təqaüdçüsü Turan Quliyevin, Məhəmmədəli Nuriyevin və digər ifaçıların adlarını fəxrlə çəkdi.

Konsertdə Azərbaycan bəstəkarlarıyla yanaşı, xarici ölkələrin klassiklərinin də əsərləri səsləndi.

 

 

Rafiq SALMANOV

 

Xalq qəzeti.- 2010.- 13 mart.- S. 8.