Üzeyir Hacıbəylinin 125 illik yubileyinə həsr olunmuş hesabat konserti

Azərbaycan Respublikası Prezidentinin imzaladığı “Üzeyir Hacıbəylinin 125 illik yubileyinin keçirilməsi haqqında” 23 fevral 2010-cu il tarixli sərəncamının icrası ilə əlaqədar müxtəlif tədbirlər keçirilir, musiqi korifeyinin yubileyi geniş miqyasda qeyd olunur.

Mədəniyyətimizin inkişafına misilsiz töhfələr verərək müstəsna xidmətlər göstərmiş dahi bəstəkar, müasir Azərbaycan musiqi sənətinin banisi, görkəmli alim, publisist, dramaturq, pedaqoq və ictimai xadim Üzeyir Hacıbəylinin 125 illik yubileyinin keçirilməsinə dair Təhsil Nazirliyi tərəfindən tədbirlər planı hazırlanmışdır.

Azərbaycan musiqi aləminə öz töhfələrini vermiş 110 yaşlı təhsil müəssisəsi – Musiqi Kollecinin tələbləri bu günlərdə dahi bəstəkarın 125 illik yubileyinə həsr olunmuş hesabat konserti vermişlər. Onu da qeyd edək ki, Azərbaycanda müasir Avropa tipli ilk musiqi təhsilinin yaranması və inkişafı Musiqi Kollecinin adı ilə bağlıdır. 110 ildir ki, respublikamızda musiqi təhsilinin inkişafında xüsusi xidmətləri olan, peşəkar musiqiçilərin yetişdirilməsində mühüm rol oynayan Musiqi Kolleci dahi Üzeyir Hacıbəylinin adı ilə sıx bağlıdır. Ötən əsrin 20 və 30-cu illərində iki dəfə bu təhsil ocağına rəhbərlik edən Ü.Hacıbəylinin və onun həmkarlarının birgə əməyi sayəsində Musiqi Kolleci tədricən təkmilləşdirilmiş, yeni müəllimlərin, metodların, qabaqcıl iş təcrübəsinin tətbiqi hesabına öz fəaliyyətini daha da genişləndirmişdir. İllər keçdikcə Musiqi Kolleci respublikamızda minlərlə ixtisaslı musiqiçi kadrlar yetişdirərək hər bir bölgədə, hətta ən ucqar kəndlərdə belə musiqi məktəbləri üçün baza rolunu oynamış və bu gün də öz ənənəsinə sadiq qalaraq bacarıqlı musiqiçilərin yetişdirilməsində müstəsna xidmətlər göstərir. Musiqi Kollecinin direktoru, əməkdar incəsənət xadimi, Milli Konservatoriyanın professoru Nazim Kazımovun təşkilatçılığı istedadlı musiqiçilərin məhz bu təhsil ocağında aşkara çıxarılmasında öz təsirini göstərmişdir. Bu gün Musiqi Kollecində təhsil alan Prezident təqaüdçüləri – III kurs tələbələri Tofiq Məmmədov və Güllü Muradova, məzun Abgül Mirzəliyev belələrindəndir. Kollecin şöbə müdiri, respublikanın əməkdar müəllimi Gülzar Hətəmzadə də söhbət zamanı dedi ki, istedadlı musiqiçilərin yetişdirilməsi istiqamətində bütün imkanlardan istifadə edirik. Bundan ötrü kollecimizdə hər cür şərait yaradılıb.

Bu günlərdə Musiqi Kolleci tələbələrinin Azərbaycan Dövlət Filarmoniyasında dahi bəstəkar Üzeyir Hacıbəylinin 125 illik yubileyinə həsr olunmuş hesabat konserti ilə əlaqədar keçirilən tədbiri giriş sözü ilə əməkdar incəsənət xadimi, musiqişünas Həcər Babayeva açdı. O, Üzeyir Hacıbəylinin Azərbaycan musiqisinin inkişafındakı müstəsna rolundan və əvəzsiz xidmətlərindən söhbət açdı. Qeyd etdi ki, musiqi mədəniyyətimizin təşəkkülü və inkişafı tarixində Üzeyir Hacıbəylinin müstəsna rolu olub. Dahi bəstəkarın ən böyük arzusu musiqi məktəblərində azərbaycanlı uşaqların təhsil almaları idi. O, bu yolda yorulmaz fəaliyyət göstərib. H.Babayeva qeyd etdi ki, bu gün Musiqi Kolleci, habelə digər musiqi ocaqlarında istedadlı azərbaycanlı uşaqlarının təhsil almaları və pərvazlanmalarının əsası məhz dahi bəstəkar tərəfindən qoyulub.

Hesabat konserti anşlaqla keçdi və tamaşaçılar tərəfindən alqışlarla qarşılandı.

Əliqismət BƏDƏLOV

Xalq qəzeti.- 2010.- 2 may.- S. 8.