İnformasiya texnologiyaları sahəsində kadr hazırlığı dövrün tələbidir

 

Son illər ölkəmizdə informasiya texnologiyalarının tətbiqinə diqqət artmaqda davam edir. Müasir dövrün səciyyəvi xüsusiyyətlərindən biri həyatın bütün sahələrinin informasiyalaşdırılması, informasiya cəmiyyətinin yaranmasıdır. Söz yox ki, belə bir cəmiyyətin qurulmasında informasiya texnologiyalarına yiyələnmiş kadrların yetişdirilməsinə böyük ehtiyac vardır. Məhz ona görə də ölkə Prezidenti İlham Əliyev hakimiyyətə gəldiyi ilk vaxtlardan bu sahəyə xüsusi diqqət yetirmişdir.

 

Dövlət başçısının belə bir fikrini diqqətə çatdırmaq istərdim: "İnformasiya-kommunikasiya texnologiyalarının gələcək inkişafımızda çox önəmli rolu olacaqdır. Çünki bütün dünyanın elmi-texniki tərəqqisi bu istiqamətdə inkişaf edəcəkdir". Doğrudan da, cəmiyyətin inkişafında güclü təsirə malik olan informasiya texnologiyaları bütün dünyada sürətlə tətbiq olunmaqdadır.

Azərbaycan isə artıq bu sahədə MDB məkanında ön sırada dayanır. Ölkə Prezidentinin 2004-cü ildə "Ümumtəhsil məktəblərinin informasiya-kommunikasiya texnologiyaları ilə təminatı Proqramı"nın qəbul edilməsi haqqında imzaladığı sərəncamdan sonra məktəblərimizin kompyuterlə təminatı sahəsində xeyli iş görüldü. Bu proqrama uyğun olaraq orta ümumtəhsil məktəblərimizdə indi hər 29 şagirdə bir kompyuter nisbəti həll olunmuşdur. Proqram 2005-2007-ci illəri əhatə edirdi və burada elektron dərsliklərin, elektron kitabxanaların, rəqəmli tədris resurslarının işlənilib hazırlanması və s. məsələlər nəzərdə tutulmuşdu. Bu məsələlər artıq reallaşmış və yeni "Təhsil sisteminin informasiyalaşdırılması üzrə Dövlət Proqramı (2008-2012)" qəbul olunmuşdur. Yeni proqram təhsil sisteminin informasiyalaşdırılması sahəsində həlledici mərhələnin başlanğıcını qoydu.

Söz yox ki, bütün bunlar təhsilin digər sahələrində, o cümlədən texniki-peşə təhsili sistemində də informasiya texnologiyalarının tətbiqinə imkanlar yaratdı. Təhsil sisteminini informasiyalaşdırılması üzrə Dövlət Proqramında texniki-peşə təhsilinin informasiya texnologiyaları ilə təminatı əhəmiyyətli yer tutur. Ancaq peşə təhsilinin yenidən qurulması, yeni ixtisaslar üzrə mütəxəssis hazırlayan peşə liseyləri yaradılması da diqqət mərkəzində olmuşdur. Son illər Təhsil Nazirliyinin bu istiqamətdə apardığı davamlı islahatlar artıq öz bəhrəsini vermişdir. Lazım olmayan, dövrün tələbləri ilə ayaqlaşmayan peşə təhsili müəssisələrinin işi yenidən qurulmuş, onlarda ölkəmizdə daha çox tələbat olan ixtisaslar açılmışdır.

Azərbaycan Respublikası Prezidenti İlham Əliyevin 2007-ci il iyulun 3-də imzaladığı sərəncamla təsdiq olunmuş "Azərbaycan Respublikasında texniki peşə təhsilinin inkişafı üzrə Dövlət Proqramı" məhz bu sahənin yenidən qurulması üçün imkanlar yaratdı.

1996-cı ildən yeni statusla fəaliyyət göstərən 7 saylı Bakı Peşə Liseyi informasiya texnologiyaları üzrə mütəxəssis hazırlığını bu gün də davam etdirir.

Bizdə olan ixtisaslar kompyuter texnologiyaları ilə bağlıdır. Kompyuter üzrə operator, kompyuter texnikasının sazlayıcısı, mühasib-fərdi kompyuter operatoru ixtisasları üzrə bu illər ərzində xeyli mütəxəssis hazırlamışıq. Məktəbimizdə bu ixtisaslar üzrə 400 şagird təhstl alır. Əsas təhsil bazası üzrə 353 nəfər, orta təhsil bazasından 47 nəfər şagirdimiz var. Onların təlim-tərbiyəsi ilə 59 nəfər mühəndis-pedaqoji işçi məşğul olur.

Həmişə çalışırıq ki, bizim məktəbin məzunları sonradan işlə təmin edilsinlər. Ona görə də müxtəlif müəssisələrlə müqavilələr bağlayırıq. Məsələn, "Kür" MMC, Maşınqayırma və nəqliyyat idarəsi, "Məşəl" MMC, "İnter Press" qəzeti redaksiyası, "Didare Metal" MMC və s. dövlət və qeyri-dövlət müəssisə və təşkilatları ilə belə müqavilələr bağlamışıq.

Deyim ki, liseyimizin son vaxtlar maddi-texniki bazası əsaslı şəkildə yenilənmişdir. Müasir kompyuterlər, müxtəlif avadanlıqlar alınıb. 2008-ci ildə Təhsil Nazirliyi ən müasir kompyuterlərlə məktəbimizi təchiz etmişdir. Yeni fənn kabinələri, laboratoriyalar yaradılmışdır.

Məktəbin yerləşdiyi bina müasir tələblərə uyğundur və burada təhsilin və təlimin səmərəli təşkili üçün hər cür şəraiti vardır.

"Kompyuter texnikasının sazlayıcısı" peşəsi üzrə yeni praktik məşğələ emalatxanası yaradılmış və 10 ədəd kompyuterlə təmin olunmuşdur.

Hazırda 12 ümumtəhsil fənn kabineti, 5 praktik məşğələ otağı, 1 gənclərin çağırışaqədərki hazırlıq kabineti, 1 idman zalı şagirdlərin istifadəsindədir. Bundan əlavə, məktəbimizdə 300 nəfərlik akt zalı, 1 konfrans zalı, latın qrafikalı kitablarla təchiz olunmuş, zəngin fondu olan kitabxana, yeməkxana da vardır. Eyni zamanda liseyimizdə ayrıca elektrik təchizatı stansiyası və istixana da fəaliyyət göstərir.

Ötən il "Kür" MMC ilə bağlanmış müqaviləyə əsasən 15 kompyuter alınaraq ayrıca nəzəri ixtisas fənn kabineti yaradılmışdır. Həmin müəssisənin dəstəyi ilə məktəbimizdə diaqnostika laboratoriyası açılmışdır. Bu laboratoriyanın fəaliyyətə başlaması ilə əlaqədar kompyuter texnikasının təmiri üzrə peşənin tədris plan-proqramı hazırlanmış, gələn tədris ilindən həmin peşə üzrə kadr hazırlanması üzrə razılaşma əldə olunmuşdur.

Biz bilirik ki, hazırladığımız kadrlar dövrümüz üçün əhəmiyyətli sahələrdə işləməlidirlər. Ona görə də təhsilin keyfiyyətinə xüsusi diqqət yetiririk.

Bu yaxınlarda peşə təhsili sistemi üçün yeni kurikulum hazırlanır. Bu da söz yox ki, təhsilin keyfiyyətinə öz təsirini göstərəcək.

Beynəlxalq əlaqələr də yaratmaq fikrindəyik. Belə ki, Türkiyənin İzmir şəhərində yerləşən Mazhar Zorlu Anadolu Liseyi ilə "Qardaşlaşmış liseylər" adı altında əməkdaşlıq haqqında razılaşma əldə olunub.

Ümumiyyətlə, çalışırıq ki, məktəbimiz respublikada informasiya texnologiyaları üzrə daha mükəmməl kadrlar yetişdirsin, onlar işlədikləri sahədə öz bilik və bacarıqları ilə fərqlənsinlər.

 

 

Yəhya SƏFƏROV,

7 saylı Bakı Peşə Liseyinin direktoru

 

Xalq qəzeti.- 2010.- 18 may.- S. 8.