Təbii fəlakətlə mübarizə genişlənir
Kür çayının Hacıqabul rayonunun Meyniman kəndi
ərazisində bəndin yarılması nəticəsində
altı yaşayış məntəqəsini su basıb. ANS
TV-nin verdiyi məlumata görə, mayın 23-də gecə
Meyniman kəndindəki bəndin xeyli hissəsi
dağılıb. Nəticədə, Meyniman 1, Meyniman 2, Ələtli,
Ağacanlı, Girvənd və Xilə kəndlərini
daşqın suları ağuşuna alıb.
Dərhal əhalinin
köçürülməsinə başlanılıb. Bu
işə Fövqəladə Hallar Nazirliyinin helikopterləri
də cəlb olunub. Bəndi yarmış su yaxınlıqdan
keçən Şirvan kanalının cənub hissəsindən
Hacıqabul gölünə tərəf istiqamətləndirilib.
Əgər Hacıqabul gölü dolub daşarsa, rayon mərkəzi
də daxil olmaqla ətraf ərazilər təhlükə ilə
üzləşə bilər. Hazırda Fövqəladə
Hallar Nazirliyinin 500-dən artıq canlı qüvvəsi və
çoxsaylı texnikası ərazidə yolçəkmə
və bəndbərkitmə işləri ilə məşğuldurlar.
Nazirliyin rəsmi məlumatına görə, təqribən
70-ə qədər ev daşqın sularının əhatəsində
qalıb.
Azərbaycanda
müşahidə edilən intensiv yağışlar nəticəsində
sel sularından əziyyət çəkən 4 minə
yaxın insan tibbi müayinədən keçirilib. Səhiyyə
Nazirliyinin məlumatına görə, 150 nəfər
hospitallaşdırılıb. Ümumilikdə 79 hamilə
qadın qeydiyyata götürülüb ki, onlardan da 14-ü
artıq dünyaya uşaq gətirib.
Ümumiyyətlə,
çadır şəhərciyində 655 azyaşlı
uşaq var. Onlardan 33-ü - 0,5 yaş arası, 482 uşaq isə
1-5 və 18 yaş arasındadır. Havaların və
çadırların həddən artıq isti olması ilə
əlaqədar profilaktik məqsədlərlə nisbətən
zəif orqanizmli 22 uşaq yaradılmış tibb məntəqələrində
yerləşdirilib. 1 uşaq anadangəlmə sepsislə Səhiyyə
Nazirliyinin Elmi-Tədqiqat Pediatriya İnstitutuna göndərilib.
1 uşağın üzərində cərrahii əməliyyat
aparılıb ki, onun da hazırki vəziyyəti qənaətbəxşdir.
Çadırda olan 33
şəkər xəstəsinə özünənəzarət
aparatları paylanıb, 6 ruhi xəstə nevroloji şöbələrə
yerləşdirilib.
Sel və
daşqından zərər çəkənlərin məskunlaşdığı
yerlərdə yoluxucu xəstəliklərin yaranmasının
və yayılmasının qarşısını almaq məqsədi
ilə gigiyena və epidemiologiya mərkəzləri tərəfindən
dezinfeksiya işləri gün ərzində bir neçə dəfə
aparılır. Fövqəladə vəziyyətlə əlaqədar
təcili tibbi yardım maşınları, eləcə də
fəlakət zonasına yaxın rayonların tibb
işçiləri də səfərbər olunublar. Səhiyyə
Nazirliyi tərəfindən tibbi və sanitar qaydalar nəzarətdə
saxlanır və bu hal təhlükə aradan qalxanadək
davam edəcək.
Mayın 23-də gecə
saat 3 radələrində Aşağı Qarabağa və
Göyçay rayonuna yağan güclü dolu
yaşayış evlərinə, kənd təsərrüfatına
ciddi ziyan vurub. Verilən məlumatlara görə, dolu əsasən
Şatırlı, Kürdoraki, Hacıbəyli, Əyricə
icra nümayəndəliklərinin ərazisinə və rayon
mərkəzinə düşüb. On dəqiqə Qısa
müddət ərzində davam edən yağıntı zaman
dolunun hündürlüyü 10 santimetrə çatıb. Bəzi
evlərə, xüsusən kənd təsərrüfatı
sahələrinə ciddi ziyan dəyib.
Tərtər rayonu ərazisinin
təxminən 70 faizinə də dolu düşüb. Rayon
icra hakimiyyətindən verilən məlumata görə, 7-8 dəqiqə
ərzində əraziyə diametri 3-4 santimetr olan buz
parçaları yağıb. Nəticədə taxıl
tarlalarına, meyvə bağlarına, tərəvəz və
bostan sahələrinə xeyli ziyan dəyib. Evlərin zirzəmilərinə
su dolub. Təbii fəlakət nəticəsində dəymiş
ziyanın miqdarı müəyyənləşdirilir.
Telman ƏLİYEV
Xalq qəzeti. – 2010.- 25 may.- S. 6.