Yeni təhsil ocağı Milli Qəhrəmanın adını
daşıyır
Biləsuvar şəhərində
yeni lisey-məktəb kompleksinin açılışı
olub. Regionların İnkişafı Dövlət Proqramı
çərçivəsində Mərkəzi Bankın vəsaiti
hesabına inşa olunmuş təhsil ocağına Milli Qəhrəman
Mübariz İbrahimovun adı verilib.
Tədbir
iştirakçıları əvvəlcə ulu öndər
Heydər Əliyevin Biləsuvarın mərkəzindəki
abidəsini ziyarət etdilər. Azərbaycanın ərazi
bütövlüyü uğrunda canlarından keçən
Biləsuvar şəhidlərinin xatirəsi də yad olundu.
Tədbir
Dövlət himinin sədaları altında təhsil
ocağının qarşısında Azərbaycan
bayrağının qaldırılması ilə
başlandı. Mərasimdə Milli Qəhrəman Mübariz
İbrahimovun ailə üzvləri, şəhər ictimaiyyətinin
nümayəndələri, kompleksin müəllim və
şagird kollektivləri iştirak edirdi. Kompleksin direktoru Anar Məmmədov
tədbiri açaraq kollektivin təhsil ocağına Milli Qəhrəman
Mübariz İbrahimovun adının verilməsindən
qürur duyduğunu bildirdi. Mərkəzi Bankın idarə
heyətinin sədri Elman Rüstəmov bu təhsil
ocağının Prezident İlham Əliyevin təşəbbüsü
ilə inşa olunduğunu bildirdi. Qeyd etdi ki, yeni lisey-məktəb
kompleksinin fəaliyyəti həm Biləsuvar rayonu, həm də
bütün bölgə üçün mühüm hadisədir.
Burada ətraf rayonların da istedadlı və qabiliyyətli
uşaqları təhsil ala biləcəklər. Natiq əsası
ulu öndər Heydər Əliyev tərəfindən qoyulan təhsil
islahatlarının ölkəmizdə böyük uğurla həyata
keçirilməsindən, Prezident İlham Əliyevin təhsilə
göstərdiyi qayğıdan, Heydər Əliyev Fondunun təhsillə
bağlı təşəbbüslərindən
danışaraq dedi ki, son 7 ildə ölkəmizdə 1600 təhsil
ocağı tikilib və əsaslı təmir olunub. Bu
müddətdə təhsilin inkişafı ilə
bağlı 16 dövlət proqramı hazırlanıb. Lisey-məktəb
kompleksinə Milli Qəhrəman Mübariz İbrahimovun
adının verilməsini mühüm hadisə adlandıran
Elman Rüstəmov binanın ən müasir standartlar səviyyəsində
inşa olunduğunu bildirdi.
Biləsuvar
Rayon İcra Hakimiyyətinin başçısı Adil Məmmədov
da təhsilimizin inkişafından, rayonda bu sahədə
görülən işlərdən danışdı.
Mübariz İbrahimovun xatirəsinin dövlətimiz tərəfindən
daim uca tutulucağını və yaxın gələcəkdə
kompleksin qarşısında Milli Qəhrəmanın abidəsinin
ucaldılacağını bildirdi.
Şəhidin
atası Ağakərim İbrahimov oğlunun adının uca
tutlumasından razılığını
çatdırdı. Öz növbəsində Ali Baş
Komandan İlham Əliyev tərəfindən Mübariz
İbrahimovun ölkəmizin müstəqilliyinin və ərazi
bütövlüyünün qorunub saxlanılmasında
müstəsna xidmətlərinə və göstərdiyi rəşadətə
görə Milli Qəhrəman adına layiq görülməsini
yüksək qiymətləndirdi və buna görə ailəsi
adından dövlət başçısına minnətdarlığını
bildirdi.
Tədbirdə
çıxış edən liseyin müəllimləri Milli
Qəhrəman Mübariz İbrahimovun adını
daşıyan bu təhsil ocağının onlarda Vətənə
məhəbbət, xalqa xidmət hissini daha da
artırdığını, milli təhsilimizin
inkişafına stimul verdiyini bildirdilər. Şagirdlərin
ifasında Vətənə, qəhrəmanlığa və
Mübariz İbrahimovun igidliyinə həsr edilmiş şeirlər
səsləndi.
İlk
zənginin çalınmasından sonra Milli Qəhrəman
Mübariz İbrahimov adına lisey-məktəb kompleksinin
açılışı oldu. Bildirildi ki, 3 mərtəbəli
kompleksdə 28 sinif, müəllimlər otağı, fənn
kabinetləri, kompyuter və idman zalları var. Məktəb
bütün zəruri avadanlıq və tədris vəsaitləri
ilə təmin olunub. Geniş və zəngin kitabxanadan 100-yə
yaxın şagird eyni vaxtda istifadə edə bilər.
Kompleksin 210 nəfərlik yeməkxanasında gün ərzində
2 dəfə şagirdlərin pulsuz yeməklə təmin
edilməsi nəzərdə tutulub. Liseyin binasında
video-müşahidə kameraları quraşdırılıb.
"Açıq sinif" otağında valideynlər dərslərin
gedişini heç bir maneə olmadan izləyə bilərlər.
Məktəbdə müasir standartlara cavab verən bilologiya,
kimya və fizika laboratoriyaları da fəaliyyət göstərir.
Bütün bu şəraitdən ən çox sevinən məhz
şagirdlərdir.
Qeyd
edək ki, Milli Qəhrəman Mübariz İbrahimovun
adını daşıyan lisey-məktəbə şagirdlər
və müəllimlər TQDK tərəfindən
hazırlanmış test üsulu ilə silsilə imtahanlar
verməklə müsabiqə yolu ilə qəbul olunublar.
Hazırda məktəbdə 107 şagird təhsil alır.
Növbəti dərs ilindən isə onların sayı daha
da artacaq. Məktəbin pedaqoji kollektivi 34 nəfərdən
ibarətdir.
Açılış
mərasimində belə bir qətiyyət ifadə edildi ki,
kollektiv etimadı doğruldacaq və tezliklə ölkənin
ən qabaqcıl təhsil müəssisələrindən
birinə çevriləcək.
Əli NƏCƏFXANLI
Xalq qəzeti.- 2010.- 20 oktyabr.- S. 5.