Moskvadan “Yubiley medalı” və fəxri diplom

Əsrlərdən bəri Azərbaycan mədəniyyətinin və ədəbiyyatının dünya arenasına çıxmasında mühüm vasitə olmuş rus dili bu gün də yaradıcı ziyalılarımızın beynəlxalq aləmdə təbliğ olunmasında özünəməxsus rol oynayır. Müstəqilliyin ilk illərində yol verilmiş bəzi səhvlər istisna olmaqla Azərbaycan — Rusiya mədəni əlaqələri daim yüksək səviyyədə olmuş, qarşılıqlı təcrübə mübadiləsi hər iki mədəniyyətin zənginləşməsinə xidmət etmişdir. Xüsusən, ulu öndər Heydər Əliyevin 1993-cü ilin payızında söylədiyi “Azərbaycan və rus mədəniyyətlərini əsrlərin sınağından çıxmış əməkdaşlıq telləri bir-birinə möhkəm bağlayır” — ifadəsi tarixi kökləri olan əlaqələrin daha da genişlənməsinə zəmin yaratmışdır.

Təsadüfi deyil ki, son illər Rusiya mədəniyyətinin və ədəbiyyatının görkəmli nümayəndələri Azərbaycanda, azərbaycanlı yaradıcı ziyalılar isə Rusiyada geniş şəkildə təbliğ olunur, yüksək qiymətləndirilirlər. Bu baxımdan Azərbaycan, Türkiyə və Rusiya Federasiyası yazıçılar birliklərinin, eləcə də Avrasiya Yazıçılar Liqasının üzvü, yazıçı-filosof Hacı Fərhad Mirzənin yaradıcılığının dost ölkədə maraqla qarşılandığı Azərbaycan oxucularına yaxşı məlumdur. Soydaşımızın Ankarada Türk Dünyası Araşdırmaları Uluslararası Elmlər Akademiyasının xətti ilə nəşr edilmiş “Kəlamlar” kitabı rusiyalı mütəxəssislərin də diqqətini çəkmişdir. Bu kitab Rusiya Federasiyası Yazıçılar İttifaqı Moskva şəhər təşkilatının sifarişiylə rus dilinə tərcümə edilmiş və Moskva mətbuatında azərbaycanlı müəllifin kitabı haqqında təsdiqedici fikirlər səsləndirilmişdir. Kitabı ruscaya fəlsəfə elmləri doktoru, professor Əli Abbasov tərcümə etmişdir. Diqqət çəkən xüsusi məqamlardan biri də odur ki, “Kəlamlar” kitabı ingilis dilinə də Azərbaycan dilindən deyil, məhz rus dilindən tərcümə olunmuşdur. Bu fakt isə yazının əvvəlində qeyd etdiyimiz kimi, Azərbaycan ədiblərinin dünya arenasına çıxmasında rus dilinin oynadığı rolun təsdiqi kimi qəbul edilir.

Yeni ilin ilk ongünlüklərində “Kəlamlar” kitabı Moskvada çap edilərək Rusiya oxucularına təqdim olunacaq. 2009-cu ilin son günlərində isə Moskvadan Bakıya — Hacı Fərhad Mirzənin ünvanına xoş xəbər gəlmişdir. Rusiya Federasiyası Yazıçılar İttifaqı Moskva şəhər təşkilatı idarə heyətinin sədri V.Qusev və bu təşkilatın baş direktoru Vladimir Boyarinovun imzası ilə göndərilən məktubda göstərilir: “Hacı Fərhad Mirzə (Azərbaycan) ölkə ədəbiyyatına inamlı xidmətlərinə görə ”Rusiya Yazıçılar İttifaqı Moska şəhər təşkilatının 55 illiyi — 1954-2009" yubiley medalı təqdim olunmaqla 2009-cu ilin Fəxri Diplomuna layiq görülür".

Qeyd edək ki, azərbaycanlı müəllifin bu kitabı indiyədək ölkə, Avropa və Avrasiya miqyaslı bir çox mükafatlara layiq görülmüşdür. Ancaq BMT yanında İctimai Təltiflər Şurasının Hacı Fərhada verdiyi “A.S.Puşkin adına Qızıl medal” Rusiyanın ədəbiyyat xadimləri tərəfindən daha yüksək qiymətləndirilir. Azərbaycanı beynəlxalq aləmdə layiqincə təmsil edən bütün soydaşlarımıza yeni-yeni uğurlar arzulayırıq.

Əlibəy MÜSƏDDİQ

Xalq qəzeti.- 2010.- 7 yanvar.- S. 6.