Şəhidlərin xatirəsinə
böyük ehtiram
Nəsimi rayonunda 20 Yanvar şəhidlərinin xatirəsini
anma mərasimi keçirildi. Əvvəlcə 20 Yanvar və
A.Məhərrəmov küçələrinin kəsişməsində
həmin hadisə zamanı canlarını Vətən
uğrunda qurban vermiş soydaşlarımızın xatirəsinə
ucaldılmış abidə önünə gül dəstələri
düzüldü.
Sonra 20 Yanvar əlilləri
və şəhid ailələrinin, rayon ictimaiyyətinin
nümayəndələrinin iştirakı ilə tədbir
keçiridi. Tədbiri açan Nəsimi Rayon İcra Hakimiyyətinin
başçısı Nəsib Məhəməliyev dedi ki,
xalqımıza qarşı törədilmiş amansız
cinayətdən 20 il ötür. O vaxt Azərbaycana
qarşı edilən bu qəddar qanlı aksiyanın məqsədi
ölkəmizdə genişlənən milli-azadlıq hərəkatını
boğmaq, əzəli torpağımız olan Qarabağı
Azərbaycandan ayırıb Ermənistana verilməsinə
etiraz edən xalqı qorxutmaq və cəzalandırmaq idi. Lakin
düşmənlərimiz istəklərinə çata bilmədilər
və xalqımız bütün çətiniklərə və
məhrumiyyətlərə baxmayaraq, azadlığa
qovuşmuş və öz müstəqil dövlətini
qurmuşdur. Elə suveren və çiçəklənən
Azərbaycanın mövcudluğu 20 Yanvar hadisələrində
şəhid olmuş qardaş və
bacılarımızın müqəddəs ruhları
üçün ən böyük təsəllidir.
Natiq bildirdi ki, 20 Yanvar hadisələrinə hüquqi və siyasi qiymət ikinci dəfə hakimiyyətə qayıdan ulu öndərimiz Heydər Əliyevin qətiyyəti və prinsipiallığı sayəsində verilmşdir. Şəhidlərin xatirəsinin uca tutulması ilə bağlı işlər həmişə ümummilli liderimizin diqqət mərkəzində olmuş və o həmin hadisələrdə əlil olmuş insanlara və şəhid ailələrinə qayğısını əsirgəməmişdir. 20 Yanvar əlilləri və şəhid ailələrinə diqqət və qayğı, onların problemlərinin həlli dövlətimizin və möhtərəm Prezidentimiz İlham Əliyevin həmişə önəm verdiyi məsələlərdəndir.
Sonra Nəsib Məhəməliyev Nəsimi rayon 20 Yanvar Cəmiyyətinin sədri Tofiq Allahverdiyevə Nəsimi Rayon İcra Hakimiyyətinin fəxri fərmanını təqdim etdi.
Respublika 20 Yanvar Cəmiyyətinin sədr müavini Tahir Fətullayev çıxışında dövlətimizin 20 Yanvar əlillərinə və şəhid ailələrinə göstərdiyi qayğıdan danışaraq bildirdi ki, bu istiqamətdə Nəsimi rayonunda böyük işlər görülür. O qeyd etdi ki, rayonda bu kateqoriyadan olan insanların bütün problemləri vaxtında həll olunur və həmin fəaliyyətinə görə respublika 20 Yanvar Cəmiyyəti Nəsimi rayonu rəhbərliyinə minnətdarlığını bildirir. T.Fətullayev bununla əlaqədar Nəsimi Rayon İcra Hakimiyyətinin başçısı Nəsib Məhəməliyevin cəmiyyətin fəxri fərmanı ilə təltif olunduğunu bildirdi. Fəxri fərman N.Məhəməliyevə təqdim olundu. Sonra millət vəkili, YAP Nəsimi rayon təşkilatının sədri Məlahət İbrahimqızı və Nəsimi rayon 20 Yanvar Cəmiyyətinin sədri Tofiq Allahverdiyev çıxış etdilər.
Şəhidlərin xatirəsinə ehsan süfrəsi açıldı. H.Sarabski adına Mədəniyyət evi üzvlərinin ifasında 20 Yanvar mövzusunda ədəbi-bədii kompozisiya göstərildi.
Sonda 20 Yanvar əlillərinə və şəhid ailələrinə maddi yardım verildi.
Ayaz HƏMİDOĞLU
Xalq qəzeti.- 2010.- 19 yanvar.- S. 5