Vəli Qədimovun xatirəsi yad edildi

Bu günlərdə Mədəniyyət və Turizm Nazirliyinin dəstəyi və bilavasitə təşəbbüsü ilə respublikanın xalq artisti, ömrünün 40 ildən çoxunu Azərbaycan xalq musiqisinin təbliğinə həsr etmiş mahir klarnet ifaçısı Vəli Qədimovun anadan olmasının 70 illiyinə həsr olunmuş anım mərasimi keçirildi.

Muğam Teatrında düzənlənən bu tədbirə dəvət olunan qonaqların əksəriyyəti də məhz Vəli Qədimovu yaxından tanıyan dost – tanışları, Vəli sənətinin pərəstişkarları və təbii ki, onunla çiyin-çiyinə çalışan sənət dostları idi. Anım günündə respublikanın ən ünlü sənətçiləri sırasında xalq artistləri Arif Babayev, Canəli Əkbərov, Aftandil İsrafilov, Sadıq Zərbəliyev, Ağasəlim Abdullayev, Teymur Mustafayev, əməkdar artist Kəmalə Rəhimli və onlarca digər sənətçi var idi.

Tədbir Vəli Qədimovun ifasında kövrək “Vağzalı ”ilə başladı, daha sonra məclisi giriş sözüylə açan Muğam Teatrının direktoru Arif Qazıyev öncə Vəli Qədimovun zəngin yaradıcı ömür yolundan, bu yolda qazandığı uğurlardan söz açdı. Yaradıcılığının 35 ildən çoxunu Zeynəb Xanlarovanın rəhbərlik etdiyi ansanblın üzvü kimi dünyanı gəzən Vəli Qədimovun bir çox oyun havalarının müəllifi kimi də tanındığını açıqladı.

Ötən əsrin 70-ci illərindən başlayaraq Vəli Qədimov, Aftandil İsrafilov və gitaraçı Ramiz Həsənov üçlüyündən söz açdı. Bu üçlüyün ifasında lentə alınmış “Qazağı”, “Tərəkəmə”, eləcə də Vəlinin özünün bəstələdiyi “Famili”, “Fuadı”, “Dalğalar” və onlarca digər oyun havalarının xalq tərəfindən bu gün də həvəslə dinlənildiyini qeyd etdi.

Daha sonra Vəli Qədimov sənətinə dərin hörmət bəsləyən xalq artistləri Arif Babayev, Canəli Əkbərov, Aftandil İsrafilov xatirələrini dilə gətirməklə yanaşı öz ifalarıyla da məclisi bəzədilər. Tədbir Vəli Qədimovun ifasında kövrək “Vağzalı” ilə başlasa da, sonda bu kövrək melodiyanı Əli Mirəliyev, Nüşabə Ələskərova, Kəmalə Rəhimli, Ruhəngiz Allahverdiyeva, Əfqan Quliyev və bir çox digər sənətçilərin şux mahnıları əvəz etdi.

Tədbirin sonunda Vəli Qədimovun həyat yoldaşı Xatirə Qədimova ailələri adından Mədəniyyət və Turizm Nazirliyinə, Muğam Teatrının rəhbəri Arif Qazıyevə və tədbir iştirakçılarına öz dərin təşəkkürünü bildirdi.

Rafiq SALMANOV

Xalq qəzeti.- 2010.- 27 yanvar.- S. 7.