Misir Ərəb Respublikasında Azərbaycan Mədəniyyəti Günləri

Azərbaycan Respublikası Hökuməti və Misir Ərəb Respublikasının Hökuməti arasında mədəniyyət sahəsində əməkdaşlığa dair sazişə uyğun olaraq 24-28 yanvar 2010-cu il tarixində Misir Ərəb Respublikasında Azərbaycan Mədəniyyəti Günləri keçirilir. Bu barədə Mədəniyyət və Turizm Nazirliyinin mətbuat xidməti xəbər yayıb.

Mədəniyyət Günləri çərçivəsində Misirin Qahirə və İsgəndəriyyə şəhərlərində Azərbaycan incəsənət xadimlərinin iştirakı ilə konsertlər, rəsm əsərləri və xalq tətbiqi-dekorativ sənət nümunələrindən ibarət sərgilər nümayiş etdirilir.

Mədəniyyət Günlərinin yüksək səviyyədə keçirilməsini təmin etmək məqsədilə yanvarın 24-də böyük nümayəndə heyəti Qahirə şəhərinə gəlmişdir. Rəsmi nümayəndə heyətinin tərkibinə Bakı Şəhər Mədəniyyət və Turizm idarəsinin rəisi Əlikram Əliyev, M.F.Axundov adına Milli Kitabxananın direktoru Kərim Tahirov daxildir. Mədəniyyət günlərinin konsert proqramına Ü. Hacıbəyovun, Q.Qarayevin, F.Əmirovun, S.Ələskərovun, T.Quliyevin əsərləri, folklor musiqisi daxil edilmişdir. Dövlət Rəqs Ansamblının bir qrup üzvü zərif milli rəqslərimizi ifa edəcək.

Solistlərdən xalq artisti, vokalçı Azər Zeynalov, xalq artisti, xanəndə Nəzakət Teymurova, əməkdar artist, vokalçı Gülnaz İsmayılova, xalq artisti, xanəndə Mənsum İbrahimov, əməkdar artistlər Elçin Həşimov (tarzən), Elnur Əhmədov (kamançada), qarmonda Etibar Qasımbəyli, aşıq Samirə Əliyeva, əməkdar artist, ud ifaçısı Mircavad Cəfərov, nağaraçı Kamran Kərimov, kanon ifaçısı Çinarə Mütəllimova kimi məharətli ifaçılarımızın çıxışları da proqrama salınmışdır. Azərbaycan nümayəndə heyəti Qahirədən sonra , yanvarın 27-də İsgəndəriyyə şəhərində olacaqdır.

M.MÜKƏRRƏMOĞLU

Xalq qəzeti.- 2010.- 27 yanvar.- S. 5.