"Xəcalət" yenə səhnədə

Dünən Akademik Milli Dram Teatrının səhnəsində oynanılan, yazıçı-dramaturq Hüseynbala Mirələmovun "Xəcalət" əsəri yenə də tamaşaçılarına kəskin dramatik hisslər yaşatdı. Tamaşanın 31 Mart - Azərbaycanlıların Soyqırımı Günündə nümayişinin də öz məramı var idi.Tamaşa başlamazdan əvvəl çıxış edən yazıçı-dramaturq Hüseynbala Mirələmov bunu belə açıqladı:

- Tarix göstərir ki, unutqanlıq, həqiqətlərin, faciələrimizin qan yaddaşımızdan silinməsi xalqımızın soyqırım faciələrini təkrar-təkrar yaşamasına, mədəniyyətimizin, varlığımızın talanmasına, milli qürurumuzun alçaldılmasına gətirib çıxarmışdır. Xüsusilə vandal erməni millətçilərinin xalqımıza qarşı 1905-ci ildən başlayan soyqırımına qarşı unutqanlığımız nəticədə əzəli Azərbaycan torpaqlarında az qala ikinci erməni dövlətinin yaradılmasına şərait yaratmışdır.

Şübhəsiz, burada ən böyük bəla laqeydliyimiz, bu barbar soyqırım siyasətinin son hədəfinin arxasında nələrin dayandığını görməməyimiz olmamışdır. Məncə, az qala 100 ildən artıq bizə qarşı olan soyqırım faktları, genefondumuzu məhv etmək üçün atılan namərd addımlar, dünyanın haqqımıza ədalətsiz yanaşması yetər ki, bir nəticə çıxarıb qərar verək. Qərar verək ki, bundan sonrakı günlər, illər üçün heç bir Azərbaycan övladı xəcalət çəkməsin.

Sonda yazıçı-dramaturq bu möhtəşəm mədəniyyət ocağının ən müasir səviyyədə təmiri və bərpasına görə Azərbaycan Respublikasının Prezidenti cənab İlham Əliyevə incəsənət işçiləri, ziyalılar və teatrsevərlər adından minnətdarlıqlarını bildirdi və qeyd etdi ki, bu artıq xalqımızın öz taleyinin sahibi olduğundan və milli-mənəvi, mədəni varlıqlarımıza verdiyi dəyərdən xəbər verir.

Sonra əməkdar incəsənət xadimi Bəhram Osmanovun quruluşunda 2006-cı il iyunun 16-dan Akademik Milli Dram Teatrının repertuarından çıxmayan "Xəcalət" tamaşası başladı. Dəfələrlə oynanılmasına baxmayaraq, yenə də teatr salonunda bir dənə də olsun boş yer yox idi. Anşlaqla keçən tamaşada hisslərini boğa bilməyib ağlayanlar isə yenə az olmadı.

İlqar RÜSTƏMOV,

Rafiq SALMANOV

Xalq qəzeti.- 2011.- 2 aprel.- S. 5.