Sabirabad rayonunda Çernobıl əlillərinə xüsusi diqqət göstərilir

Bu günlərdə Sabirabad rayonunda Çernobıl faciəsinin 25-ci ildönümü münasibətilə həmin faciənin aradan qaldırılmasında iştirak etmiş vətəndaşlarla görüş keçirildi.

Tədbir iştirakçıları faciə qurbanlarının xatirəsini bir dəqiqəlik sükutla yad etdilər. Rayon icra hakimiyyətinin başçısı Nazim İsmayılov çıxış edərək bildirdi ki, dünyanın ən dəhşətli qəzası olan Çernobıl faciəsindən 25 il keçməsinə baxmayaraq, bu qəzanın fəsadları hələ də qalmaqdadır. Həmin dövrdə SSRİ-yə rəhbərlik edən Mixail Qorbaçov hər vəchlə qəzanın ağır nəticələrini xalqdan gizlətməyə çalışırdı. Ümummilli liderimiz Heydər Əliyev Siyasi Büronun yeganə üzvü idi ki, faciənin gizlədilməsinə qarşı çıxdı və baş vermiş hadisənin xalqa doğru-dürüst çatdırılmasına təkid etdi.

Qeyd olundu ki, Çernobıl qəzasının nəticələri Azərbaycandan da yan keçməmişdir. Qəzanın nəticələrinin aradan qaldırılmasında 7 mindən çox həmvətənimiz iştirak etmiş, Sabirabaddan da bu iş üçün yüz nəfərdən çox insan səfərbər olunmuşdu. 1993-cü ildə ümummilli liderimiz Heydər Əliyev Çernobılda baş vermiş qəzanın nəticələrinin aradan qaldırılmasında iştirak edən Azərbaycan vətəndaşlarının statusu haqqında sənəd imzalamaqla bu kateqoriyadan olan insanlara diqqət və qayğısını bir daha nümayiş etdirdi. Bu qayğı və diqqət ölkə Prezidenti cənab İlham Əliyev tərəfindən də uğurla davam etdirilir. Çernobıl iştirakçılarının müavinətləri dəfələrlə artırılıb, onların sosial müdafiəsi gücləndirilib. Bu il aprelin 22-də isə dövlət başçısının növbəti sərəncamı ilə Çernobol qəzasında zərər çəkimş şəxslərə 200 manat məbləğində birdəfəlik maddi yardım göstərilməsi qərara alınıb.

Çernobıl əlillərindən Əzizağa Quliyev, Naib Nəcəfov, Tahir Feyzullayev və başqaları çıxış edərək onlara göstərilən diqqət və qayğıya görə, ölkə Prezidenti İlham Əliyevə minnətdarlıqlarını bildirdilər. Onlara qarşı həssas münasibətə görə rayon rəhbərliyinə də razılıqlarını ifadə etdilər.

Tədbirdə həmçinin xidmət təşkilatları rəhbərlərinin məlumatları da dinlənildi və onlara əlillərin qaldırdıqları məsələlərin ən qısa müddətdə həlli tapşırıldı. Axırda Çernobıl əlillərinə maddi yardım göstərildi.

Səməd HÜSEYNOĞLU

Xalq qəzeti.- 2011.- 27 aprel.- S. 10.