Görkəmli alim, gözəl insan...

 

Akademik Zərifə Əliyeva adına Zaqatala şəhər texniki fənlər təmayüllü liseydə görkəmli oftalmoloq alimin anadan olmasının 88-ci ildönümünə həsr olunmuş "Azərbaycan qadınının tərənnümü" mövzusunda tədbir keçirilmişdir.

 

Tədbirdə Zaqatala Rayon İcra Hakimiyyətinin başçısı Mübariz Əhmədzadə, rayon ictimaiyyətinin nümayəndələri, ziyalılar və gənclər iştirak etmişlər.

İlk öncə tədbir iştirakçıları lisey şagirdlərinin əl işlərindən ibarət sərgiyə baxış keçirmişlər.

Tədbirdə Zaqatala Rayon İcra Hakimiyyəti başçısının müavini Zümrüd Ağakişiyevanın "Xeyirxah insan, fədakar ana" mövzusunda məruzəsi dinlənilmişdir. Məruzəçi akademik Zərifə xanım Əliyevanın mənalı həyatı və yorulmaz fəaliyyəti , onun Azərbaycanda oftalmologiya elminin inkişafı üçün göstərdiyi səylər barədə məlumat vermiş, onun Azərbaycan xanımlarının bütün gözəl xüsusiyyətlərini özündə birləşdirmiş insanlıq, qadınlıq meyarı olduğunu qeyd etmişdir.

Məruzəçi ömürlərə sevinc, gözlərə nur bəxş etmiş görkəmli oftalmoloq alim, akademik Zərifə Əliyevanın xalqımızın yaddaşından heç vaxt silinməyəcəyini xüsusi vurğulamışdır.

Tədbirdə "Qoşa ömür yolu", "İşgüzar qadın" və "Örnək ana" adlı şagird təqdimatları nümayiş etdirilmiş, məktəblilərin ifasında ədəbi-bədii kompozisiya göstərilmişdir.

Daha sonra rayon icra hakimiyyətinin başçısı Mübariz Əhmədzadə akademik Zərifə Əliyevanın 88-ci ildönümü ilə əlaqədar liseydə keçirilmiş bilik və idman yarışlarının, əl işləri və inşa müsabiqələrinin qaliblərinə fəxri fərman və qiymətli hədiyyələr təqdim etmişdir.

 

 

İ.MUSAOĞLU

 

Xalq qəzeti.- 2011.- 29 aprel.- S. 6.