17 fevral
Qaradağlı faciəsinin 19-cu ildönümüdür.
Erməni vəhşiliyinin
qanlı səhifəsi
1992-ci
il fevralın 17-də Dağlıq Qarabağın erməni
separatçıları Ermənistanın silahlı quldur dəstələrinin
və 366-cı sovet alayının köməyi ilə Xocavənd
rayonunun Qaradağlı kəndində dəhşətli
soyqırım törətmişlər. Soydaşlarımız
hər il faciə qurbanlarının xatirəsini dərin
ehtiramla yad edirlər.
Bir zamanlar Qarabağda gələcək müsibətlərdən xəbərsiz, çal-çağırlı, barlı-bağatlı, dəfələrlə tarixin amansız acılarını mərdliklə dəf etmiş Qaradağlı adlı kənd vardı. Təbiət bu yerlərə bütün gözəlliklərini bəxş etdiyi kimi, tarix də bu kəndin adamlarını bütün sınaqlardan üzüağ çıxarmışdı. XX əsrdə ermənilər Qaradağlını beş dəfə - 1905, 1907, 1915, 1918 və 1992-ci illərdə dağıtmışlar.
Sovetlər dövründə də dinc dayanmayan ermənilər Dağlıq Qarabağda soydaşlarımızı sıxışdırır, milli münaqişəni daim qızışdırır, hətta terror törətməkdən belə çəkinmirdilər. 1967-ci ildə milli münaqişə yaratmaq üçün əslən Qaradağlı kəndindən olan 3 nəfərə böhtan ataraq həbs etdirən ermənilər məhkəmə prosesi zamanı, Xankəndində sovet əsgərlərinin gözü qarşısında bu adamların başlarını kəsib, üzərlərinə benzin töküb yandırmışdılar. Sonrakı illərdə də onlar bu düşmənçiliyi açıq-gizli davam etdirmişdilər.
1988-ci il 12 fevralda ermənilərin separatçılıq niyyətlərini açıq şəkildə bəyan etməsi ilə Qarabağ münaqişəsi başlandı. Hadisələrin ilk günlərindən Dağlıq Qarabağda yaşayan azərbycanlılar öz haqq səslərini ucaltsalar da heç bir nəticə vermədi. Münaqişə getdikcə genişləndi, qanlı xarakter aldı. Respublikanın o vaxtkı rəhbərliyinin qorxaqlığı, səriştəsizliyi və maymaqlığı ermənilərin daha da azğınlaşmasına gətirib çıxartdı. Kəndlər, şəhərlər yandırıldı, talan edildi.
Qarabağ münaqişəsində erməni vəhşiliyinin qurbanı olan bölgələrdən biri də Xocavənd rayonudur. Gec də olsa, 1991-ci il 26 noyabr tarixdə Dağlıq Qarabağ Muxtar Vilayəti ləğv ediləndə Martuni və Hadrut rayonlarının bazası əsasında Xocavənd rayonu yaradıldı. Lakin 1 il keçməmiş - 1992-ci il 2 oktyabr tarixdə Ermənistan silahlı birləşmələri rayonu işğal etdi. Erməni təcavüzü nəticəsində soydaşlarımızdan 145 nəfər qətlə yetirildi. Bu rayonun azərbaycanlı əhalisinin hər 50 nəfərindən biridir. 300 nəfərdən çox rayon sakini isə sağlamlığını itirmişdir. Hazırda rayon əhalisi məcburi köçkün kimi ölkənin 36 rayonunda məskunlaşmışdır.
Xocavəndin ən çox itki verən və böyük döyüş yolu keçən kəndlərindən biri Qaradağlıdır. Bütövlükdə 20-yə yaxın erməni kəndinin əhatəsində olan Qarabağlı kəndi Xankəndi yolunun üstündə yerləşirdi. 4 il quldurların bu yoldan gediş-gəlişi kəsilmişdi və onlar digər erməni kəndlərindən keçib getməli olurdular. Öz kəndlərini kənar kömək olmadan müdafiə edən qaradağlılar doğma obanın hər daşı, hər qayası uğrunda sonadək mübarizə apardılar.
Bu 4 ildə Qaradağlının başına nələr gəlmədi? Bu xronikanın dəhşətli səhifələri qan rəngindədir, unudulmazdır. 24 noyabr 1990-cı il tarixdə Xocavənd yolunda sərnişinlərindən biri Qaradağlı kəndindən, ikisi qonaq olan avtomobili ermənilər atəşə tutmuş, onların hər üçünü vəhşicəsinə qətlə yetirmiş, sinələrinə güllə ilə xaç şəkli çəkmişdilər. 9 yanvar 1991-ci il tarixdə bütünlüklə erməni məntəqələrinin əhatəsində olan kəndə gələn UAZ markalı avtomaşını erməni quldurları atəşə tutdular - Soltan Bayramov öldürüldü, 4 nəfər yaralandı. Nemət Səmədov və Əfqan Əzizov sonralar aldıqları yaralardan dünyalarını dəyişdilər. 8 mart 1991-ci ildə kəndin ətrafında Dəmir Hüseynov və Ələkbər Quliyev vəhşicəsinə qətlə yetirildi.
28 iyun 1991-ci il tarixdə "Vərəndəli" adlanan yerdə fermada erməni qurdurları 6 uşaq atası Tağıyev Bakir Qaçay oğlunu, 11 uşaq atası Məmmədov Tohid Cəlil oğlunu, 2 uşaq atası Şirinov İltifat Əjdər oğlunu, 8 övlad anası Şirinova Qaragöz Həbib qızını və övladları Hüseynova Səbiqa və Hüseynova Məxmər Məcid qızı ilə birlikdə qətlə yetirdilər.
Növbəti
qanlı terror hadisəsi 1991-ci il 8 sentyabr tarixdə baş
verdi. Ağdamdan Qaradağlıya gələn sərnişin
avtobusu Xocavənd - Xankəndi yolunda pusquda durmuş erməni
quldurları tərəfindən güclü atəşə
tutuldu, 40 nəfərə yaxın adamdan 6-sı qadın
olmaqla, 8 nəfər qətlə yetirildi. Həmin gün
Quliyev Əloğlan Ələslan oğlu, Quliyev Gündüz
Əlqəmə oğlu, Quliyeva Nazənin Rəşid
qızı, Hüseynova Rahilə Şahmar qızı,
Hüseynova Rəxşəndə Bayram qızı,
Hüseynova Qənirə Həmid qızı, Hüseynova
Gülzəndə Bəkir qızı və Babayeva Validə
Həmid qızı şəhid oldular. Avtobusda olan kənd
sakinlərindən Hüseynov Əvəz Mahmud oğlu,
Hüseynov Zülümxan Miriş oğlu, Hüseynova
Ürüzgar Pəsi qızı, Hüseynova Göyçək
Həmid qızı və Əzizov İltifat Yelmar oğlu
aldıqları ağır yaralardan sonradan vəfat etdilər.
Yerdə qalan 21 kənd sakinindən 1 nəfəri qadın
olmaqla, 7 nəfər müxtəlif ağırlıqlı
güllə yaraları almışdılar.
Get-gedə
daha da azğınlaşan ermənilər 8 yanvar 1992-ci il
tarixdə Böyük Vətən müharibəsi
iştirakçısı Qasım Əliyevi və 23
yaşlı Məzahir Gülverdiyevi qətlə yetirdilər.
Hər iki şəhidin meyidi böyük çətinliklə
vertolyot vasitəsilə kənddən
çıxarıldı. Artıq Qaradağlının
mühasirə halqası tam sıxılırdı. Xocavənd
19 noyabr 1991-ci ildə işğal edildi. Kəndə yaxın
olan Malıbəyli 12 fevral 1992-ci il tarixdə
yandırıldı. Hamıya aydın idi ki, növbəti hədəf
Qaradağlıdır. Kənddə vəziyyət getdikcə
çətinləşir, faciənin törədiləcəyi
gün hər saat yaxınlaşırdı.
Fevral
ayının 14-də Kənxurd, Qağarza, Ağkənd,
Aşan, Müşkabad, Ninqi və digər erməni kəndləri
istiqamətindən quldurlar xarici muzdluların və Xankəndində
yerləşən sovet ordusunun 366-cı alayının
texnikasından və canlı qüvvəsindən istifadə
etməklə, əlaqəsi hər tərəfdən kəsilmiş,
köməksiz qalmış Qaradağlıya sürətli
hücuma keçdilər. Az miqdarda, adi silahları olan
qaradağlılar düşmənlə qeyri-bərabər
döyüşə girdilər.
Fevralın
14-də məktəb direktoru Zeynalov Nobil Əliş oğlu,
Hüseynov Xanalı Həbib oğlu, Həsənov Altay Məhəmməd
oğlu, Dadaşov Manaf İslam oğlu həlak oldular.
Hüseynov Əsgər Səməd oğlu, Bayramov Rəşid
Həşim oğlu, Rüstəmova Zivər Abdıhüseyn
qızı isə səhərisi gün qətlə yetirildilər.
16-17 fevralda Bayramov Arif İbrahim oğlu, Dadaşov Eldar
İsa oğlu, Hüseynov Şahmurad Abdıhüseyn oğlu,
Hüseynov Dəmir Musa oğlu, məktəbli Hüseynov Fədail
Zülfüqar oğlu, Kərimov Əliqismət Qara oğlu,
Doluxanov Rəhim Möhkəmə oğlu şəhid oldular.
1992-ci il
fevralın 17-də Qaradağlı kəndi qeyri-bərabər
döyüşdə erməni silahlı quldur birləşmələri
tərəfindən işğal olundu. İşğal
zamanı 118 nəfər əsir götürüldü. Əksəriyyəti
gənclər olmaqla, 33 nəfər kəndin
yaxınlığında "Bəylik bağı" adlanan
yerdə vəhşicəsinə güllələndi.
Öldürülənləri və yaralıları təsərrüfat
quyusuna tökərək üzərlərini torpaqla
örtdülər. Bu hadisə həmin gün təsadüf nəticəsində
sağ qalan Vidadi Hüseynovun gözləri
qarşısında baş vermişdi. Ata-ananın,
qardaşın gözləri qarşısında
doğmaları güllələnmişdi.
Bunlar
aşağıdakılardır:
Tağıyev
Telman Tevon oğlu, Tağıyev Faiq Həsrət oğlu, Məmmədov
Ədalət Şahmar oğlu, Məmmədov Məmməd Əmirxanoğlu,
Məmmədov Ərəstun Ağalar oğlu, Hüseynov
Föhruz Mahmud oğlu, Hüseynov İbiş Həbib oğlu
(məktəbli), Quliyev Nəbi Mütəllim oğlu, Əliyev
Xaliq Məhərrəm oğlu (məktəbli), Nağıyev
Avtandil Xanlar oğlu (məktəbli), Hüseynov Niftalı
Bakir oğlu, Rəhimov Məhi Surxay oğlu, Dadaşov
Uğur Eldar oğlu (məktəbli), Vəliyev Mobil Mürsəl
oğlu, Mustafayev Qərib Həsrət oğlu, Kazımov Nəsimi
Kazım oğlu, Tağıyev Zahir Gülüm oğlu,
Hüseynov Nahid Adil oğlu, Əzizov Alov Əfqar oğlu, Əzizov
Atəş Əfqar oğlu, Mustafayev Talıb Yaqub oğlu və
Quliyev Mirzəli Nüsrət oğlu.
Qaradağlı
- Xankəndi yolu üzərində yerləşən erməni
kəndlərində əsirlər maşınlardan
düşürdülür və hamının gözü
qarşısında güllələnirdi. Zəki
bulağında Abbasov Səlvər İldırım oğlu və
Bayramov Elmidar Rəşid oğlu qətlə yetirildi. Xəlilov
Zahid Əyyub oğlu və Hüseynov Həbib Həmzə
oğlu (ailəsindən 4 nəfər şəhid olub) erməni
kəndi Cəmiyyətdə güllələndilər.
Girovluqda
olarkən ermənilər tərəfindən əzab və
işgəncələr verilərək amansızlıqla qətlə
yetirilənlər: Hüseynov İmran Əhməd oğlu,
Şirinov Böyükkişi Lələ oğlu,
Tağıyev Kamil Sərdar oğlu, Vəliyev Fazil Cavad
oğlu, Quliyev Əlaslan Nəriman oğlu, Hüseynov Şura
Abdıhüseyn oğlu, Nəzərov Şura İbad oğlu
və Quliyev Kamal Bəylər oğlu. Əliyev Vətən Əmirxan
oğlunun (subay), Axundov Hafiz Elmaz oğlunun (subay), Dadaşov Mikayıl
İslam oğlunun (subay), Hüseynov Əbülfət Mehman
oğlunun (subay) və Vəliyev Füzuli Cavad oğlunun (ailəli)
taleləri naməlum qaldı.
Kazımov
Səlim Kazım oğlu, Tağıyev Elsevər Teyyub
oğlu (məktəbli), Süleymanov Elçin Möhübbət
oğlu, Əzizov İltifat Yelmar oğlu müxtəlif
dövrlərdə şəhid olmuşlar. Əsir
götürülənlərdən 50 nəfəri Xankəndi
və Əsgəranda 2 aydan artıq əsirlikdə
saxlanılmış, azad olunduqdan sonra 18-i aldıqları
sağalmaz yaralardan müxtəlif vaxtlarda vəfat etmişlər.
Sağ qalan 32 nəfər isə Qaradağlı faciəsinin
dəhşətlərini xatirələrində,
yaralarını ürəklərində
sızıldaya-sızıldaya yaşadırlar.
Dörd
il ərzində hər gün Qaradağlı kəndi ermənilərin
hücumuna məruz qalmış, hər gün bir qanlı
hadisə törədilmişdi. 1992-ci il 17 fevralda
Qaradağlı kəndinin işğalı zamanı 118 nəfər
əsir götürülmüş, 33 nəfər yerindəcə
güllələnmişdi.
Əsir götürülənlərdən 68 nəfəri öldürülmüş, 50 nəfəri böyük çətinliklərlə əsirlikdən azad edilmişdir. Əsirlikdə saxlanılanlarla vəhşicəsinə, vandalizm hərəkətləri ilə davranılması, başlarının kəsilməsi, diri-diri basdırılması, dişlərinin çıxarılması, ac-susuz saxlanılması, döyülərək öldürülməsi insanlığa qarşı misilsiz cinayət hadisəsi idi. Kənddə 2 ailənin hər birindən 4 nəfər, 6 ailədən 2 və 3 nəfər öldürülmüşdür. 43 ailə öz başçısını itirmiş, 1 ailədən hər iki valideyn qətlə yetirilmiş, 146 uşaq yetim qalmışdır. Qaradağlı kəndində 91 nəfər - kənd sakinlərinin hər 10 nəfərindən biri qətlə yetirilmişdir. Öldürülənlərdən 21 nəfəri ahıl və qocalar, 10 nəfəri qadın, 8 nəfəri məktəbli olmuşdur.
İşğal nəticəsində kənddə 200 yaşayış evi, 1 mədəniyyət evi, 320 yerlik orta məktəb, 25 çarpayılıq xəstəxana binası və çoxlu sayda digər sosial obyektlər dağıdılmışdır.
Dağlıq Qarabağda baş vermiş qanlı hadisələr zamanı şəhid olmuş həmvətənlərimizin əziz xatirəsinə ehtiram əlaməti olaraq 1993-cü ildən Qaradağlı faciəsinin ildönümü günlərində kənd şəhidlərinin xatirəsinə həsr olunmuş mərasimlər, tədbirlər keçirilir. Respublikanın müxtəlif şəhər və rayonlarında məskunlaşmış rayon sakinlərinin və şəhid ailələrinin iştirakı ilə Yeni Xocavənd qəsəbəsində şəhidlərin xatirəsinə ucaldılmış abidə önündə faciə qurbanları dərin hüznlə yad edilir.
Erməni silahlı birləşmələrinin Xocavənd rayonunun Qaradağlı kəndində törətmiş olduqları soyqırım qurbanlarının xatirəsinə həsr olunmuş "Soyqırım - Qaradağlı" filminin bu gün Bakı şəhərində, "Azərbaycan Respublikasının Dağlıq Qarabağ bölgəsinin Azərbaycanlı İcması" İctimai Birliyinin binasında təqdimat mərasimi keçiriləcək. Mərasimə respublika ictimaiyyətinin, diplomatik korpusun və beynəlxalq təşkilatların nümayəndələri də qatılacaqdır. Təqdimat mərasimindən əvvəl Şəhidlər Xiyabanı ziyarət olunacaq, şəhidlərin məzarı üzərinə tər güllər qoyulacaq.
Dağlıq Qarabağ münaqişəsində erməni vandallarının törətdikləri soyqırım və dağıntılar xalqımızın qan yaddaşına əbədi yazılaraq hər bir azərbaycanlını haqq savaşına səsləyir, bundan sonrakı tariximizdə ayıq-sayıq və əyilməz olmağa hazırlayır.
Tahir AYDINOĞLU
Xalq qəzeti.- 2011.- 17 fevral.- S. 8.