Gələcək nəsillər bu faciəni unutmamalıdır

Bakı şəhərindəki Əsəd Ələsgərov adına 244 saylı orta məktəbdə keçirilən tədbirdə Xocalı faciəsinin qurbanları anıldı.

"Biz Xocalıda baş verənləri unutmamalıyıq. Xalqımıza qarşı erməni cəlladlarının törətdikləri bu qətliam gələcək nəsil üçün ibrət dərsi olmalıdır". Bu sözləri Bakı şəhəri 244 saylı məktəbdə Xocalı soyqırımının 19-cu ildönümünə həsr olunan tədbirdə direktor Yəhya Abbasov dedi. O bildirdi ki, bu günlər Azərbaycanın bütün regionlarında, şəhər və kəndlərimizdə Xocalı soyqırımına həsr olunan tədbirlər keçirilir, bu dəhşətli qətliamın qurbanlarının xatirəsi anılır. Azərbaycan Respublikasının Prezidenti cənab İlham Əliyevin apardığı uğurlu xarici siyasət dünyanın əksər ölkəsinə Azərbaycanın haqq səsini çatdırmağa imkan yaradıb. Eyni zamanda, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva da bu istiqamətdə çox uğurlu tədbirlər həyata keçirir.

Bu günlərdə təhsil naziri Misir Mərdanov Xocalı soyqırımının ildönümünü münasibətilə Azərbaycanın bütün təhsil ocaqlarında xüsusi tədbirlərin keçirilməsi ilə bağlı əmr imzalamışdır. Bizim məktəbin kollektivi hər il Xocalı qətliamı ilə bağlı tədbir keçirir. İstəyirik ki, siz, əziz məktəblilər bu hadisələrin mahiyyətini dərk edəsiniz, ermənilərin əsl iç üzünü tanıyasınız. Biləsiniz ki, erməni qəsbkarları Xocalıda silahsız insanların, körpələrin, qadınların başına necə müsibətlər açmışlar. Bu görünməmiş soyqırım aktı xalqımıza qarşı törədilmiş amansız qətliamdır. O gecə baş verənləri unutmağa heç bir azərbaycanlının haqqı yoxdur. Gələcək nəsillərə bu faciə çatdırılmalıdır ki, xalqımızın qan yaddaşında əbədi yaşasın.

Tədbirin təşkilatçısı, məktəbin tərbiyə işləri üzrə direktor müavini Ləman Sadıqova mərasimi davam etdirərək Xocalı faciəsi haqqında danışdı, bildirdi ki, bu qətliam xalqımıza qarşı ermənilərin ilk təcavüzü deyil. Dəfələrlə xalqımız erməni cəlladlarının təcavüzünə məruz qalmışdır. Xocalı faciəsi isə əsl soyqırımdır.

Sonra tədbirin aparıcıları səhnəyə gəldilər. Məktəblilər - İlqar və Roza Xocalı haqqında, burada baş vermiş qanlı erməni cinayəti haqqında danışdılar. Dedilər ki, 1992-ci il fevralın 25-dən 26-na keçən gecə Qarabağın dilbər guşəsi olan Xocalının günahsız sakinləri ermənilər tərəfindən vəhşicəsinə qətlə yetirildi. Bu gecənin dəhşətli ağrılarını yaşayan, həmin faciənin canlı şahidi olan insanları dinləyəndə adam dəhşətə gəlir. Bu, bəşər tarixində analoqu olmayan, insanlığa qarşı yönəlmiş ən qəddar qətliamdır.

Sonra "Xocalı qan yaddaşımızdır" adlı ədəbi-bədii kompozisiya nümayiş etdirildi. "Xocalı - yurdum mənim" şeiri şagirdlərin ifasında səsləndi. 7-ci sinif şagirdi Cavid Novruzovun öz gitarası ilə oxuduğu "İgid əsgər", "Cənab leytenant" mahnıları da tədbirə qəmli bir ovqat bəxş etdi.

"Meşə harayı" adlı kompozisiyanı isə 2-5 və 8-ci siniflərin şagirdləri təqdim etdilər. Burada valideynlərini itirmiş uşağın və övladını itirmiş ananın ah-naləsi əks olunurdu.

Sonra isə slaydlar vasitəsilə o dəhşətli gecə bir daha xatırlandı. O gecənin musibətlərini kameranın yaddaşına köçürmüş Milli Qəhrəman Çingiz Mustafayev haqqında hazırlanmış kompozisiya daha təsirli idi.

M.MÜKƏRRƏMOĞLU

Xalq qəzeti.- 2011.- 26 fevral.- S. 7.