Soyqırım
qurbanlarının xatirəsi yad edildi
Azərbaycan
Respublikasının Prezidenti yanında Dövlət İdarəçilik
Akademiyasında 31 Mart - Azərbaycanlıların
Soyqırımı Günü ilə əlaqədar anım mərasimi
keçirildi.
Əvvəlcə
soyqırımı qurbanlarının əziz xatirəsi bir dəqiqəlik
sükutla yad edildi.
Tədbiri
akademiyanın I prorektoru, professor Əlikram Abdullayev
açaraq, azərbaycanlıların soyqırımı
tarixindən, XX əsrin əvvəllərində erməni
millətçiləri və daşnaklarının
"Böyük Ermənistan" yaratmaq xülyası ilə
Bakı quberniyasının Bakı, Şamaxı, Quba şəhərlərində,
Göyçay qəzasında, həmçinin Qarabağda, Zəngəzurda,
Naxçıvanda vaxtaşırı xalqımıza
qarşı qırğınlar, talanlar, yanğınlar, terror
və digər zorakılıq aktları həyata keçirmələrindən
danışdı. O, əsrlər boyu soyqırımı və
deportasiyaya məruz qalmış xalqımızın
başına gətirilən müsibətlər barədə
ətraflı məlumat verərək dedi ki, erməni
şovinistləri "Böyük Ermənistan" yaratmaq
iddiasını həyata keçirmək üçün
zaman-zaman Azərbaycan torpaqlarını işğal etmiş,
soydaşlarımızı öz doğma ata-baba
yurdlarından didərgin salmışlar. Onlar azərbaycanlılara
qarşı amansız soyqırımı törətmişlər.
Ermənistanın həyata keçirdiyi
işğalçılıq siyasəti kütləvi
qırğınlarla müşayiət olunmuşdur.
Ə.Abdullayev diqqətə çatdırdı ki, erməni şovinistləri keçmiş SSRİ-nin rəhbəri Mixail Qorbaçovun onlara himayədarlığından yararlanaraq 1988-1993-cü illərdə Azərbaycana hərbi təcavüz nəticəsində 20 mindən artıq soydaşımızı qəddarlıqla qətlə yetirmiş, 100 min nəfərdən çox insanı yaralamış, 50 min nəfərə isə müxtəlif dərəcəli bədən xəsarəti yetirmişlər.
XX əsrin sonunda ermənilərin Xocalıda törətdikləri soyqırımı barədə məlumat verən Ə.Abdullayev bunu bütün insanlığa və bəşəriyyətə qarşı yönəldilmiş ən ağır cinayətlərdən biri olduğunu bildirdir. Bu soyqırımı nəticəsində 613 nəfər öldürülmüşdür. Onlardan 63 nəfəri uşaq, 106 nəfəri qadın, 70 nəfəri isə qocalar idi.
Ə.Abdullayev qeyd etdi ki, Ermənistanın işğalçılıq siyasəti hazırda beynəlxalq aləmdə kəskin pislənilir. Bu, Azərbaycanın dövlət başçısının düşünülmüş şəkildə həyata keçirilən xarici siyasətinin uğurudur.
Natiq, bütün sahələrdə olduğu kimi, Azərbaycan dövlətinin milli maraqlarının qorunması istiqamətində də ulu öndər Heydər Əliyevin siyasi ideoloji xəttini uğurla davam və inkişaf etdirən ölkə Prezidenti cənab İlham Əliyevin xalqımızın haqq səsini dünya ictimaiyyətinə çatdırmaq üçün mötəbər tribunalardan istifadə etdiyini, məhz onun rəhbərliyi altında Azərbaycanın həyata keçirdiyi diplomatiyanın bu gün təcavüzkar Ermənistanı çıxılmaz vəziyyətdə qoyduğunu vurğuladı.
Tarix kafedrasının müdiri Firdovsiyyə Əhmədova, professorlar Namiq Axundov, Nigar Ələkbərova, Musa Quliyev, dosentlərdən Elçin Əhmədov, Rəna Bayramova, Çingiz Məmmədov və Fəxrəddin Nağıyev öz çıxışlarında bu tarixi gün haqqında, ermənilərin mənfur siyasəti və bu siyasətin havadarları tərəfindən əsrlər boyu xalqımızın başına gətirilən dəhşətli faciələr barədə danışdılar. Bu istiqamətdə daha böyük işlər görməyin vacibliyi qeyd edildi və həmin məsələlərin beynəlxalq təşkilatlar tərəfindən tezliklə həqiqi qiymətini alacağına əmin olduqlarını bildirdilər.
Anım mərasimində Milli Məclisin deputatlarından Hadi Rəcəbli, Musa Urut və Aydın Mirzəzadə iştirak etdirdilər.
Sonda Azərbaycanın əzəli, tarixi torpaqlarında erməni dövlətçiliyinin yaradılmasına zəmin hazırlandığını nümayiş etdirən 4 xəritə təqdim olundu. XVIII-XIX əsrə aid Rusiya imperiyasının hərbi mütəxəssisləri tərəfindən tərtib olunmuş bu xəritələr İrəvan, Naxçıvan, Qarabağ xanlıqları əraziləri hesabına erməni vilayətinin yaradılmasını əks etdirir. Təqdim olunan xəritələr Azərbaycanın torpaqlarına qarşı təcavüzün təksibolunmaz sübutudur.
Sona MƏMMƏDBƏYOVA,
DİA-nın mətbuat və informasiya
xidmətinin rəhbəri
Xalq qəzeti.- 2011.- 31 mart.- S. 4.