"Sarı Aşıq işığında"

Bu günlərdə M.Maqomayev adına Azərbaycan Dövlət Filarmoniyasında Laçın rayon aşıqlarının "Sarı Aşıq işığında" adlı konserti onların bu möhtəşəm sənət məbədgahında ilk çıxışı oldu. Konsertə dəvətli qonaqlar sırasında respublikanın tanınmış elm, sənət xadimləri, ziyalılar, Milli Məclisin deputatları, eləcə də aşıq sənətinə dərin rəğbət bəsləyən sənət pərəstişkarları var idi. Konsertə düşmək arzusunda olanların sayı çox olsa da, bəxti gətirən tamaşaçılar zal tutan qədər oldu. Tədbiri giriş sözü ilə açan folklorşunas alim Məhərrəm Qasımlı mənəvi mədəniyyətimizin tərkib hissəsi olan aşıq sənətinin xalqımızın tarixi qədər qədim olduğunu qeyd etdi.

Laçın Rayon İcra Hakimiyyətinin başçısı Ramiz Cəbrayılov öz çıxışında rayonunun Güləbird kəndində yaşayıb-yaratmış Sarı Aşığın öz bayatıları ilə xalq arasında böyük hörmət qazandığını, cinas bayatı yaratmaq sahəsində ustad kimi adını tarixə yazdığını qeyd etdi. XVI əsrin sonu - XVII əsrin əvvəllərində yaşayıb-yaratmış Sarı Aşıq yaradıcılığının tədqiq və təhlil edilməsi sahəsində Salman Mümtaz və Bəhlul Behcətlə yanaşı professor M.N.Təhmasibin, Ə.Axundovun, eləcə də şair-publisist Səbahəddin Eloğlunun da böyük xidmətləri olduğunu açıqladı.

Sarı Aşıq öz bayatılarında Azərbaycan təbiətini, gözəllikləri yüksək sənətkarlıqla tərənnüm etdiyi kimi, lirik nəğmələr ustası kimi də tanınmışdır. Dərin məntiqə, bədahətən söz demək qabiliyyətinə malik olan Sarı Aşıq hazırcavablığı ilə də elin hörmətini qazanmışdır. Çox təəssüf ki, Laçın rayonu işğal edildikdən sonra Sarı Aşıq xatirə muzeyi də ermənilər tərəfindən yerlə-yeksan edilmişdir. Hazırda Abşeron rayonu Pirəküşkül qəsəbəsində kiçik bir otaqda köçkünlük həyatı yaşayan Sarı Aşıq xatirə muzeyi məhz o günlərin yadigarıdır. Bu gün Laçında Aşıq Cabbar Cabbarovun rəhbərlik etdiyi "İşıqlı" aşıqlar ansamblının 100-dək üzvü var. Ansambl köçkünlük həyatı yaşasa da, bir gün də olsun fəaliyyətini dayandırmayıb. Rayonun bütün mədəni, kütləvi tədbirlərində fəal iştirak edir. 2008-ci ildə Aşıq Umbayın, 2010-cu ildə isə Aşıq Cabbarın Taxtakörpü qəsəbəsində böyük təntənə ilə qeyd olunan yubiley tədbirlərində Aşıqlar Birliyinin sədri xalq şairi Zəlimxan Yaqubun iştirak etməsi məcburi köçkünlərə əsl bayram sevinci yaşatmış, gələcəyə olan ümidlərini daha da artırmışdır.

Aşıq yaradıcılığına dövlətimiz tərəfindən göstərilən diqqət və qayğı, bu sahədə Heydər Əliyev Fondunun, Mədəniyyət və Turizm Nazirliyinin, Aşıqlar Birliyinin həyata keçirdiyi tədbirlər aşıq sənətinin nəinki ölkəmizdə, onun hüdudlarından çox-çox uzaqlarda tanıtmışdır. Çıxışının sonunda Ramiz Cəbrayılov tədbirin belə yüksək səviyyədə təşkilinə görə Mədəniyyət və Turizm Nazirliyinə, eləcə də Aşıqlar Birliyinə öz dərin təşəkkürünü bildirdi.

Bədii hissə Laçın haqqında filmin nümayişi ilə başladı. Aşıqlar qrupunun - Şahsevən, Nəsir Laçınlının "Kərəm gözəlləməsi", Ələddin İmanovun "Baş sarıtel", Təbriz Sadıqov və Əbdul Axundovun "Yüngül Şərili", Elvin Axundov və Sahib İsmayılovun "Koroğlu dübeytisi" Şəhriyar Şahverdiyevin "Yanıq Kərəmi", Fənarə Həşimova, Aybəniz Laçınlı, Təbriz Sadıqov və Ələddin İsmayılovun "Müxəmməs"i və digər aşıq havaları o gecə hamını valeh etdi.

Rafiq SALMANOV

Xalq qəzeti.- 2011.- 19 may.- S. 8.