Müstəqil Azərbaycan təkcə xalqımız üçün deyil, bütövlükdə region üçün xüsusi töhfələr verir

Biz... 20 ildir müstəqilik. Biz tariximizlə, mədəniyyətimizlə qürur duyuruq. Bu gün müstəqil və azad xalq kimi yaşamağımız ən böyük qürurverici amildir. Azərbaycanın gələcəyi Azərbaycan xalqının əlindədir.

İlham ƏLİYEV,

Azərbaycan Respublikasının Prezidenti

Bu gün beynəlxalq aləmdə özünəməxsus yeri və mövqeyi olan, ictimai-siyasi, sosial-iqtisadi, elmi-texniki və tarixi-mədəni baxımdan mühüm inkişaf yolu keçmiş müstəqil Azərbaycan dövləti öz tərəqqisinin yeni dövrünü yaşayır.

Respublikamız dövlət müstəqilliyini bərpa etməsinin 20-ci ildönümünü, sözün həqiqi mənasında, möhtəşəm uğurlar fonunda qeyd edir. Hələ yubiley ilinin əvvəlində - yanvar ayının 14-də Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclasında yekun nitqi söyləyən Prezident İlham Əliyev qeyd etmişdi ki, 1991-ci ildə keçmiş SSRİ-dəki bütün müttəfiq respublikalar müstəqillik əldə etmişdilər. Azərbaycan isə o zaman öz müstəqilliyini bərpa etmişdi: "Çünki bizim müstəqilliyimizin tarixi 1991-ci ildən deyil, 1918-ci ildən başlayır. Məhz buna görə Azərbaycanda 28 May günü xüsusi təntənə ilə qeyd olunur. Bizim üçün müstəqilliyimizin əsas tarixi 28 May 1918-ci ildir. 1991-ci ildə Sovet İttifaqının dağılması nəticəsində bütün başqa respublikalarla bərabər Azərbaycan da müstəqilliyə qovuşdu, daha doğrusu, dediyim kimi, müstəqilliyini bərpa etdi. Bu yubileyi biz Azərbaycanda geniş qeyd etməliyik".

Dövlət başçımızın hələ yeni ilin başlanğıcında səsləndirdiyi bu çağırış ölkə ictimaiyyəti tərəfindən böyük maraq və diqqətlə qarşılanmış, bu yubileyin daha möhtəşəm şəkildə qeyd edilməsi üçün həm ölkə daxilində, həm də xaricdə reallaşdırılacaq çoxsaylı tədbirlər planı tərtib olunmuşdu. Dövlət müstəqilliyimizin bərpasının 20 illiyi münasibətiylə keçirilən ilk böyük tədbirin müəllifi və təşəbbüskarı bilavasitə ulu öndərin adını daşıyan fondun olması da təsadüfi deyildir. Çünki bu yubileyi bizə böyük xilaskar, ulu öndər Heydər Əliyevin siyasi müdrikliyi və möhtəşəm dövlətçilik təcrübəsi bəxş etmişdir. İlk tədbirə gəlincə isə qeyd edək ki, bu il fevralın 17-də Parisdə dövlət müstəqilliyimizin 20 illiyinə və "Azərbaycan" kitabının təqdimatına həsr olunmuş təntənəli mərasimdə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva da iştirak etmiş və öz geniş çıxışında bu yubileyin Azərbaycan üçün olan əhəmiyyətindən söz açmışdır.

Həmin tədbirdən sentyabrın 23-də "Gülüstan" sarayında Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) təşkilatçılığı ilə reallaşdırılan iki günlük beynəlxalq bayram tədbirinə qədər onlarla yubiley mərasimi keçirilmişdir. Bu silsilə davam edir. Politoloq və ekspertlərin fikrincə, hər birimiz üçün əziz və qürurverici olan Azərbaycanın dövlət müstəqilliyinin 20 illiyi tədbirlərinə ölkə əhalisinin bu şəkildə qatılması və hərənin öz töhfəsini verməsi tamamilə təbiidir. Ancaq yubileyə ən böyük töhfə Prezident İlham Əliyevin həyata keçirdiyi sosial-iqtisadi siyasət və bu siyasətin göz qabağında olan nəticələridir. Yubiley ilində elə bir həftə olmur ki, dövlət başçısı ya paytaxtda, ya da regionlarda bir neçə mühüm sosial obyektin açılışında iştirak etməsin və ya hansısa mühüm qurğunun təməlini qoymasın. Təkcə məktəblilərin yay tətilində olduğu 3 ay müddətində Prezident İlham Əliyev 28 orta məktəbə getmiş, təmir və bərpa işlərinin vəziyyəti ilə şəxsən tanış olmuşdu. Ekspertlərin fikrincə, dövlət başçısının bu addımları Azərbaycanın gələcəyi üçün narahatlıq keçirən liderin məsuliyyəti kimi dəyərləndirilir. Çünki bizim güclü təhsilimiz, müasir təhsil müəssisələrimiz və intellektual səviyyəli gənclərimiz olarsa - onda Azərbaycan öz dövlət müstəqilliyinin 30, 40-50 illik yubileylərini daha yüksək səviyyədə qeyd edə bilər. Prezident İlham Əliyevin 20 illik yubiley ərəfəsində reallaşdırdığı tədbirlər məhz həmin məqsədə xidmət edir və bu tendensiya ümumxalq təqdiri qazanır.

Azərbaycanda Vətəndaş Cəmiyyətinin İnkişafına Yardım Assosiasiyasının sentyabrın 23-də təşkil etdiyi beynəlxalq bayram tədbirində dünyanın 58 ölkəsindən 300-dən artıq tanınmış ictimai-siyasi xadim, o cümlədən Avropa Parlamenti, Avropa Şurası Parlament Assambleyası, ATƏT, Avronest, Avropa ölkələri parlamentlərinin deputatları, dövlət xadimləri, Nobel mükafatı laureatları, ABŞ-ın regional şirkətlərinin nümayəndələri, keçmiş konqresmen və senatorlar, alim və biznesmenlər iştirak edirdilər. Tədbirdə, AVCİYA-nın prezidenti, Milli Məclisin deputatı Elxan Süleymanov, Prezident Administrasiyası ictimai-siyasi məsələlər şöbəsinin müdiri Əli Həsənov, Milli Məclis sədrinin birinci müavini Ziyafət Əsgərov, Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov və digər natiqlər çıxış edərək müstəqil Azərbaycan dövlətinin son 20 ildə üzləşdiyi problemlər, ölkənin sosial-iqtisadi inkişafının təmin edilməsi üçün dövlətin həyata keçirdiyi layihələr və dövlət müstəqilliyimizin əbədiləşdirilməsi üçün reallaşdırılan siyasi kursun nəticələri barədə geniş məlumat verdilər. Avropanı və ümumiyyətlə, bütün dünyanı təmsil edən tədbir iştirakçılarının nəzərinə çatdırıldı ki, bu gün beynəlxalq aləmdə dövlətlərin siyasi kursunun göstəricisi kimi qiymətləndirilən bir neçə xüsusi məqam vardır ki, onlardan birincisi insan hüquqları, ikincisi isə azad mətbuat məsələsidir. Son 20 ildə Azərbaycanda 3600-dən çox qeyri-hökumət təşkilatı, onlarla siyasi partiya, 4500-ədək mətbu orqan (50-dən çoxu informasiya agentliyidir) yaradılıb və fəaliyyət göstərirsə, həmin rəqəmlər bu dövlətin siyasi kursunun göstəricisi kimi qiymətləndirilə bilər. Deməli, bu ölkədə həm əsas insan hüquq və azadlıqlarının qorunması, həm də azad mətbuatın fəaliyyəti yüksək səviyyədə təmin olunub. Dövlət siyasətinin mühüm bir hissəsinin insanların sosial-rifah halının daha da yaxşılaşdırılmasına istiqamətləndirilməsi isə artıq bütün dünyada yeni nümunə kimi qəbul edilir. Xarici siyasətdə əldə etdiyimiz uğurlar Azərbaycanı beynəlxalq ictimaiyyətin ən vacib subyektlərindən birinə çevirib. Bu işdə Heydər Əliyev neft strategiyasının əhəmiyyəti isə xüsusilə qeyd olunmalıdır.

2003-cü ilin oktyabrından sonra Azərbaycan təkcə regionda deyil, ümumilikdə Avrasiya məkanında söz sahibinə çevrilmişdir. Avropanın enerji təhlükəsizliyinin təmin edilməsində xüsusi rolu olan Azərbaycan dövləti qitə miqyaslı bütün tədbirlərdə ən çox arzuolunan qonaq kimi iştirak edir. Cənubi Qafqaz, Xəzər dənizi hövzəsi və Mərkəzi Asiyada reallaşdırılan istənilən iqtisadi layihədə Azərbaycan söz sahibidir. Rəsmi Bakının iştirakı olmadan heç bir layihə reallaşdırılmır. Prezident İlham Əliyevin fikrincə, bütün bunların təməlində ulu öndər Heydər Əliyevin müdrikcəsinə işləyib hazırladığı siyasi kurs dayanır.

Sentyabrın 23-də "Gülüstan" sarayında keçirilən tədbirdə həmin məqamı xüsusilə vurğulayan Azərbaycan Prezidenti demişdir: "Müstəqilliyimizin tarixində 1993-cü il müstəsna əhəmiyyətə malikdir. Qeyd etdiyim kimi o zaman, mürəkkəb durumda xalqımız çox müdrik və tarixi bir seçim etmiş, Heydər Əliyevi ölkənin Prezidenti seçmişdir. Böyük nüfuza və şöhrətə malik olan bu siyasi xadim Azərbaycanda inkişafın təməlini qoymuş, əvvəlcə vətəndaş müharibəsi dayandırılmış, Ermənistanla atəşkəsin bərqərar olması ilə bağlı saziş imzalanmışdır. Bir sıra mühüm siyasi və iqtisadi islahatlara başlanmışdır". Prezident İlham Əliyev müstəqilliyin ilk illərində üzləşdiyimiz problemləri yada salır, həmin problemlərin aradan qaldırılması üçün ulu öndər Heydər Əliyevin reallaşdırdığı titanik layihələri xatırladır və nəticənin Azərbaycan üçün əhəmiyyətini göstərən indiki faktlara diqqət çəkir: "Azərbaycan iqtisadiyyatı Cənubi Qafqaz iqtisadiyyatının 75 faizini təşkil edir. Bu rəqəm bundan sonra da artacaqdır... Dünya İqtisadi Forumunun rəyinə görə, Azərbaycan rəqabətlilik baxımından dünyada 55-ci, MDB məkanında isə birinci yerdə olan dövlətdir. Bu da həyata keçirdiyimiz islahatların göstəricisidir". Dövlət başçımızın fikrincə bu gün Azərbaycan Avropa üçün inamlı və güclü tərəfdaş ola bilər: "Bu gün Avropa strukturları, institutları ilə Azərbaycanın əlaqələri məhz bu amil üzərində qurulub və əminəm ki, bu, əlaqələrimizin inkişafının möhkəm təməli olacaqdır".

Bu isə o deməkdir ki, Azərbaycanın dövlət müstəqilliyi təkcə xalqımız və ölkəmiz üçün deyil, bütövlükdə region və dünyadakı dostlarımız üçün böyük önəm kəsb edir.

İttifaq MİRZƏBƏYLİ

Xalq qəzeti.- 2011.- 25 sentyabr.- S. 7.