Erməni faşizmi alman faşizminin aqibətindən ibrət dərsi götürməlidir

Bu fikir Respublika Veteranlar Şurasının ümumrespublika toplantısında səslənmişdir

Dünən Azərbaycan Həmkarlar İttifaqları Konfederasiyasının "Əmək" sarayında Böyük Vətən müharibəsi veteranlarının ümumrespublika toplantısı keçirildi. Tədbir Azərbaycan Respublikasının Dövlət himninin təntənəli sədaları altında başlandı. Toplantıda faşizm üzərində Qələbənin qazanılmasında böyük xidmətləri olan həm müharibə, həm də arxa cəbhə veteranları iştirak edirdilər.

Respublika Veteranlar Şurasının sədri Əlövsət Baxışov toplantını giriş sözü ilə açaraq tədbirin məramı barədə məlumat verdi. Dedi ki, İkinci dünya müharibəsindən 66, bu dəhşətli faciənin başlanmasının səbəbkarlarını ittiham edən Nürenberq prosesindən isə 65 il keçir. Respublika Veteranlar Şurası bu hadisələrə bugünkü baxış bucağından qiymət vermək və Hitler nasizminin cinayətlərini təkrar edən, ölkəmizə və xalqımıza qarşı qanlı cinayətlər törədən erməni faşizminin iç üzünü açmaq və bir daha dünyaya yaymaq məqsədi ilə bu toplantını çağırmaq barədə qərar qəbul etmişdir.

Toplantıda "İkinci dünya müharibəsi, Nürenberq prosesi və Ermənistan-Azərbaycan, Dağlıq Qarabağ münaqişəsi barədə" məruzə ilə Respublika Veteranlar Şurası Rəyasət Heyətinin üzvü, görkəmli alim, akademik, Sosialist Əməyi Qəhrəmanı, 96 yaşlı ağsaqqal İsmayıl Əli oğlu İbrahimov çıxış etdi.

O dedi ki, İkinci dünya müharibəsi ona görə dəhşətli idi ki, bu müharibə nəticəsində minlərlə şəhər və kəndlər viran qaldı, 60 milyondan artıq insan məhv edildi. Müharibəni, özlərini ali irq hesab edən, dünyada hegemonluğu ələ almaq istəyən, Hitler faşizmi başlamışdı. Ədalətsiz müharibə idi, buna görə də məğlubiyyətlə başa çatdı. Özlərini müdafiəyə qalxan xalqlar, o cümlədən, o zamankı SSRİ xalqları bir yumruq kimi birləşərək Qələbənin qazanılmasına, sülhün əldə edilməsinə nail oldular.

Qələbənin əldə edilməsində Azərbaycan xalqı da öz töhfəsini vermişdir. Müharibədə iştirak edən 700 min azərbaycanlının yarısı Vətənin müdafiəsində şəhid oldu. Azərbaycan xalqının 1941-1945-ci illər müharibəsində göstərdikləri igidlikləri və fədakarlığı saymaqla qurtarmaz. Bunları Böyük Vətən müharibəsinin iştirakçıları, o cümlədən toplantıda iştirak edən müharibə və əmək veteranları yaxşı bilirlər.

Natiq Böyük Vətən müharibəsi illərində döyüşən cəbhənin neft və neft məhsulları ilə təmin olunmasında Bakı neftçilərinin, bu məhsulları cəbhəyə çatdıran dəmiryolçuların, dənizçilərin müstəsna rolundan da bəhs etdi. Təsadüfi deyildir ki, görkəmli hərb və dövlət xadimləri G.K.Jukov, K.K.Rokosovski, R.Y.Malinovski, N.K.Baybakov və başqaları Azərbaycan neftçilərinin fədakarlığını yüksək qiymətləndirirdilər. Onlar öz xatirələrində göstərirdilər ki, Bakı nefti olmasaydı, faşizm üzərində qələbə çalmaq da mümkün olmazdı.

Lakin tək neft sahəsi deyil, Azərbaycan xalqı gecə-gündüz bilmədən, cəbhəni ərzaq və geyimlə, ehtiyat hissələri ilə təmin etmək üçün, sözün əsl mənasında, fədakarlıq göstərirdi. Respublikanın sənaye müəssisələri bütünlüklə hərbi vəziyyətə keçmişdi. 130-dan artıq müxtəlif adda silah, mərmi, o cümlədən düşməni dəhşətə gətirən məşhur "Katyuşa" bu müəssisələrdə istehsal edilirdi. Respublikada 132 hərbi hospital yerləşdirilmişdi, onlardan 86-sı Bakıda fəaliyyət göstərirdi. Onların işinə xalqımızın ən layiqli şəxsiyyətləri, ən bilikli alimləri və həkimləri cəlb edilmişdi. Burada müalicə edilib, sağaldılan zabitlər və əsgərlər yenidən dərhal cəbhəyə göndərilirdi.

İ.İbrahimov çıxışında daha sonra bildirdi ki, Nürenberq prosesindən 65 il keçir. Tarixin dönüş nöqtələrindən istifadə edən və dənizdən-dənizə fatehlik xülyasına düşən, Hitler faşistləri kimi özlərini ən ali, ən qədim millət kimi qələmə verən erməni nasistləri, görünür, Nürenberq prosesindən heç bir ibrət dərsi götürməmişlər. Onlar havadarlarının köməyi ilə artıq 20 ildir ki, Azərbaycan torpaqlarını işğal altında saxlayırlar. İşğal nəticəsində 900-dən artıq yaşayış məntəqəsi talan edilmiş, yandırılmış, 6 min sənaye, kənd təsərrüfatı müəssisəsi və digər obyektlər məhv edilmişdir. 150 min yaşayış binası dağıdılmış, 4366 sosial-mədəni obyekt, eyni zamanda 695 tibb ocağı yerlə yeksan edilmişdir. İşğal edilmiş ərazilərdə hidrotexniki qurğular, bütün nəqliyyat və kommunikasiya xətləri tam sıradan çıxarılmışdır. Dağıntılar nəticəsində respublikamızın iqtisadiyyatına 60 milyard ABŞ dollarından artıq ziyan dəymişdir.

"Hərbi münaqişələr zamanı mədəni sərvətlərin qorunması haqqında" Haaqa Konvensiyasının və "Mədəni sərvətlərin qeyri-qanuni dövriyyəsi haqqında" Paris Konvensiyasının müddəalarını kobudcasına pozan Ermənistan Respublikasının işğalçı qüvvələri ələ keçirdikləri Azərbaycan ərazilərində 927 kiabxananı, 464 tarixi abidə və muzeyi, 100-dən çox arxeoloji abidəni, 6 teatrı və konsert zalını dağıtmışlar.

İşğal olunmuş torpaqların qeyd-şərtsiz azad edilməsi barədə BMT Təhlükəsizlik Şurasının hələ 1993-cü ildə qəbul etdiyi 4 qətnaməyə və başqa aparıcı beynəlxalq təşkilatların qərarlarına, bütün dünya dövlətlərinin Azərbaycanın ərazi bütövlüyünü tanımalarına və məsələni sülh yolu ilə həll edilməsinə dair ATƏT-in Minsk qrupunun həmsədrlərinin konkret təkliflərinə, Azərbaycan hökumətinin, ümummilil ilder Heydər Əilyevin və onun layiqli davamçısı hörmətli Prezidentimiz İlham Əliyevin yorulmaq bilmədən bu istiqamətdə apardıqları ardıcıl fəaliyyətə baxmayaraq, keçən əsrin 80-cı illərində Ermənistan tərəfindən başlanmış təcavüz bu gün də davam edir. Atəşkəs barədə iki dövlət arasında bağlanmış müqavilə Ermənistan tərəfindən hər gün pozulur, müharibə qurbanlarının sayı artır.

Natiq belə bir faktı acı təəssüf hissi ilə vurğulayaraq dedi ki, münaqişənin uzanmasından istifadə edən Ermənistan rəhbərliyi öz işğalçılıq siyasətini davam etdirir, hər cür vasitələrlə tarixi saxtalaşdırmağa, milli ayrı-seçkiliyi dərinləşdirməyə çalışır, erməni gənclərini qonşu xalqlara qarşı düşmənçilik ruhunda tərbiyə edir. Bunu Ermənistan prezidenti Serj Sarkisyanın Gorusda jurnalistlərlə görüşündə və Düşənbədə MDB Ölkələri Başçıları Şurasında çıxışları aşkar surətdə sübut edir.

İ.İbrahimov çıxışını optimist ruhda bitirirək dedi ki, şükürlər olsun ki, bugünkü müstəqil Azərbaycan nə Xalq Cümhuriyyəti, nə Sovetlər, nə də Sovetlərin dağılması dövründəki Azərbaycan deyildir. Dövlətimizin başçısı İlham Əliyevin apardığı düzgün siyasət nəticəsində Azərbaycan özünün hərbi gücü ilə hər an öz torpaqlarını işğaldan azad etməyə qadirdir. Lakin erməni nasistlərindən, onun prezidentindən fərqli olaraq bizim dövlət başçılarımız - ulu öndər Heydər Əliyev və hörmətli Prezidentimiz İlham Əliyev heç bir zaman başqa xalqlara qarşı düşmənçilik münasibətində olmamışlar. Bu, xalqımızın tarixindən və milli mənəviyyatından irəli gəlir. Azərbaycan xalqı həmişə öz sülhsevərliyi, beynəlmiləlçiliyi və tolerantlığı ilə fərqlənmişdir. Həmişə belə olmuşdur, bu gün də belədir. Ölkə başçısı İlham Əliyev özünün mötəbər məclislərdəki çıxışlarında dəfələrlə bəyan etmiş və bildirmişdir ki, münaqişəyə sülh yolu ilə son qoyularsa, azərbaycanlılarla ermənilərin birgə yaşayış hüququ təmin ediləcəkdir.

Tədbirdə çıxış edən müharibə və əmək veteranları Seyfulla Baxışov, Qara Sarıyev, Sergey Məmmədov və başqaları toplantının olduqca mühüm məsələyə həsr olunduğunu vurğulayaraq bildirdilər ki, Respublika Veteranlar Şurası özünün əməli fəaliyyətində Ermənistan-Azərbaycan, Dağlıq Qarabağ münaqişəsinin həllini haqlı olaraq daim diqqət mərkəzində saxlayır. Razılıq hissi ilə qeyd olundu ki, Respublika Veteranlar Şurasının Rəyasət Heyəti keçən il MDB Ölkələri Veteranlar Təşkilatının Əlaqələndirmə Şurasına və Dünya Veteranlar Federaiyasına bəyanatlar göndərmişdir. Şuranın rəhbərliyi Moskvada və Parisdə çıxış edərək Qarabağ həqiqətlərini bütün dünyaya çatdırmışdır.

Toplantı iştirakçıları Ermənistan-Azərbaycan, Dağlıq Qarabağ münaqişəsinin həlli üzrə ATƏT-in Minsk qrupu ölkələrinin dövlət başçıları - Rusiya Federasiyasının Prezidenti Dmitri Medvedevə, Amerika Birləşmiş Ştatlarının Prezidenti Barak Obamaya və Fransa Prezidenti Nikola Sarkoziyə müraciət qəbul etdilər.

Müraciətdə deyilir: "Ermənistan-Azərbaycan, Dağlıq Qarabağ münaqişəsinin tezliklə həll edilməsi, BMT Təhlükəsizlik Şurasının, başqa beynəlxalq təşkilatların qərarlarının yerinə yetirilməsi, Azərbaycan torpaqlarının qeyd-şərtsiz işğaldan azad edilməsi üçün sizin siyasi iradə göstərməyiniz, qətiyyətli tədbirlər görməyiniz tələb olunur, başqa yol yoxdur! Münaqişənin uzanması bölgədə yaşayan xalqların maraqlarına deyil, işğalçı və separatçı dairələrin mənafeyinə xidmət edir. İkinci dünya müharibəsindən 66 il ötür. Biz, həyatın qanunu ilə sürətlə azalan müharibə veteranları, son və müqəddəs borcumuzu yerinə yetirərək sizə müraciət edir, əsası olmayan, ədalətsiz Ermənistan-Azərbaycan, Dağlıq Qarabağ münaqişəsinə son qoyulmasını istəyirik".

Müraciət rus, ingilis və fransız dillərinə tərcümə edilərək yuxarıda adları çəkilən ölkələrin Bakıdakı səfirləri vasitəsilə tezliklə ünvanlarına çatdırılacaq. Qeyd edək ki, toplantının materialları Azərbaycan, rus, ingilis dillərində ayrıca kitabça şəklində dərc ediləcəkdir.

Məsaim ABDULLAYEV,

Elçin ABBASOV

Xalq qəzeti.- 2011.- 30 sentyabr.- S. 3.