Ukraynada 20 Yanvar şəhidlərinin xatirəsi "Ülviləşən Mübariz " devizi altında yad edilib

Ukrayna Azərbaycanlı Gənclər Birliyi, Ukrayna Parlamenti yanında Ümumukrayna Gənclər Assambleyasının təşkilatçılığı və Azərbaycan səfirliyinin dəstəyi ilə Kiyev şəhərindəki 20 Yanvar şəhidlərinin xatirəsi "Ülviləşən Mübariz " devizi altında yad edilib. Ukraynalı və azərbaycanlı gənclər 20 yaşında Azərbaycan gəncliyinin ilk şəhid rəmzinə çevrilən Ülvi Bünyadzadə ilə 22 yaşında Azərbaycanın Milli Qəhrəmanı zirvəsinə ucalmış Mübariz İbrahimovun timsalında torpaqlarımızın bütövlüyü uğrunda canlarını fəda etmiş Vətən mücahidlərinin ürəklərə yol açan ülviləşən mübarizə tarixindən bəhs ediblər. Azərbaycan səfirliyinin, mili diasporumuzun, o cümlədən bir sıra Ukrayna gənclər təşkilatları və media nümayəndələrinin qatıldığı mərasimi Ukrayna Azərbaycanlı Gənclər Birliynin sədri Anar Tahirov açaraq, Azərbaycanın dövlət müstəqilliyi və ərazi bütövlüyü uğrunda şəhid olan qəhrəman oğul və qızlarımızın keçdiyi mübarizə tarixindən danışıb. Qeyd olunub ki, anım mərasiminin Ülviləşən Mübariz devizi altında keçirilməsində əsas məqsəd 1990-cı ilin 20 Yanvar gecəsində sinəsini dövlət müstəqilliyimizə tuşlanmış gülləyə sipər edərək şəhid olan 20 yaşlı şair Ülvi Bünyadzadə ilə bu faciədən düz 20 il sonra Vətənimizin bütövlüyü naminə düşmənə sarsıdıcı zərbə vuraraq qəhrəmanlıq zirvəsinə ucalmış Mübariz İbrahimovun indiki gənc nəslə örnək qoyub getdikləri ülviləşən mübarizə yolunu davam etdirməkdən ibarətdir. Mərasimdə Azərbaycan səfirliyinin müşaviri Yeganə Qafqazlı, Ukrayna Parlamenti yanında Gənclər Assambleyasının sədr müavini Lesiya Xlopets çıxış edərək, Vətən naminə canlarını fəda edənlərin xatirəsinin heç zaman unudulmayacağını bildiriblər. Sonra Azərbaycan və Ukrayna dövlət televiziyalarının birgə layihəsi əsasında çəkilmiş "Qanlı 20 Yanvar faciəsi" filminə baxmaqla, 21 il bundan öncə keçmiş SSRİ rəhbərliyinin Azərbaycan xalqına qarşı həyata keçirdikləri vəhşiliklərlə tanış olublar. Tədbirdə çıxış edən filmin ssenari müəllifi Georgi Spasakukottsiy böyük qəhrəmanlıq ənənəsinə malik olan Azərbaycan xalqının mütləq öz ərazi bütövlüyünü bərpa edəcəyini bildirib. Tədbirdə Ukrayna Azərbaycanlı Gənclər Birliyinin qərarı ilə şəhid Ülvi Bünyadzadənin ölümündən dörd ay öncə yazdığı "Vətən And"ı birliyə üzv olmaq istəyənlərin andı kimi qəbul olunub. Milli Qəhrəman Mübariz İbrahimovun Ukraynada xatirəsinin əbədiləşdirilməsi üçün Vətənimiz və dövlətimiz naminə nümunəvi tədbirlər həyata keçirməklə xalqımızın adına şərəf gətirən gənclərə "Mübariz Gənc" fəxri diplomunun veriləcəyi bildirilib.

A.ÜLVİ

Xalq qəzeti.- 2011.- 22 yanvar.- S. 7.