Şəmkir:
sosial-iqtisadi inkişaf möhkəm təmələ malikdir
- Əlcəklərinizi
çıxardın bir salamlaşaq, hal-əhval tutaq...
Üst-başları qıra, mazuta bulaşmış
yolsalanlar gözləmirdilər ki, bu vəziyyətdə bir
kimsə onlara yaxınlaşıb salam versin və elə ona
görə də ilk anda duruxdular. Amma başçının
təkidlə onlara sarı uzadılmış əlini görərək
əlcəklərini çıxardıb görüşməyə
başladılar.
Sifətləri
dəyişdi, çöhrələrini təbəssüm
bürüdü, sanki yorğunluqları da onları tərk
elədi. Elə bil, gördükləri işin
böyüklüyünü, əhəmiyyətini, onların
əməyinə verilən qiymətin dəyərini
yalnız indi hiss etməyə başladılar. Təbii ki, bu
hisslərə başçının sadəliyi, səmimiliyi,
insani keyfiyyətləri də qarışmışdı.
Nazim
müəllim bizi görmürdü və onunla buradakı
görüşümüz də təsadüf idi. Məqsədimiz
Şəmkirdən Kür qəsəbəsinə gedən 12
kilometrlik yolun asfaltlaşdırılması işinin
gedişi ilə yerində tanış olmaq idi. Məlumdur ki,
Bakı - Qazax avtomagistralından qəsəbəyə
ayrılan yolun təmiri üçün ölkə
başçısı İlham Əliyevin 27 fevral 2012-ci il
tarixli sərəncamı ilə rayona 3 milyon manat vəsait
ayrılıb. Uzun müddət idi ki, 12 min nəfər əhalinin
yaşadığı və 3 yaşayış məntəqəsini
birləşdirən bu yolun asfalt döşəməsi
dağılmışdı, avtomobillərin gediş-gəlişi
olduqca çətinləşmişdi...
Fəhlələrə
çevrilib nəyisə göstərmək istəyəndə
bizi gördü və eyni səmimiyyətlə
görüşüb hal-əhval tutdu:
- Jurnalist
ki, yazını arayışlara baxıb yazdı, onu o saat
hiss edirəm. Amma siz özünüz görməsəniz,
adamlarla görüşməsəniz, vəziyyətlə
yerində tanış olmasanız,
yazmırsınız...
Nazim müəllim bu dəfə fəhlələri
deyil, bizi ruhlandırırdı və təbii ki, onu uzun illər
tanıdığımdan sözlərinin səmimiliyinə
inanırdım.
Adamlar müxtəlif cür olur. Biri kobuddur, digəri səmimidir,
başqa birisi mülayimdir, yaxud tez dəyişəndir və
sair. Nazim Veysovu 25-30 il əvvəl
necə tanıyıramsa, eləcə də qalıb. Söhbət onun sadəliyindən, səmimiliyindən,
adamlarla tez ünsiyyət qurmaq bacarığından, həddindən
artıq diqqətcil olmasından gedir. Gələn ilin
martında 10 il olacaqdır ki, icra hakimiyyətinin
başçısıdır. İki il Gədəbəydə,
2005-ci ilin aprelindən isə Şəmkir Rayon İcra Hakimiyyətinin
başçısıdır.
Əslində
az müddət deyil və rayon rəhbəri
üçün kifayətdir ki, əhalinin bütün təbəqələri
haqqında məlumatı olsun, problemlərini öyrənsin,
onların həlli yollarını tapsın və sair. Qeyd edək
ki, bunların hamısına nail ola bilib. Məhz yuxarıda sadaladığımız keyfiyyətlərinə
görə.
Səyyar qəbullar problemlərin həllində
mühüm rol oynayır
Yazı stolumun üstündə rayon icra hakimiyyətinin
ümumi şöbəsindən aldığım bir
arayış var. Orada göstərilir ki, rayon icra hakimiyyətinin
başçısı 2007-ci ildən bu günədək kənd
və qəsəbələrdə 271 görüş və səyyar
qəbul keçirib. Nəzərə alsaq ki, rayonda 66
yaşayış məntəqəsi var, o zaman hər kəndə,
qəsəbəyə, şəhərə orta hesabla 4
görüş düşür.
Başçının müxtəlif vaxtlarda
keçirdiyi görüşlərdə, səyyar qəbullarda
bir neçə dəfə iştirak etmişəm və
düzü onun təəssüratı uzun müddət
yaddaşımdan çıxmayıb. Ona görə yox ki,
bu görüşlərdə problemlərin çoxu elə
yerindəcə həll olunub, qaldırılan məsələlərə
operativ müdaxilə olunub və sair. Həm
də ona görə ki, bu görüşlər bir çox
hallarda mənə bir ailə üzvlərinin öz valideynlərinə
münasibəti, istəyi, arzusu təsiri
bağışlayıb. Qarşılıqlı
hörmət, inam bu görüşlərin yüksək səviyyədə
başa çatması ilə yadda qalıb.
İllər keçdikcə görüşlərin
xarakteri, məzmunu, problemlərin adları da dəyişdirilib. Yadımdadır
ki, ilk illər daha çox qaz, su, işıq problemləri
üstünlük təşkil edirdi. Amma
indi onların adlarını belə çəkən yoxdur.
Hazırda Şəmkir şəhərinin
içməli su təchizatının və kanalizasiya
sisteminin yenidən qurulması işi həyata keçirilir.
Sərxan massivində 3 su anbarının
tikintisi başa çatmaq üzrədir. Ölkədə
həyata keçirilən ən böyük layihələrdən
biri Şəmkirdədir. Ümumi su tutumu
175 milyon kubmetr, bəndinin hündürlüyü 190 metr
olacaq Şəmkirçay dəryaçasının tikintisi
sürətlə davam etdirilir. İşlər başa
çatdırıldıqdan sonra Şəmkir, Goranboy, Samux və
Göygöl rayonlarında 75 min hektar, o cümlədən
Şəmkir rayonunda 41 min hektar torpaq sahəsi suvarma suyu ilə
təmin olunacaq. Dəryaçadan Gəncə, Şəmkir və
Samux şəhərlərinə içməli su xətti
çəkiləcəkdir. Artıq bu işlərə
başlanılmışdır. Dəryaçanın
tikintisi zamanı qurulacaq 6 ədəd hidroturbin vasitəsilə
həm də 49 meqovatt elektrik enerjisi istehsal olunacaqdır.
Ötən
il Şəmkirdə 65 min tondan çox taxıl tədarük
olunmuş, məhsuldarlıq hər hektardan 38 sentneri
keçmişdir ki, bu da respublikada ən yüksək göstəricidir.
İndi görün, dəryaçay istifadəyə
verildikdən sonra nələr olacaqdır. Şəmkirin
məhsulunu yığıb-yığışdırmaq
olmayacaq...
Səyyar
qəbullar problemlərin həlli, əhali ilə ünsiyyət
qurmağın ən təsirli növlərindən, iş
üsullarından biridir. Bunu Şəmkirin
inkişaf edən simasında aydın görmək
mümkündür. Bu il də həmin
sahədə işlər uğurla davam etdirilir.
2012-ci ilin əvvəlindən aprel ayının 1-dək
Şəmkir Rayon İcra Hakimiyyətinin
başçısı tərəfindən həftədə
bir dəfə olmaqla yerlərdə 13 səyyar qəbul
keçirilmişdir. Yerlərdə keçirilən qəbullarda
39 təklif irəli sürülmüşdür. İrəli
sürülmüş təkliflərdən 7-si daxili
yolların təmirinə, 5-i əhalinin qaz, su təchizatına,
9-u kənd təsərrüfatı məsələlərinə,
6-sı məktəblərin, səhiyyə və mədəniyyət
müəssisələrinin təmir-tikintisinə, 5-i elektrik
dayaqlarının təmirinə, 3-ü ünvanlı sosial
yardımın verilməsinə və 4-ü digər məsələlərə
dair olmuşdur. Təkliflərin 8-i müsbət,
11-i qismən həll edilmiş, 14-nün icrası nəzarətə
götürülmüş, 6-sı əsassız
sayılmışdır.
Bunlara adi rəqəmlər kimi yanaşmaq olmaz. Onların hər
biri gərgin əməyin, operativ işin göstəricisidir.
İcra hakimiyyətinə yazaq, yoxsa
daha yuxarı təşkilata?
Birmənalı şəkildə qeyd edək ki,
adamların yerli icra orqanlarına olan inamı əvvəlki
illərə nisbətən xeyli artıb. Bir fikir verin: əgər 7 il qabaq, yəni 2007-ci ildə 897 nəfər,
bir il sonra 581 nəfər icra hakimiyyətinə müraciət
etməyi qərara aldığı halda, keçən il bu rəqəm
1253-ə çatmışdır. Bu, yuxarı
orqanlara göndərilmiş müraciətlərin sayından
çoxdur.
Şəmkir kiçik rayon deyil. Əhalisinin
sayı 200 min nəfərə çatıb. Dəqiq məlumata görə, rayonda 199 min 516 nəfər
yaşayır. Yazı çapa gedənə
kimi yəqin ki, 200 mini keçəcək. Çünki
təkcə keçən il Şəmkirdə
doğulanların sayı 3750 nəfəri keçmişdir.
Bu statistik rəqəmləri ona görə
xatırladırıq ki, 200 min nəfər əhalisi olan
rayonda təbii ki, problemləri olan ailələr də var. Təəssüf
ki, müraciətlərin bir hissəsini əsassız və həlli
mümkün olmayan təkrar ərizə və şikayətlər
təşkil edir. Nəzərə alsaq ki, belə
müraciətlər əsasən bir qrup peşəkar şəxslər
tərəfindən yazılır, o zaman əsl mənzərə
aydın olur. Əlbəttə, bəzi
idarə, müəssisə və təşkilat rəhbərlərinin
vətəndaşların qəbulu işinə düzgün
yanaşmamaq haqları da mövcuddur. Belələrinə
qarşı rayon icra hakimiyyəti başçısı
çox ciddi mübarizə aparır. Təsadüfi
deyil ki, vətəndaşları narahat edən problemlərin
aradan qaldırılmasında fəallıq göstərmədiklərinə,
tapşırılan işlərin öhdəsindən gələ
bilmədiklərinə görə təkcə keçən
il rayon icra hakimiyyəti başçısının
Qapanlı, Yeni həyat və Mehrili kənd inzibati ərazi
dairələri üzrə nümayəndələri
tutduqları vəzifələrdən azad olunmuşlar.
Təmizliyə ümumi nəzarət
var
Bu günlərdə Gədəbəyə gedirdik. Şəmkirin
içərisindən keçəndə gözlərimə
inanmadım. Şəhərdə olan təmizlik,
səliqə-sahman adamı valeh edirdi. Yasamal
aşırımına kimi gedib çıxan, uzunluğu 5-6
kilometr olan prospektin hər iki tərəfində
yaşayış evləri, ticarət, ictimai iaşə
obyektləri, inzibati binalar olmasına baxmayaraq, yerdə bir dənə
də olsun siqaret kötüyü, kiçik bir kağız
parçası və ya hər hansı bir məişət
tullantısına rast gəlmədim. Halbuki səhərin
gözü, necə deyərlər, yenicə
açılmışdı. Binaların
fasadlarına düzülmüş gül dibçəkləri,
asfalt yolun kənarına toplanmış kiçik torpaq təpəcikləri
diqqətimi cəlb etdi. "Görəsən
bunlar gecə yatmırlarmı?" Fikrimdən keçənləri
qapısının girişində səliqə-sahman yaradan
ağsaqqal kişi sanki hiss elədi. Ona
yaxınlaşıb salam verəndən
sonra özü sözə başladı:
- Təkcə
"komunxozun" (kommunal müəssisələri
kombinatı - H.Q) işçiləri deyil, biz
özümüz də təmizliyə,
yaşıllığa, səliqə-sahmana fikir veririk. Bax, burada kimi dindirsən, deyəcək ki, Nazim
müəllimdən ayıbdır, gəlib görər,
biabır olarıq. Bir də ki, şəhəri
ilk növbədə özümüz təmiz
saxlamalıyıq. Hər ay yarış keçirilir, ən
təmiz məhəlləyə, evə, onun sakinlərinə
rayon icra hakimiyyəti mükafat verir...
Sonradan öyrənirik ki, ağsaqqalın dediyi həmin
yarış neçə illərdir ənənə şəklini
alıb. Bundan başqa, hər həftənin
dördüncü günləri icra hakimiyyəti
başçısı müşavirə keçirir,
ayrı-ayrı məhəllələrə təhkim
olunmuş təsərrüfat rəhbərlərinin
hesabatını dinləyir, konkret
tapşırıqlarını verir. Bu da
artıq ənənə şəklini alıb.
- Vaxt gələcək
buna heç ehtiyac qalmayacaq, - deyə Nazim Veysov həmin
kiçik müşavirələrə toxunur, - adamlar
artıq özləri şəhərin təmiz
saxlanmasının nə qədər vacib olduğunu dərk
edir. Kimsə kiçik bir siqaret
kötüyünü və ya kağız
parçasını yerə atan görəndə onu tənbeh
edir, məcbur edir ki, zibil qutusuna atsın. İnanırsınızmı,
hətta bunun üçün də bir-biri ilə dalaşan və
hələ də küsülü qalan qonşular var.
Maraqlı və həm də diqqətçəkən
məqamlardan biri budur ki, Şəmkirdə kommunal müəssisələri
kombinatının işçilərinə xüsusi
qayğı ilə yanaşırlar. Onlara əmək haqqı
vaxtlı-vaxtında verilməklə yanaşı,
bütün bayramlarda rayon icra hakimiyyəti tərəfindən
8-10 kiloqramlıq ət, yağ,
düyü, çay və digər ərzaqlardan ibarət
bağlamalar göndərilir. Kombinat
işçilərinin sayı isə 100-ə çatır.
Əslində bu faktın, yəni şəhərin həm
də əhali tərəfindən təmiz və yaşıl
saxlanması yuxarıda toxunduğumuz rəhbər
işçi - əhali münasibətlərinin bir növ təcəssümüdür. Adamları
ruhlandırmaq, onların əməyini qiymətlənirmək
işinin necə aktual, vacib olması göz
qabağındadır.
2011-ci il çoxdan
arxada qalıb, bəs 2012-ci il?
Rayonda bütün sahələrdə yüksəliş,
tərəqqi var. 2011-ci ilin uğurları da göz
qabağındadır.
2011-ci ildə
rayonda 397 milyon 86 min manatlıq, yəni 2010-cu ilə nisbətən
32,4 faiz çox ümumi məhsul buraxılmış,
adambaşına düşən ümumi məhsul istehsalı
41,4 faiz artaraq 1997 manat olmuşdur.
Sənaye
müəssisələrində 19 milyon 221 min manatlıq, kənd
təsərrüfatında 201 milyon 572 min manatlıq,
tikinti-quraşdırma sahəsində 98 milyon 926 min
manatlıq məhsul buraxılmışdır.
Xidmət sahələrində 52 milyon 375 min manatlıq
xidmət göstərilmişdir. Əmtəə dövriyyəsinin həcmi
206 milyon 600 min manat olmuşdur ki, bu, 2010-cu ildəkindən 13,2 faiz çoxdur. Əhaliyə
göstərilən pullu xidmətlərin həcmi 5 faiz
artmışdır.
İl ərzində 630 ədəd fərdi
yaşayış evi tikilib istifadəyə verilmişdir. Əsas
kapitala 108 milyon 588 min manat investisiya qoyulmuşdur.
2011-ci ildə
1970 iş yeri açılmışdır ki,
onun da 639-u daimi iş yeri olmuşdur. Ümumiyyətlə, son
3 ildə (2009 -2011-ci illər) rayon üzrə 6266 iş yeri, o cümlədən 2106 daimi iş yeri
yaradılmışdır.
Rayonun
maliyyə sistemində davamlı tədbirlər həyata
keçirilmiş, 2011-ci il üçün yerli gəlir və
xərclər 33 milyon 35 min 851 manat, o cümlədən yerli gəlirlər
6 milyon 108 min manat proqnozlaşdırılmışdır. Yerli gəlirlərin proqnoz
tapşırığı 6 milyon 179 min 435 manat və ya 107
faiz yerinə yetirilmişdir.
"Ünvanlı
dövlət sosial yardımı haqqında" Azərbaycan
Respublikası Prezidentinin 16 noyabr 2005-ci il tarixli fərmanına
uyğun olaraq yoxsulluq həddindən aşağı səviyyədə
yaşayan 2856 ailənin 13 min 298 nəfər üzvünə
ünvanlı sosial yardım verilmişdir.
Təhsil sahəsində uğurlar ilbəil artır. Həyata keçirilən məqsədyönlü
tədbirlər rayonun ümumtəhsil məktəblərini
bitirən gənclərin respublikanın ali
məktəblərinə qəbulu zamanı öz müsbət
təsirini göstərmişdir.
2011-ci ildə
orta məktəbləri bitirən 2272 nəfər şagirddən
1937 nəfəri (85,2 faiz) orta təhsil
haqqında attestat aldı. Onlardan 988 nəfəri ali məktəblərə sənəd
vermiş, 467 nəfər tələbə adını
qazanmışdır. Bu göstərici 2005-ci ilə
nisbətən 2 dəfə, 2010-cu ilə nisbətən isə
66 nəfər çoxdur.
Son illər ərzində rayonun ümumtəhsil məktəblərindən
58-i yenidən tikilmiş və əsaslı təmir
olunmuşdur.
O cümlədən, yenidən tikilmiş 190 məktəb
binasının 6-sı Heydər Əliyev Fondunun vəsaiti
hesabına tikilmişdir.
Şəmkir rayonu respublikamızın qədim tarixə,
zəngin mədəniyyətə malik rayonlarından biridir. Rayon ərazisində
yerləşən tarix və mədəniyyət abidələrinin
qorunması ön plana keçirilmişdir. Bu məqsədlə Muxtariyyat kəndi
yaxınlığında yerləşən qədim Şəmkir
qalasında və Qaracəmirli kəndi
yaxınlığında yerləşən qədim
yaşayış yerində konservasiya işləri davam
etdirilmişdir. Azərbaycan Respublikası Prezidentinin 15
fevral 2011-ci il tarixli sərəncamı ilə
2011-ci il "Turizm ili" elan olunması ilə əlaqədar
rayonda bir sıra tədbirlər həyata
keçirilmişdir.
Heydər Əliyev Muzeyinin fəaliyyətinin genişləndirilməsinə,
ümummilli liderin irsinin təbliği işinin
yaxşılaşdırılmasına başlıca diqqət
yetirilmişdir. Fəaliyyətində tədris, milli vətənpərvərlik
tərbiyəsi və kütləvi tədbirlərin genişləndiyi
nəzərə alınaraq 2011-ci il iyul
ayından etibarən Heydər Əliyev Muzeyi Heydər Əliyev
Mərkəzinə çevrilmişdir.
Kənd təsərrüfatı ilbəil
inkişaf edir
Sarıtəpə kəndi yaxınlığında
"Azaqro" MMC-yə məxsus istilikxana kompleksində tərəvəz
məhsulları istehsal olunur. Hazırda kompleksin
istehsal gücünün artırılması istiqamətində
işlər davam etdirilir.
Müsbət haldır ki, kənd əməkçiləri
tərəfindən xeyli sahədə istilikxanalar tikilmiş və
həmin sahədə tərəvəz məhsulları
yetişdirilir.
İstehsal olunan məhsullar daxili bazarlarla
yanaşı, xarici ölkələrə də göndərilir.
Azərbaycan
Respublikası Prezidentinin 23 yanvar 2007-ci il tarixli sərəncamına
uyğun olaraq rayonun kənd təsərrüfatı məhsulları
istehsalçılarına əkin sahələrinin becərilməsində
istifadə etdikləri yanacaq və mühərrik
yağlarına görə 1 milyon 122 min 436 manat pul
konpensasiyası verilmişdir.
Şəmkir rayonu vaxtilə respublikamızın
üzümçülük rayonlarından biri olmuşdur. Hazırda
rayonda 526 hektar üzüm bağı vardır. 2011-ci ildə üzüm bağlarından, vətəndaşların
həyətyanı sahələrindən 21 min 872 ton
üzüm istehsal olunmuşdur. Üzümçülüyün
inkişaf etdirilməsi üçün rayonda potensial imkan
vardır. Bununla bağlı zəruri tədbirlər
görülür. Heyvandarlığın
inkişafı, bu sahənin problemləri də daim diqqət mərkəzində
saxlanılmışdır.
...Şəmkirin inkişafı göz
qabağındadır. Ölkə Prezidenti İlham Əliyevin
rayona göstərdiyi diqqət, qayğı, rayon rəhbərliyinin
əhalinin bütün təbəqələri ilə
qaynayıb-qarışması, səmimi, işgüzar
münasibətləri Şəmkirdə həyata keçirilən
işlərin təməlini qoyub. Bu təməl
çox möhkəmdir. Möhkəm təməl üzərində
qurulan iş isə baş ucalığıdır,
başın daim uca olsun, ulu Şəmkir!
Hamlet QASIMOV
Xalq qəzeti.- 2012.- 12 aprel.- S. 6.