Qəhrəmanlıq zirvəsi

Alı Mustafayev – 60

Azərbaycanın Milli Qəhrəmanı, şəhid jurnalist-şair Alı Mustafayevin anadan olmasının 60 illiyi tamam oldu. Bu münasibətlə Rəşid Behbudov adına Mahnı Teatrında keçirilən yubiley mərasimində qəhrəmanın xatirəsi qədirbilənliklə yad olundu, onun milli telejurnalistikamızda keçən mənalı yaradıcılıq yolu, poetik irsi diqqət mərkəzində oldu.

Alı Mustayev Qazaxın Qazaxbəyli kəndində dünyaya göz açmışdı, doğma obasında orta təhsil almışdı.1975-1981-ci illərədə Bakı Dövlət Universitetinin jurnalistika fakültəsində oxumuşdu. Hələ tələbəlik illərindən Azərbaycan Televiziyası ilə sıx yaradıcılıq əlaqəsi saxlamış, ali təhsilli jurnalist kimi ilk və son iş yeri "AzTV"nin xəbərlər baş redaksiyası olmuşdu. 10 illik telejurnalist fəaliyyəti dövründə Alı Mustafayev saysız-hesabsız müxtəlif janrlı süjetlərin müəllifi olmuş, operativ reportyor, zəkalı şərhçi kimi tanınmışdı.

1988-ci ilin fevralında Dağlıq Qarabağ münaqişəsi xalqımızın dincliyini pozanda Alı narahat, vətənpərvər telejurnalist kimi daim hadisələrin qaynar nöqtələrindən reportajlar hazırladı, öz şərhləri ilə xalqı birliyə, mübarizəyə çağırdı. Ekstremal şəraitdə telesüjetlər hazırlayarkən dəfələrlə həyatı təhlükə qarşısında qaldı. Bir dəfə Şuşadan ezamiyyətdən qayıdarkən içərisində olduğu vertolyot Xankəndindən quldurların atdığı raketin hədəfi oldu. Vertolyot yerə dəyib alovlansa da, Alı ağır xəsarətlə ölümdən yaxa qurtardı. Bütün bunlar onu qorxutmadı, düşmənin üstünə yeriməkdən çəkindirmədi, mübarizə əzmi bir az da artdı.

1991-ci ilin noyabrında - SSRİ-nin süqutu günlərində Azərbaycan rəhbərliyinin maymaqlığından istifadə edən Ermənistan silahlı qüvvələri Dağlıq Qarabağın dinc azərbaycanlı kəndlərində soyqırımı və etnik təmizləmə aparanda Alı Mustafayevin yaraları hələ sağalmamışdı. 1991-ci ilin 18-19 noyabarında azğın quldurlar Xocavəndin Qaradağlı kəndində kütləvi qırğın törədəndə bu xəbəri yataqda eşidən cəsur telejurnalist bütün gecəni yata bilmədi. Səhəri sevimli iş yeri Azərbaycan Televiziyasına gəlib təcili Ağdama yola düşən qrupa rəhbərliyi öz üzərinə götürdü. Yoldaşlarının səhhətindəki problemləri təkidlə xatırlatması onu bu ağır səfərdən çəkindirə bilmədi.

Noyabrın 20-də Ağdamdan Azərbaycanın dövlət və hökumət rəsmilərini, yüksək rütbəli hərbçiləri Qaradağlıya aparan hərbi vertolyota Alı Mustafayevin reportyor qrupu son anda özünü yetirdi. Cəmi 10 dəqiqədən sonra isə Qarakənd üzərində erməni cəlladların raketlə vurduğu vertolyot içəridəkilərin dəhşətli ölüm kamerası oldu...

Min bir əziyyətlə böyümüş, yüksək dəyərlərlə tərbiyələnmiş, Vətənin ağır günlərində sözü, qələmi, mikrafonu ilə düşməni hədəfə almış 39 yaşlı jurnalistin böyük arzuları çilikləndi, ömür yolu taleyin amansız hökmü ilə yarımçıq qaldı. Alının gözəl ailəsi - tələbəlik və həm də ömür-gün yoldaşı Lalə xanım, 2 oğlu bu məşum qəzadan sarsılanlara yadigar və təsəlli oldu. Bir də sənət dostlarına, qədirbilən insanlara sənədli-bədii yaradıcılığının gözəl örnəklərini qoyub getdi. Çəkdiyi süjetlər Dağlıq Qarabağ münaqişənin ilk dövrləri ilə bağlı videoxronikanın qiymətli epizodları oldu. Alının dərin lirizm, fəlsəfi düşüncə, alovlu vətənpərərliklə aşılanmış misraları şəhid jurnalistin bitkin obrazının mənalı çalarları kimi xatirələrə işıq, hərarət gətirdi.

Ötən 21 il Alı Mustafayevi qəhrəman soydaşımız, istedadlı jurnalist və şair kimi bir daha hamıya sevdirdi. Bu ad jurnalistikamızın tarixində unudulmaz bir dəyər kimi yer aldı. Onun ömür yolu yeni nəsillər üçün cazibəli bir timsal kimi həmişə göz önündədir.

Yubiley mərasimində bütün bunlardan geniş söhbət açan tanınmış telejurnalist, Alı Mustafayevlə 10 il bir redaksiyada çalışmış Telli Pənahqızı şəhid həmkarımızın unudulmaz xatirəsi ilə bağlı bir çox məqamları yada saldı. Milli Qəhrəmanın tələbə yoldaşı İlqar Həsənov və Mirzə Yusifov onun nəcib və yetkin xüsusiyyətlərindən səmimiyyətlə söz açdılar, kövrək xatirələri dilə gətirdilər.

Alı Mustafayevin adını daşıyan orta məktəbin yetirmələrinin onun məktub və şeirləri əsasında hazırladıqları bədii kompozisiya hamını təsirləndirdi. Alının şeirləri, ona həsr olunmuş poetik nümunələr, sözlərinə bəstələnmiş mahnılar, yada düşən xatirələr, ekranda görünən foto-video təsvirlər şəhid qəhrəmanın kimliyini müxtəlif yönlərdən göz önünə gətirdi, onu ruhən bugünümüzə qovuşdurdu.

Sonda yubilyarın həyat yoldaşı Lalə Mustafayeva Alının xatirəsinə göstərilən ehtirama görə ailəsi adından razılığını bildirdi, şəhidlərimizin ruhunun onların haqq işinin qalib gəlməsi ilə dinclik tapacağını söylədi.

Tahir AYDINOĞLU

Xalq qəzeti.- 2012.-17 aprel.- S. 10.