Masallı: dövlət qayğısının nəticələri fərəh doğurur

Biz Masallının inkişafının yeni mərhələsini yaşayırıq. Çünki Masallıda gedən işlər, bu gün mənə göstərilən layihələr, təqdimat yaxın zamanlarda rayonda, demək olar ki, əsas sosial məsələlərin həllinə gətirib çıxaracaqdır.

İlham ƏLİYEV,

Azərbaycan Respublikasının Prezidenti

Zamanın tələblərinə uyğun şəkildə, sürətlə inkişaf edən rayonlarımızdan biri də Masallıdır. Dövlət müstəqilliyimizin bərpasından ötən illərdə, xüsusilə də yeni əsrin əvvəllərindən burada sosial-iqtisadi inkişaf naminə həyata keçirilən tədbirlər rayonun simasını xeyli dəyişdirmiş, Masallını gözəl bir diyara çevirmişdir. Azərbaycan Respublikasının Prezidenti cənab İlham Əliyev cənub bölgəsinə vaxtaşırı səfərləri zamanı Masallıda görülən işləri hər zaman yüksək qiymətləndirmiş, tərəqqi layihələrinin sürətlə gerçəkləşdirilməsini təqdir etmişdir.

Ötən il aprelin 14-də Masallıya səfər edən dövlət başçısının sərəncamları ilə rayonun sosial-iqtisadi inkişafı üçün 5,5 milyon manat vəsait ayrılmışdır. Üstündən heç bir il ötməmiş - bu il martın 13-də Azərbaycan rəhbəri yenidən Masallıya gəlmiş, aparılan quruculuq işləri ilə tanış olmuş və yenidən rayonun inkişafına 2 milyon manat vəsait ayrılması üçün sərəncam imzalamışdır. Bu, ilk növbədə, əvvəlki vəsaitlərdən səmərəli istifadə olunmasına verilən qiymət, başlanan möhtəşəm işlərin eyni vüsətlə davam etdirilməsinə əməli dəstək kimi dəyərləndirilir. Rayon ictimaiyyəti dövlət qayğısından daha da ruhlanır, etimadı doğrultmaqdan ötrü fədakarlığını artırır.

Masallıya növbəti ezamiyyətimdə bir daha gördüm ki, burada özünü yurdsevər sayan hər kəs dövlət başçısının rayona növbəti səfərinin xoş təəssüratını yaşayır və göstərilən diqqətdən hədsiz məmnundur. Uzun illər rayon rəhbərliyində təmsil olunmuş dövlət qulluğu veteranı, cənub bölgəsində birinci olaraq "Vətənə xidmətə görə" ordeni ilə təltif edilmiş köhnə dostum Ələşrəf Niftiyevin çay masası arxasında söylədiklərini olduğu kimi təqdim edirəm:

- Sevimli Prezidentimiz bütün gücü, amalı və bacarığı ilə xalqa xidmət edir, xalq da onu ürəkdən sevir. Bölgələrin inkişafının təmin olunmasında, əhalinin rifahının ildən-ilə yaxşılaşdırılmasında misli görünməmiş irəliləyişlərimiz uzunmüddətli müstəqillik tarixinə malik dövlətlərin belə diqqətini çəkmiş və onları bizimlə əməkdaşlığa sövq etmişdir.

Prezidentin bölgələrə hər səfəri dövlətçiliyə inamı artırır, xeyirli-bərəkətli olur, adamların həyat şəraitinin yaxşılaşmasına, fəaliyyət sferasının genişlənməsinə, sosial tələbatının ödənilməsinə, mədəni yüksəlişə səbəb olur. Dövlət başçısının ağsaqqallarla, gənclərlə, ziyalılarla görüşləri, bir qayda olaraq, konkret əməli nəticələrlə yadda qalır. Rayonumuzun son illərdəki yüksəlişi məhz möhtərəm Prezidentimizin konkret göstərişləri və qayğısı sayəsində mümkün olmuşdur. Neçə-neçə təhsil, səhiyyə, mədəni-məişət obyekti, yol-abadlıq, infrastruktur işləri məhz cənab İlham Əliyevin adı ilə bağlıdır.

İllər boyu bizi narahat edən kanalizasiya xətti problemi, nəhayət, həllini tapmaqdadır. Bu qurğunun tikintisinə start verilməsi çox böyük işdir. Masallının bugünü gözəldir. İnamla deyə bilərəm ki, sabahı daha da gözəl və cəlbedici olacaq.

Ötən ay Masallıya səfəri zamanı Azərbaycan Prezidenti öncə şəhərin mərkəzindəki Heydər Əliyev Parkında ulu öndərin abidəsini ziyarət etmiş, sonra oradakı işlərlə maraqlanmışdır. Yenidən qurulan parkdakı muzeyin bazasında Heydər Əliyev Mərkəzi açılmış, sakinlərin və qonaqların istirahəti üçün hər cür şərait yaradılmışdır. Yeni mərkəz ulu öndərin irsinin dərindən öyrənilməsi və təbliğində, gənclərin hərtərəfli inkişafında mühüm rol oynayır. Burada vaxtaşırı müxtəlif maraqlı tədbirlər keçirilir.

"Milli su təchizatı və kanalizasiya xidmətləri" üzrə ikinci layihə çərçivəsində yenidən qurulacaq Masallı şəhər su-kanalizasiya sisteminin təməlqoyma mərasimi səfər proqramının əsas tədbirlərindən idi. Dövlət başçısı gilizi təmələ buraxmış və beton qarışığı tökmüşdür. Prezident icraçılara müvafiq tapşırıq və tövsiyələr vermişdir.

Tikintisi ötən əsrin 90-cı illərində dayandırılan Masallı sutəmizləyici kanalizasiya qurğusu yararsız vəziyyətdədir. Bu sisteminin təkmilləşdirilməsi zamanın tələbidir. Yeni layihə əsasında Masallı şəhərində adambaşına düşən suyun həcmi gün ərzində 180 litr hesablanıb. Bu isə 2030-cu il üçün supaylayıcı şəbəkəyə 24 saat ərzində su verməklə ildə 2 milyon 400 min kubmetr su tələbatı deməkdir. Masallı şəhərinin su təchizatını yaxşılaşdırmaq üçün Viləşçay su anbarı əsas mənbə kimi qəbul olunmuşdur. Yeni layihə çərçivəsində həcmi 5 min kubmetr olan su anbarının inşası da təklif edilib. Təmizləyici stansiyanın gücü gündəlik 22 min kubmetr olacaq. Masallı şəhərindəki bütün evlər içməli su şəbəkəsinə qoşulacaq.

Masallının mərkəzində 1956-cı ildə inşa olunmuş mədəniyyət evi indiyədək əsaslı təmir edilməmişdi. Rayonun bu əsas mədəniyyət ocağının təmirinə ötən ilin avqustunda başlanmışdır. İşlərin gedişi ilə tanış olan Prezident İlham Əliyevə məlumat verildiyi kimi, 358 yerlik tamaşaçı salonundan və digər yardımçı otaqlardan ibarət mədəniyyət evinin bütün infrastrukturu tamamilə yenidən qurulur. Hazırda burada qızğın iş gedir. Çox keçməz ki, mədəniyyət evi yenidən rayonun əsas mədəni-kütləvi tədbirlər mərkəzinə çevrilər.

Dövlətimizin başçısı Masallıya səfəri çərçivəsində Gənclər Mərkəzinin açılışında iştirak etmişdir. Burada da işlərə ötən il başlanmışdır. İndi isə bina artıq əsl memarlıq incisi kimi göz oxşayır. Mərkəzin müasir oyun zalı var. Rəsm qalereyası gənclərin ixtiyarına verilib. İki hissəli tir otağı Almaniya avadanlığı ilə təchiz edilib. Otaq pnevmatik və interaktiv atıcılıq tirlərindən ibarətdir. Burada 30-a qədər proqramdan istifadə imkanı yaradılıb. Onlardan ikisi olimpiya idman növüdür. Multimedia kitabxanası, kompyuter otağı, açıq tipli kafe, 30 nəfərlik konfrans zalı gənclərin dolğun həyatını təmin edəcək. Burada xarici dil kursları da fəaliyyət göstərəcək.

Martın 13-də Masallı Gənclər Mərkəzinin konfrans zalında Prezidentin Biləsuvar, Cəlilabad, Lənkəran, Astara, Yardımlı və Lerik rayonlarından olan gənclərlə görüşündə iştirak edənlərdən biri də Məmmədhüseyn Hüseynov idi. Gənc mütəxəssis təəssüratlarını bizimlə bölüşdü:

- Bu gün ölkəmizin idman və gənclər siyasəti sahəsində inkişafını görməmək mümkün deyil. Əhalisinin üçdə-birini gənclər təşkil edən Masallı da görkəmini günbəgün dəyişir. İnkişafda gənclərin rolu böyükdür. Yeni Azərbaycan Partiyası rayon təşkilatının sıralarında 3 minə qədər gənc ictimai və siyasi fəallığı ilə seçilir.

Unudulmaz görüş zamanı dövlət başçısı gənclərə dəyərli tövsiyələr verdi. Bizi daha da bilikli, zəkalı, fəal və vətənpərvər görmək istədiyini vurğuladı. Əslində, belə olmaqdan ötrü hər cür şəraitimiz var. Ötən il qəbul edilmiş "Azərbaycan Gəncliyi" Proqramı, yeni yaradılmış Gənclər Fondu bizim hərtərəfli inkişafımıza xidmət edir.

Dövlət qayğısı sayəsində Masallıda müasir Olimpiya İdman Kompleksi tikilib və hazırda məhsuldar fəaliyyət göstərir. Şahmat məktəbi yenidən qurulub. Bu yaxınlarda Boks və Taekvondo mərkəzlərinin açılışı olacaq. "İdman ili"nə bundan gözəl töhfə nə ola bilər? Möhtərəm Prezidentlə görüş zamanı rayonumuzu təmsil edən tələbə Nigar Əliyeva da çıxışında fəxrlə qeyd etdi ki, yeni Gənclər Mərkəzi bizlərə misilsiz hədiyyədir. Biz bundan sonra da daim sevimli Prezidentimizin yanında olacaq, ağlımız, intellektimiz sayəsində Azərbaycanın bundan sonra da çiçəklənməsinə töhfələr verəcəyik.

Masallıda abadlıq, yol tikintisi durmadan davam edir, işıq, təbii qaz təchizatı yaxşılaşır. Təbii qaz alan kəndlərin sayı artıq 52-yə çatıb. Hazırda altı yeni məktəb tikilir. Ötən il Masallıda ümumi məhsul istehsalı və xidmətlərin həcmi 12 faizədək artmışdır. Beş ildə rayonda əkin sahələri 4600 hektar çoxalmışdır. Əla toxumluq buğda və zəruri texnika ilə təminat sayəsində keçən il zəmilərdən rekord həddə - 31 min 300 ton taxıl yığılmışdır. Rayonda hər bir işçiyə düşən orta aylıq əməkhaqqı indi 257 manata çatmışdır.

Sahibkarlıq inkişafdadır. Prezident İlham Əliyev rayona səfəri zamanı burada yeni yaradılan "Masera" MMC-nin soyuducu anbar və istixana komplekslərinin açılışında iştirak etmişdir. Kompleksin sahibi Mirəkbər Şükürov bununla bağlı ürək sözlərini ifadə elədi:

- Hələ də unudulmaz açılış mərasiminin, dövlət başçısının obyektlə tanışlığının təsiri altındayam. Sahibkarlığa yaşıl işığı məhz bizim sevimli Prezidentimiz yandırıb. Görüş zamanı çox həyəcanlı idim. Amma ali qonağın səmimiyyəti, mehribanlığı məni ürəkləndirdi. Həvəslə gördüyüm işlərdən, məhsulların yetişdirilməsi texnologiyasından danışdım. Suallara ətraflı cavab verməyə çalışdım. Dedim ki, cənab Prezident, bütün uğurlarımızı Sizin diqqət və qayğınız sayəsində qazanmışıq.

Regional inkişaf Dövlət Proqramı çərçivəsində 1,2 min tonluq soyuducu anbar kompleksi və 2 hektar ərazidə illik 0,7 min ton tərəvəz istehsal etmək gücünə malik olan bu istixana kompleksi artıq fəaliyyətdədir. Layihəyə 5 milyon manat investisiya qoyulub ki, bunun da 1 milyonunu Sahibkarlığa Kömək Milli Fondunun güzəştli krediti təşkil edir. Bundan başqa, kompleksin inşası zamanı "Aqrolizinq" ASC-dən də ümumi dəyəri 2,4 milyon manat olan avadanlıq və köməkçi vəsaitlər lizinq yolu ilə alınıb. Layihənin icrası nəticəsində 60 nəfər daimi, 20 nəfər isə mövsümi işlə təmin olunub. Dövlətimizin başçısı istixanada yetişdirilmiş pomidor sortları ilə maraqlandı. Bildirdim ki, burada hər hektardan mövsüm ərzində 350-400 ton keyfiyyətli məhsul götürülə bilər. Kompleksdə pomidorla yanaşı, digər məhsullardan da yetişdirmək mümkündür. Gələcəkdə məhsullarımızı xarici ölkələrə də ixrac edə biləcəyik.

Göründüyü kimi, Masallıya dövlət qayğısının nəticələri çox fərəhlidir. İnanırıq ki, gözəl cənub rayonunun xoş soraqlarını hələ çox eşidəcək və qəlbən sevinəcəyik.

Əli NƏCƏFXANLI

Xalq qəzeti.- 2012.- 17 aprel.- S.10.