Eldar İsmayıl - 70. Ulu Göyçənin şair
oğlu
Bu günlərdə
tanınmış şair, yazıçı-publisist,
"Qızıl qələm" mükafatı laureatı,
Azərbaycan Yazıçılar və Azərbaycan jurnalistlər
birliklərinin üzvü, əməkdar jurnalist Eldar
İsmayılın 70 yaşı tamam olur.
Qəlbi
daim yazmaq-yaratmaq əzmi ilə döyünən bir şair
ömrü yaşayıb Eldar İsmayıl. Bu günədək
irili-xırdalı 40-a yaxın kitabın müəllifidir.
Yaradıcılığının sorağı yaxın-uzaq
ellərdən gəlir. Eldar İsmayıl poeziyası
Türkiyədə, İranda, İraqda oxunur.
Könlünü sözə, ürəyini közə verən
şair bir də başını qaldırdı ki,
yaşı 70-i haqlayıb.
Ədəbi fəaliyyətə Eldar Ağbulaqlı imzası ilə başlayan şairin "Kəndimiz" adlı ilk şeiri 1961-ci ildə rayon qəzetində dərc olunub. Bundan sonra dövri mətbuatda müəllifin müxtəlif səpkili yazıları çıxıb. E.İsmayıl yaradıcılığa gənc yaşlarından başlasa da, ilk kitabı "Ulu Göyçə" adı ilə 1990-cı ildə "Yazıçı" nəşriyyatında işıq üzü görüb.
Görkəmli alim Yaşar Qarayevin və böyük şair Bəxtiyar
Vahabzadənin xeyir-duası ilə ədəbiyyata vəsiqə
alan bu kitab
ədəbi ictimaiyyətdə böyük
marağa səbəb olub.
Ulu Göyçənin həsrət alovunu qəlbində yandıran şairin ürəyində, sanki,
sözlə dolu xəzinə
yatırmış:
İçim
kürə, Eldar, çölüm ayazdı,
Tanrı
dedim,
taleyimi o yazdı.
Məni
məndə tapmısansa
o azdı,
Məndən yana bir dünya var, o mənəm.
Vətənin hər qarışına,
qədim tarixinə,
soy-kökünə dərindən
bələd olan sənətkar qürbətdə
qalan ellərimizi kitabların daş yaddaşına həkk etməyi ciddi vəzifə sayır.
Müəllifin narahat günlərinin, yuxusuz gecələrinin hesabına ərsəyə
gələn şeir, poema, roman və publisistikadan ibarət kitablarının hər biri həyatımızın
reallıqlarını əks
etdirən salnaməyə
çevrildi. Tanınmış ədəbiyyatşünaslar, tarixçilər bu əsərləri təhlil
edib dəyərli fikirlər söylədilər.
Yaşar Qarayev, Nizami Cəfərov, Hüseyn Əhmədov, Teymur Bünyatov, Mürsəl Həkimov, Qara Namazov, Hüseyn
İsmayılov, Həmid
Əliyev, İsmayıl
Məmmədov, türkiyəli
alim Mustafa Özbaş,
xalq şairləri Bəxtiyar Vahabzadə, Hüseyn Arif, İlyas Tapdıq və neçə-neçə
görkəmli elm-mədəniyyət
adamları dövri mətbuatda və elmi-ədəbi monoqrafiyalarda
Eldar İsmayılın
yaradıcılığından ürək dolusu danışdılar. Eldar İsmayıl
və yaradıcılığı
haqqında indiyədək
istər yerli mətbuatda, istər xarici mətbuatda bir-birindən sanballı fikirlər səsləndirilib.
Buna görə də mən yalnız şairin ədəbi-ictimai fəaliyyətindən
və onun keçdiyi mənalı ömür yolundan söhbət açmaq istəyirəm.
Eldar İsmayıl 1942-ci il martın 10-da ulu Göyçədə
dünyaya gəlib. İbtidai təhsilini doğma Ağbulaq kəndində alır. Toxluca kəndində natamam
orta məktəbi bitirir. Bakı Mədəni-Maarif Texnikumunu başa vurub doğma kəndə qayıdır.
Əvvəlcə kənd mədəniyyət
evinə müdir təyin olunur, sonralar isə "Dostluq" rayon qəzetində
redaktor müavini vəzifəsində işləyir.
Bakı Dövlət Universitetində ali
təhsilini qiyabi davam etdirir. Ağbulaq və Şorca kəndlərinin birləşmiş
sovetliyinin sədri vəzifəsində çalışır.
Həmin illərdə
Göyçəni qarış-qarış
gəzən E.İsmayıl
bədii yaradıcılıqdan
da bir an
belə ayrılmır,
"Ulu Göyçə"
poemasını yazır.
O dövr Hüseyn Arif yazırdı ki, Göyçədə
böyük bir şair yetişməkdədir.
Eldar İsmayıl erməninin kim
olduğunu yaxşı
bilirdi və gec-tez Göyçənin,
eləcə də əzəli türk torpaqlarının erməni
məkrinin girovuna çevriləcəyini hiss edirdi
və narahat olurdu.
1988-ci ildə Qərbi Azərbaycan torpaqlarının
işğalından sonra
Bakı şəhərinə
pənah gətirən
E.İsmayıl Dövlət
Statistika Komitəsində
iki il
böyük iqtisadçı
vəzifəsində çalışdıqdan
sonra 1990-cı ildə
Azərbaycan Qaçqınlar
Cəmiyyəti yaradılır
və o burada ideologiya şöbəsinə
müdir təyin olunur. Burada işləyə-işləyə
"Göyçə" və "Ulu Göyçə" qəzetlərinin
təsisçisi və
baş redaktoru olur. Bu dövr
Eldar İsmayılın
bədii yaradıcılıqla
ən çox məşğul olduğu
illərdir. Onun ictimai fəaliyyətinə
diqqət yetirdikdə
bir vətəndaş
şair kimi keçirdiyi məclislərdən
"Aşıq Alı
200-ü aşırdı", "Bir Vətən həsrəti, bir Göyçə qəmi",
"Dədə Ələsgərin
işığında" kimi tədbirlərin adını çəkmək
yerinə düşərdi.
Onun
"Ələsgər" pyesi 1999-cu ildə radionun tamaşa salonunda səsləndirilib.
1997-ci ildə fəaliyyəti
dayandırılmış "Təbib" qəzetinin nəşri bərpa edilir və elə o vaxtdan da Eldar İsmayıl
bu qəzetin baş redaktorudur. Azərbaycan
Tibb Universitetinin rektoru, akademik Əhliman Əmiraslanov onu belə səciyyələndirir:
"Eldar İsmayıl
vətənpərvər şairdir. "Təbib" qəzetinin baş redaktorudur. Ləyaqətli jurnalist kimi
də fəaliyyəti
çox təqdirəlayiqdir".
Onun türkcə işıq üzü görən
"Allah amanatı" və
"Eldar İsmayılın
seçilmiş şeirləri"
kitabları Türkiyə
Cümhuriyyəti Atatürk
Universitetinin Kazım Qarabəkir təhsil fakültəsində dərslik
kimi hazırlanmışdır.
Müəllifin 2005-ci ildə
Türkiyə Cümhuriyyətinin
banisi Mustafa Kamal Atatürkə həsr etdiyi "Türkün xilaskarı" poeması
qardaş ölkədə
yüksək qiymətləndirilmiş,
"Türk ədəbiyyatına
hizmət" ödülü
ilə mükafatlandırılmışdır.
"Heyrət" ədəbi dərgisinin
"Məslək-Şərəf" diplomu ilə təltif edilmişdir.
"Göyçənin qisası qalır" tarixi-sənədli romanı
xüsusi mükafata layiq görülmüşdür.
İnsan ömrünün
mənası yaşanmış illərin sayı ilə deyil, bu illərin necə
və hansı məqsədlərlə yaşanması,
hansı əməllərə xidmət etməsi ilə
müəyyən olunur. Eldar
İsmayılın keçdiyi həyat yoluna baxanda görərik ki, o, sözün
əsl mənasında Ulu Tanrının ona verdiyi bu
ömrü şərəflə və ləyaqətlə
yaşamışdır. Mənə elə gəlir ki, belə insanlar
qocalmır, zaman keçdikcə
müdrikləşir:
Bu həyatda
ilk ovçum mən, ovum mən,
Yerdən
şəri, göydən çəni qovum mən.
Hər
xətanı bu canımla sovum mən,
Ölüm gedim bu millətim
yaşasın.
Bu şeirindən də
göründüyü kimi,
millətin yaşaması,
gələcəyi, xoş
günləri üçün
canından belə keçməyə hazırdır
Eldar İsmayıl. İnsanlıq,
təmiz ad onun həyat amalıdır.
Mənsur,
"Təbib" qəzetinin
məsul katibi, şair-publisist, Azərbaycan
Jurnalistlər Birliyinin
üzvü
Xalq qəzeti.- 2012.-22 aprel.- S. 7.