Olimpiada gündən-günə sürətini artırır
Kimiyə sevinc, kimiyə də məyusluq gətirən XXX Yay Olimpiya Oyunları getdikcə sürətini artırır və hər ötən gün onun medalları
uğrunda mübarizəyə
daha çox idmançı qoşulur. Olimpiadanın ilk üç günündə
36 ölkə təmsilçiləri
fəxri kürsüyə
yüksəlib medal sevinci
keçirə bilmişdilər.
Onların siyahısına 17 mükafatla (9 qızıl,
4 gümüş və
4 bürünc medal) ÇXR komandası başçılıq
edirdi. İkinci yeri tutan
ABŞ yığmasının da hesabında 17 mükafat var idi. Lakin amerikalılar qızıl
medalların sayına
görə çinlilərdən
geri qalırdılar
(5+7+5). Üçüncü pillədə Fransa
qərar tutmuşdu
(3+2+3). Azərbaycan ağırlıqqaldıran Valentin Xristovun qazandığı bürünc
medal sayəsində daha
on ölkə ilə
26-36-cı yerləri bölüşdürürdü.
Olimpiadanın üçüncü günü
daha bir ağır atletimiz medal qazanmağa yaxın idi. Qadınların yarışında
Azərbaycan idmançısı
Boyanka Kostova (58 kq-dək) birdən ağırlıqqaldırmada çıxışlarını
üçüncü mövqedə
başa vursa da, təkanla ağırlıqqaldırma yarışlarına
yekun vurulduqda məlum oldu ki, Azərbaycan idmançısı iki hərəkətin cəmində
233 kq (105+128) nəticə
ilə yalnız beşinci olmuşdur. Bu çəkidə medalları isə Çin, Tailand və Ukrayna idmançıları qazandılar.
Cüdoçularımız Rüstəm Orucovla (73 kq-dək) Kifayət Qasımovanın (57 kq-dək)
elə ilkin mərhələlərdə uduzub
çıxışlarını başa vurduqları haqqında məlumat vermişdik. Əlavə edək ki, həmin çəkilərdə
Olimpiadanın çempionu
adını təmsilçilərimizi
mübarizəni dayandırmağa
məcbur edən cüdoçular rusiyalı
Mənsur İsayev və yapon Kaori Matsumoto qazanmışlar.
Boksçularımız Elvin Məmişzadə (52 kq-dək)
ilə Vətən Hüseynlinin (81 kq-dək)
elə ilk görüşlərdən
sonra Olimpiadadan kənarda qalacaqlarını
gözləmirdik. Təəssüf ki, ümidlərimiz
doğrulmadı. Məmişzadə monqolustanlı Nyambayara layiqli müqavimət göstərə bilmədi
(11:18), Hüseynli isə
ekvadorlu rəqibi Karlos Merkado ilə görüşün
yalnız üçüncü
raundunda ondan üstün ustalıq nümayiş etdirdi.
Lakin bu, boksçumuza kömək etmədi və o, döyüşü
hesabda kiçik fərqlə (8:9) uduzdu.
Nəticədə boksçularımız arasında
birinci olaraq rinqə çıxan üç nəfərdən
təkcə Soltan Migitinov (75 kq-dək) ilkin mərhələ səddini dəf edə bilmişdir. İyulun 28-də misirli Məhəmməd Hikal üzərində layiqli qələbə qazanan Soltan indi avqustun 2-də braziliyalı Falkao Florentinoya qarşı keçirəcəyi səkkizdəbir
final görüşünə hazırlaşır.
Dünən Azərbaycanın daha bir boksçusu Heybətulla Hacıəliyev
(64 kq-dək) rinqə
çıxmışdır. Onun ilk rəqibi
Tunis idmançısı idi.
Bu turnirdə görüşlərə
bizim vaxtla gecəyarısı start veriləcəkdi.
Ağırlıqqaldıranlarımız Sərdar Həsənovla Əfqan Bayramovun da hansı yerləri
tutduqları gecə məlum olacaqdı. Onların hər
ikisi 69 kq-dək çəki dərəcəsində
yarışır. Sərdarın çıxış etdiyi
"B" qrupunda görüşlərin
başlanma vaxtı saat 14-ə təyin edilmişdisə, Əfqanın
daxil olduğu
"A" qrupunda rəqiblər
saat 23-də mübarizəyə
başlayacaqdılar.
İlkin
mərhələdə uğurlu
nəticə göstərib
2000 metr məsafəyə
yarışda dörddəbir
finala çıxan akademik qayıqlarda avarçəkənlər Aleksandr
Aleksandrovla Natalya Mustafayeva
yarımfinalda mübarizəni
davam etdirmək hüququ qazanmaq üçün dünən
dörddəbir finalda
öz qruplarında
ilk üç yerdən
birini tutmalı idilər. Onlar bu vəzifənin
öhdəsindən gəldilər
və bu gün yarımfinalda çıxış edəcəklər.
Böyük ümidlərlə gözlədiyimiz
cüdo yarışlarında
isə tatami üzərinə çıxmaq
növbəsi Pekin Olimpiadasının çempionu
Elnur Məmmədli
(81 kq-dək) və Ramilə Yusubovanın (63 kq-dək) idi. Ancaq onlar
da komanda yoldaşları kimi uğursuz çıxış
etdilər. Məmmədli rəqiblərdən heç
birinin xal qazana bilmədiyi elə ilk görüşdə
hakimlərin rəyinə
görə Kanada idmançısına uduzdu,
Yusubova isə Türkmənistan təmsilçisi
üzərində qələbədən
sonra səkkizdəbir
finalda koreyalıya məğlub oldu.
Oqtay BAYRAMOV
Xalq qəzeti.- 2012.- 1 avqust.-
S. 5.