Medallara görə çox
sağ olun, dostlar!
"Xalq qəzeti"nin
mənə yaratdığı
imkandan istifadə edərək, ilk növbədə,
Londonda XXX Yay Olimpiya Oyunlarında ölkəmizin şərəfini
layiqincə qoruyub beynəlxalq dairələrdə
onun nüfuzunu daha da artırmış
Azərbaycan idmançılarını
və onların məşqçilərini ürəkdən
təbrik edirəm. Həmvətənlərimiz Olimpiadada
möhkəm iradə
və yenilməz qələbə əzmi nümayiş etdirərək
əvvəlki Olimpiya oyunları ilə müqayisədə rekord nəticə göstərmişlər
- 10 medal və 30-cu yer!
Qazanılmış medallardan ikisinin
qızıl olması
isə bu gün keçirdiyimiz böyük bayrama xüsusi yaraşıq verir.
Pekin -
2008-dəkindən 3 medal, o cümlədən
1 qızıl mükafat
çox qazanaraq dünya idmançılarının
ən ali
məclisi - Olimpiya oyunlarında ən yaxşı nəticə göstərmiş 30 ölkə
sırasına daxil olmuşuq. Bunun nə demək
olduğunu izah etməyə ehtiyac yoxdur. Sadəcə onu deyim ki,
nə az,
nə çox - düz 175 ölkəni qabaqlayıb hər bir Azərbaycan vətəndaşının ürəyindən
olan böyük qələbənin sevincini
yaşayırıq. Bunun
üçün çempionlarımıza,
mükafatçılarımıza, məşqçi və mütəxəssislərə, bütün idman nümayəndə heyətimizə,
- çox sağ olun, dostlar! - deyirəm.
Bugünkü qələbəmizin əsası
hələ lisenziya yarışlarında qoyulmuşdu. Dörd
il əvvəl
Pekində 44 idmançı
ilə təmsil olunan Azərbaycan bu dəfə Olimpiadaya daha çox - 53 vəsiqə qazanmış və Londona daha mötəbər
nümayəndə heyəti
ilə getmişdi.
Başqa
cür ola
da bilməzdi. İnsan həyatının
ayrılmaz tərkib hissəsi olan idmanın inkişafına
böyük qayğı
göstərib onu gündəlik nəzarətdə
saxlayan dövlətimizin
başçısı, Milli
Olimpiya Komitəsinin prezidenti cənab İlham Əliyev Azərbaycan idmançılarının
XXX Yay Olimpiya Oyunlarına hazırlığı
ilə əlaqədar
xüsusi sərəncam
imzalamışdı. Olimpiyaçılarımızın gərgin və
məqsədyönlü məşqləri
hədər getmədi.
Azərbaycan idmanının ən
yaxşı nümayəndələri
ölkəmizin idman mükafatları xəzinəsini
2 qızıl, 2 gümüş
və 6 bürünc medalla daha da
zənginləşdirdilər. Bu, idmanımızın növbəti böyük
təntənəsidir.
Mən güləşçilərimizə,
xüsusən də təxminən bir saat ərzində iki dəfə fəxri kürsünün
zirvəsində gördüyümüz
Toğrul Əsgərov
və Şərif Şərifova dərin minnətdarlığımı bildirmək istərdim. Onlar, eləcə də komanda yoldaşları, gümüş mükafatçılar
Rövşən Bayramov
və Mariya Stadnik, ölkəmizə bürünc medallarla qayıdan Emin Əhmədov, Yuliya Ratkeviç, Xetaq Qazyumov ölkə idmanının bütün
pərəstişkarlarını sevindirdilər, zəngin ənənələrə malik
Azərbaycan güləş
məktəbi yetirmələrinin
layiqli davamçıları
olduqlarını inamla
təsdiq etdilər. Bürünc
mükafatçılar - boksçular
Teymur Məmmədovla
Məhəmmədrəsul Məcidov,
ağırlıqqaldıran Valentin Xristov da Olimpiya medallarına
aparan yolda böyük əzmkarlıq
göstərdilər.
Bir mütəxəssis
kimi bir neçə kəlmə də Aliyə Qarayeva və Şakir Şıxəliyevin
çıxışları haqqında danışmaq istərdim. Aliyə bədii gimnastların yarışlarının final mərhələsində
üç qalib sırasına daxil ola bilməsə
də, dördüncü
yer də Olimpiya oyunlarında pis nəticə deyil. Şakir isə Azərbaycanı
idman gimnastikası yarışlarında təmsil
edirdi. 1992-ci ildə Barselona Olimpiadasında Müstəqil
Dövlətlər Birliyi
komandasının bayrağı
altında çıxış
edən bizim Valeri Belenki o zaman Olimpiya çempionu olmuşdu.
Hazırda Azərbaycan Dövlət
Bədən Tərbiyəsi
və İdman Akademiyasının tələbəsi
olan Şakir Şıxəliyev, bəlkə
də, kifayət qədər təcrübəsi
olmadığı üçün
Londonda imkanlarından
tam istifadə edə bilmədi. Mən inanıram ki,
o, gələcək yarışlarda
daha yaxşı nəticə göstərəcək.
Bir sözlə, İngiltərə paytaxtında Azərbaycana medal qazandırmış idmançılar da, çıxışlarını mükafatsız başa vuranlar da çətin sınaqlarda ölkəmizin şərəfini layiqincə qorumaq üçün əllərindən gələni etdilər və son nəticədə biz 10 medalın sevincini yaşadıq, Azərbaycan idmanının daha bir zəfəri ilə qürur duyduq.
Elşad NƏRİMANOV,
beynəlxalq dərəcəli
hakim,
əməkdar bədən tərbiyəsi
və
idman xadimi
Xalq qəzeti.- 2012.- 18 avqust.- S. 3.