Qürbəti vətənləşdirənlər

Rusiya Federasiyasının Tomsk şəhərində fəaliyyət göstərən Azərbaycan Milli Mədəni Mərkəzi xaricdə yaşayan soydaşlarımızın yaratdığı ən fəal, mütəşəkkil diaspor qurumlarından biri kimi tanınır. Qərbi Sibirin mühüm sənaye və mədəniyyət mərkəzlərindən biri sayılan bu şəhərdə yaşayan 30 minədək azərbaycanlı özünə doğma ocaq bildiyi təşkilatın ətrafınıda sıx birləşməklə mədəni tələbatını cavabdlandırır, milli maraqları ictimai-siyasi həyatla uzlaşdırır.

2 il əvvəl Tomsk yerli hakimiyyətinə - Dumaya keçirilən seçkilərdə 3 soydaşlımızın deputat seçilməsi Azərbaycan diaspor hərəkatının uğurlarından biri kimi hamımızı sevindirdi. Birdən-birə 3 azərbaycanlının - Ələkbər Rəhimovun, Mahir Rüstəmovun və Şaban Bayramovun seçki qələbəsi soydaşlarımızın Tomsk vilayətindəki nüfuzunun, ictimai-siyasi fəallığının, diaspor kimi gücünün göstəricisidir.

Tomskun azərbaycanlı deputat üçlüyü həmvətənələrinin bütün sahələrdə maraqlarını qeyrətlə təmsil etdikdəri kimi, olnların Azərbaycanla sıx əlaqələrinin ağırlığını da çiyinlərində daşıyırlar. Milli Mədəni Mərkəz Dumadakı təmsilçilərinin arxasında möhkəm dayandığı kimi, icma elçiləri də hər bir azərbaycanlının marağının və qayğılarının keşiyindədir. Mərkəz və deputat qrupu Azərbaycanla Tomsk arasınıda da körpü rolunu oynayır. Tomskdakı diasporumuzla sıx əlaqə saxlayan Azərbaycan Respublikası Milli Məclisinin deputatları Elton Məmmədov və Mirkazım Kazımov onların bu gərəkli fəaliyyətlərinə Vətəndən dəstək qazandırırlar.

Bu günlərdə Milli Mədəni Mərkəzin rəhbərliyi depuat üçlüyünün iştirakı ilə Bakıda olmuş, müxtəlif mədəni tədbirlər və məclislər keçirmişlər. Soydaşlarımızın yenidən Vətəndə olması fürsətindən istifadə edib Tomskun azərbaycanlı deputatlarını redaksiyamıza dəvət etdik. Onları oxucularımıza tanıdırıq:

Rəhimov Ələkbər Əlixan oğlu 1957-ci ildə Azərbaycan Respublikasının Cəlilabad şəhərində anadan olub. 1975-ci ildən Rusiya Federasiyasının Tomsk şəhərində yaşayır. 1975-1986-cı illərdə burada silahlı qüvvələrdə xidmət edib. Müxtəlif illərdə şəhərin xidmət sahəsində rəhbər vəzifələrdə çalışıb. Lenin və Oktyabr dairələrinin birləşmiş icra başçısının müavini işləyib. Hazırda "Retro" MMC-nin baş direktorudur. 1996-cı ildən Tomskdakı Azərbaycan Milli Mədəni Mərkəzinin prezidentidir. Dünya azərbaycanlılarının Bakıda keçirilən 1-ci və 2-ci qurultaylarına Rusiya Federasiyasından nümayəndə seçilmişdir.

Rüstəmov Mahir Rüstəm oğlu 1958-ci ildə Cəlilabad rayonunun Ağdaş kəndində anadan olub. Belarusiya Kənd Təsərrüfatı Akademiyasını bitirib, mühəndis-hidrotexnikdir. 1984-cü ildə Tomsk Melorasiya Birliyində fəaliyyətə başlayıb, mühəndis, baş mühəndis vəzifələrində çalışıb. 1996-cı ildən mineral su istehsal edçən "Omeqa - Holdinq" MMC-nin baş direktorudur. Xeyriyyəçilik fəaliyyəti ilə də yaxşı tanınır, "Selena" xeyriyyə fondunun təsisçisidir.

Bayramov Şaban Rüstəm oğlu 1965-ci ildə dünyaya göz açmışdır. Rostov Mühəndis İnşaat İnstitutunu bitirmişdir. Hazırda "Tomskmeşətikinti" Açıq Səhmdar Cəmiyyətinin baş direktorudur. 2007-ci ildən Tomsk Vilayət İctimai Palatasının üzvüdür. Vilayət üzrə "İlin mesenatı" müsabiqəsinin qalibi olmuşdur. Qızı Lamiyə Bayramova Tomsk Azərbaycan Gənclər Təşkilatının sədridir.

Redaksiyada deputat soydaşlarımızı salamlayan "Xalq qəzeti"nin baş redaktoru Həsən Həsənov 3 azərbaycanlının Rusiyanın böyük əyalət şəhərlərindən birində yerli hakimiyyətə seçilməsinin önəmini vurğuladı, onlara kollektivin xoş arzularını çatdırdı. Baş redaktor qonaqlara qəzetin tarixi, çağdaş məramı, diaspor quruculuğuna fəal informasiya dəstəyi göstərməsi barədə məlumat verdi.

Deputatlar isə ümummilli lider Heydər Əliyevin diaspor siyasətinin həyata keçirilməsi ilə bağlı Tomsk Azərbaycan icmasının fəaliyyətindən danışdılar. Bildirildi ki, onlar ulu öndərin tövsiyələrini rəhbər tutaraq qonşu dövlətin uzaq vilayətində xalqımızın adına layiq yaşayıb-çalışır, hər yerdə Azərbaycanın şərəfini uca tuturlar. Xalqımızın ən ağrılı problemi Tomsk azərbaycanlıları üçün də milli prioritetdir. İcma üzvləri Azərbaycan həqiqətlərini başqa xalqlara çatdırmağı da vacib məsələlərdən sayır. Milli varlığı qoruyub saxlamaq, mədəni dəyərlərə bağlı olmaq Vətənə övladlıq borcu ilə vəhdətdə götürülür. Heç kəs Azərbaycanın sevincindən və kədərindən uzaq deyil və bunu əməli işlərlə sübuta yetirirlər.

Görüşdə Tomsk icması ilə redaksiyanın sıx əlaqə saxlaması, qəzetdə soydaşlarımızın qürbətdə qazandıqları uğurların işıqlandırılması da söhbət mövzusu oldu. Sonda qonaqlar qısaca Vətən təəssüratlarını söylədilər:

Ələkbər Rəhimov: - Bu gün Azərbaycana, Bakıya gələn xaricilər sürətli inkişafa, yaradılmış gözəlliyə heyran qalırlar. Biz isə bu prosesə həm içəridən, həm də kənardan baxıb ürəkdən sevinirik.

Azərbaycanın xoş sorağı uzaq Sibirə də qədərincə gəlib çatır. "Avroviziya" təntənəsi başımızı nə qədər uca elədi. London Yay Olimpiya Oyunlarında Vətənimizin 10 medal qazanması da bizi qürurlandırdı.

Biz Azərbaycan üçün önəmli ölkə olan Rusiyada xalqımıza xoş münasibət yaratmaqla, rusları və kənar xalqları ana yurdumuza dost etməklə, iqtisadi-mədəni əlaqələri genişləndirməklə respublikamıza az da olsa kömək etmək istəyirik. Şükür ki, dostlarımızın, bizi anlayanların sayı getdikcə artır. Biz övladlarımızı da Vətən sevgisi ilə böyüdür, yeri gəldikcə onların Azərbaycana qayıtmasına çalışırıq.

Mahir Rüstəmov: - Azərbaycan gənc, müstəqil dövlət kimi dünya birliyində layiqli yer tutur. Prezident İlham Əliyev Azərbaycanı inamla irəli aparır - Vətənimiz bir sıra sahələrdə önə çıxır. Bu prosesə kənarda yaşayan bütün azərbaycanlılar da kömək göstərməlidir. Qoy dostlarımız sevinsin, düşmənlər qabiliyyətimizi, gücümüzü görüb özünü yığışdırsın.

Sevinirik ki, bu gün təkcə Bakı deyil, bütün regionlar inkişaf edir. Ölkənin müdafiə qabiliyyəti yüksəlir. Biz də inanırıq ki, bu proses Dağlıq Qarabağ münaqişəsinin həllində təsirli olacaq. Biz bu münaqişə və onun ağrıları ilə bağlı müxtəlif tədbirlər keçiririk. Arzumuz budur ki, qələbə çevincini xalqımızla bir yerdə yaşayaq.

Şaban Bayramov: - Mən inşaatçı olduğuma görə Bakıdakı quruculuq işlərinə xüsusi diqqət yetirdim. Çox tikilir, yeni infrastruktur yaradılır. Arzu edərdim ki, gələcək tələbat daha çox nəzərə alınsın. Elə tikilsin ki, on illərlə yox, yüz illərlə gərəkli olsun, Qız Qalası kimi tarixləri aşa bilsin.

Bir arzum da odur ki, soydaşlarımızdan xaricdə yaşayan nadir mütəxəssislər ölkəyə dəvət olunsunlar. Belə insanlar bugünkü nəhəng quruculuğa yeni ahəng qata bilərlər. Biz yaşadığımız diyarı bacardığımız qədər vətənləşdirməyə çalışırıq. Bu dəfə də qürbətə qəlbimiz dolusu Azərbaycan aparırıq.

Tahir AYDINOĞLU

Xalq qəzeti.- 2012.- 26 avqust.- S. 4.