Azərbaycanda turizmin inkişafı

Son dövrlərdə Azərbaycanda turizm yüksək templə inkişaf etməkdədir. Bu özünü həm ölkəmizdə geniş turizm infrastrukturunun formalaşmasında, həm də sahənin inkişafını göstərən göstəricilərlə xarakterizə olunur.

Mədəniyyət və Turizm Nazirliyinin mətbuat xidmətindən bildirmişlər ki, nazirlik tərəfindən 2012-ci ilin I yarımili ərzində Azərbaycana gələn əcnəbi vətəndaşların sayı ilə bağlı müqayisəli təhlillər aparılmışdır.Təhlil göstərir ki, 2011-ci ilin müvafiq dövrü (1.016.559 nəfər) ilə müqayisədə 2012-ci ilin I yarımili ərzində (1.088.823 nəfər) Azərbaycana gələn əcnəbi vətəndaşların sayında 72.264 nəfər və ya 7,1% artım müşahidə olunmuşdur.

2011-ci ilin müvafiq dövrünə nisbətən 2012-ci ilin I yarımilliyi ərzində ən çox artım Gürcüstandan (55.462 nəfər və ya 21,9%), Rusiyadan (33.671 nəfər və ya 9,8%), Türkiyədən (17.864 nəfər və ya 15,6%), Almaniyadan (3.570 nəfər və ya 67,7%), Özbəkistandan (2.690 nəfər və ya 41,1%), Böyük Britaniyadan (2.196 nəfər və ya 18,9%) və Ukraynadan (1.858 nəfər və ya 10,8%) müşahidə olunmuşdur. Region dövlətlər üzrə nəticələr də diqqətəlayiqdir. MDB ölkələri və Gürcüstan üzrə ümumi artım 89.972 nəfər və ya 13,9%, Avropa ölkələri üzrə ümumi artım 30.808 nəfər və ya 20,6%, Asiya ölkələri üzrə artım 986 nəfər və ya 11,0%, Afrika ölkələri üzrə artım 229 nəfər və ya 25,3%, Amerika və Avstraliya üzrə artım 1.102 nəfər və ya 14,0% təşkil etmişdir.

Avropa ölkələrindən gələn əcnəbi vətəndaşların sayında artım müşahidə olunmuş, heç birində azalma qeydə alınmamışdır. Bu hal Azərbaycanın Avropa məkanına yaxın olması və "Eurovision-2012" kimi mühüm tədbirlərin Azərbaycanda keçirilməsi digər Avropa ölkələrindən ölkəmizə turizm axınını intensivləşdirir.

Eyni zamanda, İran Körfəzi və Yaxın Şərq ölkələri üzrə 51.112 nəfər və ya 34,0% azalma müşahidə olunmuşdur.Bunun əsas səbəbi Yaxın Şərqdə müşahidə olunan qeyri- sabit vəziyyətdir.

2011-ci ilin müvafiq dövrü (1.776.439 nəfər) ilə müqayisədə 2012-ci ilin I yarımili ərzində (1.685.564 nəfər) xarici ölkələrə gedən Azərbaycan vətəndaşlarının sayında 90.875 nəfər və ya 5,4% artım müşahidə olunmuşdur. Xarici ölkələrə gedən Azərbaycan vətəndaşlarının sayının artması ölkədə iqtisadi inkişafın davamlı olduğunu, beynəlxalq iqtisadi əlaqələrin genişlənməsi və ölkə əhalisinin sosial-iqtisadi vəziyyətinin yaxşılaşmasını göstərir. Bu göstəricilər ümumilikdə Azərbaycanın turizm sektorunun inkişafı, möhkəmlənməsi və dövlətin turizm sektoruna diqqət və dəstəyini göstərir.

M.MÜKƏRRƏMOĞLU

Xalq qəzeti.- 2012.- 31 avqust.- S.5.