“Almaniya bir rəssamın gözu ilə”

Almaniya Federativ Respublikasının Bakıdakı Səfirliyinin təşkilatçılığı ilə “Qız Qalası” İncəsənət Qalereyası, Azərbaycan Dövlət Rəssamlıq Akademiyası, Kapital Bank, “Standard İnsurance”, “Berlin-Bakı” Rəsm Qalereyası ilə birlikdə Alman-Azərbaycan Mədəniyyət Birliyi “Kapellhaus”da “Almaniya bir rəssamın gözü ilə” adlı sərginin acılışı olmuşdur.

Rəssamlıq müsabiqəsinin 5-ci ildönümünə həsr olunmuş sərginin açılışında çıxış edən Almaniya Federativ Respublikasının Azərbaycandakı səfiri Herbert Kvelle demişdir:

- Azərbaycan və Almaniya arasında əlaqələr bütün sahələrdə inkişaf edir. Bu gün bu əlaqələrin genişləndiyini mədəniyyət sahəsində görürük. Bir neçə ildir ki, Azərbaycanlı gənc rəssamlar tərəfimizdən təşkil olunan müsabiqədə iştirak edir və öz əsərlərini təqdim edirlər. Hər il bu rəsmlərin arasından ən yaxşıları seçilirdi. Bu il isə müsabiqənin 5 illiyi ilə əlaqədar olaraq məhz ötən illər ərzində qalib gələn rəssamlardan xahiş etdik ki, ikinci dəfə həmin rəsm əsərlərini çəkib müsabiqəyə təqdim etsinlər. Bu mövzular gənc rəssamların Almaniya haqqında olan təsəvvürləridir. Çox maraqlıdır ki, Almaniya haqqında təəssüratlar bu rəsm əsərlərində öz əksini tapmışdır. Rəssamlar həm də Almaniya ilə Azərbaycanı birləşdirən xüsusiyyətləri əks elətdirmişlər. Biz bu il qaliblərin qalibini seçmişik. Sərgidə rəssamların birinci və ikinci əl işləri təqdim olunur. Xüsusilə maraqlıdır ki, birinci ilə ikinci rəsm əsərləri arasında böyük bir fərq vardır. Birinci rəsm əsərlərinin müsabiqəsində məqsəd bu idi ki, gənc rəssamların ilk dəfə Almaniya haqqında necə düşündüklərini öyrənək. Bütün qalibər 5 il ərzində Almaniyaya səfər etdikdən sonra bu rəsmləri çəkmişlər. Qaliblərin Almaniya haqqında mövqelərinin dəyişməsini görə bilərsiniz. Birinci rəsmlərlə inkinci rəsmlər arasında böyük bir inkişaf görürük. Ölkə haqqında rəssamların yeni təsəvvürləri yaranmışdır. Böyük inkişafı, onların yaratdıqları təsvirləri, belə gözəl guşələri təkcə Almaniyada deyil, Azərbaycanda da görmək olar.

Bu rəssamlıq müsabiqəsi növbəti illərdə də davam etdiriləcək. İlkin olaraq burada gördüyünüz rəsm əsərləri bu tədbirin, müsabiqənin sponsorları – Azərbaycanın bir sıra bankları, sığorta şirkətləri, qalereyaları, o cümlədən “Berlin-Bakı” Rəsm Qalereyası ilə birlikdə təşkil olunmuşdur. Bu əsərlər Berlinə göndəriləcək, bir il ərzində orada səgilənəcək və sonra digər əsərlərlə birlikdə “Kapellhaus” çərçivəsindən kənarda nümayiş etdiriləcəkdir. Biz çətinliklə olsa da, münsiflər heyəti tərəfindən qalibi seçmişik. Bu rəsmlər həmin rəssamın Berlin səfərindən sonra çəkilmişdir.Gənc rəssam Ləman Məmmədzadə müsabiqənin qalibi seçilmişdir.

Azərbaycan Dovlət Rəssamlıq Akademiyasının professoru, xalq rəssamı Səlhab Məmmədov müsabiqədə 600-dən çox tələbənin iştirak etdiyini, onlardan 30 nəfərinin rəsmlərinin münsiflər tərəfindən bəyənildiyini qeyd etmiş, Almaniya səfirliyinə və sponsorlara minnətdarlığını bildirmişdir.

A.SADIQOĞLU

Xalq qəzeti.- 2012.- 9 dekabr.- S. 7.