Lerik:inkişaf tarixinin daha bir ilinə yekun vuruldu

Dağlar qoynunda yerləşən Lerik rayonu son illərdə xeyli dəyişmiş, inkişaf etmişdir. Bu fikir 2011-ci ilin yekunlarına və qarşıda duran vəzifələrə həsr olunmuş hesabat yığıncağında səslənən bütün çıxışların ana xəttini təşkil etmişdir. Tədbir iştirakçıları əvvəlcə ümummilli lider Heydər Əliyevin abidəsini ziyarət etmiş, unudulmaz dahi şəxsiyyətin xatirəsi önündə baş əymişlər.

Rayon mədəniyyət evinin foyesində isə iştirakçılar tikinti-quruculuq işlərini, istehsal və turizm potensialını əks etdirən fotoşəkillərdən və çeşidli məhsul nümunələrindən ibarət sərgi ilə tanış oldular. Rayonun sosial-iqtisadi inkişafına həsr olunmuş film nümayiş etdirildi.

Sonra Lerik Rayon İcra Hakimiyyətinin başçısı Rövşən Bağırovun 2011-ci ildə görülmüş işlər və qarşıda duran vəzifələrə dair məruzəsi dinlənildi. O, böyük iftixar hissi ilə bildirdi ki, Sovetlər dönəmində heç bir ölkə rəhbərinin qədəm qoymadığı Lerikə 2005-ci ildən başlayaraq, Azərbaycan Prezidenti cənab İlham Əliyev 3 dəfə səfər etmişdir. Bir sıra sosial obyektlərin açılışında iştirak edən ölkə başçısının rayon ictimaiyyəti ilə görüşü zamanı söylədiyi fikirlər görülmüş işlərə verilən ən böyük qiymətdir: "Mən çox şadam ki, Lerikdə inkişaf çox sürətlə gedir... Rayonun, sözün əsl mənasında, inkişafı həm yerli sakinlər, həm də bütün ölkə üçün çox vacibdir... Dağ rayonlarına, paytaxtdan, mərkəzdən uzaqda yerləşən bölgələrə xüsusi diqqət göstərilməlidir və bu diqqət göstərilir".

Məruzəçi sonra dedi:

- Cənab İlham Əliyevin 14 aprel 2009-cu ildə imzaladığı "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın təsdiq edilməsi haqqında Fərmanın icrasına uyğun olaraq keçən vaxt ərzində rayonumuzda 1951, o cümlədən ötən il 621, ümumilikdə isə 2004-2011-ci illər ərzində 6701 iş yeri açılmışdır. Bu iş yerlərinin 30 faizindən çoxu daimi xarakterlidir.

Ölkə başçısının diqqəti sayəsində rayonumuzda dövlət vəsaiti hesabına iki kənddə tam orta məktəblər inşa edilmişdir. Yeddi kənddə isə məktəb binalarının tikintisində iş davam etdirilir. 2012-ci ildə rayonumuzda daha 7 məktəb binasının tikintisi nəzərdə tutulmuşdur.

Rayon icra hakimiyyəti aparatı, baytarlıq idarəsi yeni inşa edilmiş, müasir binalara köçmüşdür. Vergilər idarəsi üçün kompyuter terminalının, statistika idarəsi üçün inzibati idarə binasının, Siyov kəndində həkim məntəqəsinin tikintisində son tamamlama işləri aparılır. Rayon üzrə bütün ATS-lər elektronlaşdırılmışdır. Qarabağ müharibəsi əlilləri və şəhid ailələri üçün Lerik şəhərində 16 mənzilli yaşayış evi, ərazilərdə isə Qarabağ müharibəsi əlilləri üçün fərdi yaşayış evləri tikilmişdir. Cənab İlham Əliyevin şəxsi tapşırığı ilə Lerik şəhərində 17 meqovatlıq elektrik stansiyasının tikintisinə başlanmışdır. Lerik şəhərinin su təchizatının yenidən qurulması və kanalizasiya sisteminin yaradılması ilə bağlı Dünya Bankı ilə Azərbaycan hökuməti arasında bağlanmış kredit sazişinə əsasən müvafiq şəbəkələrin, həmçinin su və çirkab su qurğularının təkmilləşdirilməsi məqsədilə tenderdə qalib gəlmiş Türkiyənin "Gəlişim" şirkəti tərəfindən iş aparılır. İlkin hesablamalara görə, bütün bu işlər üçün 50 milyon manatdan yuxarı dövlət vəsaiti ayrılmışdır ki, bu da rayonumuzun tarixində həyata keçirilən maliyyə vəsaiti baxımından ən böyük sosial layihələrdir.

Daxili imkanlar hesabına 8 kənddə, "Azərsu" ASC tərəfindən isə 3 kənddə hər biri 40 min manata başa gələn artezian quyuları qazılmışdır. Gürdəsər kəndinin məhəllədaxili su xətləri çəkilmişdir. Cari ildə bu kəndlərdə su anbarlarının və magistral xətlərin çəkilişi başa çatdırılacaq. Küman kəndinə bir iş adamının köməyi ilə 8 kilometr məsafədən su xətti çəkilmiş, Cəngənəvud kənd sakinlərinin dəstəyi ilə isə kəndə su xəttinin çəkilməsinə başlanmışdır. Lerik şəhəri və rayonun 6 kəndində yaşayan 1800-dən yuxarı ailə mavi yanacaqdan istifadə edir, daha 10 yaşayış məntəqəsinin qazlaşdırılması üçün işlər davam etdirilir. Lakin magistral qaz xətti üzərində yerləşən bəzi kəndlərin layihə-smeta sənədləri çoxdan hazırlansa da, qaz çəkilişi nədənsə yubadılmışdır. Rayon icra hakimiyyəti tərəfindən edilən müraciətlərdən sonra həmin yaşayış məntəqələrinə ötən il yenidən baxış keçirilmiş və sənədlər təkrar hazırlanmışdır.

Şəhərin bütün küçələrində suaxarlar, sakinlərin narahatlığına səbəb olan sel suyu kanalları inşa edilmişdir. Hacı Heydər küçəsində abadlıq işləri başa çatdırılmış, şəhərin küçələrində 1700 kvadratmetrdən çox istinad divarı hörülmüş, 1967 kvadratmetrlik divar ağlay daşları ilə üzlənmiş, 1000 kvadratmetrədək səkiyə tamet döşənmiş, küçələrdə 56 yeni işıqlanma dirəyi quraşdırılmışdır.

Yol istismar idarəsi tərəfindən hesabat ilində 20 min kvadratmetr yola asfalt döşənmiş, Lənkəran-Lerik yolunda baş verən uçqunlar təmizlənmişdir. Sakinlərin, bəzi bələdiyyələrin və iş adamlarının köməyi ilə 16 kəndin bir-biri ilə əlaqəsini təmin edən 8 yolda təmir işləri aparılmış, Haftoni kəndi yaxınlığında körpü inşa edilmişdir. Amma Yol istismar idarəsinin faydalı iş əmsalının artırılmasına tələbat böyükdür.

Ötən il şəhərdə yerli sahibkar tərəfindən 118 dükanı, 1 örtülü bazarı, iaşə obyekti, məhsul anbarı və mehmanxanası olan bazar kompleksi inşa edilərək rayon sakinlərinin istifadəsinə verilmişdir. Əliabad kəndində 350 yerlik xeyir-şər evi, Daster kəndində şadlıq sarayı, şirə sexi, restoran, Günəşli kəndində isə iaşə obyektinin tikintisində son işlər aparılır. Rayonumuzda adambaşına düşən gəlir 859 manata çatmışdır. Ümumi məhsul buraxılışının həcmi əvvəlki ilə nisbətən 13, nəqliyyat daşımalarının gəlirləri 9, pərakəndə əmtəə dövriyyəsi 18, pullu xidmət 9 və kənd təsərrüfatı məhsulunun həcmi 14 faiz artmışdır. 2011-ci ildə bütün maliyyə mənbələri hesabına 338 min manatlıqdan çox təmir-tikinti işləri icra edilmişdir. Rayon üzrə əhalinin orta aylıq nominal əməkhaqqı artaraq 267 manata, adambaşına düşən gəlirlər 859 manata çatmışdır.

Kənd təsərrüfatı məhsulları istehsalı ilə məşğul olan fermer və fərdi təsərrüfatlarda mal-qaranın baş sayı, ət, süd, yumurta, yun istehsalı artmışdır. Lakin "Aqroservis" yaradılmasına baxmayaraq, maşın və digər zəruri texnika tələbatı ödəmir.

Lerik fermerlərinin istehsal etdiyi keyfiyyətli bal paytaxtda keçirilən sərgi-satış yarmarkalarında həvəslə alınır. Hazırda Piran kəndində broyler fabrikinin tikintisi aparılır. Obyektdə 80-dən yuxarı lerikli işləyir.

Qarabağ müharibəsi əlilləri, şəhid və digər kateqoriyadan olan imkansız ailələrə icra hakimiyyəti tərəfindən pul və ərzaq bağlamaları verilmiş, bayramlarla bağlı şadlıq saraylarında süfrələr açılmış, veteranların mənzil-məişət problemlərinin həllinə köməklik göstərilmişdir. Qış fəsli ilə əlaqədar sərt keçən havalarda rayon elektrik təsərrüfatının işi xeyli çətinləşmişdir. Belə ki, əsasən meşə ərazilərindən keçən, uzun müddət əsaslı təmir aparılmayan Lerik-Vizəzəmin elektrik xəttində mütəmadi qəzalar baş verir. Bu xəttin əsaslı təmirinə tələbat çox yüksəkdir.

Şəhərin təmizliyi üçün 12 ədəd müxtəlif markalı maşın ayrılmışdır. Salınmış yaşıllıqlar lazımı səviyyədə qorunmalıdır ki, sakinlərin istirahəti üçün yaradılan meydanlarda, park və xiyabanlarda, fəvvarələrin ətrafında nümunəvi şərait yaradılsın. İldən-ilə abadlaşan, xarici qonaqlarının sayı artan şəhərimizin təmiz saxlanması son dərəcə vacibdir.

Sonra icra hakimiyyətinin başçısı Rövşən Bağırov təhsil, səhiyyə, mədəniyyət və turizm sahələrinin işinə münasibət bildirdi. Bu sahələrdə qazanılan uğurları diqqətə çatdırmaqla bərabər, qarşıda duran vəzifələrdən danışdı.

Azərbaycan Respublikasının dövlət müstəqilliyinin 20-ci ildönümü ilə əlaqədar "Lerik: tərəqqi və yüksəlişə doğru" kitabının hazırlanması ilin yaddaqalan hadisələrindəndir.

Məruzə ətrafında işgüzar müzakirələr aparıldı. Milli Məclisin deputatı İqbal Məmmədov, Prezident Administrasiyasının məsul əməkdaşı Vəfadar Bağırov da yığıncaqda çıxış etdilər.

Sonda hesabat yığıncağının iştirakçıları və rayon ictimaiyyəti adından Azərbaycan Respublikasının Prezidenti cənab İlham Əliyevə müraciət qəbul edildi.

Əli NƏCƏFXANLI

Xalq qəzeti.- 2012.- 23 fevral.- S. 9.