Xocalı
soyqırımını törədənlər ədalət
mühakiməsi qarşısında cavab
verməlidirlər!
Xocalı soyqırımının
tanınmasının hüquqi əsasları
Xocalı
hadisəsi qətliamdır, yoxsa soyqırımı? Bu günə
qədər mətbuatda bu iki anlayışdan sıx-sıx
istifadə edilsə də onların qarşılıqlı
müqayisəsinə rast gəlinməmişdir. Lakin qeyd edilən
anlayışların fərqinə varmadan bəzi yazarlar hadisəni
qətliam, digərləri isə soyqırımı kimi qiymətləndirirlər.
Əslində bu sözlər həm etimologiya, həm də
hüquqi cəhətdən fərqli anlayışlardır.
Azərbaycan dilinin izahlı lüğətində (3-cü
cild, səh. 672, 2006) "qətliam" ələ
keçirilən bir ölkənin bütün əhalisinin
qılıncdan keçirilməsi, kütləvi
qırğın kimi dəyərləndirilir.
Cinayət
qanunvericiliyində bu məfhuma uyğun xüsusi maddə də
nəzərdə tutulmuş (ACM 105-ci maddə) və qeyd
edilmişdir ki, soyqırımı əlamətləri olmadan əhalini
bütövlükdə və qismən məhvetmə əməli
əhalini məhvetmə cinayəti kimi qiymətləndirilir.
Soyqırımı isə Azərbaycan Respublikası Cinayət
Məcəlləsində başqa bir maddə ilə
(103-cü maddə) tövsif edilir və göstərilir ki, hər
hansı milli, etnik, irqi və ya dini qrupu, bir qrup kimi
bütövlükdə və ya qismən məhv etmək məqsədi
ilə qrup üzvlərini öldürmə, qrup üzvlərinin
sağlamlığına ağır zərər vurma və
ya onların əqli qabiliyyətinə ciddi zərər vurma,
qrupun bütövlükdə və ya qismən fiziki məhvinə
yönəlmiş yaşayış şəraiti yaratma, qrup
daxilində doğumların qarşısını almağa
yönəlmiş tədbirləri həyata keçirmə,
bir qrupa mənsub olan uşaqları başqa qrupa keçirmə
soyqırımı cinayətinin tərkibini yaradır. Xocalı
hadisəsini törətmiş ermənilərin əməlləri
Cinayət Məcəlləsinin məhz bu maddəsi ilə
tövsif edilməlidir.
Məlumdur
ki, 1992-ci il fevralın 25-dən 26-na keçən gecə Ermənistan
silahlı qüvvələri SSRİ dövründən Xankəndi
şəhərində yerləşən 366-cı
motoatıcı alayın zirehli texnikası və hərbi heyətinin
köməkliyi ilə Xocalı şəhərini
işğal etmişdir. Mühasirəyə alınan şəhərdə
qalmış təqribən 2500 nəfər Xocalı sakini
Ağdam rayonunun mərkəzinə çatmaq ümidi ilə
şəhəri tərk etmiş lakin onlardan 613 nəfəri
Azərbaycan millətinə məxsus olduqları
üçün soyqırımı cinayətinin qurbanı
olmuşdur: bunlardan da 63-ü uşaq, 106-sı qadın, 70-i
isə qoca ahıl yaşlı insanlar olmuşdur. 8 ailə
tamamilə məhv edilmiş, 25 uşaq hər iki valideynini,
130 uşaq valideynlərindən birini itirmiş, 487 nəfər,
o cümlədən, 76 uşaq yaralanmışdır. 1275 nəfər
əsir götürülmüş, 150 xocalı sakini itkin
düşmüşdür. Dövlətin və əhalinin əmlakına
1 aprel 1992-ci il tarixinə olan qiymətlərlə 5 milyard rubl
dəyərində ziyan vurulmuşdur.
Ermənilərin
törətdiyi bu mənfur hadisə kütləvi informasiya
vasitələrində ətraflı
işıqlandırılaraq beynəlxalq ictimaiyyətin nəzərinə
çatdırılsa da, ona bu günə qədər
lazımı hüquqi qiymət verilməmişdir. Ümumiyyətlə
götürdükdə, "soyqırım" sözü
"genosid" sözünün ekvivalentidir. Təsadüfi
deyildir ki, Azərbaycan Respublikası Milli Məclisinin 31 may
1996-cı il tarixli, respublikanın Birləşmiş Millətlər
Təşkilatının Baş Assambleyası tərəfindən
9 dekabr 1948-ci il tarixdə qəbul olunmuş "Genosid cinayətlərinin
qarşısının alınması və onun cəzalandırılması
haqqında" Konvensiyaya qoşulması barədə qəbul
etdiyi qanunda da "soyqırım" terminindən yox,
"genosid" terminindən istifadə edilmişdir.
"Genosid"
sözünün etimologiyası iki dilə aid olub, yunan
sözü "genos" - nəsil və latın
"caedo" - öldürmək ifadələrindən ibarətdir.
Bu söz ilk dəfə olaraq 1944-cü ildə yəhudi əsilli
Polşa hüquqşünası Rafael Lemkin tərəfindən
leksikona daxil edilmiş, 9 dekabr 1948-ci ildə isə "Genosid
cinayətinin qarşısının alınması və onun
cəzalandırılması haqqında" Konvensiyanın qəbulu
ilə ona rəsmi status verilmişdir.
Bu
konvensiya qüvvəyə mindikdən sonra genosid cinayətinin
törədilməsinə görə dövlətlərin
hüquqi məsuliyyəti konsepsiyası da paralel olaraq
inkişaf etməyə başlamışdır. Məlumat
üçün bildirirəm ki, beynəlxalq hüquqda
"genosid" sözü sülh və ya müharibə
vaxtında törədilməsindən asılı olmayaraq,
beynəlxalq hüquq normalarının pozulması kimi qiymətləndirilir
və beynəlxalq cinayət hesab olunur. Bu, öz əksini həm
adı çəkilən konvensiyada, həm də "Beynəlxalq
Cinayət Məhkəməsi" haqqında Roma Statutunun
6-cı maddəsində tapmışdır. Statuta görə,
Beynəlxalq Cinayət Məhkəməsinin yurisdiksiyasına
beynəlxalq birliyi narahat edən ən ciddi cinayətlər
daxildir ki, bunlara genosid cinayəti; Bəşəriyyət əleyhinə
törədilən cinayətlər; hərbi cinayətlər
və təcavüz aiddir.
Göründüyü
kimi, Beynəlxalq Cinayət Məhkəməsi yalnız bu
cinayətlərə münasibətdə müstəsna
yurisdiksiyaya malikdir və 6-cı maddədə verilən
genosid anlayışı 9 dekabr 1948-ci il tarixli Konvensiyada nəzərdə
tutulan anlayış ilə eynilik təşkil edir. Lakin
Statutada diqqəti cəlb edən məqamlardan biri məhkəmə
yurisdiksiyası çərçivəsində olan cinayətlər
barəsində informasiya daxil olduqda prokuror tərəfindən
cinayət təqibini həyata keçirilməsinin məcburiliyidir.
Bu məqsədlə prokuror dövlətdən, BMT
orqanlarından, hökumətlərarası təşkilatlardan,
QHT-lərdən və digər mənbələrdən
yazılı və şifahi informasiya əldə etmək
üçün sorğu etməkdə haqlıdır. Prokuror
sübutların kifayət etdiyi qənaətinə gəldikdə
məhkəmənin ilkin icraat palatasına təqdimat göndərməli
və həmin təqdimata müvafiq materialları əlavə
etməlidir.
9
dekabr 1948-ci il tarixli Konvensiyanın 6-cı maddəsinə əsasən
genosid cinayətinin məhkəmə icraatı, ərazisində
həmin cinayətin törədildiyi ölkənin məhkəmələri
tərəfindən və ya Konvensiyanın
iştirakçısı olan dövlətlərə
münasibətdə yurisdiksiyası olan Beynəlxalq Cinayət
Məhkəməsi tərəfindən həyata
keçirilir. Konvensiyanın 9-cu maddəsinə əsasən,
ölkələr arasında genosidin törədilməsinə
görə, məsuliyyətlə bağlı mübahisələr
tərəflərin birinin tələbi ilə Beynəlxalq Məhkəmənin
baxışına verilir.
Bu
gün Xocalı soyqırımı ilə bağlı
hüquqi qiymətləndirmənin vəziyyəti beynəlxalq
təcrübəyə və Azərbaycan Respublikası
Prezidentinin 26 mart 1998-ci il tarixli "Azərbaycanlıların
soyqırımı haqqında" fərmanının tələblərinə
uyğundurmu? Mən bu məsələyə müsbət
cavab verməkdə çətinlik çəkirəm.
Çünki bu vaxta qədər heç kim bu cinayətlə
bağlı mühakimə edilməmişdir. Halbuki,
yuxarıda qeyd edilən beynəlxalq sənədlərin tələbinə
görə hadisənin soyqırım kimi tanınması
üçün onun baş verdiyi dövlətin məhkəmə
orqanının bu barədə qüvvəyə minmiş
hökmü olmalıdır, narazı tərəfin isə bu
hökmdən Beynəlxalq Məhkəməyə şikayət
vermək hüququ vardır. Təssüf ki, bu günə qədər
heç kim Xocalı soyqırımı ilə bağlı Azərbaycan
Respublikası Cinayət Məcəlləsinin 103-cü maddəsi
ilə məhkum edilməmişdir. Bu maddənin subyekti ilə
bağlı bəzi məqamlara da beynəlxalq hüquq
baxımından aydınlıq gətirmək istərdim. Maddədən
göründüyü kimi cinayətin subyekti fiziki şəxslərdir.
Genosid cinayətlərində isə nəinki fiziki şəxslər,
habelə bütövlükdə dövlətin özü təqsirləndirilə
bilər. Konkret halda Xocalı soyqırımı ilə
bağlı ayrı-ayrı fiziki şəxslərlə
yanaşı, məhz Ermənistan dövlətinin də
genosid törətməsinin sübut mexanizmi yalnız və
yalnız oxşar tarixi hadisələrə verilən
hüquqi qiymətlərlə müəyyənləşdirilməlidir.
Bu gün bizim əlimizdə olduqca dəyərli bir sənəd
Nürnberq prosesini aparmış Beynəlxalq Hərbi
Tribunalın hökmü vardır və orada faşist
Almaniyasının bir sıra vəzifəli şəxsləri
cəzaya məhkum edilməklə bərabər, SS, SD, Gestapo
və Nassist partiyasının cinayətkar təşkilat kimi
tanınması barədə hökm
çıxarılmış və bu hökmlə faktiki
olaraq Faşist partiyasının hakimiyyətdə olduğu
dövlət tərəfindən Avropa yəhudilərinə
qarşı genosid törədilməsi qənaətinə gəlinmişdir.
Bu hal Xocalı soyqırımının Ermənistan dövləti
tərəfindən törədilməsinin sübutu
mexanizminin hüququ əsası kimi çıxış edə
bilər.
Bütün
fəaliyyəti dövründə insan və vətəndaş
hüquq və azadlıqlarını hər şeydən
üstün tutan demokratik dövlətlərin böyük əksəriyyəti
erməni soyqırımı ilə bağlı məsələləri
daim diqqətdə saxlayır və Fransa parlamenti tərəfindən
bu soyqırımı qəbul etməyən şəxslərin
cinayət məsuliyyətinə cəlb edilməsi məsələsini
pisləməkdədir. Düşünürəm ki, bu
dövlətlər sırasında olan Azərbaycan Respublikası
da qeyd edilən qərarı pisləməklə kifayətlənməməli,
soyqırımı məsələsinin prosessual qanun
pozğunluğu ilə gündəliyə
salınmasını hüquqi cəhətdən, yuxarıda
qeyd edilən qaydada, beynəlxalq sənədlərə və
təcrübəyə istinad etməklə əsaslandırmalıdır.
Yeri gəlmişkən Fransa parlamentinin qərarının həm
də aşağıdakı səbəblərə görə
əsassız olduğunu iddia edirik:
1. 10
dekabr 1948-ci il tarixli "İnsan hüquqları
haqqında" Ümumi Bəyannamənin 18-ci və 19-cu maddələrində
hər kəsin fikir vicdan və dini azadlıq hüququna malik
olduğu və onları sərbəst şəkildə ifadə
etmək hüququ göstərilmişdir.
2. 4
noyabr 1950-ci tarixli "İnsan hüquqlarının və əsas
azadlıqlarının müdafiəsi haqqında" Avropa
Konvensiyasının 10-cu maddəsinin 1-ci bəndində hər
kəsin öz fikrini sərbəst ifadə etmək
hüququna malik olduğu, öz fikrində qalmaqda azad
olduğu, dövlət hakimiyyəti orqanları tərəfindən
hər hansı maneçilik olmadan və dövlət sərhədlərindən
asılı olmayaraq, məlumat və ideyalar almaq və yaymaq
azadlığı qeyd edilmişdir.
3. 16
dekabr 1966-cı il tarixli "Mülki və siyası
hüquqlar" haqqında Beynəlxalq Paktın 18-ci və
19-cu maddələrində hər kəsin fikir, vicdan və
dini azadlıq hüququna malik olduğu və onları sərbəst
şəkildə ifadə etmək hüququ təsis
edilmişdir.
4. 26
avqust 1789-cu il tarixdə Fransada qəbul olunmuş
"İnsan və vətəndaş hüquqları"
haqqında Bəyannamənin 10-cu 11-ci maddələrində
göstərilir ki, heç kəs baxışlarına
görə sıxışdırıla bilməz, fikir və
düşüncəsinin sərbəst ifadəsi insanın ən
dəyərli hüququ olduğu üçün hər bir vətəndaş
sərbəst şəkildə fikrini ifadə edə bilər,
yaza bilər və nəşr oluna bilər.
Fransa
dövləti qeyd edilən beynəlxalq sənədlərin
hamısına qoşulduğundan, onun parlamentinin erməni
soyqırımı ilə bağlı
çıxardığı qərar nəinki heç bir
hüququ qüvvə kəsb edə bilməz və hətta
bütün beynəlxalq qanunlar və konvensiyalarla ziddiyyət
təşkil edir. Düşünürəm ki, Xocalı
soyqırımının tanınması üçün beynəlxalq
hüququn normalarında əksini tapmış mexanizmə
ciddi riayət edəcəyimiz təqdirdə haqlı
olduğumuzu beynəlxalq arenaya çatdırar və
yalnız bu üsulla dünya dövlətlərinin dəstəyini
qazana bilərik. Fransanın yolu bizim üçün məqbul
deyildir. Biz əminik ki, Xocalıda tökülmüş
günahsız insanların qanı dünya xalqlarının dəstəyi
ilə yerdə qalmayacaq və cinayətkar erməni
quldurları layiqli cəzasını alacaq, Ermənistan
dövləti isə soyqırımı törətmiş
dövlət kimi tanınacaqdır.
İsaxan VƏLİYEV,
AMEA-nın Fəlsəfə,
Sosiologiya və
Hüquq İnstitutunun şöbə
müdiri, hüquq
elmləri doktoru
Xalq qəzeti.- 2012.- 26 fevral.- S. 5.