2012-ci il Azərbaycan üçün daha bir uğurlu il kimi başa çatacaq

Azərbaycanın sosial-iqtisadi inkişaf dinamikası bu ilin birinci yarısında da davam etmişdir. Bütövlükdə isə ölkəmizin iqtisadi inkişafının növbəti uğurlu mərhələsi kimi qiymətləndirilən son altı ayda ümumi daxili məhsul istehsalı 1,5 faiz, qeyri-neft iqtisadiyyatımız isə 11,3 artmış, qarşıda duran bütün vəzifələr müvəffəqiyyətlə icra olunmuşdur. Məlum olduğu kimi, son illər iqtisadi sahədə yüksək inkişafa nail olmuş Azərbaycan Respublikası artıq uğurlu investisiya siyasəti yeritməyə başlamış, ölkədə genişmiqyaslı quruculuq işlərinə, bir sıra sosial layihələrin icrasına start verilmişdir. Bütün bunlar isə, heç şübhəsiz, ölkəmizin ümumi sosial-iqtisadi inkişafını bir qədər də sürətləndirmiş, əhalinin həyat səviyyəsinin daha da yaxşılaşmasına səbəb olmuşdur.

Prezident İlham Əliyevin sədrliyi ilə Nazirlər Kabinetinin 2012-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında dövlət başçısının səsləndirdiyi fikirlər hər bir vətəndaşda Azərbaycanın dünyanın sürətlə inkişaf edən bir ölkəsinə çevrilməsi qənaətini bir qədər də möhkəmləndirdi. Möhtərəm Prezidentimiz dedi ki, biz 20 il ərzində həm siyasi, həm də iqtisadi sahədə köklü islahatlar aparmaqla ölkəmizi yeni müstəviyə gətirib çıxarmışıq. Azərbaycan artıq ortagəlirli ölkələr sırasındadır. Qarşıda duran hədəf isə belədir ki, Azərbaycan yüksəkgəlirli ölkələr sırasında olsun, inkişaf etmiş ölkəyə çevrilsin. Bunun üçün isə bizim hər cür imkanımız var. Çünki Prezident İlham Əliyevin rəhbərliyi ilə ölkəmizdə son dərəcə düşünülmüş, gələcəyə hesablanmış iqtisadi siyasət həyata keçirilir, xalqımızın firavan həyatının təminatına, ölkəmizin gələcək inkişafına yönəldilmiş məqsədli proqramlar reallaşdırılır. Ən başlıcası isə qarşıya qoyulmuş vəzifələrin öhdəsindən gəlmək üçün iqtisadi gücümüz və siyasi iradəmiz vardır.

Nazirlər Kabinetinin məlum iclasında dövlətimizin başçısı cari ilin ötən dövründə əldə olunmuş uğurları sadalamaqla yanaşı, qarşıda duran həlli vacib məsələlərə də geniş toxundu. Prezident İlham Əliyev proqram xarakterli yekun nitqində qeyd etdi ki, ilin sonunadək makroiqtisadi vəziyyəti sabit saxlamaqla yanaşı, ölkəmizin hərtərəfli inkişafı üçün son dərəcə vacib olan infrastruktur layihələrini də başa çatdırmalıyıq. Məlum olduğu kimi, hər bir ölkənin ümumi inkişafının təmin olunmasında yerli istehsalın gücləndirilməsi mühüm əhəmiyyət kəsb edir. Məhz bu vacib məqama toxunan Prezidentimiz ölkəmizdə yeni sənaye parklarının yaradılmasının davam etdiriləcəyini diqqətə çatdırdı. Dövlət başçısının ölkədə biznes mühitinin daha da yaxşılaşdırılması, özəl sektora dəstəyin gücləndirilməsi ilə bağlı göstərişləri isə belə bir qənaətə gəlməyə imkan verir ki, Azərbaycanda yeni iş yerlərinin yaradılması prosesi bir qədər də intensivləşəcək, ölkəmizin idxaldan asılılığı minimuma enəcəkdir. Bu günlərdə Azərbaycanın iqtisadi həyatı üçün son dərəcə vacib olan yeni sement və metal konstruksiyalar zavodları dövlət başçısının xeyir-duası ilə fəaliyyətə başladı. Bu da daxili bazarın mühüm tikinti materiallarına olan tələbatının ödənilməsini təmin etməklə yanaşı, ölkədə məşğulluq strategiyasının həlli baxımından da xüsusi əhəmiyyət daşıyır.

Yeri gəlmişkən, hazırda ölkə əhalisinin yarısından çoxu bölgələrdə yaşayır. Bu baxımdan regionlarda əhalinin məşğulluq imkanlarının təmin olunmasında xüsusi paya malik aqrar sahənin inkişaf etdirilməsi son dərəcə vacibdir. Məhz buna görədir ki, son illər kənd təsərrüfatı ölkə iqtisadiyyatının prioritet sahələrindən birinə çevrilməkdədir. Təsadüfi deyil ki, Prezident İlham Əliyev Nazirlər Kabinetinin məlum iclasında demişdir: " Kənd təsərrüfatının inkişafı ilə bağlı görülən tədbirlər öz nəticəsini verir. Kənd təsərrüfatı 10 faizdən çox artmışdır. Əminəm ki, biz növbəti illərdə çalışıb bu dinamikanı saxlamalıyıq. Mən dəfələrlə bu barədə fikirimi bildirmişəm. Kənd təsərrüfatı Azərbaycan iqtisadiyyatının şaxələndirilməsi üçün əsas sahələrdən biridir və məşğulluğun təmin edilməsi üçün, demək olar ki, əsas sahədir. Çünki əhalinin təxminən yarısı bölgələrdə, yəni kənd yerlərində yaşayır".

Qeyd etdiyimiz kimi, son illər ölkəmizin iqtisadi gücünün artması infrastruktur layihələrinin icrasını xeyli sürətləndirmişdir. İndi ölkənin elə bir bölgəsi yoxdur ki, orada yol infrastrukturunun yaxşılaşdırılması, əhalinin işıq, qaz, içməli su ilə təminatı ilə bağlı layihələr həyata keçirilməsin. Hətta artıq respublikamızın ən ucqar kəndlərinə belə, qaz xətlərinin çəkilməsinə başlanılmışdır. Bu isə o deməkdir ki, indi Azərbaycan dünyada özünün enerji təhlükəsizliyini tam təmin edən aparıcı ölkələrdən birinə çevrilmişdir. Bütün bu məsələlərdən geniş söhbət açan Prezident İlham Əliyev hazırda Azərbaycanın fəal iştirakı ilə reallaşdırılan enerji layihələrinin ölkəmizə əlavə güc verdiyini bir daha bəyan etmişdir.

Hazırda dünyanın ən dinamik inkişaf edən ölkələrindən birinə çevrilmiş Azərbaycanın paytaxtı Bakı şəhəri müasir meqapolisə çevriməkdədir. Bakının inkişafını xüsusi nəzarətdə saxlayan dövlətimizin başçısı bir il əvvəl qəbul etdiyi geniş proqrama bu yaxınlarda bir sıra əlavələr etdi. Elə Nazirlər Kabinetinin iclasında da bu barədə geniş söhbət açan ölkə Prezidenti paytaxtımızın daha da gözəlləşdirilməsi, burada bütün lazımi infrastrukturun yaradılması, xüsusən də şəhərin ekoloji mühitinin yaxşılaşdırılması ilə bağlı konkret tövsiyə və tapşırıqlar verdi. Bütün bunlar isə bir daha onu deməyə əsas verir ki, 2012-ci il Azərbaycanımız üçün daha bir uğurlu il kimi başa çatacaqdır.

Əlixan BƏDƏLOV,

iqtisad elmləri namizədi

Xalq qəzeti.- 2012.- 13 iyul.- S. 7.