"Azərbaycan folkloru mədəni sərvətimizdir"

Azərbaycan Respublikası Mədəniyyət və Turizm Nazirliyinin "2010-2014-cü illər üçün xalq yaradıcılığı paytaxtları" proqramına əsasən 2012-ci ildə Masallı şəhəri "Azərbaycanın Folklor paytaxtı" elan edilmişdir. Bununla əlaqədar rayonda artıq bir sıra maraqlı tədbirlər keçirilmişdir. Masallı Rayon İcra Hakimiyyəti başçısı aparatının akt zalında "Azərbaycan folkloru mədəni sərvətimizdir" mövzusunda elmi-praktiki konfrans da bu qəbildəndir.

Konfransı giriş sözü ilə rayon icra hakimiyyəti başçısının müavini Nəsir Muxtarlı açmışdır. Proqram üzrə görülən tədbirlərdən danışan natiq aprelin 30-dan mayın 4-nə kimi rayonda keçirilən ümumrespublika Muğam festivalından, "Halay" folklor ansamblına həsr olunmuş film çəkilişindən bəhs etmiş və demişdir ki, hazırda Masallının folkloru barədə kitablar üzərində iş gedir. Bundan başqa, "Onlar Masallıdandır" adlı sayt da yaradılacaq. Folklor ili cərcivəsində nəzərdə tutulan tədbirlərin ən genişi isə sentyabr ayında keçiriləcək Beynəlxalq Folklor Festivalı olacaq.

Pedaqoji elmlər doktoru, professor Fərahim Sadıqov "Masallı folklorunun pedaqoji əsaslarına dair", filologiya elmləri doktorları Füzuli Bayat, Asif Rüstəmli və Aslan Salmanlı isə müvafiq olaraq "Regional folklor kontekstində Masallı folkloru", "İstiqlal fədaisi Ələsgər Ələkbərovun tədqiqatlarında cənub folkloru", "Masallı folklorunda fərdilik" mövzularında məruzələr etmişlər.

Məruzəçilər Masallını ən qədim insan yaşayış məskənlərindən biri kimi dəyərləndirmiş, onun zəngin folklora malik olduğunu bildirmişlər. Onlar vurğulamışlar ki, xalqımızın mənəvi dəyərləri bu bölgədə daha yaxşı qorunur. Kənd və qəsəbələrin qədimliyi bu baxımdan xüsusi əhəmiyyət daşıyır. Masallı folklor nümunələri Azərbaycan folklorunun önəmli tərkib hissəsidir.

Mədəniyyətşünaslıq üzrə Elmi Metodik Mərkəzin direktor müavini Polad Zeynalov çıxışında Masallı mədəniyyət və incəsənət ustalarının fəaliyyətini dəyərləndirmiş, incəsənət ustalarına və kollektivlərinə nazirliyin Fəxri fərman və qiymətli hədiyyələrini təqdim etmişdir.

Masallı ziyalılarından Camal Lələoğlu, Xanəli Tolış, Musarza Mirzəyev, Nazilə Məmmədova və başqaları bölgə folkloru ilə bağlı fikirlərini söylədilər, bu barədə kitabların, tədqiqat əsərlərin yaranmasında alimlərə dəstək olacaqlarını bildirdilər. Rayonda "Göyqurşağı" ədəbi birliyinin yaradılmasından və 80 nəfərdən çox üzvü olan yaradıcı ziyalılar məclisinin fəaliyyətindən danışılmışdır.

Xalq qəzeti.- 2012.- 20 iyul.- S. 7.