23 İyun
Dövlət Qulluqçularının Peşə Bayramı
Günüdür. Dövlət qulluğu: nailiyyətlər və
hədəflər
Dövlət quruculuğu, dövlətin
idarə edilməsi və dövlət qulluğu sahəsində
siyasətin dinamik inkişaf etdirilməsində dövlət
qulluqçularının öz yeri var. Hər bir dövlət
qulluqçusunun qarşısında qoyulan əsas vəzifə
xalqa və dövlətçiliyə sədaqətlə xidmət
etməkdən, vətəndaşların hüquq və
azadlıqlarını qorumaqdan, əxlaqı, mənəviyyatı,
insanlarla rəftarı, qəbul etdiyi qərarları ilə rəsmi
orqanlara hörmət qazandırmaqdan, vətəndaşların
və dövlətin maraqlarını uzlaşdırmaqdan ibarətdir.
Eyni zamanda 23 iyun Dövlət Qulluqçularının Peşə
Bayramı Gününün təsis edilməsi ilə
bağlı 22 iyun 2006-cı ildə dövlət
qulluqçularına müraciətində Azərbaycan
Respublikasının Prezidenti çağdaş, sivil, demokratik
vətəndaş cəmiyyətinin tələblərinə
tam cavab verən dövlət idarəçiliyi sisteminin daim
inkişaf etdirilməsi üçün dövlət
qulluqçularının qarşısında əlavə vəzifələr
də qoymuşdur. Belə ki, hər bir dövlət
qulluqçusu dünyada gedən qlobal proseslərdən xəbərdar
olmalı, informasiya texnologiyalarını, demokratik idarəçilik
metodlarını mənimsəməli, müasir
düşüncə sahibi olmalıdır.
Dövlət
qulluğunun daha yaxşı təşkili və idarə
olunması, dövlət qulluğu sahəsində vahid
dövlət siyasətinin formalaşdırılması, dövlət
qulluğuna qəbulun mərkəzləşdirilmiş qaydada
müsabiqə və şəffaflıq əsasında həyata
keçirilməsi üçün Azərbaycan Respublikası
Prezidentinin fərmanı ilə 2005-ci ildə Azərbaycan
Respublikası Prezidenti yanında Dövlət Qulluğu Məsələləri
üzrə Komissiya yaradılmışdır. 2006-cı ilin
oktyabrından fəaliyyətə başlayan komissiya müstəqil
dövlətçiliyin möhkəmləndirilməsi və
inkişafına, xalqımızın istək və
arzularının daha çevik və səmərəli şəkildə
həyata keçirilməsinə xidmət edən dövlət
idarəçiliyi sistemini bu tələblərə cavab verən
kadrlarla təmin edir. 5 ildir ki, dövlət qulluğuna qəbul
müsabiqə və şəffaflıq əsasında
komissiya tərəfindən həyata keçirilir. Eyni zamanda
"Dövlət qulluğu haqqında" Qanuna edilmiş son
dəyişikliklərə görə dövlət
orqanlarının kateqoriyalarında və inzibati vəzifələrin
təsnifatında dəyişiklik edilib. Dəyişikliyə əsasən
dövlət orqanlarının kateqoriyaları Ali kateqoriya və
1-5-ci kateqoriyalar üzrə təsnifatlaşdırılır,
inzibati vəzifələr isə Ali təsnifat və 1-7-ci təsnifatlara
bölünür. Dəyişikliklərə kimi dövlət
orqanları 7 kateqoriyaya, inzibati vəzifələr isə 9 təsnifata
ayrılmışdı. Bu və digər yeniliklər dövlətin
idarə edilməsi sistemində əhəmiyyətli dəyişikliklər
etmişdir. Buna görə də "Dövlət qulluğu
haqqında" Qanunun tətbiqi ilə bağlı ötən
dövrə, keçirilən müsabiqə və müsahibələrin
ümumi nəticələrinə və ümumiyyətlə
komissiyanın fəaliyyətinə nəzər salmaq, əldə
olunan nailiyyətləri qiymətləndirmək və
qarşıda duran hədəflərə diqqət yetirmək
yerinə düşərdi.
Nailiyyətlərimiz
Komissiya yaradılarkən onun qarşısında qoyulan əsas məqsədlərdən biri dövlət qulluğuna qəbulda neqativ halların qarşısının alınması olub. Bu gün biz qətiyyətlə deyə bilərik ki, dövlət qulluğuna qəbulda neqativ halların qarşısı alınmışdır.2007-ci ildən başlayaraq vətəndaşların dövlət qulluğuna qəbulu ilə bağlı on iki müsabiqə keçirilmişdir. Bu müsabiqələrə 5800 vakant vəzifə təqdim edilmişdir. Qeydiyyata alınan namizədlərin sayı 28059 nəfər olmuşdur. Qeydə alınan namizədlərdən 4042 nəfəri test imtahanı mərhələsində iştirak etməmişdir. Test imtahanı mərhələsində iştirak edən 24017 namizəddən 7325 nəfəri test qalibi olaraq müsahibədə iştirak etmək hüququ əldə etmişdir. Onlardan 1252 nəfəri müsahibədə iştirak etməmişdir.Müsahibədə iştirak etmiş 6073 namizəddən 2107(34,69%) nəfəri müsahibədən uğurla keçmişdir. Müsahibə qaliblərindən 1717 nəfəri vakant dövlət qulluğu vəzifəsinə təyin olunmuş, 390 nəfəri isə ehtiyat kadr siyahısına daxil edilmişdir. Bundan başqa 719 dövlət qulluqçusu olmuş və ya dövlət qulluğunda çalışan vətəndaşımız komissiyanın keçirdiyi müsahibələr nəticəsində ya yenidən dövlət qulluğuna qəbul olunmuş, ya da vəzifədə yüksəlmişlər. Beləliklə, komissiyanın indiyədək keçirdiyi müsabiqə və müsahibələr nəticəsində 2436 nəfər vakant dövlət qulluğu vəzifəsinə təyin olunmuşdur.
Onu da qeyd edək ki, dövlət qulluğuna qəbulla bağlı keçirilən müsabiqələrdə qeydiyyatdan keçmiş namizədlərin 78,46%-ni, test qalibi olmuş namizədlərin 84,01%-ni, müsahibə mərhələsində uğur əldə edən namizədlərin 80,87%-ni, vəzifəyə təyin olunanların isə 80,90%-ni gənclər təşkil etmişdir.
Fəaliyyəti dövründə komissiya "Dövlət qulluğu haqqında" Qanunun tətbiqi zamanı meydana çıxan problemləri təhlil edərək qanunvericiliyə zəruri dəyişikliklər edilməsi üçün müvafiq normativ-hüquqi aktların layihələrini hazırlayaraq təqdim etmişdir.
Birinci problem bəzi orqanlar tərəfindən vakant dövlət qulluğu vəzifələrinin müsabiqə və ya müsahibəyə təqdim edilməməsi ilə bağlı idi.2011-ci ilin fevral ayından bu problem aradan qalxmışdır. Belə ki, qanunvericiliyə edilən dəyişikliyə əsasən dövlət orqanları inzibati vəzifələrin 5-7-ci təsnifatlarına uyğun olan vakant vəzifə yarandığı gündən bir ay ərzində müsabiqənin, ümumi müsahibənin və ya daxili müsahibənin keçirilməsi barədə qərar qəbul etməli və bu barədə komissiyaya məlumat verməlidirlər.
İkinci problem dövlət qulluğu vəzifələrinin tutulması məqsədi ilə keçirilmiş müsabiqələrdən uğurla keçən şəxslərin bəzi hallarda əsassız olaraq vakant vəzifəyə təyin edilməməsi ilə bağlı idi.Bu problem 2009-cu ilin oktyabr ayında qanunvericiliyə edilən dəyişikliklərlə aradan qaldırılmışdır. Belə ki,qanun müsabiqədən uğurla keçmiş namizədlərdən birinin seçilərək mütləq qaydada vəzifəyə təyin edilməsini nəzərdə tutur.
Üçüncü problem bəzi dövlət
orqanları tərəfindən müsabiqəyə təqdim
edilmiş bütün vəzifələrə staj tələbi
qoyması ilə bağlı idi. Bu problem də 2009-cu ilin sentyabr
ayından öz həllini tapmışdır. Ali təhsil müəssisələrini
yeni bitirmiş gənclərin dövlət qulluğuna cəlb
edilməsi, habelə vakant dövlət qulluğu vəzifələrinin
tutulması zamanı vəzifənin təsnifatının və
funksiyalarının nəzərə alınması, həmçinin
dövlət orqanından asılı olmayaraq bu vəzifələrə
iddia edən şəxslər üçün ümumi tələblərin
müəyyən edilməsi məqsədilə Azərbaycan
Respublikası Nazirlər Kabinetinin müvafiq qərarı ilə
təsdiq edilmiş ümumi şərtlər qəbul
edilmişdir. Şərtlərdə vakant vəzifələrin
tutulması üçün təhsil,
iş təcrübəsi və zəruri minimal biliklərə
dair ümumi tələblər nəzərdə
tutulmuşdur. Şərtlərə əsasən mərkəzi
icra hakimiyyəti orqanlarının mərkəzi aparatında
olan "aparıcı məsləhətçi" və
"məsləhətçi" vəzifələrinə,
habelə aşağı təsnifat vəzifələrinə
(rəhbər vəzifələr istisna olmaqla), apellyasiya və
birinci instansiya məhkəmələri üzrə müsabiqəyə
çıxarılan bütün vakant dövlət qulluğu
vəzifələrinə staj tələbi qoyula bilməz.
Dördüncü problem ehtiyat kadrların təyinatı
ilə bağlı idi. "Dövlət orqanlarında dövlət
qulluğuna müsabiqə vasitəsi ilə qəbul
qaydaları"na edilmiş dəyişikliyə
əsasən vakant vəzifəyə təyin olunmaq
üçün dövlət orqanının rəhbərinə
təqdim olunmuş, lakin vakant vəzifəyə təyin edilməmiş
namizədlər iki il müddətində həm komissiyada, həm
də dövlət orqanında ehtiyat kadr kimi saxlanılacaq. Bu
müddət ərzində həmin dövlət orqanında
analoji vakant vəzifələr olduqda, namizədlər
onların razılığı ilə bu vəzifələrə
təyin edilməli və təyin olunduğu gündən 5
iş günü müddətində komissiyaya bu barədə
məlumat verilməlidir.
Komissiya 5
il ərzində keçirdiyi müsabiqə və müsahibələrin
nəticələrini dövlət orqanları, ali məktəblər,
yaş və gender məsələləri üzrə təhlil
edərək dövlət qulluğuna vətənpərvər,
yüksək ixtisaslı, müasir
dünyagörüşlü və yeniliklərə meylli
kadrların seçilməsi və yerləşdirilməsi məqsədi
ilə müsabiqələrin keçirilməsi şərtlərinin
təkmilləşdirilməsi və yeniliklərin tətbiq
edilməsi üçün davamlı olaraq təşəbbüslə
çıxış etmişdir. Bu yeniliklər
aşağıdakılardır:
Test imtahanına hazırlaşma və
test imtahanının gedişi prosesində
1) Test
tapşırıqlarının tərtibində istifadə
edilən mövzular və müvafiq ədəbiyyatların
siyahısından ibarət test imtahanı proqramları
komissiyanın internet saytında yerləşdirilmişdir. Bu, vətəndaşların test imtahanına daha
yaxşı hazırlaşmalarına imkan verir və
bütün namizədlər üçün eyni
başlanğıc vəziyyətini yaradaraq şəffaflığın
təmin edilməsi məqsədi daşıyır.
2)
Müsabiqəyə təqdim edilən vəzifələr
üzrə tələb olunan keçid balı
həmin vəzifələrin funksiyalarının məzmunundan
və səlahiyyət həcmindən asılı olaraq fərqləndirilmiş
və müvafiq olaraq 70 və 75 bal müəyyən
edilmişdir.
3) Test
imtahanı mərhələsində 100 mümkün baldan
50%-dən aşağı bal toplayan namizədin
6 ay ərzində dövlət qulluğuna qəbulla
bağlı keçirilən müsabiqələrdə
iştirak etmək hüququnun olmaması məhdudiyyəti
aradan qaldırılmışdır.
4) Məntiqi
düşünmə qabiliyyətinin yoxlanılması
üçün müəyyən olunan minimum keçid balı ləğv edilmişdir.
Müsahibə prosesində
1) Test
imtahanı mərhələsində müsabiqəyə təqdim
edilmiş və funksiyalarının məzmunundan və səlahiyyət
həcmindən asılı olaraq 75 bal tələb
edən vakant vəzifəyə iddia edən, lakin 70 bal tələb
edən vakant vəzifələr üzrə uğur əldə
edən namizədlərə həmin vəzifənin
tutulması şərtləri nəzərə alınmaqla
onun tutulması üçün keçirilən müsabiqənin
müsahibə mərhələsində iştirak etmək
hüququ verilmişdir. Bu yenilik 2010-cu ilin 5
fevral müsabiqəsindən başlayaraq tətbiq
edilmişdir.
2) Vətəndaşların
təkliflərini nəzərə alaraq test imtahanında
uğur qazanan namizədlərlə müsahibə aparan qrupun
tərkibində komissiyanın və vakant dövlət
qulluğu vəzifəsinin mövcud olduğu dövlət
orqanının nümayəndələri ilə yanaşı
müstəqil ekspertlərin iştirakı təmin
edilmişdir. Komissiya tərəfindən
dövlət orqanlarının fəaliyyət istiqamətləri
təhlil edilərək müxtəlif sahələr üzrə
mütəxəssislərə olan tələblər müəyyənləşdirilmiş,
bu mütəxəssislərin müsahibə qrupuna cəlb
edilməsi məqsədi ilə elm və təhsil müəssisələrinə
müraciət edilmişdir. Komissiyaya təqdim
edilən 230-a yaxın mütəxəssis üçün
müsahibələrin keçirilməsi ilə bağlı
interaktiv təlimlər keçirilmiş, müsahibə
aparılmış və 37 nəfərin müsahibələrin
aparılmasında ekspert kimi iştirak etməsi uyğun
bilinmişdir. Onu da qeyd edək ki, müstəqil
mütəxəssislərin müsahibələrə cəlb
edilməsi müsahibələrdə obyektivliyin və şəffaflığın
artırılması, dövlət qulluğuna qəbul sahəsinə
ictimai nəzarətin və etimadın yüksəldilməsi,
namizədlərin potensialının, bilik və
bacarıqlarının hərtərəfli qiymətləndirilməsi
məqsədi daşıyır.
3)
Müsahibə zamanı namizədlərə təqdim ediləcək
sualları əhatə edən mövzular və bu mövzular
üzrə ədəbiyyat siyahısı olan müsahibə
proqramları komissiyanın internet saytı vasitəsi ilə əvvəlcədən
namizədlərə təqdim edilmişdir. Bu isə
namizədlərin müsahibələrə daha səmərəli
və sistemli hazırlaşmasına, müsahibələrin
daha peşəkar və vəzifə yönümlü
aparılmasına imkan verir və müsahibələrdə
şəffaflığın artırılmasına xidmət
edir.
4) Namizədlərin
razılığı ilə müsahibə mərhələsi
videokamera vasitəsilə çəkilir və arxivləşdirilir.
Bu, şəffaflığın və
aşkarlığın təmin edilməsi ilə
yanaşı pozuntuların aşkarlanması və
qarşısının alınmasında ən səmərəli
vasitədir. Eyni zamanda bu mərhələdə
qeyri-hökumət təşkilatlarının, kütləvi
informasiya vasitələrinin və beynəlxalq təşkilatların
nümayəndələri də daxil olmaqla müşahidəçilərin
iştirakı üçün zəruri şərait
yaradılır.
5)
Müsahibə mərhələsində müsahibə qrupunun
üzvlərinin namizədin qiymətləndirilməsi
zamanı verdiyi ümumi ballar arasında 4 və daha çox bal olduqda və ya müsahibənin keçirilməsi
zamanı obyektivlik və şəffaflıq prinsipləri
pozulduqda komissiyanın sədri tərəfindən müsahibənin
nəticəsi ləğv edilə bilər.
Müsabiqələrin həm test, həm də
müsahibə mərhələlərindən narazı qalan
namizədlərin müraciətlərinin operativ şəkildə
hərtərəfli araşdırılaraq
cavablandırılması üçün komissiyada Apellyasiya
komissiyası fəaliyyət göstərir. İndiyə kimi
keçirilmiş 12 müsabiqənin test imtahanı mərhələsinin
nəticəsindən Apellyasiya komissiyasına 54 şikayət
daxil olmuşdur. Bunlardan 8 nəfərinin şikayəti təmin
olunmuşdur,46 nəfərin isə
şikayəti əsassız hesab edilmişdir. Müsahibə
mərhələsinin nəticəsindən isə 189 şikayət
daxil olmuşdur. Şikayətlərdən
149-u əsassız hesab edilərək təmin
olunmamışdır. Apellyasiya
komissiyasının qərarına əsasən apellyasiya
şikayəti təqdim etmiş namizədlərdən 19 nəfərinin
müsahibə nəticələri ləğv edilərək
yeni müsahibə keçirilmişdir. Keçirilmiş
yeni müsahibələr nəticəsində 10 namizəd
iddia etdiyi vəzifəyə uyğun hesab edilmiş, 9 nəfər
isə keçid balını toplaya bilməmişdir. 18 namizədin müsahibə nəticəsi isə
Apellyasiya komissiyasının qərarına əsasən ləğv
edilmiş və namizədlər yeni müsahibə
keçirilmədən iddia etdiyi vəzifəyə uyğun
hesab edilmişlər. Apellyasiya
komissiyası 3 namizədi aşağı təsnifat inzibati vəzifəyə
uyğun bilmişdir.
Gənclərə
dövlət qayğısının artırılması,
onların sosial müdafiəsinin təmin edilməsi, gənclərin
məşğulluq problemlərinin həll edilməsi məqsədi
ilə Azərbaycan Respublikası Prezidentinin 7 iyul 2011-ci il tarixli sərəncamı ilə "Azərbaycan
gəncliyi 2011-2015-ci illərdə" Dövlət
Proqramı təsdiq edilmişdir. Gənclərin dövlət
qulluğuna cəlb edilməsi məqsədi ilə 2012-ci ilin
aprel-may aylarında komissiya əməkdaşlarının
Texniki Universitet, Müəllimlər İnstitutu, Qafqaz
Universiteti, Xəzər Universiteti, Turizm İnstitutu, Dillər
Universiteti, Dövlət Neft Akademiyası, Dövlət
İdarəçilik Akademiyasında bu il məzun olacaq tələbələr
ilə görüşü keçirilmişdir. Görüşdə komissiyanın əməkdaşları
təqdimatla çıxış edərək dövlət
qulluğuna qəbulun müsabiqə və şəffaflıq
əsasında keçirilməsi şərtlərini tədbir
iştirakçılarının diqqətinə
çatdırmışdır.
Bundan başqa gənclərin dövlət qulluğuna
marağının artırılması məqsədilə
komissiyanın rəhbərliyi və əməkdaşları
bir sıra tədbirlərdə iştirak etmişlər. Bunların sırasında
xaricdə təhsil alan və məzun olmuş azərbaycanlı
tələbələrin Beynəlxalq Forumunun (ASAİF) 2010-cu
ildə Bakıda, 2011-ci ildə Strasburqda, 2011-ci ilin aprel
ayında isə Budapeştdə keçirdiyi forumları,
Berlində "Təhsil-Perspektivlər-Müvəffəqiyyətlər"
mövzusunda keçirilən seminarı, Dövlət
İqtisad Universitetində keçirilmiş "Məzun -
2010" və "Məzun - 2011" respublika əmək
yarmarkalarını qeyd etmək olar. Budapeştdə
keçirilən forumda "2007-2015-ci illərdə Azərbaycan
gənclərinin xarici ölkələrdə təhsili üzrə
Dövlət Proqramı" üzrə xaricdə təhsil alan gənclərimiz dövlət
orqanlarında, o cümlədən, komissiyada təcrübə
keçməyə dəvət olunmuşlar. Bu
barədə müvafiq məlumat komissiyanın rəsmi
internet saytında yerləşdirilmişdir və təcrübə
keçmək arzusunda olan onlarla gənc komissiyaya müraciət
etmişdir.
Bundan
başqa 2012-ci il 6-8 iyun tarixlərində
"Azərbaycan gəncliyi 2011-2015-ci illərdə"
Dövlət Proqramının həyata keçirilməsi
üzrə Tədbirlər Planına uyğun olaraq komissiya tərəfindən
keçirilmiş müsabiqələrdə uğur əldə
edən və hazırda dövlət qulluğunda
çalışan gənclər üçün təlimlər
keçirilmişdir. Təlimin məqsədi gənc
dövlət qulluqçularının peşə
bacarıqlarının artırılması və müasir
dövrün tələblərinə cavab verməsi
olmuşdur. Təlimdə dövlət
orqanlarının mərkəzi aparatlarında və Bakı
şəhəri üzrə yerli bölmələrində
inzibati vəzifələrdə qulluq keçən gənc
dövlət qulluqçuları iştirak etmişlər.
Təlimdə komissiyanın əməkdaşları
"İş bölgüsü", "Vaxtın idarə
edilməsi" və "Dövlət
qulluqçularının etik davranış qaydaları"
mövzuları ətrafında çıxış etmiş,
dövlət qulluqçularını maraqlandıran suallara
cavab vermişlər.
İKT-nın
dövlət idarəedilməsində, "elektron hökumət"in
və "informasiya cəmiyyəti"nin
təşəkkül tapmasında önəmini nəzərə
alan komissiya dövlət qulluğuna kompyuter və əsas ofis
proqramlarını bilən, habelə internetlə işləmək
bacarığı olan vətəndaşların qəbulunda
maraqlıdır. Buna görə də komissiya
dövlət qulluğuna qəbulla bağlı keçirilən
test imtahanlarında 15 sualı məhz İT sahəsinə aid
edib.
23 may
2011-ci il tarixdə Azərbaycan Respublikasının
Prezidenti cənab İlham Əliyev "Dövlət
orqanlarının elektron xidmətlər göstərməsinin
təşkili sahəsində bəzi tədbirlər
haqqında" fərman imzalamışdır. Həmin
fərmanda mərkəzi icra hakimiyyəti orqanları
qarşısında elektron xidmətin təşkili
üçün bəzi tədbirlərin həyata
keçirilməsi tələbi qoyulmuşdur. Fərmana uyğun olaraq "Komissiyanın elektron
xidmətlər göstərilməsinin təşkili ilə
bağlı "Tədbirlər planı" hazırlanıb
təsdiq edilmişdir.
Komissiyanın göstərdiyi elektron xidmətlər
sırasında dövlət qulluğuna qəbul edilmək
üçün e-qeydiyyatı xüsusi vurğulamaq
lazımdır. Bu, namizədlərin əlavə vaxt
itkisinin və əlavə xərclərinin
qarşısını almaqla yanaşı, komissiyanın da
işini yüngülləşdirmişdir.
Qeyd etmək
lazımdır ki, komissiya dövlət
qulluqçularının İKT sahəsində bilik və
bacarıqlarının artırılması məqsədilə
həm ölkə daxilində, həm də e-hökumət
sahəsində öndə gedən ölkələrdə (Cənubi
Koreya, Estoniya, Kanada, Niderland və s.) dövlət
qulluqçuları üçün treninq, seminar və
konfranslar təşkil edir.
Komissiya ötən
il xidməti fəaliyyətin qiymətləndirilməsinin
sınaq tətbiqi ilə bağlı Dövlət Sosial
Müdafiə Fondunda və Sumqayıt Şəhər İcra
Hakimiyyətində qulluq keçən dövlət
qulluqçuları üçün iki pilot layihə həyata
keçirmişdir. Pilot layihənin keçirilməsində məqsəd
dövlət qulluqçusunun xidməti fəaliyyətinin qiymətləndirilməsi
sisteminin tətbiqi ilə bağlı təcrübənin əldə
edilməsi və pilot layihə nəticəsində əldə
edilmiş təcrübəyə uyğun olaraq qiymətləndirilmə
sisteminin təkmilləşdirilməsi və bütün
dövlət orqanları üçün tətbiqinə nail
olmaqdır. Təlimlərdə qiymətləndirmə
sisteminin iştirakçıları olan struktur bölmə rəhbərləri
(şöbə müdirləri), bilavasitə rəhbərlər
(sektor müdirləri), dövlət qulluqçuları və
kadr qurumunun işçiləri iştirak etmişlər.
Komissiyanın vətəndaş cəmiyyəti ilə
münasibətləri faydalı əməkdaşlıq
müstəvisi üzərində qurulub. Dövlət qulluğuna qəbulla
bağlı keçirilən müsabiqələrin həm
test imtahanı, həm də müsahibə mərhələlərində
komissiyanın dəvəti ilə qeyri-hökumət təşkilatları
və media nümayəndələri müşahidəçi
kimi iştirak edir. Bu il may ayının
31-də ölkəmizdə fəaliyyət göstərən
QHT-lərlə sayca üçüncü dəyirmi masa
keçirmişik. İlk
görüşümüz 2010-cu ilin dekabr ayında, ikinci
görüşümüz isə 2011-ci ilin iyun ayında
keçirilmişdir. Dəyirmi masaların keçirilməsi
vətəndaş cəmiyyətini komissiyanın fəaliyyəti
və dövlət qulluğu sahəsində aparılan
islahatlarla yaxından tanış etmək,
QHT və KİV-lərlə əlaqələri inkişaf
etdirmək məqsədini daşıyır.
Dövlət
qulluğuna qəbul sahəsində Azərbaycanın təcrübəsini
bölüşmək, dövlət qulluğuna qəbulun
peşəkarlıq, şəffaflıq və obyektivlik
prinsipləri əsasında həyata keçirilməsini
göstərmək, dövlət qulluğunun inkişafı
istiqamətində ölkəmizdə aparılan islahatlar barədə
beynəlxalq ictimaiyyəti məlumatlandırmaq, bu sahədə
mövcud problemləri müzakirə etmək məqsədilə
2011-ci ilin iyun ayında komissiya və Almaniya Federativ
Respublikasının İqtisadi Əməkdaşlıq və
İnkişaf Nazirliyi adından Almaniya Beynəlxalq Əməkdaşlıq
Cəmiyyətinin (GIZ) təşkilatçılığı
ilə Bakıda "Obyektiv işəqəbul vasitəsi ilə
dövlət qulluğunda şəffaflığın təmini"
mövzusunda beynəlxalq dəyirmi masa keçirilmişdir. Tədbir
"Azərbaycanda Dövlət Qulluğu Sektorunda
İslahatların Dəstəklənməsi" Azərbaycan-Almaniya
layihəsinin dəstəyi ilə keçirilmişdir.Tədbirdə
14 ölkənin dövlət qulluğu və inzibati idarəetmə
sahəsində müvafiq qurumlarının, həmçinin
Almaniya Beynəlxalq Əməkdaşlıq Cəmiyyətinin
(GIZ), BMT-nin İnkişaf Proqramının (UNDP) və digər
beynəlxalq təşkilatların yüksək vəzifəli
şəxsləri iştirak etmişlər.
Komissiyanın
Türkiyə Cümhuriyyəti və Ukraynanın dövlət
qulluğu sahəsində çalışan qurumları ilə
əməkdaşlıq barədə ikitərəfli
müqavilələri var. Bundan başqa komissiya Kanada,
Böyük Britaniya, İrlandiya, Çin, Macarıstan,
Qazaxıstan, Cənubi Koreya, Əfqanıstan, Monteneqro,
Gürcüstan və digər dövlətlərin analoji
qurumları ilə sıx əməkdaşlıq edir.
Türkiyə Respublikasının Dövlət Kadrlar İdarəsi
və Ukrayna Dövlət Qulluğu Baş İdarəsi ilə
imzalanan müqavilələrə əsasən hər il təcrübə mübadiləsi məqsədilə
qarşılıqlı səfərlər təşkil edilir.
2011-ci ilin dekabr ayında Əfqanıstan İslam
Respublikasının Müstəqil İnzibati İslahat və
Dövlət Qulluğu üzrə Komissiya sədrinin
müavini ilə keçirilən görüşdə əldə
olunan razılığa əsasən Əfqanıstan dövlət
qulluqçularının idarəetmənin müxtəlif sahələrində
Azərbaycan təcrübəsinin öyrənilməsi məqsədilə
bu ayın 10-15-i ölkəmizdə səfərdə
olmuşlar.
Bu ilin
aprel ayının 17-18-də komissiyanın sədri Braziliyada
keçirilmiş "Açıq Hökumət Tərəfdaşlığı"nın Yüksək Səviyyəli ilk illik
Sammitində Azərbaycan nümayəndə heyətinin tərkibində
iştirak etmiş və sammit çərçivəsində
Beynəlxalq Şəffaflıq (Transparency İnternational) Təşkilatının,
Estoniya e-İdarəçilik Akademiyasının, BMT-nin
İnkişaf Proqramının e-İdarəçilik və
informasiya əldə etmək üzrə proqramının
nümayəndələri ilə ikitərəfli
görüşlər keçirmişdir. Görüşlərdə
Azərbaycanda dövlət qulluğu sahəsində
aparılan islahatlar, dövlət qulluğuna mərkəzləşdirilmiş
qaydada şəffaf və obyektiv qəbulun təşkili,
dövlət qulluqçularının etik davranış
qaydaları, dövlət qulluqçularının potensialının
gücləndirilməsi tədbirləri və digər məsələlər
barədə məlumat verilmişdir.
Hədəflərimiz
1.
Dövlət qulluqçularının xidməti fəaliyyətinin
qiymətləndirilməsi sahəsində pilot layihələrin
başa çatdırılması və xidməti fəaliyyətin
qiymətləndirilməsi qaydalarının hüquqi əsasının
müəyyən edilməsi.
2.
Komissiyanın veb-portalının inkişaf etdirilməsi.
3.
Komissiyanın göstərdiyi e-xidmətlərin tam təmin
edilməsi.
4. Gənclərin
dövlət qulluğuna cəlb edilməsi.
5.
Dövlət qulluğuna dair qanunvericiliyin məcəlləşdirilməsi.
6.
Dövlət qulluğu strategiyasının inkişaf etdirilməsi.
7.
Dövlət qulluqçuları üçün Təlim Mərkəzinin
yaradılması.
8. Milli təlim
strategiyasının inkişaf etdirilməsi.
Sonda bütün dövlət qulluqçularını
23 iyun Dövlət qulluqçularının peşə
bayramı münasibətilə ürəkdən təbrik
edir, onlara gördükləri çətin, amma şərəfli
işlərində uğurlar diləyirəm. Azərbaycan
Respublikasının Prezidenti cənab İlham Əliyevin dediyi
kimi "Dövlət qulluğunda çalışmaq o deməkdir
ki, həmin vətəndaşa müstəqil, demokratik
dövlət və vətəndaş cəmiyyəti
quruculuğunun ön sıralarında olmaq imkanı etibar
edilmişdir. Hər bir şəxs bilməlidir
ki, dövlət qulluğunda olmaq imtiyaz deyil, məsuliyyətdir,
insanlara xidmət imkanıdır. Tutduğu
vəzifənin səviyyəsindən və əhəmiyyətindən
asılı olmayaraq, dövlət qulluqçusu həmişə
xatırlamalıdır ki, o, xalqın xidmətçisidir,
insanlara xidmət, onların qayğıları ilə
yaşamaq onun əsas vəzifəsidir."
Bəhram XƏLİLOV,
Azərbaycan Respublikasının
Prezidenti yanında Dövlət
Qulluğu Məsələləri
üzrə
Komissiyanın sədri
Xalq qəzeti.-
2012.- 23 iyun.- S. 3.