Azərbaycan Gürcüstan:
qədim qonşular, çağdaş
arxadaşlar
Gürcüstan-Azərbaycan əlaqələri
regional çərçivədən çıxıbdır
və bu gün bizim birgə təşəbbüslərimiz
artıq beynəlxalq əhəmiyyətə malikdir.
İlham ƏLİYEV,
Azərbaycan
Respublikasının Prezidenti
Azərbaycanın müstəqilliyi həm
də Gürcüstanın müstəqilliyidir. Biz belə
hesab edirik ki, qarşımızda duran məsələlərin,
bütün problemlərin həllinə nail olmuşuq və
gözəçarpan nəticələr əldə
etmişik.
Mixeil
SAAKAŞVİLİ,
Gürcüstan
Respublikasının Prezidenti
(əvvəli
qəzetimizin 30 may tarixli nömrəsində)
Gürcüstan
- Azərbaycan qonşuluq münasibətləri, dost ölkədə
yaşayan soydaşlarımızın taleyi, güzəranı,
onların irili-xırdalı problemləri dövlət siyasətimizin
prioriteti, ictimai rəyin daimi mövzusu kimi medianın da gündəmindədir.
Gürcüstana bir həftəlik yaradıcılıq ezamiyyətimizin
də hədəfi günümüzün bu
marağını cavablandırmaq idi. Beləliklə, səfərimiz
qədim qonşumuz, çağdaş arxadaşımız
olan Gürcüstanadır.
Birliyimiz-diriliyimiz
Qardabani Rayon Bələdiyyəsinin
(Sakrebulu) sədr muavini Xanəhməd Qəribovla
görüşümüz bizi xeyli uzaqlara apardı. Hələ
Bakı Ali Partiya Məktəbində təhsil
aldığı vaxtlardan yaxşı
tanıdığımız bu "köhnə komsomol"un
yaşı üstə yaş gəlsə də əvvəlki
işgüzarlığı bir zərrə belə itməmişdi.
Əksinə, vəzifə məsuliyyəti bir az da
artmış, onu daha işgüzar etmişdi. Qardabani rayonunun
komsomol katibliyindən o vaxt BAPM-ə göndərilən X.Qəribov
ali partiya təhsilindən sonra rayona qayıtmış,
müxtəlif məsul vəzifələrdə
çalışmışdır. Qardabani Rayon Bələdiyyəsinin
sədr müavini seçilənədək bir sira rəhbər
təsərrüfat işlərində
çalışmış, son vaxtlar isə vergi mufəttişliyində
müavin və rəis olmuşdur. Gürcüstan dövləti
Xanəhməd muəllimin əmək fəaliyyətini və
işgüzarlığını yuksək qiymətləndirmiş,
ölkə Prezidenti Mixeil Saakaşvili onu Gürcüstanın
ali mükafati - "Şərəf" ordeni ilə təltif
etmişdir.
Söhbət zamanı Xanəhməd Qəribov
dedi:
- Hər bir dövlət
özünün geosiyasi əhatəsini, malik olduğu
resursların istifadəsi taktikasını müəyyən
etmədən, yaşadığı coğrafiyanın
reallıqlarını nəzərə almadan, heç zaman əlahiddə
inkişaf edə bilməz. Bu anlamda Cənubi Qafqazın
coğrafi və geosiyasi reallıqları elədir ki, burada
yaşayan xalqlar, hansı əqidəyə, mənəviyyata
xidmət etməsindən asılı olmayaraq, bir yerdə,
sülh şəraitində bir-birinə dəstək verməyə
məhkumdurlar. Cənubi Qafqazın tarixində hər zaman belə
olub, bu gün də belədir və gələcəkdə də
belə olacaq. Keçmiş zamanlarda burada yaşayan
bütün xalqlar yadelli işğalçılara
qarşı birgə mübarizə tədbirləri
görüblər.
Cənubi Qafqazın hər üç
dövləti, demək olar ki, eyni vaxtda müstəqillik
qazanıb və bir-biri ilə əlaqələndirilmiş
siyasət yürüdüblər. 1918-1920-ci illərdə Cənubi
Qafqazda milli dövlətlərin yaranması da bir-biri ilə əlaqəli
şəkildə həyata keçirilib. Təəssüflər
olsun ki, müəyyən məqamlarda biz bir-birimizə güzəştə
getməmişik və ölkələrimizin inkişafına
mane olan hallara da yol vermişik. Bunlar Dağlıq Qarabağ, Cənubi
Osetiya və Abxaziya münaqişələri, Qafqazdakı
etnik separatizmdir. Bütün bunlar kənardan
qızışdırılan və Cənubi Qafqaz xalqları
arasında nifaq salan hallardır.
Gürcüstan-Azərbaycan munasibətlərindən
danışan X.Qəribov bildirdi:
- Gürcüstan mənim ana Vətənimdir,
burada dogulmuşam, böyüyüb-başa
çatmışam. Bu gün də burada
çalışıram, əmək fəaliyyətimi davam
etdirirəm. Azərbaycan isə mənim milli Vətənimdir.
Hər ikisi mənim üçün müqəddəs və
əzizdir. Bu torpaqda mənim əzizlərim, ulularım
uyuyur.Bu torpaq uğrunda hər şeyimdən keçməyə
həmişə hazır olmuşam və bu gun də belədir.
O ki, qaldı milli Vətənimə, mən
xalqımızın ulu öndəri Heydər Əliyev təbirincə
desək, həmişə böyük qürur və iftixar
hissi ilə fəxr etmişəm ki, azərbaycanlıyam.
Azərbaycan özünü dərk edən
hər bir azərbaycanlının qibləgahıdır. Bunun
üçün də biz, ilk növbədə, bu yerdə,
bu torpaqda möhkəm olmalıyıq! Yeri gəlmişkən,
yadıma bir əhvalat düşdü. 1980-ci il idi,
ümummilli liderimiz Heydər Əliyev Gürcüstanda səfərdə
idi. Komsomol məktəbinin həyətində əkəcəyi
ağacı tutmaq mənə və başqa bir azərbaycanlı
həmkarıma tapşırılmışdı. O qədər
həyacanlı idim ki, heç onun bizə nə vaxt yaxınlaşdığını
belə hiss etməmişdim. İlk sualı indi də
qulaqlarımdadır: Azərbaycanlısınızmı? - Bəli,
- cavabımızdan sonra daha iki kəlmə də soylədi:-
Möhkəm olun, gurcu dilini də möhkəm öyrənin!"
İndi o tarixdən 30 ildən də şox vaxt keçir,
amma ümummilli liderimizin hələ o vaxtlar dediyi o sözlər
bu gün də oz dəyərini itirməyib. Biz bu tövsiyyəyə
rəğmən möhkəm olduq, hələ Qarabağ
savaşı başlayanda Gürcüstan azərbaycanlıları
səfərbər ola bildilər. Qarabağ uğrunda
döyüşə də hazir idik, doğma torpaqlarından
didərgin olanları qarşılamağa da! Biz bunları
layiqinçə edə bildik. Ulu öndərin
"gürcü dilini də möhkəm öyrənin!"-
tövsiyyəsi bizi Gürcüstan dövləti ilə daha
da yaxınlaşdırdı. İndi azərbaycanlılar məhz
gürcü dilini möhkəm bildiklərinə görə
hakimiyyətdə layiqli vəzifələr tutmaqdadırlar.
Bu gün Gürcüstan
iqtisadiyyatının xeyli dərəcədə Azərbaycandan
asılı olması heç kimə sirr deyildir,- deyə Xanəhməd
Qəribov davam etdi: - Azərbaycan - Türkiyə müttəfiqliyi
və regionda reallaşan layihələrin Gürcüstana
böyük fayda verməsi də faktdır. Azərbaycansız
Gürcüstanın və digər Qafqaz ölkələrinin,
hətta Ermənistanın müstəqiliyini qoruyub saxlamaq
çox çətindir, əslində,
mümkünsüzdür. Belə olmasaydı, bu gün
çarəsiz qalan Ermənistan Rusiyanın forpostu olmazdı.
Biz qüvvələrimizi birləşdirməliyik və
mübarizə aparmalıyıq. Azərbaycan və
gürcü xalqı hər zaman birdir və bundan sonra da bir
olacaq. Son illərdə Azərbaycan iqtisadiyyatı
dünyanın ən yüksək templəri ilə inkişaf
etmişdir. Bu sahədəki nailiyyətlər dünya birliyi
tərəfindən də qiymətləndirilir. Nüfuzlu beynəlxalq
maliyyə qurumları Azərbaycanda aparılan islahatları
yüksək qiymətləndirirlər. Şübhəsiz ki,
bu inkişafın təməlində iqtisadi və siyasi
islahatlar- Azərbaycanda aparılan uğurlu neft siyasəti
dayanır. Bu siyasət əsası xalqımızın ulu
öndəri Heydər Əliyev tərəfindən qoyulan və
İlham Əliyevin uğurla davam etdirdiyi siyasətdir. Bu
baxımdan Azərbaycan Respublikasının
Gürcüstandakı səfirliyinin, xüsusən də
fövqəladə və səlahiyyətli səfirimiz cənab
Azər Hüseynin gördüyü işlər qənaətbəxş
və təqdirə layiqdir. Biz onun timsalında Azərbaycan
Respublikasının böyük Vətən olduğunu dərk
etmişik. Təəssüf ki, bu yerlərin coğrafiyası
barədə anlayışı belə olmayan, muxtəlif təşkilatlar
yaradan həmvətənlərimiz bölgədəki problemlərin
həll olunması yolunda quruca bəyanatlardan başqa, əməli
addımlar atmayıblar.
Qardabani Borçalının yeganə
rayonudur ki, 1989-cu ildən etibarən əhalisi nəinki
azalmamış, hətta 1,3% artmışdır. 2006-cı
ilin əvvəlinə olan məlumata əsasən, Qardabani
rayonunun əhalisinin sayı 116,4 min nəfər olmuşdur.
2002-ci il əhali siyahıyaalmasının nəticələrinə
görə rayon əhalisinin 53,2%-i gürcülər, 43,7%-i
azərbaycanlılar, 9%-i ermənilər, 9%-i ruslar, 2%-i isə
yunanlardır. Bunun 13,6%-i şəhər, 86,3%-i isə kənd
əhalisidir.Qardabani Gürcüstanın aqrar-sənaye
rayonudur. Energetika sənayesi, xüsusilə istilik
energetikası kifayət qədər yüksək inkişaf
etmişdir.
Borçalı
qayğıları
Səfər vaxtı
görüşüb fikirlərini bildiyimiz ayrı-ayrı
adamların mülahizələrinə də diqqət yetirmək
yerinə düşər. Belə ki, Gürcüstan Rusiya ilə
avqust müharibəsindən əvvəl də, sonra da bir
sıra problemlərlə üzbəüz idi. Düzdür, Qərbdən
aldıqları dəstək sayəsində mövcud problemlərin
həllinə çalışan Saakaşvili hökuməti
bu istiqamətdə xeyli işlər görməyi bacardı.
Məsələn, torpaq islahatının aparılması,
milli azlıqların üzləşdiyi problemlərin həlli,
ixrac fəaliyyətinin gücləndirilməsi və s.
Hazırkı vəziyyətdə hansısa problem Kvemo-Kartli
bölgəsində (Borçalıda) qalıb desək,
yanılarıq. Çünki analoji vəziyyət Sivaneti və
Kaxetiyada da qalmaqdadır. Orada da torpaq islahatları tam
aparılmayıb.
Bir il əvvəl taxılın və
çörəyin qiymətinin qalxması siyasi dairələrdə
belə dəyərləndirildi ki, ölkədə
"çörək inqilabı" baş verəcək.
Amma bu olmadı. Çünki Mixeil Saakaşvilinin
başçılıq etdiyi hökumət
çıxış yolunu tapmağa nail oldu. İlkin mərhələdə
satıcı tapana kimi, çörəyin qiymətini 10 sent
artıran hökumət, tezliklə Ukrayna və Qazaxıstanla
anlaşdı. Bundan başqa, digər taxıl
idxalçıları ilə də dil tapıldı, vəziyyət
sabitləşdi. Ardından isə 10 sentlik artım əvvəlki
səviyyəsinə qaytarıldı və problem
çözüldü. Növbəti ildə isə
qarşıya qoyulan hədəf o oldu ki, ölkədə
taxıl istehsalı artırılmalıdır. Bunun
üçün yetərli imkanların olduğunu bəyan edən
ölkə fermerləri hökumətdən, sadəcə,
cüzi yardımlar istədi. Elə hökumət də bunu
etməyə hazır olduğunu bildirdi.
Bildiyimizə görə,
Borçalının kənd təsərrüfatı ilə
bağlı iki əsas problemi mövcuddur. Onlardan birincisi
torpaqların ədalətli bölüşdürülməməsidir.
Bunun da qarşısını alan iri sahibkarların əlindəki
hektarlarla ərazilərdir. Əvvəl sahibkarlar bu əraziləri
pulla aldığından indiki hökumət onlara çox da təzyiq
edə bilmir. Amma çıxış yolları da
axtarılır. Məsələn, rəsmi Tibilisi bildirir ki,
Borçalıda yaşayan azərbaycanlıların
hamısına torpaq sahələri çatması üçün
həmin sahibkarlarla hökumət danışıqlar aparmaq
fikrindədir. Lakin hazırkı maliyyə
sıxıntısı üzündən belə qəti bir
addımın atılması ləngiyir. Çünki öz
büdcəsini təkbaşına doldurmaq iqtidarında olmayan
Gürcüstan hələlik Qərbdən aldığı
dotasiyalar hesabına ümumi vəziyyəti tarazlamaqdadır.
İkinci problem isə əkin sahələrinin
suvarılması ilə bağlıdır. Borçalıda
böyük və sulu çayların sayı həddindən
artıq azdır. Amma Kürün ərazidən keçməsi
böyük bir şans olaraq dəyərləndirilir. Yerli
sakinlər deyirlər ki, əgər hökumət bu məsələdə
yardımçı olarsa, problem aradan qalxacaq. Həmin təkliflər,
əsasən, kiçik çayların üzərində su
bəndlərinin qurulması və Kürdən əlavə
qolların çəkilməsidir. Bunların kiçik layihə
olmadığı bəllidir. Su anbarı və kanalların
çəkilməsi böyük xərclər tələb
edir və onun üçün də yetərli maliyyə
yoxdur. Ancaq gələcək üçün bunun reallaşa
biləcəyi mümkündür. - Bunları isə qubernator
müavini Hüseyn Yusifov bildirdi.
Borçalıda əhalinin başqa
problemləri də mövcuddur. Orta məktəblərin bir
çoxu yaxşı vəziyyətdə olmasa da, hökumət
hissə-hissə onları yeniləri ilə əvəz etməkdədir.
İndiyə qədər bəzi işlər də
görülüb. Azərbaycan hökumətinin, o cumlədən
Heydər Əliyev Fondunun bu məsələyə mudaxiləsi
isə öz layiqli töhfələrini verməkdədir.
Borçalıların problemləri azaldıqca sabaha ümidləri
də artır.
Vətəndən
Vətənə...
Bir həftəlik Gürcüstan-Tibilisi
və Borçalı təəssüratlarından sonra yenidən
"Sınıq körpü"dəyik. Azərbaycandan
Gürcüstana əsas keçid məntəqəsi olan və
sərhəd qapısı funksiyasını yerinə yetirən,
müasir standartlara cavab verən yeni gömrük-keçid məntəqəsinin
inşası 2010-cu ilin oktyabrında başa
çatdırılmışdır. Yenidənqurma işləri
zamanı burada geniş abadlıq-quruculuq işləri də
görülmüş, yaşıllıqlar
salınmışdır. Ətrafdakı səliqə-səhman,
vəzifə başındakı səlahiyyətli şəxslərin
nizam-intizamı, vətəndaşların sərhəddən
gediş-gəlişi üçün
asanlaşdırılmış qaydalar, avtomobil
parkındakı sistemli yerləşdirilmə və sair təqdirəlayiq
məqamlarla yanaşı, bir-birilə əlaqəli fəaliyyət
göstərən bölmələrin müasir texnoloji
avadanlıqlarla təmin olunması, mərkəzi idarəetmə
sisteminin üstünlükləri diqqəti çəkirdi. Məntəqənin
ərazisində yardımçı binalarla yanaşı,
üçmərtəbəli inzibati bina da tikilmişdir. Sərhəd
Gömrük Məntəqəsindən gün ərzində
yüzlərlə avtomobil və minlərlə insan
keçir.
Gömrük postunun rəisi Ceyhun
İbrahimov dedi ki, Azərbaycanda bütün sahələrdə
olduğu kimi, gömrük sistemində də davamlı
inkişaf gedir. Gömrük xidməti daha da müasirləşir,
işçilərin sosial və iş şəraitlərinin
yaxşılaşdırılması üçün zəruri
tədbirlər görülür. Əsaslı şəkildə
yenidən qurulmuş "Sınıq körpü" Sərhəd
Gömrük Məntəqəsi də bu qəbildən olan
işlərin davamıdır. Gələcəkdə ərazidə
yeni yük terminalının tikintisinə də
başlanacaqdır. Regionda ən böyük keçidlərdən
olacaq terminalda məhsulların saxlanması üçün
soyuducu anbarlar, sərnişinlərin qalması
üçün otel, habelə ofis də tikiləcəkdir.
Gömrük məntəqəsinin
inzibati binası, yardımçı tikililər və yeni
avadanlıqlar MDB məkanında yenidir, analoqsuzdur. Burada əməkdaşların
nəzəri biliklərinin artırılması
üçün sinif otaqları da vardır. Əməliyyat
otağı ən zəruri və müasir texniki
avadanlıqla təchiz olunmuşdur. Gömrük məntəqəsinin
ərazisində quraşdırılmış xüsusi rentgen
aparatından dünyanın ən aparıcı dövlətlərində
istifadə edilir. Həmin aparat vasitəsilə nəqliyyat
vasitələrindəki bütün yükləri aydın
görmək mümkündür. Bu isə
qaçaqmalçılıq yolu ilə daşınan
malların dərhal aşkarlanması ilə yanaşı, həm
də gömrük xidmətinin öz işini müasir tələblər
səviyyəsində qurmağa imkan yaradır.
Hazırda məntəqədə 4
gömrük nəzarəti xətti vardır. Onların ikisi
ixrac, ikisi isə idxal nəzarətini həyata keçirir. Məntəqədə
vahid pəncərə sistemi yaradılmışdır, burada
yük, maliyyə, yol vergiləri şöbələrinin əməkdaşları
çalışırlar. Sanitar karantin, fitosanitar
və baytar nəzarəti xidməti də burada yerləşir.
"Sınıq
körpü"dən də
xoş xatirələrlə
ayrılırıq. Gördüyümüz bir
həqiqət isə bizi xeyli qürurlandırır:
Cənubi Qafqaz regionunda bu cür
müasir sərhəd
gömrük məntəqələri
yalnız Azərbaycandadır.
Biz bunu Astarada
və Naxçıvanda
- Culfada, Şahtaxtıda
görmuşduk. İndi
"Sınıq körpü"də
də belə post fəaliyyətdədir. Bu, Azərbaycan dövlətinin
güc və qüdrətinin təntənəsidir.
Gürcüstana səfərdən sonra Azərbaycanın sürətli və hərtərəfli inkişafına
bir daha əmin olduq.
Namiq QƏDİMOĞLU,
Tahir AYDINOĞLU,
Tbilisi – Bakı
Xalq qəzeti.- 2012.- 12 iyun.- S. 6.