Azərbaycan gəncliyi
müstəqil dövlətimizin dayağıdır
Dünya Azərbaycanlı Gənclər Birliyinin təsis edilməsi böyük
tarixi hadisədir. Bu, bir daha təsdiqlədi ki, ölkəmizdə gənclərə böyük etimad göstərilir
və gənclik müstəqil Azərbaycanın gələcəyidir.
Bir qədər
əvvəl Almaniyanın Frankfurt şəhərində
Dünya Azərbaycanlı Gənclərinin
1-ci Konqresində bu birliyin
yaradılması ideyası irəli sürüləndə gənclərimizin
sabaha olan inamı daha da artdı. Azərbaycan
gəncliyinin ölkədə gedən ictimai-siyasi
proseslərdə aparıcı qüvvə kimi
çıxış etməsi beynəlxalq aləmə inteqrasiya istiqamətində geniş
imkanlar açır.
Ümummilli
lider Heydər Əliyev gəncləri Azərbaycanın XXI əsrinin
qurucuları hesab edir, gəncliyi müstəqilliyimizin
qarantı adlandırırdı. Azərbaycanda gənclərə
etimad göstərilməsi, onların müasir
düşüncə səviyyəsində yetişmələri,
hərtərəfli biliyə malik olmaları üçün
aparılan işlərin əsası ümummilli lider Heydər
Əliyev tərəfindən qoyulub. Böyük tarixi şəxsiyyətin
ikinci dəfə siyasi hakimiyyətə gəlişindən
sonra müstəqil Azərbaycanı gələcəkdə də
idarə edə biləcək, yaşadacaq və möhkəmləndirəcək
gənc nəslin formalaşdırılması istiqamətində
mühüm əhəmiyyətli tədbirlər həyata
keçirildi.
1993-cü
ilin iyunundan sonra müstəqil Azərbaycanı gələcəkdə
də yaşadacaq və idarə edə biləcək gənc
nəslin formalaşdırılması istiqamətində qətiyyətli
addımlar atıldı. Bu sahədə ciddi tədbirlər həyata
keçirən ulu öndər Heydər Əliyev gənclərlə
işi daha səmərəli şəkildə təşkil
etmək, onların problemləri ilə yaxından
tanış olmaq, gənclərin ictimai-siyasi həyatda daha fəal
iştirakını təmin etmək məqsədi ilə Gənclər
və İdman Nazirliyinin yaradılması ilə əlaqədar
1994-cü il iyulun 26-da sərəncam imzaladı. Bir müddət
sonra isə "Gənclər siyasəti haqqında" Azərbaycan
Respublikasının Qanunu qəbul edildi. 1996-cı il
fevralın 2-də Bakıda Azərbaycan Gənclərinin
Birinci Forumunun keçirilməsi də gəncliyə olan
inamın və etimadın nəticəsi idi. Forumun əhəmiyyətini
yüksək qiymətləndirən ulu öndər Heydər Əliyev
1997-ci ildə sərəncam imzalayaraq tədbirin
keçirildiyi günü - 2 fevralı Gənclər
Günü elan etdi. Hər il fevralın 2-si Azərbaycanda Gənclər
Günü kimi qeyd edilir.
Ümummilli
lider Heydər Əliyevin siyasi xəttini uğurla davam etdirən
möhtərəm Prezidentimiz İlham Əliyevin rəhbərliyi
altında gəncliyin inkişafını daha da stimullaşdıran
qanunvericilik bazası xeyli möhkəmləndirildi. Dövlət
başçısının imzaladığı "Azərbaycan
Gəncliyi Dövlət Proqramı (2005-2009-cu illər)",
"2007-2015-ci illərdə Azərbaycan gənclərinin
xaricdə təhsili üzrə Dövlət Proqramı",
həmçinin gənclərin təhsil səviyyəsinin
yüksəldilməsi, sosial müdafiəsinin möhkəmləndirilməsi
istiqamətindəki digər sənədlər bunun parlaq
sübutudur.
Dünya
Azərbaycanlı Gəncləri Birliyinin təsis edilməsi
ideyasının gerçəkləşdirilməsi Azərbaycan
gəncliyinin beynəlxalq aləmdə növbəti
uğurlarındandır. Bu tədbirin Almaniyanın Frankfurt
şəhərində keçirilməsi gənclərimizin
beynəlxalq aləmdə böyük uğuru kimi dəyərləndirilməlidir.
Xarici
ölkələrdə yaşayan azərbaycanlı gənclərin
diaspor quruculuğu işinə cəlb olunması, ictimai-siyasi
fəallığının artırılması, milli-mənəvi
dəyərlərimizin qorunması və mədəni irsimizin
təbliğində, habelə Azərbaycan həqiqətlərinin
dünya ictimaiyyətinə çatdırılmasında daha
fəal iştirakının təmin olunması qarşıya
qoyulan prioritet vəzifələrdəndir.
2009-cu
ilin aprelində Moskvada Rusiyanın Azərbaycanlı Gənclər
Təşkilatının (RAGT) təsis edilməsi Azərbaycan
diasporunun və xaricdə yaşayan azərbaycanlı gənclərin
həyatında mühüm hadisə oldu. Heydər Əliyev
Fondunun vitse prezidenti Leyla xanım Əliyevanın sədrliyi
ilə gəncləri öz ətrafında birləşdirən
bu təşkilat qısa müddət ərzində Azərbaycan
həqiqətlərinin dünya ictimaiyyətinə
çatdırılması, gənclərin milli diaspor
quruculuğu işinə cəlb olunması istiqamətində
çox önəmli addımlar atıb.
Hazırda
xarici ölkələrdə təhsil alan azərbaycanlı gənclərin
milli maraqlarımızın müdafiəsi,
xalqımızın tarixi və müasir həyatı ilə
bağlı həqiqətlərin dünya ictimaiyyətinə
çatdırılması, zəngin mədəni irsimizin təbliği
sahəsində uğurlu layihələr həyata keçirməsi
böyük əhəmiyyət kəsb edir. Gənclərimiz
müasir informasiya texnologiyalarının imkanlarından istifadə
edərək Ermənistan-Azərbaycan, Dağlıq Qarabağ
münaqişəsinin nəticələri haqqında əsl həqiqətləri
bu barədə məhdud informasiyaya malik dövlət və
siyasət adamlarına, eləcə də sadə vətəndaşlara
çatdırmağa çalışırlar.
Ermənistan
silahlı qüvvələrinin ölkəmizdə törətdiyi
ağlasığmaz vəhşiliklər barədə
dünya ictimaiyyətinə dolğun, əhatəli məlumat
verilməsində Rusiyanın Azərbaycanlı Gənclər
Təşkilatının rolu yüksək qiymətə
layiqdir. RAGT-ın sədri Leyla xanım Əliyevanın təşəbbüsü
ilə keçirilən "Xocalıya ədalət"
kampaniyasının əsas məqsədi Ermənistan
silahlı qüvvələrinin günahsız insanlara
qarşı törətdikləri misli görünməmiş
qəddarlıq, soyqırımı barədə dünya
ictimaiyyətinə təkzibolunmaz faktlarla məlumat verilməsidir.
Təşkilatın müxtəlif ölkələrin parlament
və hökumət üzvlərinin məlumatlandırılması
məqsədi ilə keçirdiyi müxtəlif tədbirlər,
kampaniyalar, elmi-praktik konfranslar və digər aksiyalar öz bəhrəsini
vermişdir. Artıq dünyanın əksər ölkələrində
keçirilən "Xocalıya ədalət"
kampaniyası Ermənistanın iç üzünü
açaraq bu ölkənin terror yuvası olduğunu
bütün dünyaya bəyan etdi.
Bütün
bunlar barəsində rayonumuzun gənclərinin məlumatlandırılması
istiqamətində əhəmiyyətli tədbirlər
keçirmişik. Ötən il bu istiqamətdə 29
rayondaxili tədbirlər, 4 zona tədbiri keçirmişik və
5 respublika miqyaslı tədbirdə iştirak etmişik.
Rayonumuzda Olimpiya İdman Kompleksinin, Gənclər Mərkəzinin
və Şahmat məktəbinin tikilməsi gənclərin
asudə vaxtlarının səmərəli keçirilməsi
istiqamətində həyata keçirilən əhəmiyyətli
tədbirlərdəndir. Bütün bunlar möhtərəm
Prezidentimizin gənclərə göstərdiyi yüksək səviyyəli
diqqət və qayğının təzahürüdür.
Rayonumuzun
gəncləri onlara göstərilən etimaddan, diqqət və
qayğıdan ruhlanaraq dövlət başçımızın
ərtafında daha sıx birləşir, müstəqil
dövlətimizin beynəlxalq aləmdə reytinqinin getdikcə
yüksəlməsində Heydər Əliyev siyasi xəttinə
alternativ olmadığını bəyan edirlər. Dünya
Azərbaycanlı Gənclər Birliyinin təsis
qurultayından sonra rayonumuzun minlərlə gənci
böyük ruh yüksəkliyi ilə bu birliyə üzv
olmaq üçün müraciət edib.
Azərbaycan
Prezidenti İlham Əliyev gənclərimizin son illərdəki
fəaliyyətini, beynəlxalq aləmə
inteqrasiyasını yüksək qiymətləndirmiş, gənclərə
böyük etimad göstərdiyini ifadə edərək
demişdir: "Mən əminəm ki, Azərbaycanın gələcəyi
etibarlı əllərdədir. Çünki bizim
bugünkü gəncliyimiz sağlam düşüncəli gənclərdir,
vətənpərvər gənclərdir, xalqını, millətini
sevən gənclərdir. Mən əminəm ki, müstəqil
Azərbaycanın gələcəyini qoruyub saxlaya bilən gənc
nəsillər yetişir".
Elçin QİYASOV,
Saatlı Rayon Gənclər və
İdman İdarəsinin rəisi
Xalq qəzeti.- 2012.- 18 mart.- S. 3.