Soyqırımı
qurbanlarının xatirəsi anıldı
31 Mart - Azərbaycanlıların
Soyqırımı Günü ilə əlaqədar anım mərasimləri
keçirilmişdir
Səbail
Ümumrayon toplantısında
bildirilmişdir ki, tarixin səhifələrini vərəqlədikcə
ermənilərin azərbaycanlılara qarşı törətdikləri
ağlasığmaz vəhşiliklərin şahidi oluruq. Son
iki yüz ildə xalqımızın başına gətirilən
bəlaların əsas səbəbkarları məhz ermənilər
olmuşlar. Erməni daşnaklarının bolşeviklərlə
birgə azərbaycanlılara qarşı həyata
keçirdikləri məşum mart
qırğınlarından 94 il ötür. 1918-ci il martın
30-31-də yaxşı silahlanmış ermənilər
Bakı şəhərində və kəndlərdə əsl
qətliamlar törətmişlər. 1918-ci ilin mart - aprel
aylarında Şamaxıda, Qubada, Gəncədə, Lənkəranda
və Azərbaycanın digər bölgələrində də
eyni qəddarlıq baş vermişdir.
Soyqırımın
ildönümü ərəfəsində Səbail Rayon
İcra Hakimiyyətinin təşkilatçılığı
ilə Park Bulvar Ticarət və İstirahət Mərkəzindəki
"Sinema-klub"da ictimaiyyət nümayəndələrinin
iştirakı ilə Vahid Mustafayevin yeni çəkdiyi
"Xoca" filminə ictimai baxış
keçirilmişdir. Tədbirin əvvəlində
soyqırım qurbanlarının xatirəsi 1 dəqiqəlik
sükutla yad olunmuşdur.
Səbail
Rayon İcra Hakimiyyətinin başçısı Asif Əsgərov
1918-ci il hadisələri, ermənilərin zaman-zaman Azərbaycan
xalqına qarşı törətdikləri vəhşiliklər
barədə məlumat vermişdir. O qeyd etmişdir ki, Azərbaycana
qarşı aparılan soyqırımı siyasətinin uzun
tarixi olsa da, bu barədə həqiqəti ümummilli lider
Heydər Əliyev dünyaya bəyan etmişdir. 1918-ci il
martın 31-də ermənilər tərəfindən həyata
keçirilən soyqırımı ulu öndər Heydər Əliyevin
1998-ci il 26 mart tarixli fərmanından sonra hüquqi-siyasi qiymətini
almışdır. O vaxtdan etibarən, 31 Mart Azərbaycanlıların
Soyqırımı Günü dövlət səviyyəsində
qeyd olunur, faciə qurbanlarının xatirəsini anma tədbirləri
keçirilir, dünya ictimaiyyətinin diqqəti bu faciəyə
cəlb edilir.
Son
illərin reallığı göstərir ki, erməni
şovinistlərinin imkanları getdikcə tükənməkdədir.
Prezident İlham Əliyevin apardığı siyasət nəticəsində
qüdrətli dövlət olmuş Azərbaycanın beynəlxalq
aləmdə günbəgün artan siyasi nüfuzu, ölkəmizin
dostlarının möhkəmlənən həmrəyliyi, nəhayət,
güclü Azərbaycan Ordusu düşməni
çıxılmaz vəziyyətə salır. Ölkə
başçısının rəhbərliyi ilə ölkəmiz
dünya siyasətinə ciddi təsiri olan böyük
dövlətlərlə məhsuldar iş aparır, onilliklər
boyu formalaşmış stereotipləri, yalnış
yanaşmaları dağıtmaqla Azərbaycan həqiqətlərini
beynəlxalq ictimaiyyətə çatdırır.
Bütün bunlar ərazi bütövlüyümüzün
bərpasına, soyqırımı həyata keçirənlərin,
xalqlar arasında düşmənçilik salanların iflasına
doğru aparır.
Sonda
"Xoca" filmi nümayiş etdirilmiş, ictimaiyyət
nümayəndələri filmi diqqətlə izləmişlər.
Nəsimi
H.Sarabski
adına Mədəniyyət Evində keçirilən mərasim
soyqırımı qurbanlarının xatirəsinin bir dəqiqəlik
sükutla yad edilməsi ilə başlanmışdır.
Tədbirdə
Nəsimi Rayon İcra Hakimiyyəti başçısı Nəsib
Məhəməliyev çıxış etmişdir. O
demişdir ki, mart ayının 31-i ölkəmizdə dövlət
səviyyəsində azərbaycanlıların
soyqırımı günü kimi qeyd edilir. 1918-ci il
martın 30-31-i və aprelin 1-də silahlı erməni dəstələri
Bakıda dinc azərbaycanlılara hücuma keçərək
qocaya, qadına, uşağa məhəl qoymadan 30 minədək
insanı görünməmiş qəddarlıqla qətlə
yetirmişlər. Sonrakı günlərdə qana
susamış erməni vəhşiləri Şamaxı, Quba,
Ağsu, Muğan və digər bölgələrdə on minlərlə
azərbaycanlını öldürmüş, evləri, məscidləri,
tarixi abidələri məhv etmişlər. Mart
qırğınları, havadarlarının dəstəyi ilə
erməni millətçiləri tərəfindən
xalqımıza qarşı zaman-zaman həyata keçirilən
soyqırımı siyasətinin ən qanlı və dəhşətil
səhifələrindəndir. Bu, sərsəm
"Böyük Ermənistan" xülyası ilə
yaşayan erməni millətçiliyinin və qəddar
şovinizminin əsil siması idi. Xalqımıza
qarşı aparılan soyqırımı və etnik təmizləmə
siyasətinin iki yüz illik tarixi var və bunda məqsəd nə
vasitə ilə olursa-olsun azərbaycanlıları öz əzəli
torpaqlarından çıxarıb sərsəm
ideyalarını reallaşdırmaqdır. Qədim Azərbaycan
diyarı olan Qarabağı ələ keçirmək də
bu mənfur ideyaya xidmət edir. Lakin insanlıq simasını
çoxdan itirmiş erməni millətçiləri öz
qara niyyətlərinə çata bilməyəcək və
biz əminik ki, məkrli düşmənin tam ifşası və
məğlubiyyəti gününə çox az vaxt
qalıb. Natiq dedi ki, 1918-ci ildə erməni şovinistlərinin
Azərbaycanda törətdikləri kütləvi
qırğınlara və azərbaycanlılara qarşı
iki əsrdir aparılan soyqırımı siyasətinə hüquqi-siyasi
qiymət ümummilli liderimiz Heydər Əliyevinin hakimiyyətə
qayıdışından sonra verilmişdir. Ulu öndərimizin
1998-ci il martın 26-da imzaladığı "Azərbaycanlıların
soyqırımı haqqında" fərman erməni millətçilərinin
cinayətlərinə ilk dəfə hərtərəfli
hüquqi-siyasi qiymət verilən mühüm sənəddir.
Natiq
Ermənistanın təcavüzkar siyasəti və
xalqımıza qarşı törədilmiş
soyqırımı barədə həqiqətlərin, ədalətli
mövqeyimizin dünya ictimaiyyətinə
çatdırılması yönündə dövlətimizin
uğurlu işlərindən və bu məsələ ilə
bağlı möhtərəm Prezidentimiz İlham Əliyevin
qətiyyətli və prinsipial fəaliyyətindən
danışmışdır. Bu istiqamətdə Heydər Əliyev
Fondunun həyata keçirdiyi çoxsaylı layihə və
proqramların əhəmiyyəti vurğulanmışdır.
Tədbirdə
İrəvan Dövlət Azərbaycan Dram Teatrı
aktyorlarının ifasında soyqırımı mövzusunda
tamaşa göstərilmişdir.
R.TAHİR,
Ayaz HƏMİDOĞLU
Xalq qəzeti.- 2012.- 31 mart.- S. 6.