Prezident İlham ƏLİYEV: Məqsədimiz Azərbaycanı yüksək gəlirli inkişaf etmiş ölkəyə çevirməkdir

Azərbaycan dövlət müstəqilliyini bərpa etdikdən sonra ümummilli lider Heydər Əliyevin uzaqgörən siyasəti və yorulmaz fəaliyyəti nəticəsində dünya iqtisadi və siyasi sisteminə inteqrasiya sahəsində böyük uğurlar qazandı. Bu inkişaf ulu öndərin ən layiqli davamçısı Prezident İlham Əliyev tərəfindən böyük müvəffəqiyyətlə davam etdirilərək Azərbaycanın beynəlxalq aləmdəki mövqelərinin daha da möhkəmləndirilməsi təmin olundu. Ölkəmizin həm iqtisadi, həm siyasi, həm də mədəni sahələrdə böyük uğurlar qazanması bir daha təsdiqlədi ki, qüdrətli siyasi xadim Heydər Əliyev tərəfindən əsası qoyulmuş iqtisadi və siyasi inkişafın Azərbaycan modelinin alternativi yoxdur.

Ötən illərdə dünyanı bürümüş çox təhlükəli iqtisadi və maliyyə böhranının ölkəmizə ciddi zərər vura bilməməsi Azərbaycanın bütövlükdə regionda lider dövlət olduğunu təsdiqlədi. Ümumilikdə ölkəmizin iqtisadi, siyasi və mədəni sahələrdəki nailiyyətləri dünyanın ən nüfuzlu iqtisadçıları, həmçinin siyasi xadimləri tərəfindən də yüksək qiymətləndirilir. Azərbayacan postsovet ölkələri arasında öz inkişafına görə diqqəti daha çox cəlb edən dövlətdir.

Son səkkiz ildə Azərbaycanın iqtisadiyyatı üç dəfə artmış, yoxsulluq 49 faizdən 7,6 faizə, işsizliyin səviyyəsi 5,3 faizə enmişdir. Keçmiş Sovet İttifaqı məkanında Azərbaycan adambaşına düşən birbaşa xarici sərmayələrin həcminə görə ilk yeri tutur. Ölkəmizdə güclü sosial siyasət həyata keçirilir, müasir sosial infarstruktur yaradılır, əhalinin həyat səviyyəsinin daha da yaxşılaşdırılması istiqamətində əhəmiyyətli layihələr hazırlanıb həyata keçirilir. Hazırda 500 mindən artıq vətəndaş aylıq əsaslarla dövlətdən maliyyə dəstəyi alır. Son bir neçə ildə iki mindən artıq orta məktəb, 400-dən artıq yeni xəstəxana, 34 olimpiya idman mərkəzi tikilib. Təbii ki, bütün bu uğurlara güclü, qüdrətli iqtisadi imkana malik dövlətlərdə imza atıla bilər. Hazırda Azərbaycan məhz belə dövlətlərdəndir.

Azərbaycanın xarici siyasət sahəsində qazandığı nailiyyətlər barəsində də inamla danışmaq olar. Müstəqilliyimizin 20 illik tarixini qeyd etdiyimiz ərəfədə ölkəyə yayılan şad bir xəbər hər bir azərbaycanlıda qürur hissi yaratdı. Azərbaycan dünyada mötəbər qurum kimi tanınan BMT Təhlükəsizlik Şurasının qeyri-daimi üzvü seçildi. Bu seçkilərdə dünyanın 155 dövləti Azərbaycana dəstək verdi. Bu fakt bir daha təsdiqlədi ki, artıq dünya ictimaiyyəti ölkəmizə etimad göstərir, inanır və hörmətlə yanaşır. Azərbaycan Təhlükəsizlik Şurasına iki illik üzvlük müddətində iki dəfə bu nüfuzlu təşkilatın iclasına sədrlik edəcək. Dövlətimizin başçısı Azərbaycanın dünya birliyində nüfuzunun getdikcə artmasından söhbət açarkən BMT Təhlükəsizlik Şurasına üzv seçilməyimizi yüksək qiymətləndirərək deyib: "BMT Təhlükəsizlik Şurasına seçilməyimiz bizim böyük təntənəmizdir, zəfərimizdir. Bizi 155 ölkə dəstəklədi. Budur, dünya ictimaiyyəti. Dünya ictimaiyyəti hansısa regional təşkilat deyildir. Dünya ictimaiyyəti BMT-dir. BMT də bizi dəstəkləyir."

Azərbaycanın bütün sahələr üzrə qazandığı uğurlar və qarşıda duran vəzifələrin həyata keçirilməsi istiqamətində görüləcək işlər barəsində Prezident İlham Əliyevin sədrliyi ilə Nazirlər Kabinetinin 2012-ci ilin birinci rübünün sosial - iqtisadi inkişafının yekunlarına və qarşıda duran vəzifələrə həsr olunmuş iclasında bu barədə daha ətraflı məlumat verildi. Azərbaycan Prezidentinin geniş və əhatəli nitqində ölkəmizin həm daxili, həm də xarici siyasət sahəsində qazandığı uğurlar, bütün sahələr üzrə inkişaf dinamikası öz təsdiqini tapdı. Əhalinin pul gəlirləri 14 faiz artmış, inflyasiya 3,1 faiz olmuş, 20 mindən artıq yeni iş yeri yardılmışdır. Bu onu göstərir ki, dövlət büdcəmiz ildən - ilə artır. Yeri gəlmişkən qeyd edək ki, bu ilin dövlət büdcəsi 20 milyard dollardan çoxdur. Bu, hər bir azərbaycanlı ailəsinin həyat səviyyəsinin getdikcə yüksəlməsi deməkdir. Artıq insanları narahat edən problemlər tədricən aradan qaldırılır.

Neçə illər idi ki, əhalinin sovet dövründən banklarda qalmış əmanətlərinin qaytarılması barədə fikirlər səsləndirilir, insanları narahat edən bu problemin aradan qaldırılmasının yolları axtarılırdı. Bundan ötrü milyardlarla vəsait tələb olunurdu. Sovet dövründən qalmış əmanətlərin qaytarılması üçün ən azı Ermənistan kimi dövlətin ümumi büdcəsinin 50 faizi qədər vəsait tələb olunurdu. Ölkəmizdə həyata keçirilən islahatlar, iri infrastruktur layihələrin reallaşdırılması iqtisadiyyatımızı daha da möhkəmləndirdi. Təbii ki, bu uğurlar xalqın həyat səviyyəsinin yüksəldilməsinə öz müsbət təsirini göstərməli idi. Biz sovet dövründən qalmış əmanətlərin qaytarılması prosesinin artıq reallaşdığını gördükcə ölkəmizin iqtisadi qüdrətinin getdikcə artmasına tam əmin oluruq.

Möhtərm Prezidentimiz İlham Əliyev aprelin 16-da Nazirlər Kabinetinin 2012-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında sovet dövründən qalan əmanətlərin qaytarılması təşəbbüsünə toxunaraq dedi: "Bu, çox ədalətli və müsbət təşəbbüsdür. Mən hesab edirəm ki, müstəqil Azərbaycan dövləti sovet dövründə yığılan əmanətlərə cavabdehlik, məsuliyyət daşımır. Buna baxmayaraq, Azərbaycan dövlətinin güclü sosial siyasətini və yenə də deyirəm, insan amilinin diqqət mərkəzində olduğunu bir daha nəzərə alaraq qərar verildi və mənim tərəfimdən sərəncam imzalandı ki, batmış əmanətlərə görə kompensasiya ödənilsin. Deyə bilərəm ki, bu, çox əhəmiyyətli kompensasiyadır. Postsovet məkanında bir neçə ölkədə buna oxşar təşəbbüslər irəli sürülüb. Ancaq Azərbaycandan başqa heç bir yerdə cəmi iki il ərzində bu məbləğ qaytarılmayıb. Biz kompensasiya üçün təxminən bir milyard manat həcmində vəsait nəzərdə tutmuşuq və iki il ərzində bu vəsaitin insanlara verilməsi prosesi təşkil edilməlidir. Onu da qeyd etməliyəm ki, mən adətən başqa ölkələrlə müqayisə aparmağı o qədər də istəmirəm. Çünki hesab edirəm ki, bu, o qədər də düzgün addım olmaz. Yəqin fikir vermisiniz, baxmayaraq ki, Azərbaycan, demək olar, bütün göstəricilərinə görə bir çox ölkələrdən üstündür, heç vaxt mən müqayisə üçün, yaxud da ki, uğurlarımızı daha da qabarıq göstərmək üçün kiminsə problemlərini üzə çıxarmıram, hesab edirəm ki, bu, qeyri-etik davranışdır. Ancaq ümumi sözlərlə deyə bilərəm ki, heç bir yerdə bizim qədər yüksək əmsal tətbiq edilmir. Müqayisə üçün deyə bilərəm ki, bizdə bu barədə kifayət qədər məlumatlar verilib, mətbuatda da dərc edilib. Bir daha xatırlatmaq istəyirəm ki, hələ 1992-ci ildə milli valyutaya keçid dövründə on sovet rublu bir Azərbaycan manatı nisbətində əvəz olunub - birə on. 2006-cı il yanvarın 1-də manatın denominasiyası həyata keçirilib. Beləliklə, beş min Azərbaycan manatı - köhnə manat bir yeni manata bərabər olub. Buna baxmayaraq, hazırda min rublu olan əmanətçiyə 150 manat, yaxud da ki, 180 dollara yaxın kompensasiya ödənilir. İki min rublu olan 300 manat, yaxud da ki, 400 dollar alacaq. Bu cədvəli davam etdirmək olar. Yəni, bu özlüyündə onu göstərir ki, ən yüksək əmsal və ən qısa dövr Azərbaycandadır. Bu, bir daha Azərbaycan dövlətinin həmin məsələyə nə qədər həssas olduğunu göstərir".

Məlum olduğu kimi, Azərbaycan müharibə şəraitində yaşayan dövlətlərdəndir. Mənfur qonşularımız torpaqlarımızın 20 faizini işğai etmiş, bir milyondan artıq soydaşımız qaçqın və məcburi köçkün şəraitində yaşayır. İşğal altında qalmış torpaqlarımızın azad olunması istiqamətində Azərbaycan Prezidentinin həyata keçirdiyi siyasət artıq dünyanın əksər dövlətləri və nüfuzlu beynəlxalq qurumları tərəfindən dəstəklənir. Artıq Ermənistan beynəlxalq aləmdə işğalçı dövlət kimi tanınır. Dağlıq Qarabağ münaqişəsinin həllində zaman Azərbaycanın xeyrinə işləyir. Dövlət başçısı giriş nitqində də Dağlıq Qarabağ münaqişəsinin nizamlanması ilə əlqədar mövcud vəziyyətdən söhbət açdı və əminliklə bildirdi ki, Azərbaycanın ərazi bütövlüyü tam bərpa ediləcək: "Bizim prinsipial mövqeyimiz dəyişməz olaraq qalır. Azərbaycanın ərazi bütövlüyü qeyd-şərtsiz bərpa edilməli, işğalçı qüvvələr torpaqlarımızdan geri çəkilməlidir. Beynəlxalq birlik tərəfindən tanınan ərazi bütövlüyümüz tam şəkildə bərpa ediləcək. Mən buna şübhə etmirəm. Biz həm iqtisadi sahədə, həm beynəlxalq aləmdə güclənirik. Hərbi potensialımız da güclənir. Bu sahəyə daim böyük diqqət göstərilir və göstəriləcək. Biz güclü hərbi sənaye yaradırıq, eyni zamanda böyük həcmdə hərbi texnika, silah, sursat alırıq və alacağıq".

Aərbaycanın gündən - günə mətnləşən və qüdrətlənən nizami ordusu da torpaqlarımızın işğaldan azad olunacağına tam əminlik yaradır. Bütün silahlı qüvvələr bu gün istənilən vəzifəni - ölkəmizin bütün maraqlarını müdafiə etmək üçün hazırdırlar, buna qadirdirlər. Lakin Azərbaycan tərəfi münaqişəni qan tökülmədən, sülh, danışıqlar yolu ilə həll etməyin tərəfdarıdır. Biz hər an, hər gün qələbəyə yaxınlaşırıq. Hər gün Ermənistan daha böyük tənəzzülə uğrayır, Azərbaycan daha da güclənir. Nazirlər Kabinetinin iclasında həmçinin diqqətə çatdırıldı ki, Azərbaycanda söz və mətbuat azadlığının təmin olunması, insanların öz fikirlərini sərbəst ifadə etmələri üçün hər cür şərait yardılıb. Bəzi müxalif qüvvələrin kimlərinsə təhriki ilə Azərbaycanın beynəlxalq aləmdə yüksələn nüfuzuna xələl gətirmək üçün etdikləri bütün cəhdlər iflasa uğrayır. Çünki mitinq həvəskarı olan radikal müxalifət üçün onların özlərinə layiq yerlər ayrılmış, hətta belələrinin təhlükəsizliyi dövlət tərəfindən tam təmin olunur. Hazırda elə ölkələr var ki, orada hər gün, hər həftə nümayişə çıxan insanlar döyülür, əzilir, həbs olunurlar. Bizdə isə hər hansı bir aksiya keçirmək istəyənlər onlar üçün ayrılmış ərazidə öz fikirlərini sərbəst ifadə edirlər. Bu yaxınlarda müxalifət nümayəndələrinin keçirdikləri icazəli aksiya bir daha təsdiqlədi ki, Azərbaycanda demokratiya, söz azadlığı, vicdan azadlığı və sərbəst toplaşmaq azadlığı vardır.

Hazırda ölkəmiz beynəlxalq səviyyəli böyük bir mədəni tədbirin keçirilməsi ərəfəsindədir. İndi bütün dünyanın diqqəti ölkəmizə cəlb olunub. "Eurovision-2012" mahnı müsabiqəsinin Azərbaycanda keçirilməsi ölkəmizin dünya birliyində nüfuz sahibi olmasından vəbər verir. Avropanın mühüm mədəni tədbirinin ölkəmizdə reallaşması Azərbaycan həqiqətlərinin, ölkədəki real vəziyyətin müəyyən daxili və xarici maraqlı dairələrin süzgəcindən keçməklə deyil, obyektiv şəkildə dünya ictimaiyyətinə çatdırılmasında böyük rol oynayacaq. Azərbaycanda mühüm ictimai - siyasi, iqtisadi və mədəni əhəmiyyətə malik hadisələrin, böyük beynəlxalq tədbirlərin keçirilməsinə mane olmaq mümkün deyil. Çünki Azərbaycan sürətlə inkişaf edir, dünya birliyinə inteqrasiya olunur və iqtisadi cəhətdən daha da qüdrətlənir. Belə bir ölkə qarşısına qoyduğu məqsədə nəyin bahasına olursa - olsun nail olmalıdır. Bu gün Azərbaycan məhz belə dövlətlərdəndir.

Azərbaycan Prezidenti gələcək planlar, qarşıda duran vəzifələr barədə məlumat verərkən dedi: "O ki qaldı bizim gələcək planlarımıza, bir daha demək istəyirəm ki, biz inamla qabağa gedirik. Bizə qarşı təxribatlar bundan sonra da olacaqdır. Bizə qarşı informasiya mübarizəsi bundan sonra da aparılacaq. Bu, bizi narahat etmir. Sadəcə olaraq, biz bu barədə danışmalıyıq, öz tədbirlərimizi görməliyik, Azərbaycan xalqının xoşbəxt gələcəyini təmin etməliyik."

Əliqismət BƏDƏLOV

Xalq qəzeti.- 2012.- 1 may.- S. 1.