"Azərbaycan səninlədir - sənsiz deyil" müsabiqəsinə yekun vurulmuşdur

Binəqədi Rayon İcra Hakimiyyətinin akt zalında mayın 7-də keçirilən tədbir Azərbaycan xalqının ümummilli lideri Heydər Əliyevin anadan olmasının 89-cu ildönümü münasibətilə təşkil edilən "Azərbaycan səninlədir-sənsiz deyil" adlı yaradıcılıq müsabiqəsinin yekun nəticələrinə həsr olunmuşdu.

Rayon icra hakimiyyətinin başçısı Xaləddin İsgəndərov tədbiri açaraq ümummilli liderin ölkəni müstəqilliyə qovuşdurandan sonra onu inkişaf etdirmək üçün gördüyü misilsiz işlərdən, apardığı uğurlu islahatlardan danışmışdır. O qeyd etmişdir ki, tarix boyu elə siyasətçilər, elə şəxsiyyətlər yaşamışlar ki, onlar təkcə öz dövrlərinin deyil, həm də çox-çox illər sonranın da insanı olmuşlar. Gələcəyi görmək, rəhbəri olduğu ölkəni, onun vətəndaşlarını işıqlı gələcəyə aparmaq yönündə fəaliyyətləri belə insanları daha da əfsanələşdirib xalqın sevilən şəxsiyyətinə çevirmişdir. Azərbaycan xalqının ümummilli lideri Heydər Əliyev məhz belə nadir şəxsiyyətlərdən olmuşdur. X. İsgəndərov bugünkü tədbirin Tanrının Azərbaycan xalqına xilaskarlıq missiyasını yerinə yetirmək üçün bəxş etdiyi ulu öndərin anadan olmasının ildönümü münasibətilə təşkil edilən yaradıcılıq müsabiqəsi qaliblərinin mükafatlandırılmasına həsr edildiyini bildirmişdir. O demişdir ki, Heydər Əliyevin ölməz ideyaları mədəniyyətimizin inkişafında güclü və yeni stimul yaratmış, onun hakimiyyəti dövründə Azərbaycan mədəniyyəti dünyada daha geniş tanınmağa və təbliğ olunmağa başlamış, incəsənətin ayrı-ayrı sahələrinin tərəqqisinə xidmət göstərən dövlət proqramları qəbul olunmuşdur.

Binəqədi Rayon Gənclər və İdman İdarəsinin rəisi Qüdsi Bayramov tədbir barədə məlumat verərək bildirmişdir ki, hər il ulu öndərin anadan olmasının ildönümü şərəfinə orta məktəblərdə müxtəlif tədbirlər keçirilmiş, inşa yazı müsabiqələri təşkil olunmuşdur. Bu il də ənənəvi olaraq ümummilli liderin anadan olmasının 89-cu ildönümünə hazırlığa mart ayından başlanılmışdır. Müsabiqənin keçirilməsində əsas məqsəd Binəqədi rayonunda ümummilli liderimiz Heydər Əliyevin xatirəsini yad etmək, yaradıcı və istedadlı gənclərə dövlət qayğısının artırılması və onların qabiliyyətinin inkişaf etdirilməsi üçün əlverişli şəraitin yaradılması olmuşdur. Sonra Q. Bayramov iki mərhələdə keçirilən və ulu öndərin anadan olmasının 89-cu ildönümünə həsr olunmuş müsabiqəyə martın 5-dən start verildiyini bildirmişdir. Qeyd etmişdir ki, məktəbdaxili mərhələ 2012-ci ilin mart ayı ərzində rayonun orta ümumtəhsil məktəblərində keçirilmişdir. Məktəbdaxili mərhələdə qalib gəlmiş şagirdlər rayon mərhələsinə vəsiqə qazanmışlar.

İkinci-rayon mərhələsi isə aprelin 13-dən 20-dək 26 saylı Uşaq Gənclər Yaradıcılıq Mərkəzində 32 orta ümumtəhsil məktəbinin, musiqi məktəblərinin, uşaq-gənclər yaradıcılıq mərkəzlərinin iştirakı ilə keçirilmişdir.

Müsabiqə əsasən iki- ədəbi-bədii və elmi-texniki layihələr üzrə keçirilmişdir. Ədəbi-bədii layihələr üzrə-gənclərin şeir söyləmək, bədii qiraət, rəsm çəkmək, milli rəqslərimizin ifası, müxtəlif müsiqili çalğı alətlərində ifa qabiliyyətinə diqqət yetirilmişdir. Elmi-texniki layihələr üzrə isə gənclərin aviomodel, raket modeli, gəmi modelçiliyi, radiotexnika və s. sahələrdə bacarıqları nümayiş olunmuşdur.

Müsabiqənin yekunlarına görə iştirakçılar arasında 15 nəfər 1-ci, 10 nəfər 2-ci, 9 nəfər 3-cü yerə layiq görülmüş, 7 nəfər isə fərqlənmişdir.

Qeyd edək ki, müsabiqədə hər nominasiya üzrə I, II, III yerləri tutmuş iştirakçılar Binəqədi Rayon Gənclər və İdman İdarəsi tərəfindən müvafiq dərəcəli diplomlarla təltif olunmuşlar. Bundan başqa qaliblər rayon icra hakimiyyəti tərəfindən xüsusi xatirə hədiyyələri ilə mükafatlandırılmışlar.

Zərifə BƏŞİRQIZI

Xalq qəzeti.- 2012.- 8 may.- S. 10.