Şuşa unudulmaz ağrımızdır

Dünən AMEA Nizami adına Ədəbiyyat İnstitutunda Şuşa şəhərinin Ermənistan silahlı qüvvələri tərəfindən işğalının iyirminci ildönümünə həsr olunmuş tədbir keçirildi.

Tədbiri giriş sözü ilə institutun direktor vəzifəsini icra edən AMEA-nın müxbir üzvü, professor Teymur Kərimli açdı. O, Prezident İlham Əliyevin Şuşa şəhərinin işğalının 20-ci ildönümü münasibətilə imzaladığı sərəncamı xatırladaraq onun tarixi əhəmiyyətini vurğuladı.

Həmin sərəncamda qeyd olunan - "Şuşa Azərbaycanın unikal mədəniyyət mərkəzlərindən biridir... Təbii gözəllikləri ilə seçilən bu şəhər milli memarlığımızın və orta əsrlər şəhərsalma sənətinin qiymətli abidəsidir. Milli-mənəvi dəyərlərimizi və musiqi ənənələrimizi daim yaşadan Şuşa mühüm iqtisadi, siyasi və mədəni əhəmiyyətə malik şəhər kimi təşəkkül tapanadək zəngin yol keçmiş, Qarabağ xanlığının mərkəzi olmaqla xalqımızın həyatında özünəməxsus rol oynamışdır. Qasım bəy Zakir, Xurşidbanu Natəvan, Mir Möhsün Nəvvab, Nəcəf bəy Vəzirov, Əbdürrəhim bəy Haqverdiyev, Yusif Vəzir Çəmənzəminli, Firidun bəy Köçərli, Əhməd bəy Ağaoğlu və digər görkəmli şəxsiyyətləri ilə tarixə düşən bu şəhər dünyada Azərbaycan muğamının beşiyi olaraq tanınır" - fikirlərini əsas götürərək institutun əməkdaşı, filologiya elmləri doktoru Qurban Bayramov "Şuşanın intizarında" adlı məruzə etdi. O, məruzəsində məhz Qarabağın, xüsusən Şuşanın ictimai-siyasi, ədəbi-mədəni mühiti haqqında əhatəli danışdı. Sonra filologiya elmləri doktoru, professor Vaqif Arzumanlı Şuşanın işğalı ilə bağlı ağrılı günlərdən söz açdı.

AMEA-nın müxbir üzvü Teymur Kərimli tədbirin sonunda Prezident İlham Əliyevin sentyabrın 23-də Nyu-Yorkda BMT Baş Məclisinin 65-ci sessiyasındakı çıxışını bir daha iştirakçıların diqqətinə yetirdi.

Şuşa unudulmaz ağrımızdır və hamımız belə bir inamdayıq ki, tezliklə Şuşamız özümüzə qaytarılacaq.

Almaz ÜLVİ

Xalq qəzeti.- 2012.- 8 may.- S. 9.