Nərimanov rayonunda qələbənin 67-ci ildönümü qeyd olunmuşdur

Alman faşizmi üzərində qazanılmış tarixi qələbənin 67-ci ildönümü ölkəmizin hər yerində olduğu kimi, paytaxtın Nərimanov rayonunda da böyük təntənə, əsl bayram əhval-ruhiyyəsi ilə qeyd edildi. Rayon ərazisində İkinci Dünya müharibəsində qəhrəmancasına həlak olmuş döyüşçülərin nurlu xatirəsinə ehtiram əlaməti olaraq yaradılmış "Qardaşlıq məzarlığı"nda keçirilən bayram tədbirində müharibə və arxa cəbhə veteranları, MDB ölkələrinin Azərbaycandakı diplomatik korpuslarının nümayəndələri, millət vəkilləri, Nərimanov Rayon İcra Hakimiyyəti Aparatının işçiləri, eləcə də rayon fəalları və məktəblilər iştirak edirdilər.

Azərbaycan Respublikasının dövlət himni səsləndirildikdən sonra meydana müharibənin ağrı-acılarını yaşamış MDB ölkələrinin dövlət bayraqları gətirildi. Daha sonra MDB respublikalarının səfirləri, millət vəkilləri və Nərimanov Rayon İcra Hakimiyyətinin rəhbərliyi "Qardaşlıq məzarlığı"ndakı abidənin önünə əklil qoydular. Tədbir iştirakçıları Böyük Vətən müharibəsində həlak olanların əziz xatirəsini bir dəqiqəlik sükutla yad etdilər. Qələbə Günü münasibətilə veteranları təbrik edən Nərimanov Rayon İcra Hakimiyyətinin başçısı Abdin Fərzəliyev bildirdi ki, İkinci Dünya müharibəsi zamanı Sovet İttifaqının bütün xalqları ilə yanaşı, Azərbaycan xalqı da faşist qəsbkarlarına qarşı ölüm-dirim savaşına qalxaraq döyüşlərdə əsl qəhrəmanlıq, şücaət göstərmişlər. O qanlı müharibəyə göndərilmiş 700 min nəfərə yaxın soydaşımızın yarıdan çoxu qəhrəmancasına həlak olmuş, bir çoxları sağlamlıqlarını itirmişlər. Qeyd olundu ki, müharibədə göstərdikləri misilsiz döyüş şücaətlərinə görə 123 nəfər azərbaycanlı Sovet İttifaqı Qəhrəmanı adına layiq görülmüş, 400 minədək soydaşımız orden və müdallarla təltif olunmuşdur. Torpaqlarımızın 20 faizinin işğal altında olduğu bir şəraitdə belə tədbirlərin keçirilməsinin gənclərin hərbi vətənpərvərlik tərbiyəsində mühüm rol oynadığını vurğulayan natiq qeyd etdi ki, müharibə veteranlarımızın keçdiyi şərəfli ömür yolu, döyüş şücaətləri gənc nəsil üçün, sözün əsl mənasında, örnək olmalıdır. Ulu öndər Heydər Əliyevin veteranlara, veteran hərəkatına göstərdiyi qayğı və diqqətdən bəhs edən A. Fərzəliyev ölkə Prezidenti İlham Əliyevin faşizm üzərində qələbənin 67-ci ildönümü münasibətilə 1941-1945-ci illər müharibəsi iştirakçılarına, həlak olmuş və ya sonradan vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım edilməsi barədə sərəncamını bunun növbəti təzahürü olduğunu vurğuladı.

Böyük Vətən müharibəsi veteranı Məhəmməd Hüseynov, Rusiya Federasiyasının Həştərxan şəhərindəki Heydər Əliyev adına 11 nömrəli orta məktəbin direktor müavini Tatyana Klinkova, Azərbaycan-Rus İcması Nərimanov rayon şöbəsinin sədri Lidiya Hacıyeva və Azərbaycan Milli Məclisinin deputatı Adil Əliyev çıxış edərək 9 May - Qələbə Günü münasibətilə bütün müharibə veteranlarını təbrik etdilər, 67 il öncə Hitler Almaniyası üzərində qazanılmış parlaq qələbədə dünyanın bir çox xalqları kimi, Azərbaycan xalqının da müstəsna rol oynadığını vurğuladılar. Faşizm üzərində tarixi qələbənin bütün bəşəriyyətin xilası üçün yol açdığını diqqətə çatdıran natiqlər müharibə illərində həlak olmuş döyüşçülərin xatirəsinin əbədiləşdirilməsi istiqamətində görülən işləri və veteranlara göstərilən dövlət qayğısını yüksək dəyərləndirdilər.

MDB respublikalarının ölkəmizdəki diplomatik korpuslarının nümayəndələri adından çıxış edən Rusiya Federasiyasının səfiri Vladimir Doroxin veteranları bu əlamətdar gün münasibətilə təbrik etdi. Böyük Vətən müharibəsində azərbaycanlı döyüşçülərin misilsiz döyüş şücaətləri göstərdiklərini vurğulayan səfir Bakı neftinin qələbədə müstəsna rol oynadığını bildirdi.

Mərasim abidə kompleksinin önünə tər gül dəstələrinin qoyulması ilə başa çatdı.

Mirbağır YAQUBZADƏ

Xalq qəzeti.- 2012.- 12 may.- S. 11.