Səhnəmizin
gözəl Sarası
Azərbaycan
klassik muğam, xalq və bəstəkar mahnıları
ifaçılığı sahəsində öz dəst-xətti,
özünəməxsus ifa tərzi ilə seçilən
Sara xanım Qədimovanın 90 yaşı tamam olur. O,
artıq 7 ildir ki, aramızda yoxdur. 2005-ci ildə dünyaya gəldiyi
bahar fəslində - may ayında da dünyasını dəyişdi.
Sara
xanımın yoxluğu minlərlə onu sevənlərin
dünyasında boşluq yaratdı.O, özü ilə musiqi
sevərlərin iç dünyasını, qəlbini
sıyırıb apardı.
Azərbaycanda
bundan sonra da çoxlu müğənnilər, xanəndələr,
sənətkarlar olacaq. Lakin heç bir vaxt Sara xanım,
Şövkət xanım və Xan Şuşinski kimisi
olmayacaq. Bu, bəlkə indi bir o qədər də hiss olunmur.
Bunu gələcək göstərəcəkdir.
Sara
xanım Üzeyir Hacıbəyovun xeyir-duası ilə səhnəyə
gəlib. Üzeyir bəyin tapıntısı olan Sara
xanım Qurban Pirimov, Zülfü Adıgözəlov, Əhməd
Bakıxanov, Hüseynqulu Sarabski, Seyid Şuşinski, Xan
Şuşinski kimi ustad sənətkarlardan dərs alıb.
Zülfü Adıgözəlov onun ilk sənət müəllimi
olub. Sonra isə Hüseyqulu Sarabskinin sinfində mugamdan dərs
almışdır.1958-ci ildən 1964-cü ilədək Seyid
Şuşinski və Xan Şuşinskidən muğamın
sirlərini öyrənirdi.
Sara
xanım Şərqdə muğam dəstgahlarını
tamam-kamal ifa edən ilk qadın xanəndədir. "Şur dəstgahı",
"Mahur-hindi", "Bayatı-Şiraz", "Rast",
"Segah", "Xari segah" "Qatar",
"Şahnaz" kimi çətin və mürəkkəb
muğamları məharətlə oxumuş, Cabbarın,
Seyidin, Xanın hökmranlıq etdiyi sənət meydanında
öz sözünü demişdir.Bu muğamlar lentə
alınaraq Dövlət Teleradio Verilişləri Şirkətinin
qızıl fondunda qorunur.Bu qiymətli sənət inciləri
milli mədəniyyətimizin parlaq nümunələri kimi
daim yaşayacaqdır.
Bəhram
Mənsurov deyirdi: "Allah Sara xanıma elə bir səs
vermişdir ki, o çox asanlıqla, çətinlik çəkmədən
tarın bütün pərdələrində gəzişə
bilər. Onun səs diapazonu, səs götürümü
çox genişdir.Əgər Sara xanım çox çətin,
yüksək kaloritli "Bayatı Şiraz"
mugamını oxuyursa, daha ona söz ola bilməz."
Sara
xanım Əbilov adına mədəniyyət evinin özfəaliyyət
kollektivinin siravi üzvündən 17 yanvar 1942-ci ildə Azərbaycan
Dövlət Filarmoniyasına solist qəbul olunmuş ilk
müğənnidir. O vaxt gənc Saranın 20 yaşı var
idi.Burada ondan başqa 8 nəfər sənətkar solist
işləyirdi: Zülfü Adıgözəlov, Seyid
Şuşinski, Xan Şuşinski, Mütəllim Mütəllimov,
Sürəyya Qaçar, Hacı Məmmədov, Nefton Qriqoryan
və Allahyar cavanşirov.
Fəaliyyətə
başladığı ilk günlərdən Üzeyir
Hacıbəyov onu nəzarətə götürüb, ona
qayğı ilə yanaşmağa başladı.Üzeyir bəy
müqtədir müğənnilərə dönə-dönə
tapşırırdı ki, Sara xanıma sənətdə
düzgün yol göstərsinlər, düzgün istiqamət
versinlər.
Üzeyir
bəy 1944-cü ildə İrana qastrola gedən incəsənət
işçilərinin sırasına Xan Şuşinskini, Sara
Qədimovanı və Zəhra Rəhimovanı da daxil etdi.
Allah-Təala
Sara xanıma hər şey vermişdi:təbii gözəllik,
məlahətli səs, xeyirxah və təmiz ürək.
Üzeyir bəy onu "Səhnəmizin gözəl Sarası"
adlandırırdı.
Sara
xanım gənc olmasına baxmayaraq, İranda yaxşı
tanınır və böyük müvəfəqiyyət
qazanırdı.Vaxtı ilə gözəl səsi olmuş,
14 yaşında Sara xanımla birlikdə İrana qastrola
getmiş, sonralar Azərbaycan Dövlət
Konservatoriyasının professoru olmuş Arif Məmmədov o
günləri belə xatırlayırdı:
- Biz
Mərənddə olanda qadınlar Saranı qucaqlayıb
bağrına basır, "Azərbaycan maralı" bura
xoş gəlibdir," - deyirdilər. Sara konsertlərdə
"Kürdün gözəli", "Ay dilbər",
"Qubanın ağ alması" xalq mahnılarını və
Xan əmilə birlikdə "Get ay batandan sonra gəl, ay
oğlan" mahnısını duet şəklində
oxuyurdu. Bir gün Təbrizdə "Qatar"
muğamını ifa etdi. İranın çox məşhur
müğənnisi Azər İqbal Soltan çıxıb
Sara xanımı təbrik etdi və dedi ki, belə zil
muğamı oxumaq böyük ustalıqdır, sənə
halal olsun, qızım. "Qatar" muğamı Sara
xanımın şah əsəri idi. Hələ heç bir
müğənni bu muğamı onun kimi füsünkar, əzəmətli
oxumamışdır. Müğənni Yavər Kələntərli
haqlı olaraq demişdir: "Bütün müğənnilər
sussun, Sara xanım "Qatar" oxuyur". Bu deyimdə
xüsusi məna var, bu deyimdə Sara xanımın
ifaçılığına yüksək qiymət verilir.
Məhəmməd
Rza Şah Pəhləvi Xan Şuşinski ilə birlikdə
Saranı igamətgahında - Şimranda qəbul edib,
onları dövlət mükafatı ilə təltif etdi.
Fövzüyyə xanım onlara qiymətli hədiyyələr
verdi. Şah təklif etdi ki, Sara İranda qalıb öz məktəbini
yaratsın.Sara xanım isə utana-utana şaha dedi:
- Mən
hələ çox gəncəm. Hələ çox öyrənməliyəm.
Bundan başqa, mənim atam və anam dünyalarını erkən
dəyişiblər. 6 uşaq-qardaş və bacılarım
mənim himayəmdədirlər.
Şah
və Fövzüyyə xanım çox kövrəldilər.
İranda qastrol səfəri
3 ay çəkdi. Sara xanım hər dəfə deyirdi ki,
İran səfəri mənim həyatımda böyük rol
oynadı.1948-ci ilin əvvəllərində Moskvada
Böyük Nizaminin 800 illiyi qeyd edilirdi. Üzeyir bəyin təklifilə
Sara xanım Moskvaya getmişdi. O, böyük şairin qəzəllərilə
"Şahnaz" muğamını oxumuş və
festivalın diplomu ilə təltif olunmuşdu.
Sara
xanım xalq və bəstəkar mahnılarının mahir
ifaçısı idi. Onun ifasında 400-dən çox
mahnı səslənmişdir. Şəfiqə Axundovanın,
Qənbər Hüseynlinin, Andrey Babayevin demək olar ki,
bütün mahnılarını ilk dəfə Sara xanım
oxumuşdur.
Qənbər
Hüseynli ilə yaradıcılıq əlaqələri
sıx idi. Onun dünyadan vaxtsız köçməsi Sara
xanımı möhkəm sarsıtmışdı. Qənbər
Hüseynlinin qəbri üstündə Sara xanımın ifa
etdiyi "Ay işığında" mahnısını gəncəlilər
indi də xatırlayırlar.
Üzeyir
Hacıbəyovun "Qara göz" və "Şəfqət
bacısı" mahnılarını ilk dəfə qadın
sənətkarlardan Sara xanım ifa etmişdir. "Şəfqət
bacısı" mahnısını Fatma Mehrəliyeva da ifa
edirdi.
Sara
xanım səsinə uyğun mürəkkəb mahnılar
ifa edərdi. Qənbər Hüseynlinin "Nə vaxta
qaldı", Şəfiqə Axundovanın "Lirik
mahnı", Ələkbər Tağıyevin "Göy
göl", Cəfər Cabbarlının "Od gəlini"
tamaşasına Əfrasiyab Bədəlbəylinin
yazdığı "Solmazın mahnısı",
Hacıbaba Həsənovun "Xatirələr", xalq
mahnısı "Qara qaşın vəsməsi"və bir
çox başqa mahnılarını oxumağa müğənnilər
cürət etmirlər.
Cəfər
Cabbarlının bütün əsərlərinə
yazılmış mahnıları təkcə Sara xanım ifa
etmişdir. Sara xanım olmasaydı, bəlkə də həmin
mahnılardan əsər-əlamət qalmazdı.
Hər
bir səs bir ümiddir-deyirlər. Sara xanımın səsi
bizə ümid verirdi. Biz bu səsin, bu ifanın təranələri
altında böyüyüb, boya-başa
çatmışıq...
...1958-ci
ildə böyük Füzulinin yubileyi keçirilirdi. O vaxt Azərbaycan
Kommunist Partiyası Mərkəzi Komitəsinin təklifilə
Sara Qədimova və Əbülfət Əliyevin ifasında
"Leyli və Məcnun" operası başdan-ayağa lentə
yazılmış və hal-hazırda qızıl fondda
saxlanılır.
Mən
1959-cu ildə Moskva şəhərində keçirilən Azərbaycan
ədəbiyyatı və incəsənəti
dekadasını heç bir vaxt unuda bilmirəm. Mən də
Dağlıq Qarabağın bədii özfəaliyyət
kollektivinin üzvü kimi dekadada iştirak edirdim.
Elə gətirdi
ki, ustad xanəndə Sara xanım Qədimova Leyla Bədəlbəyli
və Firəngiz Əhmədova ilə birlikdə
"Moskva" mehmanxanasında bir otaqda qalırdılar. Mən
də onlar olan otağın qarşısındakı zada
qalırdım. İyun ayının 3-də gecə saat 4
olardı. Birdən qapı döyüldü. Sara xanım
qapını açanda dekadanın bədii rəhbəri
Şəmsi Bədəlbəylinin yanında İmam Mustafayevi
gördü və özünü tamamilə itirdi, rəng
verib rəng aldı. İ.Mustafayev narahat halda dedi:
- Sara
xanım, sən Xan Şuşinski və Şövkət
xanımla birlikdə bu gün dekadanın
bağlanışında "Qarabağ şikəstəsi"
oxumalısan. Şəmsi deyir ki, sən bu təklifə etiraz
edirsən. Mən məcbur olub özüm gəldim. Axı
hamımız ambisiyalarımızı,
narazılıqlarımızı bir kənara qoyub, dövlət
üçün, millət üçün
çalışmalıyıq. Sənin barəndə
düzgün mövqe tutulmadığını bilirəm.
Sara
xanım heç bir söz demədi. İmam Mustafayev ona
buraxılış vəsiqəsini uzadıb, "Bu gün
saat 10-da Böyük Teatrda məşqdə olmalısan",
- dedi.
Sonra
öyrəndim ki, o dövrdəki mədəniyyət naziri,
Sara xanıma "badalaq" vurmaq istəyən yaxın bir rəfiqəsinin
sözü ilə Sara xanımın adını
"Qarabağ şikəstəsi"ni oxuyacaq müğənnilərin
sırasından pozub, onun yerinə Rübabə Muradovanı
yazıblar. İmam Mustafayev yekun konsertin məşqinə
baxarkən trionun tərkibində Sara xanımın
olmadığını görüb çox əsəbləşmişdi.
Və demişdi ki, "Qarabağ şikəstəsi"ni
Sara xanımdan yaxşı ifa edən ikinci müğənni
yoxdur. Onu nə üçün yekun konsertinə
buraxmırsınız? Bundan sonra İmam müəllim
özü işə qarışmalı olmuşdu.
Sara
xanım "Qarabağ şikəstəsi"ni keçən
əsrin 40-cı illərindən oxuyurdu. Hələ heç
bir qadın müğənni Sara xanıma qədər bu
şikəstəyə müraciət etməmişdi.
Bütün Azərbaycan bilirdi ki, "Qarabağ şikəstəsi"
Sara xanımın ifasında necə gözəl səslənir.
Dekadanın
bağlanışına bu şikəstə də daxil
edilmişdi. Lakin Rübabə Muradovanın səs ahəngi bu
şikəstəyə uyğun gəlmirdi. Musiqinin ritmi, ahəngi,
tamlığı pozulurdu, yaxşı uğur
qazanılmırdı.
Əfrasiyab
və Şəmsi Bədəlbəylilər, Xan
Şuşinski, Hacı Məmmədov və Səid Rüstəmov
dönə-dönə tələb edirdilər ki, Sara
xanım uzun illər "Qarabağ şikəstəsi" ni
oxuduğu üçün Rübabənin əvəzinə
Sara xanım trionun tərkibində oxumalıdır.
Sara
xanım çox zabitəli, prinsipial, sözündən
dönməyən adam idi. Nə qədər təkid edirdilər
"yox" deyib dayanırdı. Deyirdi ki, "Əgər mən
sizə lazım idimsə əvvəlcədən məni
trionun tərkibinə daxil edəydiniz.
İmam
Mustafayevin tapşırığından sonra Sara xanım səhər
saat 10-da məşq üçün səhnəyə
çıxanda, bütün orkestr ayağa qalxıb onu
alqışladı və Sara xanımın iştirakı ilə
füsunkar bir ifa alındı. Sara xanım
sağlığında hər dəfə həmin lent
yazısına baxanda İmam Mustafayevi xatırlayır və
onun ruhuna min rəhmət oxuyurdu.
Sara
xanım bütün hökumət tədbirlərində
çıxış edərdi. Türkiyənin baş naziri
Süleyman Dəmirəl 1967-ci ildə Bakıya gələrkən
onun şərəfinə verilən ziyafətdə "Qara
tellər", "Ay dilbər" , "Türk
mahnısı" , "Aişə" və
"Şahnaz" muğamını oxumuşdur. Həmin tədbirdə
Əbülfət Əliyev, Şövkət Ələkbərova,
Xan Şuşinski də iştirak edirdilər. Sara
xanımın ifaçılıq sənəti Süleyman Dəmirəli
məftun etmişdir. Bundan 29 il sonra Süleyman Dəmirəl
Prezident kimi Bakıya gələrkən bu illər ərzində
Sara xanımın səsinin onun qulağından getmədiyini
dilə gətirdi və onu şəxsi qonağı kimi
Türkiyəyə dəvət etdi.
Sara
xanım 1996-cı ilin noyabr ayında Türkiyədə oldu,
Süleyman Dəmirəllə görüşdü və 700
kilometr uzaqda yerləşən Bursa şəhərinə
gedib, böyük türk sənətçisi Zəki
Mürenin məzarını ziyarət etdi.
Yeri gəlmişkən,
keçən əsrin 50-ci və 60-cı illərində SSRİ
qapalı bir dövlət olduğu üçün xarici
ölkələrə qastrola getmək müşkül məsələ
idi. Lakin Rəşid Behbudovdan sonra Sara xanım Qədimova
xarici ölkələrə qastrola ən çox gedən
ikinci müğənni idi. O, 22 xarici ölkədə konsert
vermişdir. Rəşid Behbudov kimi çılğın və
tələbkar bir sənətkar Sara xanımla birlikdə
qastrolda olmaqdan zövq alırdı. O deyirdi ki, Sara xanım
böyük-kiçik yeri bilən, özünü gözə
soxmayan, mənəm-mənəmliyi, şəxsi iddiası
olmayan böyük bir müğənnidir.
Sara
xanımın 1960-cı ildə Misirdə 10 günlük qastrolları
başladı. O, burada bəstəkar Fərid Əl-Ətraşla
tanış oldu. Fərid özünün yazdığı
"Xəyalımın nuru" mahnısını Sara
xanıma öyrətdi. Böyük müğənni dəfələrlə
bu mahnını oxumalı oldu.
Sara
xanım məşhur ərəb mügənnisi
Um-Gülsümü həmişə xatırlayırdı. Bu
böyük mügənninin gözləri kor oldu. Belə bir
ağır vəziyyətdə onun qolundan yapışıb,
Sara xanımın Qahirədə verdiyi konsertə gətirdilər.
Sara xanım "Xəyalımın nuru"
mahnısını oxuyarkən Um- Gülsüm
özünü saxlaya bilməyib, acı göz yaşları
axıtmışdır.
Sara
xanım İranın, Efiopiyanın və İndoneziyanın
dövlət mükafatları ilə təltif olunmuşdur.
Efiopiyanın şahı II Hayl Selasye Sara xanımın şərəfinə
ziyafət vermişdir.
1963-cü
ildə Sara xanımın İndoneziya qastrolları 3 ay davam
etdi.İlk qadın kosmonavt Valentina Tereşkovada burada idi. Sovet
mütəxəssislərinin tikdikləri 100 min nəfərlik
stadionda Sara xanım Prezident Sukarnonun ən çox sevdiyi
"Sili" mahnısını ifa etdi. 100 min nəfərlik
tamaşaçı ayaga qalxıb bu mahnını Sara
xanımla birlikdə oxumağa başladı. Prezident Sukarno
evində Sara xanıma və Valentina Tereşkovaya qonaqlıq
verdi və Sara xanımı qiymətli hədiyyələrlə
mükafatlandırdı.Sara xanım həmin hədiyyələrdən
birini - yaşıl rəngli çox qiymətli səhnə
geyimini sənət rəfiqəsi Şövkət xanıma
bağışladı.
O vaxt
SSRİ mədəniyyət naziri Furtseva Azərbaycan SSR Mədəniyyət
Nazirliyinə yazırdı "Sara Qədimova İndoneziyada
böyük müvəffəqiyyət qazandı. Kosmonavt
Valentina Tereşkovanın iştirak etdiyi və SSRİ
inşaatçılarının iştirakı ilə tikilib
istifadə verilmiş 100 minlik stadionda Sara xanım Prezident
Sukarnonun sevdiyi İndoneziya mahnısını böyük məharətlə
oxumuşdur. 100 minlik publika həmin mahnını Sara
xanımla birlikdə ifa etmişdir.
Rəşid
Behbudovdan sonra Sara xanım ən çox xarici ölkə
xalqlarının mahnılarını ifa edən sənətkar
idi.
Onun
çox yaxşı hafizəsi, yaddaşı var idi. Xarici
ölkə xalqlarının mahnılarını çox
ustalıqla ifa edirdi. Sara xanım həm də Füzulinin,
Seyid Əzimin, Vahidin, Müşfiqin, cavidin 500-dən çox
qəzəlini bilirdi...
Çingiz FƏRƏCOV,
Sara Qədimovanın
tədqiqatçısı
Xalq qəzeti.- 2012.- 23 may.- S. 5.