Vətən
uğrunda döyüşüb şəhid olanlar
ölmürlər, ürəklərdə yaşayırlar
Bir
daha Əkbər xan Naxçıvanski
(Kəngərli)
haqqında
Azərbaycan
şairi və ictimai xadimi Xurşidbanu Natəvanın anadan
olmasının 180 illik yubileyinin dövlət səviyyəsində
keçirilməsi haqqında Prezident İlham Əliyev 2012-ci
il aprelin 3-də sərəncam imzalamışdır. Bu tarixi
sərəncam unudulmaz şairimizin həyat və
yaradıcılığının daha dərindən öyrənilməsi
üçün münbit şərait yaradır. Qeyd edək
ki, şairənin qızı Fatmabikə (Xanbikə) general
İsmayıl xan Naxçıvanskinin oğlu polkovnik Əmənulla
xanın (Aman xan) həyat yoldaşı olmuşdur. Onların
bu nikahdan Bəhram xan, Kamran xan, Xaqan xan, Əkbər xan, Ənvər
xanım və Sənubər xanım adlı övladları
olmuşdur. Əvvəlki yazılarımızda Bəhram,
Kamran və Xaqan xan haqqında məlumat vermişik. Məqamındaca
qeyd edək ki, Ənvər xanım Bəhmən Mirzənin
oğlu Fətəli xan Qacarın, Sənubər xanım isə
Azərbaycan Xalq Cümhuriyyətinin qurucularından biri olan
İsmayıl xan Ziyadxanovun həyat yoldaşı olmuşdur.
Aman xanın oğlanlarından Bəhram xanı və Əkbər
xanı Xurşidbanu Natəvan Şuşada öz yanında
böyütmüşdür.
Əkbər
xan 1909-cu il oktyabrın 1-də nənəsi Xurşidbanu Natəvan
haqqında xatirələrini yazmışdır. Həmin xatirələrin
bir hissəsi AMEA-nın M.Füzuli adına Əlyazmalar
İnstitutunda saxlanılır (arxiv 6 (686), saxlama vahidi 457).
Qeyd edək ki, xatirələr haqqında ilk məlumatı Bəylər
Məmmədov 1983-cü ildə yazdığı
"Xurşidbanu Natəvan" monoqrafiyasında vermişdir
(s. 47). Filologiya elmləri doktoru Əsgər Qədimov 2009-cu
ildə Azərbaycan Dövlət Pedaqoji Universitetinin "Xəbərlər"ində
bu xatirələrlə bağlı "Əkbər xan
Naxçıvanski Xurşidbanu Natəvan və onun ailə
üzvləri haqqında" adlı məqalə dərc
etdirmişdir.
Əlyazmalar
İnstitutunun direktor əvəzi P.Əlioğlu "525-ci qəzet"in
2012-ci il 5 may tarixli nömrəsində Əkbər xanın
xatirələrini olduğu kimi çap etdirmişdir. Əkbər
xanın əski əlifba ilə yazdığı bu xatirə
17 səhifədən ibarətdir. Burada şairə
Xurşidbanu Natəvan haqqında maraqlı məlumatlar
vardır. Amma xatirədə müəyyən dəqiqləşdirmələrə
ehtiyac olduğunu nəzərə alıb onu bəzi şərhlərlə
yenidən nəşr etdirməyi məqsədəuyğun
sayırıq. Əkbər xanın oğlu Həbib xanın
qızı siyasi elmlər doktoru Aqiyə xanım
Naxçıvanlı uzun illərdir ki, babası və ulu əcdadları
ilə bağlı arxiv materiallarını və fotoşəkilləri
böyük zəhmətlə toplayıb biz tədqiqatçılara
təqdim edir. Məqsədi isə tarixi həqiqətlərin
olduğu kimi üzə çıxarılmasıdır.
Xatırladaq ki, babası Əkbər xanın xatirələrini
də bizə o təqdim edib. Biz də Aqiyə xanıma minnətdarlığımızı
bildiririk. Xatirələrdə Əkbər xanın yazı tərzini
redaktə etmədik.
Son
vaxtlar oxucularımız tez-tez Əkbər xan haqqında
maraqlı suallarla bizə müraciət edirlər. Bu, təbiidir.
Çünki Əkbər xan ensiklopedik bilikli, vətənpərvər
və qorxmaz bir şəxsiyyət olmaqla bərabər, həm
də I Kalbalı xanın oğul varislərindəndir, daha
doğrusu, onun kötükcəsidir. Nə qədər kədərli
olsa da, Naxçıvan xanlarının yeganə oğul varislərindəndir
ki, ata-baba yurdunda torpağa tapşırılıb.
Oxucuların diqqətini bu böyük şəxsiyyətin tərcümeyi-halına
çəkən əsas məqam onun məzarının
Naxçıvan şəhər qəbiristanlığına
köçürülməsi ilə bağlıdır. Bu
haqda yazımızın sonunda danışacağıq.
Qeyd
etmək yerinə düşər, Əkbər xan haqqında
Azərbaycanda və MDB məkanında ilk yazını bu sətirlərin
müəllifi 2002-ci ildə "Şərq
qapısı" qəzetində çap etdirib. Həmin
yazı Əkbər xanın o vaxtlar sağ olan
övladlarının xatirələri əsasında
yazılmışdı. Bütün kəşməkəşli
və əzab-əziyyətli həyatına baxmayaraq, Əkbər
xanın qızlarının bir neçəsi
Naxçıvanda qalıb yaşamışdılar. Onlardan həmin
illərdə sağ qalanlardan Əxtər xanım atası
haqqında maraqlı məlumatlar vermişdi.
Arxivlərin
qapıları üzümüzə açıldıqca
tapılan yeni sənədlər də bir çox sirləri
aşkara çıxardı. Yeni arxiv sənədlərini
tapıb təhlil etdikdən sonra "Şərq
qapısı"nda ikinci bir geniş məqalə çap
olundu ki, əvvəlki səhvlərimizi düzəldək.
Sonralar
Əkbər xanla bağlı üçüncü bir
yazı "Xalq qəzeti"ndə dərc olundu. Əkbər
xanın uzaq sürgünlərdə yaşayan böyük
qızı Xanımcan xanımın (1903, Naxçıvan -
30.05.1984, Daşkənd) qızı Ənvərin oğul nəvəsi
Fərhad Nağdəliyev 2006-cı ildə Moskvada rus dilində
yazdığı 432 səhifəlik bir kitabda
("Naxçıvan xanları Rusiya imperiyasında") Əkbər
xanın həyatının sürgün illərindən də
söhbət açıb. Bu kitabla bağlı bir məsələni
də deməliyəm. Əkbər xanın 100 səhifəyə
yaxın arxiv işini və Naxçıvanla bağlı
fotoları Fərhada bu sətirlərin müəllifi hədiyyə
edib. Əvvəlki yazdıqlarımızı və Fərhad
Nağdəliyevin yazdıqlarını təkrarlamayacağıq.
Biz, əsasən, Əkbər xanın həbs olunmasından və
istintaq materiallarının bəziləri haqqında
danışacağıq.
Əkbər
xan uzun və maraqlı, həm də kədərli
ömür yaşayıb. Taleyində çox sevdiyi
Naxçıvan uğrunda 1905, 1918-1920-ci illərdə
döyüşmək də olub. Bəlkə də, bu, onun
Naxçıvanı necə sevdiyini sınamaq
üçün bir alın yazısıdır?! Çoxlu
suallara cavab tapmaq üçün xəyalən o illərə
qayıtmağa bizə arxiv sənədləri kömək edə
bilər. Dövlət Siyasi İdarəsinin 90398 nömrəli
işi Əkbər xan Aman xan oğlu Naxçıvanskiyə
aiddir. 1928-ci ilin avqustunda tərtib edilib. Əkbər xanın
həbsi və Arxangelskdəki Solovetskə sürgün
olunması haqqında Moskvaya məxfi və təcili məlumat
verilib. İmzalanıb və möhürlənib. 10 noyabr
1929-cu ildə. 1928-ci ildə həbs edilən Əkbər xan
haqqında sənədlərin çoxu "məxfidir"
qrifi altındadır. Buradakı sənədlərdən
aydın olur ki, Əkbər xan 60 yaşında, 1928-ci ilin iyun
ayında Naxçıvanda həbs olunub, 4 ay Naxçıvan
NKVD-sinin xüsusi təkadamlıq kamerasında
saxlanılıb. Sovet hökuməti Hacı Vəli ağa
Şahtaxtinskinin əzəmətli mülkünü NKVD-nin
inzibati binası etmişdi. Binanın zirzəmisini dəhşətli
kameralara çevirmişdilər. O bina 1972-ci ilədək
qalırdı. İndiki Zaviyyə məscidinin yanındakı
dayanacağın yerində yerləşirdi.
Sənədlərdən
məlum olur ki, Əkbər xan həbs olunan kimi NKVD-nin rəisi
Yaqubov özü istintaq aparıb. İstintaq protokollarında Əkbər
xanı 1905-ci ildə, həmçinin 1918-1920-ci illərdə
ermənilərə qarşı vuruşduğu
üçün "xüsusi" cani kimi qeyd ediblər. Onu
Naxçıvandan Bakıya aparıb səkkiz ay istintaqsız
saxlayırlar, sonra istintaqa başlayırlar. Onun bildiyi məsələlər
var idi və bu, bolşeviklərə hava, su kimi lazım idi.
Çünki Naxçıvanın bir çox cəsur
adamları qonşu xarici ölkələrdə
sığınacaq tapmışdılar. Sovet hökuməti o
adamlardan ehtiyat edirdi və istəyirdi ki, onların yerini
müəyyənləşdirib agent terrorçuların əli
ilə gizlicə aradan götürsün. Həmin ölkələrdə
yaşayan Naxçıvan Kəngərlilərinin
ünvanlarını Əkbər xandan öyrənmək istəyirdilər.
Hətta ona 500 çervon (1922-1947-ci illərdə
keçmiş SSRİ-nin pul vahidi) verib Arazdan o taya göndərmişdilər
ki, xəbər gətirsin. Əkbər xan gedib əzizləri
ilə görüşüb dərdləşmişdi.
Qayıdanda isə Bakıya gedib Siyasi İdarəyə məlumat
vermişdi ki, o, heç kimin haqqında məlumat toplaya bilməyib.
Qeyd edək ki, istintaq materiallarının çoxu bu məsələyə
həsr olunub. Dönə-dönə bu məsələyə
qayıtdıqlarını dindirilmə protokolları da
sübut edir. Dindirilmə protokolu 3 səhifədə xırda
hərflərlə sıx yazılıb, mətni olduqca
genişdir. Protokolun əvvəlində yazılıb: "Mən
Naxçıvan Siyasi Bürosunun rəisi Yaqubov 60
yaşlı Əkbər xanı - hansı ki o,
Naxçıvan xanlarının varislərindəndir -
İrana getməsi ilə əlaqədar olaraq 1928-ci il fevralın
4-də dindirirəm".
Bu dindirilmə protokolunda olduqca maraqlı nüanslar
vardır. Onların hamısını olduğu kimi qəzetdə
dərc etmək imkan xaricindədir. Sonrakı
sənədlərdən aydın olur ki, Əkbər xanı
yalan məlumat verməkdə günahlandırıb Bakıda
istintaqa cəlb ediblər.
20 fevral 1929-cu ilə aid dindirilmə protokolunda Əkbər
xandan, əsasən, Cəfərqulu xan və onun
oğlanları Kalbalıxan və Davud xan haqqında dönə-dönə
soruşublar.
Əkbər xan dediklərini təsdiqləyib və
imzalayıb. Burada bir məsələ də
həqiqəti üzə çıxarır. Əkbər xan deyir ki, Kalbalı xanın atası Cəfərqulu
xan Makuda qızının yanında yaşayır. O,
sovet hökuməti qurulandan sonra dövlətin icazəsi ilə
xaricə mühacirət edib. Deməli, bəzi
tədqiqatçıların yazdığı kimi, Cəfərqulu
xanı Qarabağda güllələməyiblər. Sonrakı səhifələrdə Əkbər xandan
tələb edirlər ki, öz avtobioqrafiyasını ətraflı
yazsın. Əkbər xanın
yazdıqlarından məlum olur ki, o, çox məsələlərin
üstündən keçib. Ancaq burada bildirir ki, onu
1927-ci il fevral ayının 9-da həbs
ediblər və 1 il 11 gün həbsdə saxlayıblar. Səbəb də gətiriblər ki, sən işlədiyin
xəstəxanada "yeyinti"yə yol vermisən və
sair.
21 fevral
1929-cu ilə aid protokolda ona verilən suallardan biri belədir:
"Ermənilərə qarşı müsəlmanların
üsyanında sizin rolunuz nədən ibarət olub, kim dururdu bu işlərin başında və
xaricdə kimlərlə əlaqə saxlayırdılar?"
NKVD "ermənilərə qarşı üsyan"
dedikdə naxçıvanlıların erməni
general-qubernatorluğuna tabe olmamalarını nəzərdə
tuturdu. Əkbər xan qeyd edir ki, general Şelkovnikovun dəstəsi
naxçıvanlılarla çox kobud davranırdı. Bu haqda generala dəfələrlə deyilsə də,
məhəl qoymurdu.
Əkbər
xan ona verilən suallardan can qurtarmağa
çalışır, üstüörtülü cavablar
verir. Qohumlarının və
tanışlarının heç birinin antisovet fəaliyyətinin
olmadığını bildirsə də, ona
inanmırdılar. Çünki onun dediklərinin
əleyhinə gedən adamlar vardı. İstintaq
başa çatır, Əkbər xanın Sibirə
sürgün olunması qərarını ləğv edib onu
3 il müddətinə Solovetsk konslagerinə
göndərirlər. Solovetskdə məhbuslar
üzərində qorxunc eksperimentlər aparan laboratoriyalar yerləşirdi.
1930-cu il yanvarın 13-də kollegiya onu, cəzasını
9 fevral 1929-cu ildən hesablayaraq 5 illik konslager həbs
düşərgəsinə göndərir və işi arxivə
verir.
1930-cu il yanvarın 30-da Tiflisdəki Zaqafqaziya Siyasi
İdarəsinə 533741 nömrəli təcili məlumat
göndərilir: "Əkbər xan Naxçıvanski Aman
oğlunun 90398 nömrəli işi Birləşmiş Siyasi
İdarənin Kotlas şəhərindəki Şimal idarəsinə
göndərilsin".
Əkbər xanın və həyat yoldaşı Aqiyə
xanımın Mir Cəfər Bağırova yazdığı
ərizələr də bu işdə saxlanılır. Onların hər
ikisi ərizələrində qeyd edirlər ki, 12 nəfər
uşaq köməksiz qalıb, yeməyə çörəkləri
yoxdur. Amma bunların heç bir xeyri olmur.
Siyasi İdarə Əkbər xanı hər vəchlə
Naxçıvandan uzaqlaşdırmaq istəyirdi. Əlacsız qalan Əkbər xan Aqiyə xanımın
halına acıyırdı. Axı tamamilə
köməksiz qalan Aqiyə xanım bu böyük ailəni
necə dolandıracaqdı? Əkbər xanın xəbəri
yoxdu ki, pillə-pillə yuxarılara verilən məxfi məlumatlarda
onu ən qatı antisovet ünsür adlandırırdılar
və yazırdılar: "... İnqilab
başlayanda o, Odessada kommersiya ilə məşğul olurdu.
Naxçıvanda erməni-müsəlman
qırğını başlayan kimi Naxçıvana
qayıtdı. Günahlandırılan
şəxsin (Əkbər xanın - müəllif) təşəbbüsü
ilə qırğın dayandırılır, ancaq bu zaman Zəngəzur
tərəfdən Andranik peyda olur və yenidən türklərlə
ermənilər arasında müharibə başlayır və
müqəssir də bu döyüşlərdə iştirak
edir. Kazım paşanın
başçılıq etdiyi türk qoşunları gəlib
erməniləri tar-mar edir və sakitlik bərpa olunur.
Türklər gedəndən sonra ingilislər gəlirlər
Naxçıvana və müqəssir deyir: bizi ermənilərə
tabe etmək istədilər, ancaq biz bununla barışa bilmədik,
döyüşlərə başladıq və onları məhv
etdik".
1930-cu il aprelin 8-də Əkbər xan Kotlasa yola
salınır. 1934-cü il fevralın 9-da Əkbər
xanın həbsdən azad olma vaxtı çatsa da, onu
Şimal diyarına yaşamağa göndərirlər və
şərt qoyurlar ki, Uralın 12 məntəqəsində
icazəsi olmadan yaşaya bilməz, həmçinin vətəninə
qayıtmağa icazəsi yoxdur.
On il, yəni 1944-cü ilədək Əkbər
xan uzaq şimalda Paxomov soyadı ilə yaşayır. Əkbər xan sürgündəki tanışı
öləndən sonra onun sənədlərini
götürmüşdü və istifadə edirdi. 1944-cü ildən sonra Əkbər xan Orta Asiyaya
sürgün edilən qızı Xanımcanı tapır və
1953-cü ilə qədər onun yanında yaşayır.
1953-cü ildə Naxçıvana qayıtmaq
ümidilə Bakıya gəlir. Amma ona Naxçıvana
getməyə icazə vermirlər. Əkbər
xan Oğuzda, gözdənuzaq yerdə yaşayan kiçik
oğlu Həbib xanın yanına gedir və bir müddət
orada qalır. Həbib xan deyirdi ki, atam
Naxçıvansız qala bilmirdi və hər cür maneələri
aşaraq çox sevdiyi Naxçıvana getdi.
Əkbər xan Naxçıvana qayıdanda
gördüklərinə inana bilmədi. Onlara məxsus
nə varsa, dağıtmışdılar. Şəhərdəki mülkündə peşə-texniki
məktəbini yerləşdirmişdilər. Əmisi qızı və həyat yoldaşı Aqiyə
xanım 1938-ci ildə vəfat etmişdi. Sahibsiz
qalan balaları olmazın əzablar yaşamışdılar.
Oğlu Seymur təqiblərdən qaçıb
Aşqabada getmişdi. Digər oğlu
İzzət 1941-1945-ci illər müharibəsinin
iştirakçısı olmuş, 1941-ci ildə Kiyev ətrafında
gedən döyüşlərdə itkin
düşmüşdü.
Əkbər xan ömrünün son illərini
Qaraçuq kəndində, qızı Reyhanat xanımın
yanında yaşamışdır. Kürəkəni Bəhlul
müəllim Naxçıvanın tanınmış
pedaqoqlarından idi. Əkbər xan
qızı Reyhanatın evində 1961-ci ildə 93
yaşında vəfat etmişdir. 1970-ci
ildə Araz dəryaçası tikiləndə
doğmaları onun məzarını Bulqan kəndindəki qəbiristanlığa
köçürmüşlər. Əkbər
xanın nəvəsi Hüseyn Mövsümovun xahişi ilə
Əkbər xanın nəşi 2011-ci ildə
Naxçıvan qəbiristanlığına
köçürülməklə doğmalarının
yanında rahatlıq tapmışdır.
Qəribə bir tale, ancaq çox mənalı
ömür yaşamış Əkbər xan haqqında bildiklərimiz,
yazmadıqlarımız çoxdur. Naxçıvanın
keçmiş partiya işçilərindən olan Yunis
Qasımovun dediyinə görə, o, Vilayət Partiya Komitəsində
işləyərkən Əkbər xanı dəvət
edirmişlər ki, Naxçıvan şəhərinin
planı ilə onları ətraflı məlumatlandırsın.
Əkbər xan 1910-1913-cü illərdə
Naxçıvan şəhərinin başçısı
olmuşdu.
Beləcə, azacıq da olsa, Əkbər xanın həyatının
bəzi məqamlarından söhbət aça bildik. O, Naxçıvanın ən
çətin günlərində -1918-1920-ci illərdə
Makuda yaşayan qohumlarının köməyi ilə
naxçıvanlılara silah-sursat
daşıyırmış. Hətta bu yolda ana
nənəsi Xurşidbanu Natəvandan və ata babası
general İsmayıl xandan ona qalan qızılları belə xərcləyirmiş.
Sovet hökumətindən gizlətsə də,
mahir döyüşçüymüş. Babaları
general İsmayıl xan və knyaz, general Xasay xan Usmiyev kimi! Siyasi İdarənin qəddar işgəncələrindən
qorxmayaraq dediyi sözlər onu yüzilliklərdə
yaşadacaqdır. Əkbər xanın mənsub
olduğu nəslin Kəngərli süvariləri
Naxçıvanı ürəkdən sevirdilər və onun
uğrunda döyüşürdülər. Həmin igid döyüşçülərin
estafeti bu gün qüdrətli ordumuzun, cəsur əsgərlərimizin
əlindədir. Ordumuz bütün xain əlləri kəsməyə
qadirdir! Vətən uğrunda
döyüşüb şəhid olanlar ölmürlər,
ürəklərdə yaşayırlar. Onlardan
biri də Əkbər xan Naxçıvanskidir.
Əkbər
xan Naxçıvanskinin Xurşidbanu Natəvan haqqında xatirələri
Mənim uşaqlığım ana nənəm Natəvanın
yanında keçmişdir. Onun görkəmini,
sadəliyini, mülayim xasiyyətini bu gün də lap
yaxşı xatırlayıram.
Natəvan çox ucaboylu deyildi, gözləri ala idi,
çox gözəl siması var idi. O, çox sadə idi. Eşitdiyimə görə, Natəvanın birinci əri
Xasay xan Usmiyef (Usmiyev-müəllif) ilə evlənmək əhvalatı
belə olmuşdu. Deyirlər ki, o zaman
Xasay xanın Dağıstanda böyük nüfuzu var idi.
Odur ki, Şamil tutulduqdan sonra üsyanı bu
davam etdirmişdi. Buna görə də rus
çarı Xasay xanı Dağıstandan uzaqlaşdırmaq
məqsədilə onu Şuşaya göndərmişdi.
Burada isə padşahın əli ilə Xasay
xan Natəvan ilə evlənmiş və yerli olmuşdu.
Bu zaman Xasay xan, hətta Natəvanın
özü də jandarm nəzarəti altında idi. Belə deyirlər ki, bu vaxt Xasay xan Dağıstanla əlaqəsini
kəsməmişdi. Onun Dağıstandan
gələn iki ləzgi ilə görüşməsi
haqqında xəbər vermişdilər. Padşah
onu Voronejə çağırtdırır. Voronejə gələn Xasay xana mehmanxanada iki
otaqlı bir yer verirlər. Lakin
padşahın burada olmadığını bilib, bunun hiylə
olduğunu duyunca mehmanxanada otağına girib özünü
öldürür. Bu xəbər
yayılır. Padşah bu qanı
yatırmaq məqsədilə dayımla anama 12 kənd
bağışlayır. Bu haqda yazılan
kağızı sonralar Gəncədə gördüm.
Natəvana
bu iş çox təsir etdi. (Xurşidbanu Natəvan əri
Xasay xan Usmiyevin vəfatından sarsılmış və bu
münasibətlə:
Yenə
ya rəbb, nə qəmgindir mənim bu şad olan
könlüm,
Rümuzi-eşqdən agah olub, ustad olan könlüm.
- qəzəlini yazmışdır. "Mənim bərbad olan könlüm" deməklə
o, ikinci əri olan Seyiddən narazı idi. Natəvanı bəylər incitdikləri
üçün naçar qalıb Seyidə ərə
getmişdi. Mənim atam Aman xan
Naxçıvani Şuşaya gəlib Natəvanın
qızı Xanbikəni alır. Bu əhvalat
üstündə bu vaxt Qarabağ bəyləri arasında
ziddiyyət düşür. Ancaq dayım Aman xanla dost
olduğu üçün bu iş bir qədər yatırılır.
Mən böyük qardaşım Bəhram xanla bir qədər
Şuşada qaldıqdan sonra Natəvan bizi İrəvana
oxumağa göndərdi. Biz orada Lunyatin miravoy
sudyanın evində qalırdıq. Nənəm
bir kənddən gələn mədaxili qardaşım ilə
mənə, həm də Lunyatinə verirdi. 15-16 yaşında biz məktəbi qurtardıq.
Biz gəldikdən sonra Natəvan Tiflisə
köçdü. Getməyində məqsəd
o idi ki, Natəvanın ikinci əri Seyiddən olan
uşaqları bizə verilən 15 kəndə şərik
deyildilər. Nənəm Tiflisdə bir ilə
qədər yaşadı. O, namestnikin yanına gedərdi.
Ancaq padşah onun ikinci ərindən olan
uşaqlarını bu kəndlərə şərik etmədi.
Kəndlər Xanbikə ilə Mehdiquluya verildi.
Natəvan Tiflisdə Salayekidə (Solalakidə-
müəllif) (Qocayev küçəsinə dönən yerdə)
doktor Malinin evinin yanında, qonşuluqda qalırdı. Sonra Natəvan Şuşaya qayıtdı. Atam bizim ailəni götürüb Naxçıvana
apardı. Atam Aman xanın
Naxçıvanda məxsusi mülkü var idi. Şəhərin meyvə bağları, habelə
Qıvraq kəndi, Xok kəndinin yarı hissəsi atamın
idi. O, həmin zamanda polkovnik idi və rus-türk (1877)
müharibəsində iştirak etmişdi. Bəyazid
qalasında gedən vuruşmalarda yaralanmış və orada
da sağalmışdır. Atam təxminən
80-ci illərin əvvəllərində Naxçıvanda vəfat
etmiş və orada İmamzadədə dəfn edilmişdir
(Naxçıvan xanlarının məqbərəsi
İmamzadəyə bitişikdir. Ona
görə də Aman xan İmamzadədə yox, məqbərədə
babalarının yanında dəfn edilib. XX
əsrin 60-cı illərində məqbərədə olan məzarlar
dağıdılmışdır. Amma məqbərə
- salon indiyədək qalmaqdadır - müəllif).
Nənəmin
Şuşa həyatı olduqca sadə
keçirdi. Onun həkimi Atabəyov idi (Xurşidbanu
Natəvanın bir neçə həkimi olmuşdur. Onlardan Mir Möhsün Nəvvab və Mirzə
Sadığı da göstərmək olar - müəllif).
Xan qızı ona bir at
bağışlamışdı. O, həmin atı minib
gəzərdi. Bir gün gəlib dedi ki, xan qızı,
qanınız azalıb. Siz gərək
çaxır içəsiniz. Xan qızı Gülməhəmmədə
500 manat qızıl pul verdi, at verdi, Nəcəfül-əşrəfə
göndərdi və dedi ki, müctəhiddən məsləhət
edəsən ki, şərab içmək olar, ya yox. Onun kiçik bir padnosu, içində də iki stəkanı
var idi. Xan qızı bir elə şair
idi, amma mövhumatı gözlərdi. Çaxırı
içəndən sonra aftafa-ləyəndə
ağzını suya çəkərdi. Nənəmin
Süleyman adlı nökəri var idi, çaxırı o
hazırlayar, evində qalan Züleyxa adlı qız isə
çaxırı ona verərdi. Nənəm
öz xidmətçisi Züleyxanı uşaqlarından
ayırmazdı. Sonralar o Züleyxanı Turşsu yolunda,
Qala qapısı yanında bir süd satan
oğlana ərə verdi. Öz qızı kimi
ona cehiz verib, gözəl toy etməyi mənim bugünkü
kimi xatirimdədir.
Nənəmin qapısı hamının üzünə
açıq olurdu. Amma Seyidi evinə qoymazdı. "Məclisi-üns" həftədə, ya ayda
olardı. Burada iştirak edənlərdən yadımda
qalanları İskəndər bəy Rüstəmbəyov
(qonşumuz idi), Növrəs, Fatı xan (Fatma xanım
kök, üzündə xal olan bir qadın idi), Əbdüssəməd
bəy (çox yaxşı adam idi) (Əbdüssəməd
bəy şair Məhəmməd bəy Aşiqlə I Ehsan
xanın qızı Sonabəyim xanımın oğludur. O, ana
tərəfdən Əkbər xanla qohumdur - müəllif). Qarabağda şair çox idi. Vəfa
çox qəribə şair idi, farsca bir poeması da var idi.
"Məclisi-üns"də Natəvan
şeir deyərdi, məclis arəstə olardı. Natəvan
həmişə nöqsanları göstərər və deyərdi
ki, çalışın fars dili
qatmayın, axı biz fars deyilik. Özü də
həmişə məclisdə başı açıq,
üzü açıq oturardı. O, "Tükəzbanlar"dan
deyildi. Danışanda da ucadan
danışardı. Elə bil natiq idi.
Eşitmişəm ki, bir dəfə Aşıq Pəri
Şuşaya onun yanına gəlibmiş. Hər bir
şair haradan gəlsəydi, əvvəl nənəmin
yanına gələrdi. "Məclisi-üns"ün
fəal üzvlərindən Əbdüssəməd bəy
Cavanşirof (Cavanşirov - müəllif) Natəvanla qohum idi.
Onun şeirlərindən yadımda qalan bunlardır:
Ey
könlümün müfariqətin qan edən gülüm,
Hicran bir mülkünü viran edən gülüm.
Asan edərdim
özgələrin müşkülün özüm,
Öz müşkülüm düşübdü, yox
asan edən, gülüm.
Yəqub
tək verib mənə beytül-həzən məqam,
Yusif tək öz məkanını zindan edən
gülüm.
Şair Mirzə Rəhim Fəna nənəmin katibi idi. Həmişə
onun yanında olardı. Yadımdadır,
Mirzə Rəhim bir qız istəyirdi. Qız
da getdi bir ayrı ərə. Fəna bu münasibətlə
bu şeiri yazdı:
Ey dostlar,
Fənanı qoyun barı ağlasın,
Çünki əğyara yar olub yarı, ağlasın.
Natəvanın anasında şairlik təbi var idi. Mənim hafizəmdə
ondan bu fərd qalmışdır:
Yarəb,
üşşaqı nə üçün yaratdın,
Eşq oduna yandırıb-yaxdın... Yarım
gecə gəldi, gecə getdi, Heç bilmədim cavan
ömrüm necə gəldi, necə getdi.
Dayım Vəfa bir qəribə şair idi. Yadımdadır
ki, Bəhmən Mirzənin oğlu Şahrzaya (Vəfanın
qızı Ağabikənin əri) padşah Anna nişanı
(söhbət II dərəcəli Müqəddəs Anna
ordenindən gedir- müəllif) göndərmişdi. Bu münasibətlə o, Vəfanı da
Şuşadan qonaqlığa
çağırmışdı. Vəfa buradakı
qonaqlıqda söz istəyir və deyir:
Aya, fəxr
konəd sineye-to zan taze nişan Ya taze
nişan fəxr konəd sineye-to.
(Tərcüməsi:
Görəsən
sənin sinən təzə nişanla fəxr edir, Yoxsa təzə
nişan sənin sinənlə fəxr edir
- P.Ə.).
Vəfanın bu fərdindən sonra məclis
pozulmuşdur.
Ondan hamı çəkinirdi. Çünki knyaz məşhur duelçi idi.
Onun duel tapançaları ölüncəyə qədər
evində qalırdı...
Vəfa Tiflisdə namestnik Dondukofun (canişin Dondukov-
müəllif) yanında, sonra isə Şeremetyevin yanında
adyutant olmuşdu. Dayım gözəl oğlan idi. Ala gözləri, sarı bığları, uca boyu
var idi. Onun üzü əsl ləzgi
üzü idi (Knyaz Xasay xanın ləzgi yox, kumık
türkü olduğunu təsdiqləyən sənədlər
vardır-müəllif). Dondukov və
Şeremetyevin arvadları dayıma çox hörmət edərlərmiş.
Hətta deyilənə görə, knyaz gəlməsəymiş,
onların arvadları çörək yeməzlərmiş.
Buna görə də sonralar Şeremetyev
knyazı duelə çağırır. Qocur
yolunda Vəfa onu öldürür. Ümumiyyətlə,
Tiflisdə bütün gürcü knyazlarının
hamısı dayımdan qorxurdu.
Dayım Mehdiqulu xan Tiflisdə təxminən keçən
əsrin 90-cı illərində vəfat etmişdir. Dayımın
cənazəsini Tiflisdən götürmək
üçün nənəm, mən və başqa qohumlar
oraya getmişdik. Cənazəni Tiflisdən
Yevlağa kimi qatarla, Yevlaxdan Ağdamacan isə faytonla gətirdilər.
Dayımın cənazəsi Ağdamda İmarət
qəbiristanlığında dəfn edildi. Dayımın qızı Ağabikə də gözəl,
lətif, amma mərd bir qız idi. Ağabikənin
əri şahzadə Əkbər Mirzə Ağabikə tərəfindən
vurulmuşdu. Şahzadə çox qorxaq adam
olmuşdu. Ağabikə qapı ağzında o
yekəlikdə canavarı gülləynən vurmuşdu.
Bu vaxt tez Tiflisə knyaza teleqram vururlar. Knyaz gəlir. Məsələnin
üstünü örtmək üçün deyirlər ki,
Ağabikənin guya dəliliyi varmış. Düzdür şahzadə Əkbər Mirzə də
sonra sağaldı. Amma o, sonralar Ağabikədən
yaman qorxardı.
Dayım Vəfa çox şahmat həvəskarı
idi. Eşitdiyimə görə, fil sümüyündən
olan şahmat dayıma Natəvandan qalmışdı. Dayımın İvan adında olan denşiki tez-tez
şahmat fiqurlarını silib-təmizlərdi. Vəfanın özü isə bir-bir fiqurlara
tamaşa edərdi.
Yaxşı yadımdadır, bir dəfə biz Natəvan
ilə faytonda Ağcabədiyə gəldik. Oradan
Yığımbərə gedəcəkdik. Xan qızı Gaur (Govur - müəllif)
arxını çıxartdırıb təmir elətdirdi.
Sonralar hökumət orada tikinti işləri
aparırdı (Gaur arxı ərəblər vaxtından qalma
idi. Ərəblər bizə "gaur"
dedikləri üçün "Gaur arx" arxın adı
kimi qalmışdı).
Natəvan Şuşadan başqa, qışda Ağdama gələr,
Kəblə Əli Əkbərin nəzarət etdiyi imarətə
düşərdi. Kəblə Əli Əkbər əkinçi
idi. Kəblə Əli Əkbər və
ailəsi Natəvana çox hörmət edərdilər.
Kəblə Əli Əkbərin oğlu Mustafa
bəy xan qızının işlərini - Natəvanın təsərrüfat
işlərini idarə edərdi. O, Bərdədə Dəli
Bəhram ilə (Bəhram Bərdədə varlı mülkədarlardan
idi) Natəvanın üstündə vuruşur. Onlar pristavın evində qonaqmışlar. Pristav ilə işi olan Mustafa bəy eşikdə
çubuq çəkirmiş. Eşidir ki, Bəhram bəy
(Bəhram bəy bir az dəli idi) xan
qızı haqqında içki məclisində
danışır. Bu söhbət ona çox
acıq gəlir. Bəhram bəyi çağırtdırıb
deyir ki, qoca arvaddır, sözün var, get özü ilə
danış. Bunun üstündə Mustafa bəy
ilə Bəhram - hər ikisi bir-birini vurub öldürür.
Natəvan həmişə qəlyan çəkərdi. Onun
gümüş başlı yaxşı Şiraz qəlyanı
var idi. Qəlyançısı
Şükür adlı cavan oğlan idi. Şükürün
yaxşı səsi var idi. Natəvan ona
muğamatı öyrədərdi. Natəvan
özü yaxşı musiqi həvəskarı idi. Qəlyan çəkə-çəkə
Şükürdən soruşardı ki, filan qəzəli
oxu. Şükür oxuyardı, Natəvan
isə onun qələtini düzəldərdi. Natəvan Şükürü yaxşı bir xanəndə
etmişdi.
Nənəm, həmçinin çox qəribə bir rəssam
idi. Karandaş ilə gözəl şəkil çəkər,
sonra rənglərdi. Şəklin
dalında isə məzmununa uyğun şeir də yazardı.
Məsələn, o, qərənfil şəklinin ardında
bu şeiri yazmışdı:
Səni
kimlər sevər bica, qərənfil,
Səni bir Natəvan çəkmiş gedir.
Natəvan mənə gözəl bir kitab -
özünün əlyazmasını
bağışlamışdı. Üstü bəzəkli,
güllü, tikməli idi. Ancaq kitab
kiçik qardaşım Xaqan xanın əlinə keçdi.
Sonradan kitab kimdə qaldı, məlum olmadı
(Xaqan xan sovet hökuməti qurulandan sonra İranın Maku
şəhərinə getməyə məcbur olmuş, orada
ulu babaları I Kalbalı xanın qız nəvəsi sərdar
Mürtəzaqulu xanın sarayında bir müddət
yaşamalı olmuşdur. Həmin kitab sərdarın
həyat yoldaşı Analı xanıma
bağışlanıb. Analı xanım
irəvanlı Pənah xan Makinskinin qızıdır. Qeyd edək ki, yazıçı Hüseyn Şərif
1944-cü ildə Makuda olarkən Analı xanım Natəvanın
həmin əlyazmalarından bir neçəsini
yazıçıya bağışlayıb. Hüseyn Şərif də bunları "Azərbaycan
gəncləri" qəzetində çap etdirib. Bütün bu məlumatları bizə Makuda olarkən
Analı xanımın qohumları danışdı. Hazırda Natəvanın Analı xanımda
saxlanılan digər əlyazmaları da axtarılır -
müəllif).
Natəvanın axır vaxtlarında qonşusu İskəndər
bəy onun yanına gələr, ona qulluq edərdi. Kiçik
oğlu Mir Cabbar Natəvana baxmazmış. İskəndər
bəy bundan təsirlənib deyərdi:
Yaman günə qalıb indi bu binəva, necə gör,
Cəfayi-cövri-sitəm dərdə mübtəla, necə
gör.
Xatirimdədir
ki, Natəvan "Ölürəm" qəzəlini
yazdıqdan sonra İskəndər bəy ona demişdi:
Xudadan istərəm,
ey can, hələ sən ölməyəsən,
Be həqqi-şahi-Xorasan,
hələ sən ölməyəsən,
* * *
Sənə
ölüm yaraşmaz, qoy filan ölsün...
("Filan" sözü Natəvanın əri Seyidə
aiddir).
Birinin Seyid ilə arası yox idi. Əri Seyid
qaradinməz, bisavad və mövhumatçı idi. Mən Natəvanı dəstəmaz alıb namaz
qılan görmədim.
Natəvanın
Şuşa bulağını
çıxartdırmasını da mən yaxşı
xatırlayıram. Bulaq gələndən sonra
Natəvan hamam tikdirdi. Bulaq məsələsi
çox böyük hadisə olmuşdu. Bulaq da bulaq... O
gün camaat hamısı tökülüb gəlmişdi. Molla Şükür də oraya gəlib
çıxdı. Dedi ki, bu qəribə ehsandır. Behiştlikdir (Şuşada bu vaxt iki molla var idi.
Bunlardan biri sünni, digəri şiə idi.
Natəvan bunların heç birinin işinə
qarışmaz, hər ikisinə hörmət edərdi).
Natəvan rəiyyət üçün
gördüyü bu tədbirlərdən başqa ilan
vuranları, qudurmuş it tutanları da müalicə edərdi. Bu işdə
Natəvanın bir köməkçisi də var idi. Onun adı Əmiraslan idi. Bu
müalicə üsullarını ona Natəvan özü
öyrətmişdi. Qudurmuş it
tutanların müalicəsi üçün xımı
gülü otu üzərində gəzən üstü
qırmızı və qara xallı xırda cücüləri
(parəbizən) taxta kağız üzərinə sancıb
qurudar, Əmiraslan onları həvəngdəstədə
döyüb toz halında hazırlayar, müalicə
üçün qədərini isə Natəvan özü
müəyyənləşdirərdi. Gündə
iki dəfə xəstələrə dərmanı Natəvan
özü verərdi. O, xəstələri
yedirib-içirdib on gün saxladıqdan sonra buraxardı. Qudurmuş it tutan xəstələri Natəvan sonra
üzbəüz oturdub, onların qəfildən üzlərinə
vurarmış. O deyərdi ki, əgər onlar diksinsələr,
demək sağalıblar. Bir gün mən nənəmdən
soruşdum ki:
-Ay nənə,
yenə sən onları vurursan?
O, məni
başa saldı ki, əgər onlar diksinməsə, müalicələrini
davam etdirmək lazımdır.
Natəvan ilan vuranların müalicəsi ilə də məşğul
olurdu. Pazəhr daşının sürtülməsi ilə
alınan su ilə ilan vuran adamı müalicə edərdi.
Natəvanın xüsusi buzxanası var idi.
Burada onun həmişə ehtiyatda buzu olardı.
Xəstəsi olan hər bir kəsə buz
lazım olarkən, Natəvan onlara buz verərdi. Bir adam da olsun onun yanından naümid
qayıtmazdı. Cümə günləri isə
elə bil onun qəbul günləri idi. O, ehtiyacı
olanlara hər cür kömək edərdi. Buna
görə də rəiyyət həmişə onun hörmətini
əziz tutardı.
Natəvanın yanına Şəkər mama
(Qarabağda bibiyə mama deyirlər- müəllif) adlı
göy tumanlı bir qadın gələrdi. O, olduqca xoş söhbət
edərdi. Natəvan onun söhbətlərinə
qulaq asardı. Şəkər mama da Natəvanın
hesabına yaşayardı.
Natəvan
öz oğlunun tərbiyəsi ilə də məxsusi məşğul
olmuş, ona fars dilini öyrətmişdi.
Rus dilini də mükəmməl bilən Vəfa
Tiflisdə olarkən həmişə farsca şeirlər
yazıb Şuşaya göndərərdi. O, çox
alim adam idi. Vəfa bir tərəfdən islam dinini müdafiə edər, növhələr
yazardı. Məsələn, o, ağ
köynək zikri yazıb baş çapanlara vermişdi ki,
bu zikr belədir:
Yaran, gəlin
bu gün əhdə vəfa edək,
Şahi-dini üçün canlar nisar edək.
Dini-Məhəmmədi
xar-zəlil olub,
Dini-Məhəmmədə canlar nisar edək.
İkinci tərəfdən isə Vəfa gözəlliyi,
həyatı, həyatdan zövq almağı tərənnüm
edən şeirlər yazardı.
Vəfa ildə bir dəfə Tiflisdən Şuşaya gələrdi. Hər gün
Tiflisdən ona məktub gələrdi. Bir
gün kağız gəlmədi. Bahar fəsli
idi. Məktubun gəlməməyi münasibətilə
Vəfa bu şeiri yazdı:
Gül gəldi-gəlmədi xəbər ol
gülüzardan, Yox hasilim bu fəsildə baği-bahardan. Düşvardır kim, kağız ilə şərhi-hal edəm,
Çoxdur şikayətim ona bu ruzigardan.
Musa QULİYEV,
AMEA Naxçıvan Bölməsi
Tarix,
Etnoqrafiya və Arxeologiya
İnstitutunun elmi işçisi
Xalq qəzeti.- 2012.- 19 may.- S. 6.